ਈਡਨ ਗਾਰਡਨਜ਼ ਟੈਸਟ ਤੋਂ ਪਹਿਲਾਂ ਕੇਸ਼ਵ ਮਹਾਰਾਜ ਨੇ ਟੀਮ ਇੰਡੀਆ ਨੂੰ ਦਿੱਤਾ ਅਲਟੀਮੇਟਮ

ਸਪੋਰਟਸ ਡੈਸਕ--ਦੱਖਣੀ ਅਫ਼ਰੀਕਾ ਦੇ ਸਪਿਨਰ ਕੇਸ਼ਵ ਮਹਾਰਾਜ ਨੇ ਸ਼ੁਭਮਨ ਗਿੱਲ ਦੀ ਅਗਵਾਈ ਵਾਲੀ ਭਾਰਤੀ ਟੀਮ ਖਿਲਾਫ਼ ਸ਼ੁਰੂ ਹੋਣ ਵਾਲੀ ਟੈਸਟ ਸੀਰੀਜ਼ ਤੋਂ ਪਹਿਲਾਂ ਇੱਕ ਅਲਟੀਮੇਟਮ ਜਾਰੀ ਕੀਤਾ ਹੈ। ਮਹਾਰਾਜ ਨੇ ਐਲਾਨ ਕੀਤਾ ਹੈ ਕਿ ਉਨ੍ਹਾਂ ਦੀ ਟੀਮ ਭਾਰਤ ਵਿੱਚ 15 ਸਾਲਾਂ ਤੋਂ ਚੱਲ ਰਹੇ ਟੈਸਟ ਜਿੱਤ ਦੇ ਸੋਕੇ ਨੂੰ ਖ਼ਤਮ ਕਰਨ ਲਈ ਪੂਰੀ ਤਰ੍ਹਾਂ ਤਿਆਰ ਹੈ।14 ਨਵੰਬਰ ਤੋਂ ਕੋਲਕਾਤਾ ਦੇ ਈਡਨ ਗਾਰਡਨਜ਼ ਵਿੱਚ ਸ਼ੁਰੂ ਹੋਣ ਵਾਲੀ ਦੋ ਟੈਸਟ ਮੈਚਾਂ ਦੀ ਇਸ ਲੜੀ ਤੋਂ ਪਹਿਲਾਂ, ਮਹਾਰਾਜ ਨੇ ਕਿਹਾ ਕਿ ਖਿਡਾਰੀਆਂ ਵਿੱਚ ਭਾਰਤ ਨੂੰ ਹਰਾਉਣ ਦਾ "ਜਨੂੰਨ ਅਤੇ ਭੁੱਖ" ਹੈ।
15 ਸਾਲ ਬਾਅਦ ਇਤਿਹਾਸ ਬਦਲਣ ਦੀ ਤਿਆਰੀ
ਦੱਖਣੀ ਅਫ਼ਰੀਕਾ ਨੂੰ ਭਾਰਤ ਵਿੱਚ ਆਖਰੀ ਟੈਸਟ ਜਿੱਤੇ ਨੂੰ 15 ਸਾਲ ਹੋ ਚੁੱਕੇ ਹਨ, ਅਤੇ ਟੀਮ ਦਾ ਮੁੱਖ ਧਿਆਨ ਇਸ ਕਮੀ ਨੂੰ ਖ਼ਤਮ ਕਰਨ 'ਤੇ ਹੈ। ਮਹਾਰਾਜ ਨੇ ਦੱਸਿਆ ਕਿ ਭਾਰਤ ਦਾ ਦੌਰਾ ਉਨ੍ਹਾਂ ਦੀ ਟੀਮ ਲਈ ਸਭ ਤੋਂ ਮੁਸ਼ਕਲ ਦੌਰਿਆਂ ਵਿੱਚੋਂ ਇੱਕ ਹੈ, ਪਰ ਉਹ ਇਸ ਨੂੰ ਆਪਣੀ "ਤਰੱਕੀ ਨੂੰ ਪਰਖਣ ਦੇ ਮੌਕੇ ਵਜੋਂ" ਦੇਖਦੇ ਹਨ। ਦੋ ਮੈਚਾਂ ਦੀ ਇਸ ਲੜੀ ਦਾ ਦੂਜਾ ਟੈਸਟ ਗੁਹਾਟੀ ਵਿੱਚ ਖੇਡਿਆ ਜਾਵੇਗਾ।
ਖੱਬੇ ਹੱਥ ਦੇ ਸਪਿਨਰ ਮਹਾਰਾਜ ਨੇ ਇਸ ਗੱਲ 'ਤੇ ਜ਼ੋਰ ਦਿੱਤਾ ਕਿ ਉਨ੍ਹਾਂ ਦੀ ਟੀਮ ਨੇ ਉਪ-ਮਹਾਂਦੀਪ ਦੇ ਹੋਰ ਹਿੱਸਿਆਂ ਵਿੱਚ ਸਫਲਤਾ ਹਾਸਲ ਕਰਨੀ ਸ਼ੁਰੂ ਕਰ ਦਿੱਤੀ ਹੈ, ਅਤੇ ਹੁਣ ਭਾਰਤ ਦਾ ਦੌਰਾ ਉਨ੍ਹਾਂ ਦੀ ਤਰੱਕੀ ਦਾ ਅਗਲਾ ਕਦਮ ਹੈ। ਹਾਲਾਂਕਿ ਦੱਖਣੀ ਅਫ਼ਰੀਕਾ ਨੇ 2015 ਅਤੇ 2019 ਦੀਆਂ ਦੋਵੇਂ ਟੈਸਟ ਸੀਰੀਜ਼ਾਂ ਭਾਰਤ ਵਿੱਚ ਹਾਰੀਆਂ ਸਨ, ਪਰ ਮਹਾਰਾਜ ਇਸ ਵਾਰ ਹਾਲਾਤ ਨੂੰ ਕੁਝ ਸੰਤੁਲਿਤ ਰੱਖਣ ਦੀ ਉਮੀਦ ਕਰ ਰਹੇ ਹਨ।
ਪਿੱਚਾਂ ਬਾਰੇ ਉਮੀਦ
ਪਿੱਚਾਂ ਦੀ ਗੱਲ ਕਰਦਿਆਂ ਮਹਾਰਾਜ ਨੇ ਕਿਹਾ ਕਿ ਉਨ੍ਹਾਂ ਨੂੰ ਨਹੀਂ ਲੱਗਦਾ ਕਿ ਵਿਕਟਾਂ ਓਨੀਆਂ ਸਪਿਨ-ਫ੍ਰੈਂਡਲੀ ਹੋਣਗੀਆਂ ਜਿੰਨੀਆਂ ਉਨ੍ਹਾਂ ਨੂੰ ਪਾਕਿਸਤਾਨ ਵਿੱਚ ਮਿਲੀਆਂ ਸਨ। ਉਨ੍ਹਾਂ ਨੂੰ ਇੱਕ ਅਜਿਹੀ "ਚੰਗੀ ਰਵਾਇਤੀ ਟੈਸਟ ਵਿਕਟ" ਦੀ ਉਮੀਦ ਹੈ ਜੋ ਬੱਲੇਬਾਜ਼ਾਂ ਅਤੇ ਗੇਂਦਬਾਜ਼ਾਂ ਦੋਵਾਂ ਦੀ ਮਦਦ ਕਰੇ। ਉਨ੍ਹਾਂ ਅੱਗੇ ਕਿਹਾ ਕਿ ਭਾਰਤ ਵਿੱਚ ਹੁਣ ਸੋਚ ਬਦਲ ਰਹੀ ਹੈ, ਅਤੇ ਟੀਮਾਂ ਮੁਕਾਬਲੇ ਵਾਲੀਆਂ ਪਿੱਚਾਂ ਚਾਹੁੰਦੀਆਂ ਹਨ ਜੋ ਚਾਰ ਤੋਂ ਪੰਜ ਦਿਨ ਤੱਕ ਟਿਕ ਸਕਣ।
ਮਹਾਰਾਜ ਨੇ ਦੱਸਿਆ ਕਿ ਟੀਮ ਪਾਕਿਸਤਾਨ ਦੌਰੇ ਤੋਂ ਚੰਗਾ ਮੋਮੈਂਟਮ ਲੈ ਕੇ ਆ ਰਹੀ ਹੈ, ਜਿੱਥੇ ਉਨ੍ਹਾਂ ਨੇ ਦਿਖਾਇਆ ਸੀ ਕਿ ਉਹ ਲੜ ਸਕਦੇ ਹਨ। ਉਨ੍ਹਾਂ ਕਿਹਾ, "ਸਾਡੀ ਤਿਆਰੀ ਸਟੀਕ ਅਤੇ ਉਦੇਸ਼ਪੂਰਨ ਹੈ। ਅਸੀਂ ਦੁਨੀਆ ਦੀ ਸਰਵੋਤਮ ਟੀਮ ਦੇ ਖਿਲਾਫ ਖੁਦ ਨੂੰ ਪਰਖਣ ਲਈ ਤਿਆਰ ਹਾਂ"।