ਮੈਡ੍ਰਿਡ ਓਪਨ: ਨਡਾਲ ਨੇ ਸਖ਼ਤ ਮੁਕਾਬਲੇ ''ਚ ਕੇਚਿਨ ਨੂੰ ਹਰਾਇਆ, ਸਵਿਆਤੇਕ ਕੁਆਰਟਰ ਫਾਈਨਲ ''ਚ ਪਹੁੰਚੀ

ਮੈਡ੍ਰਿਡ— ਦੁਨੀਆ ਦੇ ਸਾਬਕਾ ਨੰਬਰ ਇਕ ਖਿਡਾਰੀ ਰਾਫੇਲ ਨਡਾਲ ਨੇ ਸੋਮਵਾਰ ਨੂੰ ਇੱਥੇ ਮੈਡ੍ਰਿਡ ਓਪਨ ਟੈਨਿਸ ਟੂਰਨਾਮੈਂਟ 'ਚ ਤਿੰਨ ਘੰਟੇ ਤੋਂ ਜ਼ਿਆਦਾ ਚੱਲੇ ਸਖਤ ਮੁਕਾਬਲੇ 'ਚ ਪੇਡਰੋ ਕੇਚਿਨ ਨੂੰ ਤਿੰਨ ਸੈੱਟਾਂ 'ਚ ਹਰਾਇਆ। ਨਡਾਲ ਨੇ ਪੁਰਸ਼ ਸਿੰਗਲਜ਼ ਦੇ ਮੈਚ ਵਿੱਚ ਵਿਸ਼ਵ ਦੇ 91ਵੇਂ ਨੰਬਰ ਦੇ ਖਿਡਾਰੀ ਕੇਚਿਨ ਨੂੰ 6-1, 6-7, 6-3 ਨਾਲ ਹਰਾਇਆ।
ਪੰਜ ਵਾਰ ਦੇ ਚੈਂਪੀਅਨ ਨਡਾਲ ਨੇ ਇਸ ਜਿੱਤ ਨਾਲ ਪ੍ਰੀ-ਕੁਆਰਟਰ ਫਾਈਨਲ ਵਿੱਚ ਥਾਂ ਬਣਾ ਲਈ ਹੈ। ਨਡਾਲ ਦਾ ਸਾਹਮਣਾ ਅਗਲੇ ਦੌਰ ਵਿੱਚ ਨੰਬਰ 31 ਜਿਰੀ ਲੇਹੇਕਾ ਨਾਲ ਹੋਵੇਗਾ। ਚੋਟੀ ਦਾ ਦਰਜਾ ਪ੍ਰਾਪਤ ਯਾਨਿਕ ਸਿਨਰ ਆਪਣੀ ਸਰਵੋਤਮ ਖੇਡ ਨਾ ਖੇਡਣ ਦੇ ਬਾਵਜੂਦ ਪਾਵੇਲ ਕੋਟੋਵ ਨੂੰ 6-2, 7-5 ਨਾਲ ਹਰਾਉਣ 'ਚ ਕਾਮਯਾਬ ਰਿਹਾ। ਪ੍ਰੀ-ਕੁਆਰਟਰ ਫਾਈਨਲ ਵਿੱਚ ਉਸਦਾ ਸਾਹਮਣਾ 16ਵਾਂ ਦਰਜਾ ਪ੍ਰਾਪਤ ਕੈਰੇਨ ਖਚਾਨੋਵ ਨਾਲ ਹੋਵੇਗਾ।
ਤੀਜਾ ਦਰਜਾ ਪ੍ਰਾਪਤ ਦਾਨਿਲ ਮੇਦਵੇਦੇਵ ਹਾਰ ਤੋਂ ਸਿਰਫ਼ ਦੋ ਅੰਕ ਦੂਰ ਸੀ ਪਰ ਉਨ੍ਹਾਂ ਨੇ ਵਾਪਸੀ ਕਰਦਿਆਂ ਸੇਬੇਸਟੀਅਨ ਕੋਰਡਾ ਨੂੰ 5-7, 7-6, 6-3 ਨਾਲ ਹਰਾਇਆ ਜਦਕਿ ਪੰਜਵਾਂ ਦਰਜਾ ਪ੍ਰਾਪਤ ਕਾਸਪਰ ਰੂਡ ਨੇ ਕੈਮਰਨ ਨੋਰੀ ਨੂੰ 6-2, 6-4 ਨਾਲ ਹਰਾਇਆ।
ਮਹਿਲਾ ਸਿੰਗਲਜ਼ ਵਿੱਚ ਮੈਡੀਸਨ ਕੀਜ਼ ਨੇ ਕੋਕੋ ਗੌਫ਼ ਨੂੰ 7-6, 4-6, 6-4 ਨਾਲ ਹਰਾ ਕੇ ਕੁਆਰਟਰ ਫਾਈਨਲ ਵਿੱਚ ਪ੍ਰਵੇਸ਼ ਕੀਤਾ। ਉਨ੍ਹਾਂ ਦਾ ਅਗਲਾ ਮੁਕਾਬਲਾ ਓਨਸ ਜਾਬਿਊਰ ਨਾਲ ਹੋਵੇਗਾ, ਜਿਸ ਨੇ ਜੇਲੇਨਾ ਓਸਤਾਪੇਂਕੋ ਨੂੰ 6-0, 6-4 ਨਾਲ ਹਰਾਇਆ।
ਚੋਟੀ ਦੀ ਰੈਂਕਿੰਗ ਵਾਲੀ ਖਿਡਾਰਨ ਇਗਾ ਸਵਿਏਟੇਕ ਨੇ ਇਕ ਤਰਫਾ ਮੈਚ 'ਚ ਸਾਰਾ ਸੋਰੀਬੇਸ ਟੋਰਮੋ ਨੂੰ 6-1, 6-0 ਨਾਲ ਹਰਾ ਕੇ ਮੈਡ੍ਰਿਡ 'ਚ ਆਪਣੇ ਪਹਿਲੇ ਖਿਤਾਬ ਵੱਲ ਵਧਿਆ। ਅਗਲੇ ਦੌਰ 'ਚ ਸਵਿਆਤੇਕ ਦਾ ਸਾਹਮਣਾ 11ਵਾਂ ਦਰਜਾ ਪ੍ਰਾਪਤ ਬੀਟਰਿਜ਼ ਹਦਾਦ ਮੀਆ ਨਾਲ ਹੋਵੇਗਾ, ਜਿਸ ਨੇ ਪੰਜਵਾਂ ਦਰਜਾ ਪ੍ਰਾਪਤ ਮਾਰੀਆ ਸਾਕਾਰੀ ਨੂੰ 6-4, 6-4 ਨਾਲ ਹਰਾਇਆ।