ਜਾਇਸਵਾਲ ਇੰਨੇ ਸੈਂਕੜੇ ਲਾਉਣਗੇ, ਮੈਕਸਵੈੱਲ ਨੇ ਕੀਤੀ ਭਵਿੱਖਬਾਣੀ

ਸਿਡਨੀ- ਆਸਟ੍ਰੇਲੀਆਈ ਆਲਰਾਊਂਡਰ ਗਲੇਨ ਮੈਕਸਵੈੱਲ ਦਾ ਮੰਨਣਾ ਹੈ ਕਿ ਯਸ਼ਸਵੀ ਜਾਇਸਵਾਲ ਦੀ ਵੱਖ-ਵੱਖ ਸਥਿਤੀਆਂ ਵਿਚ ਅਨੁਕੂਲ ਹੋਣ ਦੀ ਸਮਰੱਥਾ ਹੈ ਅਤੇ ਇਸ ਕਾਰਨ ਉਨ੍ਹਾਂ ਵਿਚ ਕੋਈ ਖਾਸ ਕਮਜ਼ੋਰੀ ਨਹੀਂ ਹੈ ਤੇ  ਇਹ ਸਲਾਮੀ ਬੱਲੇਬਾਜ਼ ਟੈਸਟ ਕ੍ਰਿਕਟ 'ਚ 40 ਤੋਂ ਵੱਧ ਸੈਂਕੜੇ ਲਗਾਉਣਗੇ ਅਤੇ ਕਈ ਰਿਕਾਰਡ ਉਨ੍ਹਾਂ ਦੇ ਨਾਂ ਦਰਜ ਹੋਣਗੇ। ਭਾਰਤੀ ਕ੍ਰਿਕਟ ਵਿੱਚ ਸਭ ਤੋਂ ਚਮਕਦਾਰ ਨੌਜਵਾਨ ਪ੍ਰਤਿਭਾਵਾਂ ਵਿੱਚੋਂ ਇੱਕ, 22 ਸਾਲਾ ਸਲਾਮੀ ਬੱਲੇਬਾਜ਼ ਜਾਇਸਵਾਲ ਨੇ ਆਪਣੇ ਟੈਸਟ ਕਰੀਅਰ ਦੀ ਸ਼ਾਨਦਾਰ ਸ਼ੁਰੂਆਤ ਕੀਤੀ ਹੈ। ਉਸ ਨੇ ਇਸ ਸਾਲ ਦੀ ਸ਼ੁਰੂਆਤ 'ਚ ਇੰਗਲੈਂਡ ਖਿਲਾਫ ਸ਼ਾਨਦਾਰ ਪ੍ਰਦਰਸ਼ਨ ਕਰਕੇ ਟੀਮ 'ਚ ਆਪਣੀ ਜਗ੍ਹਾ ਪੱਕੀ ਕੀਤੀ ਸੀ। 

ਮੈਕਸਵੈੱਲ ਨੇ 'ਦਿ ਗ੍ਰੇਡ ਕ੍ਰਿਕਟਰ' ਪੋਡਕਾਸਟ 'ਤੇ ਕਿਹਾ, "ਉਹ (ਜਾਇਸਵਾਲ) ਅਜਿਹਾ ਖਿਡਾਰੀ ਹੈ ਜੋ ਸ਼ਾਇਦ 40 ਤੋਂ ਵੱਧ ਟੈਸਟ ਸੈਂਕੜੇ ਲਗਾਏਗਾ ਅਤੇ ਕੁਝ ਵੱਖਰਾ ਰਿਕਾਰਡ ਬਣਾਏਗਾ। ਉਸ ਵਿੱਚ ਵੱਖ-ਵੱਖ ਸਥਿਤੀਆਂ ਨਾਲ ਅਨੁਕੂਲ ਹੋਣ ਦੀ ਅਦਭੁਤ ਸਮਰੱਥਾ ਹੈ।'' ਜੈਸਵਾਲ ਨੇ ਪਰਥ ਵਿੱਚ ਆਸਟਰੇਲੀਆ ਖ਼ਿਲਾਫ਼ ਖੇਡੇ ਗਏ ਪਹਿਲੇ ਟੈਸਟ ਮੈਚ ਦੀ ਦੂਜੀ ਪਾਰੀ ਵਿੱਚ 161 ਦੌੜਾਂ ਬਣਾਈਆਂ ਸਨ, ਜਿਸ ਨਾਲ ਭਾਰਤ ਨੇ ਪੰਜ ਮੈਚਾਂ ਦੀ ਲੜੀ ਵਿੱਚ 295 ਦੌੜਾਂ ਨਾਲ ਜਿੱਤ ਦਰਜ ਕੀਤੀ ਸੀ ਤੇ 1-0 ਦੀ ਬੜ੍ਹਤ ਬਣਾਈ।। 

ਜਾਇਸਵਾਲ ਨੇ ਹੁਣ ਤੱਕ 15 ਟੈਸਟ ਮੈਚਾਂ ਵਿੱਚ 58.07 ਦੀ ਸ਼ਾਨਦਾਰ ਔਸਤ ਨਾਲ 1568 ਦੌੜਾਂ ਬਣਾਈਆਂ ਹਨ, ਜਿਸ ਵਿੱਚ ਚਾਰ ਸੈਂਕੜੇ ਸ਼ਾਮਲ ਹਨ। ਪਰਥ 'ਚ ਪਹਿਲੀ ਪਾਰੀ 'ਚ ਉਹ ਖਾਤਾ ਵੀ ਨਹੀਂ ਖੋਲ੍ਹ ਸਕਿਆ ਸੀ ਪਰ ਦੂਜੀ ਪਾਰੀ 'ਚ ਉਸ ਨੇ ਸ਼ਾਨਦਾਰ ਵਾਪਸੀ ਕੀਤੀ, ਜਿਸ ਤੋਂ ਉਸ ਦੀ ਬੱਲੇਬਾਜ਼ੀ ਦਾ ਹੁਨਰ ਦਿਖਾਈ ਦਿੰਦਾ ਹੈ। ਮੈਕਸਵੈੱਲ ਨੇ ਕਿਹਾ, ''ਉਸ ਨੇ ਕਈ ਤਰ੍ਹਾਂ ਦੇ ਸ਼ਾਟ ਖੇਡੇ ਪਰ ਜਿਸ ਤਰ੍ਹਾਂ ਉਸ ਨੇ ਗੇਂਦਾਂ ਨੂੰ ਵਿਚਾਲੇ ਛੱਡਿਆ ਅਤੇ ਜਿਸ ਤਰ੍ਹਾਂ ਉਸ ਨੇ ਬੈਕ ਫੁੱਟ 'ਤੇ ਖੇਡਿਆ ਉਹ ਮਹੱਤਵਪੂਰਨ ਸੀ। ਉਸ ਦਾ ਫੁਟਵਰਕ ਬਹੁਤ ਵਧੀਆ ਹੈ। ਅਜਿਹਾ ਨਹੀਂ ਲੱਗਦਾ ਕਿ ਉਸ ਵਿੱਚ ਕੋਈ ਖਾਸ ਕਮਜ਼ੋਰੀ ਹੈ। ਉਹ ਸ਼ਾਰਟ-ਪਿਚ ਵਾਲੀ ਗੇਂਦ ਨੂੰ ਚੰਗੀ ਤਰ੍ਹਾਂ ਖੇਡਦਾ ਹੈ, ਚੰਗੀ ਤਰ੍ਹਾਂ ਡ੍ਰਾਈਵ ਕਰਦਾ ਹੈ, ਸ਼ਾਨਦਾਰ ਤਰੀਕੇ ਨਾਲ ਸਪਿਨ ਕਰਦਾ ਹੈ ਅਤੇ ਦਬਾਅ ਨੂੰ ਸੰਭਾਲ ਸਕਦਾ ਹੈ।'' ਉਸ ਨੇ ਕਿਹਾ, ''ਜੇਕਰ ਆਸਟਰੇਲੀਆ ਉਸ ਨੂੰ ਰੋਕਣ ਦਾ ਕੋਈ ਰਸਤਾ ਨਹੀਂ ਲੱਭ ਸਕਿਆ ਤਾਂ ਸਥਿਤੀ ਭਿਆਨਕ ਹੋਵੇਗੀ।'' 

ਮੈਕਸਵੈੱਲ ਨੇ ਵੀ ਨੇ ਨਿਯਮਤ ਕਪਤਾਨ ਰੋਹਿਤ ਸ਼ਰਮਾ ਦੀ ਗੈਰ-ਮੌਜੂਦਗੀ 'ਚ ਟੀਮ ਦੀ ਕਮਾਨ ਸੰਭਾਲਣ ਵਾਲੇ ਤੇਜ਼ ਗੇਂਦਬਾਜ਼ ਜਸਪ੍ਰੀਤ ਬੁਮਰਾਹ ਦੀ ਤਾਰੀਫ ਕੀਤੀ, ਜਿਸ ਨੇ ਪਹਿਲੇ ਟੈਸਟ ਮੈਚ 'ਚ 72 ਦੌੜਾਂ 'ਤੇ ਅੱਠ ਵਿਕਟਾਂ ਲੈ ਕੇ ਭਾਰਤ ਨੂੰ ਆਸਟ੍ਰੇਲੀਆ 'ਚ ਸਭ ਤੋਂ ਵੱਡੀ ਜਿੱਤ ਦਿਵਾਉਣ 'ਚ ਅਹਿਮ ਭੂਮਿਕਾ ਨਿਭਾਈ ਖੇਡਿਆ। ਉਸਨੇ ਕਿਹਾ, “ਭਾਰਤ ਕੋਲ ਬੁਮਰਾਹ ਅਤੇ ਜਾਇਸਵਾਲ ਵਿੱਚ ਦੋ ਸ਼ਾਨਦਾਰ ਪ੍ਰਤਿਭਾ ਹਨ। ਮੈਂ ਪਹਿਲਾਂ ਵੀ ਕਿਹਾ ਸੀ ਕਿ ਬੁਮਰਾਹ ਸੰਭਾਵਤ ਤੌਰ 'ਤੇ ਹੁਣ ਤੱਕ ਦੇ ਸਰਬੋਤਮ ਤੇਜ਼ ਗੇਂਦਬਾਜ਼ਾਂ 'ਚੋਂ ਇਕ ਵਜੋਂ ਜਾਣਿਆ ਜਾਵੇਗਾ।''