ਮੁੰਬਈ ਓਪਨ WTA ਟੂਰਨਾਮੈਂਟ:  ਸਹਿਜਾ ਯਮਲਾਪੱਲੀ ਨੂੰ ਮਿਲਿਆ ਵਾਈਲਡ ਕਾਰਡ

ਮੁੰਬਈ : ਭਾਰਤ ਦੀ ਚੋਟੀ ਦੀ ਮਹਿਲਾ ਸਿੰਗਲ ਟੈਨਿਸ ਖਿਡਾਰਨ ਸਹਿਜਾ ਯਮਲਾਪੱਲੀ ਨੂੰ 2 ਫਰਵਰੀ ਤੋਂ ਸ਼ੁਰੂ ਹੋਣ ਜਾ ਰਹੇ ਵੱਕਾਰੀ ਮੁੰਬਈ ਓਪਨ WTA ਟੂਰਨਾਮੈਂਟ ਲਈ ਵਾਈਲਡ ਕਾਰਡ ਦਿੱਤਾ ਗਿਆ ਹੈ। ਸਹਿਜਾ, ਜੋ ਇਸ ਸਮੇਂ ਭਾਰਤ ਦੀ ਨੰਬਰ ਇੱਕ ਖਿਡਾਰਨ ਹੈ, ਨੂੰ ਇਹ ਮੌਕਾ ਬੁੱਧਵਾਰ ਨੂੰ ਦਿੱਤਾ ਗਿਆ। 

ਉਨ੍ਹਾਂ ਨੇ ਹਾਲ ਹੀ ਵਿੱਚ ਪੁਣੇ ਵਿੱਚ ਹੋਏ ‘ਬਿਲੀ ਜੀਨ ਕਿੰਗ ਕੱਪ’ ਦੇ ਏਸ਼ੀਆ ਓਸ਼ੀਆਨਾ ਗਰੁੱਪ ਵਨ ਪੜਾਅ ਵਿੱਚ ਭਾਰਤੀ ਟੀਮ ਨੂੰ ਦੂਜੇ ਸਥਾਨ 'ਤੇ ਪਹੁੰਚਾਉਣ ਵਿੱਚ ਬਹੁਤ ਅਹਿਮ ਭੂਮਿਕਾ ਨਿਭਾਈ ਸੀ। ਇਸ ਤੋਂ ਇਲਾਵਾ, ਉਹ ਬੇਂਗਲੁਰੂ ਵਿੱਚ ਹੋਏ ਪਲੇਅ-ਆਫ ਮੁਕਾਬਲਿਆਂ ਵਿੱਚ ਵੀ ਭਾਰਤੀ ਟੀਮ ਦਾ ਅਹਿਮ ਹਿੱਸਾ ਰਹੀ ਸੀ।

ਵਾਈਲਡ ਕਾਰਡ ਮਿਲਣ 'ਤੇ ਆਪਣੀ ਖੁਸ਼ੀ ਦਾ ਪ੍ਰਗਟਾਵਾ ਕਰਦਿਆਂ ਸਹਿਜਾ ਨੇ ਕਿਹਾ ਕਿ ਉਹ ਮਹਾਰਾਸ਼ਟਰ ਸਟੇਟ ਲਾਅਨ ਟੈਨਿਸ ਐਸੋਸੀਏਸ਼ਨ (MSLTA) ਦੀ ਬਹੁਤ ਸ਼ੁਕਰਗੁਜ਼ਾਰ ਹੈ। ਉਨ੍ਹਾਂ ਨੇ ਕਿਹਾ, "ਆਪਣੇ ਦੇਸ਼ ਵਿੱਚ WTA ਟੂਰਨਾਮੈਂਟ ਖੇਡਣਾ ਮੇਰੇ ਲਈ ਬਹੁਤ ਖ਼ਾਸ ਅਹਿਸਾਸ ਹੈ ਅਤੇ ਮੈਂ ਇਸ ਵਿੱਚ ਆਪਣਾ 100 ਫੀਸਦੀ ਯੋਗਦਾਨ ਪਾਉਣ ਦੀ ਪੂਰੀ ਕੋਸ਼ਿਸ਼ ਕਰਾਂਗੀ"।