ਜੂਨੀਅਰ ਹਾਕੀ ਏਸ਼ੀਆ ਕੱਪ : ਭਾਰਤ ਨੇ ਇੰਡੋਨੇਸ਼ੀਆ ਨੂੰ 14-0 ਨਾਲ ਦਿੱਤੀ ਕਰਾਰੀ ਹਾਰ

ਸਪੋਰਟਸ ਡੈਸਕ- ਮੋਕੀ (ਚੀਨ) ਵਿਖੇ ਖੇਡੇ ਜਾ ਰਹੇ AHF ਜੂਨੀਅਰ ਏਸ਼ੀਆ ਕੱਪ 2026 ਦੇ ਪੂਲ-ਏ ਮੁਕਾਬਲੇ ਵਿੱਚ ਡਿਫੈਂਡਿੰਗ ਚੈਂਪੀਅਨ ਭਾਰਤੀ ਜੂਨੀਅਰ ਪੁਰਸ਼ ਹਾਕੀ ਟੀਮ ਨੇ ਇੰਡੋਨੇਸ਼ੀਆ ਨੂੰ 14-0 ਦੇ ਵੱਡੇ ਫਰਕ ਨਾਲ ਕਰਾਰੀ ਸ਼ਿਕਸਤ ਦੇ ਕੇ ਆਪਣੇ ਅਭਿਆਨ ਦੀ ਧਮਾਕੇਦਾਰ ਸ਼ੁਰੂਆਤ ਕੀਤੀ ਹੈ। ਭਾਰਤ ਦੀ ਇਸ ਇੱਕਤਰਫਾ ਜਿੱਤ ਦੇ ਸਭ ਤੋਂ ਵੱਡੇ ਸਟਾਰ ਪ੍ਰਭਦੀਪ ਸਿੰਘ ਰਹੇ, ਜਿਨ੍ਹਾਂ ਨੇ ਸ਼ਾਨਦਾਰ ਖੇਡ ਦਾ ਪ੍ਰਦਰਸ਼ਨ ਕਰਦਿਆਂ 5 ਗੋਲ ਦਾਗੇ ਅਤੇ 'ਪਲੇਅਰ ਆਫ਼ ਦ ਮੈਚ' ਦਾ ਪੁਰਸਕਾਰ ਆਪਣੇ ਨਾਮ ਕੀਤਾ। ਟੀਮ ਦੇ ਕਪਤਾਨ ਅਨਮੋਲ ਏਕਾ ਨੇ 4 ਗੋਲ ਕੀਤੇ, ਅਜੀਤ ਯਾਦਵ ਨੇ ਹੈਟ੍ਰਿਕ (3 ਗੋਲ) ਲਗਾਈ, ਜਦੋਂ ਕਿ ਹਰਪਾਲ ਸਿੰਘ ਅਤੇ ਆਸ਼ੂ ਮੌਰਿਆ ਨੇ 1-1 ਗੋਲ ਕਰਕੇ ਭਾਰਤ ਦਾ ਸਕੋਰ 14-0 ਤੱਕ ਪਹੁੰਚਾਇਆ।

ਮੈਚ ਦੀ ਸ਼ੁਰੂਆਤ ਤੋਂ ਹੀ ਭਾਰਤ ਨੇ ਆਕ੍ਰਾਮਕ ਰੁਖ਼ ਅਪਣਾਇਆ ਅਤੇ ਪਹਿਲੇ ਕੁਆਰਟਰ ਵਿੱਚ ਪ੍ਰਭਦੀਪ ਅਤੇ ਹਰਪਾਲ ਦੇ ਗੋਲਾਂ ਦੀ ਬਦੌਲਤ 2-0 ਦੀ ਬੜ੍ਹਤ ਬਣਾ ਲਈ। ਦੂਜੇ ਕੁਆਰਟਰ ਵਿੱਚ ਕਪਤਾਨ ਅਨਮੋਲ ਨੇ ਪੈਨਲਟੀ ਸਟ੍ਰੋਕ 'ਤੇ ਗੋਲ ਕੀਤਾ, ਜਿਸ ਤੋਂ ਬਾਅਦ ਅਜੀਤ ਅਤੇ ਪ੍ਰਭਦੀਪ ਦੇ ਲਗਾਤਾਰ ਗੋਲਾਂ ਨਾਲ ਹਾਫ ਟਾਈਮ ਤੱਕ ਸਕੋਰ 6-0 ਹੋ ਗਿਆ। ਤੀਜੇ ਕੁਆਰਟਰ ਵਿੱਚ ਅਨਮੋਲ ਦੇ ਦੋ ਪੈਨਲਟੀ ਕਾਰਨਰਾਂ ਅਤੇ ਪ੍ਰਭਦੀਪ ਦੇ ਇੱਕ ਗੋਲ ਨਾਲ ਸਕੋਰ 9-0 ਤੱਕ ਪਹੁੰਚਿਆ, ਜਦਕਿ ਆਖਰੀ ਕੁਆਰਟਰ ਵਿੱਚ ਭਾਰਤੀ ਫੋਰਵਰਡ ਲਾਈਨ ਨੇ 5 ਹੋਰ ਗੋਲ ਦਾਗੇ। ਭਾਰਤ ਨੇ ਪੂਰੇ ਮੈਚ ਵਿੱਚ ਕੁੱਲ 9 ਫੀਲਡ ਗੋਲ, 4 ਪੈਨਲਟੀ ਕਾਰਨਰ ਅਤੇ 1 ਪੈਨਲਟੀ ਸਟ੍ਰੋਕ ਨੂੰ ਗੋਲ ਵਿੱਚ ਤਬਦੀਲ ਕੀਤਾ।

ਇੰਡੋਨੇਸ਼ੀਆ ਦੀ ਟੂਰਨਾਮੈਂਟ ਵਿੱਚ ਇਹ ਲਗਾਤਾਰ ਦੂਜੀ ਹਾਰ ਹੈ, ਜਿਸ ਤੋਂ ਪਹਿਲਾਂ ਉਸ ਨੂੰ ਦੱਖਣੀ ਕੋਰੀਆ ਖਿਲਾਫ 0-9 ਨਾਲ ਹਾਰ ਝੱਲਣੀ ਪਈ ਸੀ। ਇਸ ਜਿੱਤ ਨਾਲ ਭਾਰਤ ਨੇ ਆਪਣੇ ਖਾਤੇ ਵਿੱਚ 3 ਅੰਕ ਜੋੜ ਲਏ ਹਨ। ਜਪਾਨ ਅਤੇ ਦੱਖਣੀ ਕੋਰੀਆ ਦੇ ਵੀ 3-3 ਅੰਕ ਹਨ, ਪਰ ਬਿਹਤਰ ਗੋਲ ਅੰਤਰ ਦੇ ਦਮ 'ਤੇ ਭਾਰਤੀ ਟੀਮ ਪੂਲ-ਏ ਵਿੱਚ ਸਿਖਰਲੇ ਸਥਾਨ 'ਤੇ ਪਹੁੰਚ ਗਈ ਹੈ। ਪੰਜ ਵਾਰ ਦੀ ਚੈਂਪੀਅਨ ਭਾਰਤੀ ਟੀਮ ਨੇ ਇਸ ਸ਼ਾਨਦਾਰ ਆਗਾਜ਼ ਨਾਲ ਆਪਣੇ ਖਿਤਾਬ ਨੂੰ ਬਚਾਉਣ ਦੇ ਇਰਾਦੇ ਸਪੱਸ਼ਟ ਕਰ ਦਿੱਤੇ ਹਨ।