ਦਿੱਲੀ ਕੈਪੀਟਲਜ਼ ਦੇ ਗੇਂਦਬਾਜ਼ੀ ਕੋਚ ਬਣੇ ਮੁਨਾਫ ਪਟੇਲ, ਭਾਰਤ ਦੀ ਵਿਸ਼ਵ ਕੱਪ ਜਿੱਤ ਦੇ ਸਨ ਹੀਰੋ

ਸਪੋਰਟਸ ਡੈਸਕ— ਵਿਸ਼ਵ ਕੱਪ ਜੇਤੂ ਤੇਜ਼ ਗੇਂਦਬਾਜ਼ ਮੁਨਾਫ ਪਟੇਲ ਦਿੱਲੀ ਕੈਪੀਟਲਸ ਦੇ ਗੇਂਦਬਾਜ਼ੀ ਕੋਚ ਦੇ ਰੂਪ 'ਚ ਨਵੇਂ ਸਪੋਰਟ ਸਟਾਫ 'ਚ ਸ਼ਾਮਲ ਹੋ ਗਏ ਹਨ। ਮੁਨਾਫ ਕ੍ਰਿਕਟ ਦੇ ਨਿਰਦੇਸ਼ਕ ਵੇਣੂਗੋਪਾਲ ਰਾਓ ਅਤੇ ਮੁੱਖ ਕੋਚ ਹੇਮਾਂਗ ਬਦਾਨੀ ਦੀ ਅਗਵਾਈ ਵਾਲੇ ਬੈਕਰੂਮ ਸਟਾਫ ਵਿੱਚ ਸ਼ਾਮਲ ਹੋਣਗੇ। ਸਾਲ ਦੇ ਸ਼ੁਰੂ ਵਿੱਚ, ਫ੍ਰੈਂਚਾਇਜ਼ੀ ਆਪਣੇ ਲੰਬੇ ਸਮੇਂ ਤੋਂ ਸੇਵਾ ਨਿਭਾ ਰਹੇ ਮੁੱਖ ਕੋਚ ਰਿਕੀ ਪੋਂਟਿੰਗ ਤੋਂ ਵੱਖ ਹੋ ਗਈ ਸੀ। ਉਨ੍ਹਾਂ ਦੀ ਥਾਂ 'ਤੇ ਰਾਓ ਅਤੇ ਬਦਾਨੀ ਦੇ ਨਵੇਂ ਕੋਚਿੰਗ ਗਰੁੱਪ ਨੂੰ ਮਨਜ਼ੂਰੀ ਦਿੱਤੀ ਗਈ। ਹੁਣ ਮੁਨਾਫ ਨੂੰ ਗੇਂਦਬਾਜ਼ੀ ਕੋਚ ਦੇ ਤੌਰ 'ਤੇ ਇਸ 'ਚ ਸ਼ਾਮਲ ਕੀਤਾ ਜਾਵੇਗਾ।

ਮੁਨਾਫ ਉਸ ਭੂਮਿਕਾ ਨੂੰ ਸੰਭਾਲੇਗਾ ਜੋ ਪਹਿਲਾਂ ਜੇਮਸ ਹੋਪਸ ਕੋਲ ਸੀ। ਤਿੰਨੋਂ ਫਾਰਮੈਟਾਂ ਵਿੱਚ ਭਾਰਤ ਦੀ ਨੁਮਾਇੰਦਗੀ ਕਰਨ ਤੋਂ ਇਲਾਵਾ, ਮੁਨਾਫ਼ ਕੋਲ ਰਾਜਸਥਾਨ ਰਾਇਲਜ਼, ਮੁੰਬਈ ਇੰਡੀਅਨਜ਼ ਅਤੇ ਗੁਜਰਾਤ ਲਾਇਨਜ਼ ਨਾਲ 63 ਆਈਪੀਐਲ ਮੈਚ ਖੇਡਣ ਦਾ ਤਜਰਬਾ ਵੀ ਹੈ, ਜਿਸ ਵਿੱਚ ਉਸ ਨੇ 7.51 ਦੀ ਆਰਥਿਕਤਾ ਨਾਲ 74 ਵਿਕਟਾਂ ਲਈਆਂ ਹਨ। ਉਸਨੇ ਆਪਣਾ ਆਖਰੀ IPL ਮੈਚ 2017 ਵਿੱਚ ਖੇਡਿਆ ਸੀ।

ਤੁਹਾਨੂੰ ਦੱਸ ਦੇਈਏ ਕਿ IPL 2024 ਵਿੱਚ ਦਿੱਲੀ ਦੀ ਟੀਮ ਦਾ ਪ੍ਰਦਰਸ਼ਨ ਨਿਰਾਸ਼ਾਜਨਕ ਸਾਬਤ ਹੋਇਆ ਸੀ। ਟੀਮ ਨੇ 14 ਮੈਚਾਂ ਵਿੱਚ ਸਿਰਫ਼ 7 ਜਿੱਤਾਂ ਹਾਸਲ ਕੀਤੀਆਂ ਸਨ ਅਤੇ ਪਲੇਆਫ ਲਈ ਕੁਆਲੀਫਾਈ ਕਰਨ ਵਿੱਚ ਅਸਫਲ ਰਹੀ ਸੀ। ਜਿਸ ਤੋਂ ਬਾਅਦ ਫ੍ਰੈਂਚਾਇਜ਼ੀ ਨੇ ਜੁਲਾਈ 'ਚ ਕੋਚਿੰਗ ਸਟਾਫ 'ਤੇ ਕਾਰਵਾਈ ਕੀਤੀ ਸੀ। ਰਿਕੀ ਪੋਂਟਿੰਗ ਅਤੇ ਉਸ ਦੇ ਸਟਾਫ ਨੂੰ ਬਰਖਾਸਤ ਕਰ ਦਿੱਤਾ ਗਿਆ ਸੀ।