ਲਵਲੀਨਾ ਗ੍ਰਾਂ ਪ੍ਰੀ ਮੁੱਕੇਬਾਜ਼ੀ ਵਿੱਚ ਲੀ ਕਿਆਨ ਤੋਂ ਹਾਰੀ

ਨਵੀਂ ਦਿੱਲੀ, (ਭਾਸ਼ਾ) ਟੋਕੀਓ ਓਲੰਪਿਕ ਦੀ ਕਾਂਸੀ ਤਮਗਾ ਜੇਤੂ ਮੁੱਕੇਬਾਜ਼ ਲਵਲੀਨਾ ਬੋਰਗੋਹੇਨ ਨੂੰ ਚੈੱਕ ਗਣਰਾਜ ਦੇ ਉਸਟਿ ਨਾਦ ਲਾਬੇਮ ਵਿੱਚ ਆਯੋਜਿਤ ਗ੍ਰਾਂ ਪ੍ਰੀ ਵਿੱਚ 75 ਕਿਲੋ ਵਰਗ ਵਿੱਚ ਚੀਨ ਦੀ ਲੀ ਕਿਆਨ ਤੋਂ ਹਾਰ ਦਾ ਸਾਹਮਣਾ ਕਰਨਾ ਪਿਆ ਤੇ ਉਸ ਨੂੰ ਚਾਂਦੀ ਦੇ ਤਗਮੇ ਨਾਲ ਸੰਤੁਸ਼ਟ ਹੋਣਾ ਪਿਆ। ਪੈਰਿਸ ਓਲੰਪਿਕ ਲਈ ਕੁਆਲੀਫਾਈ ਕਰ ਚੁੱਕੀ ਲਵਲੀਨਾ ਨੂੰ ਸ਼ਨੀਵਾਰ ਦੇਰ ਰਾਤ ਏਸ਼ੀਆਈ ਖੇਡਾਂ ਦੀ ਮੌਜੂਦਾ ਚੈਂਪੀਅਨ ਖਿਲਾਫ ਆਪਣੇ ਫਾਈਨਲ ਮੈਚ ਵਿੱਚ 2-3 ਨਾਲ ਹਾਰ ਦਾ ਸਾਹਮਣਾ ਕਰਨਾ ਪਿਆ। 

ਵਿਸ਼ਵ ਚੈਂਪੀਅਨਸ਼ਿਪ 'ਚ ਤਿੰਨ ਸੋਨ ਤਗਮੇ ਨਾਲ ਦੋ ਵਾਰ ਦੀ ਓਲੰਪਿਕ ਤਮਗਾ ਜੇਤੂ ਕਿਆਨ ਨੇ ਪਿਛਲੇ ਸਾਲ ਏਸ਼ੀਆਈ ਖੇਡਾਂ ਦੇ ਫਾਈਨਲ 'ਚ ਵੀ ਲਵਲੀਨਾ ਨੂੰ ਹਰਾਇਆ ਸੀ। ਵਿਸ਼ਵ ਮੁੱਕੇਬਾਜ਼ੀ ਦੀ ਅਗਵਾਈ ਹੇਠ ਕਰਵਾਏ ਇਸ ਟੂਰਨਾਮੈਂਟ ਵਿੱਚ ਲਵਲੀਨਾ ਅਤੇ ਕਿਆਨ ਤੋਂ ਇਲਾਵਾ ਔਰਤਾਂ ਦੇ 75 ਕਿਲੋ ਵਰਗ ਵਿੱਚ ਰਿਫਿਊਜੀ ਬਾਕਸਿੰਗ ਟੀਮ ਦੀ ਸਿੰਡੀ ਨਗਾਮਬਾ ਅਤੇ ਇੰਗਲੈਂਡ ਦੀ ਚੈਂਟਲ ਰੀਡ ਨੇ ਭਾਗ ਲਿਆ। ਇਨ੍ਹਾਂ ਚਾਰਾਂ ਮੁੱਕੇਬਾਜ਼ਾਂ ਵਿਚਾਲੇ ਮੈਚ ਰਾਊਂਡ ਰੌਬਿਨ ਫਾਰਮੈਟ 'ਚ ਹੋਇਆ। ਇਸ ਦੌਰਾਨ ਲਵਲੀਨਾ ਤਿੰਨ ਮੈਚਾਂ ਵਿੱਚੋਂ ਸਿਰਫ਼ ਇੱਕ ਹੀ ਜਿੱਤ ਸਕੀ। ਅਸਾਮ ਦੀ ਮੁੱਕੇਬਾਜ਼ ਨੇ ਨਗਾਮਬਾ ਅਤੇ ਕੀਆਨ ਤੋਂ ਹਾਰਨ ਤੋਂ ਪਹਿਲਾਂ ਰੀਡ ਵਿਰੁੱਧ ਜਿੱਤ ਦਰਜ ਕੀਤੀ ਸੀ। ਉਹ ਇਸ ਟੂਰਨਾਮੈਂਟ ਵਿੱਚ ਹਿੱਸਾ ਲੈਣ ਵਾਲੀ ਭਾਰਤ ਦੀ ਇਕਲੌਤੀ ਖਿਡਾਰਨ ਹੈ।