ਕਮਰ ਦੀ ਸੱਟ ਉਭਰਨ ਕਾਰਨ ਆਸਟ੍ਰੇਲੀਆ ਖਿਲਾਫ ਵਨਡੇ ਸੀਰੀਜ਼ ਤੋਂ ਬਾਹਰ ਹੋ ਸਕਦੇ ਹਨ ਅਈਅਰ

ਅਹਿਮਦਾਬਾਦ : ਸ਼੍ਰੇਅਸ ਅਈਅਰ ਦੀ ਕਮਰ ਦੀ ਸੱਟ ਦੇ ਮੁੜ ਸਾਹਮਣੇ ਆਉਣ ਤੋਂ ਬਾਅਦ ਭਾਰਤੀ ਟੀਮ ਅਤੇ ਨੈਸ਼ਨਲ ਕ੍ਰਿਕਟ ਅਕੈਡਮੀ (ਐੱਨ.ਸੀ.ਏ.) ਵੱਲੋਂ ਖਿਡਾਰੀਆਂ ਦੀ ਸੱਟ ਪ੍ਰਬੰਧਨ ਇੱਕ ਵਾਰ ਫਿਰ ਸਵਾਲਾਂ ਦੇ ਘੇਰੇ ਵਿੱਚ ਆ ਗਿਆ ਹੈ। ਭਾਰਤ ਦੇ ਮੱਧਕ੍ਰਮ ਦੇ ਬੱਲੇਬਾਜ਼ ਅਈਅਰ ਨੂੰ ਆਸਟਰੇਲੀਆ ਦੇ ਖਿਲਾਫ ਚੌਥੇ ਅਤੇ ਆਖਰੀ ਕ੍ਰਿਕਟ ਟੈਸਟ ਦੇ ਚੌਥੇ ਦਿਨ ਐਤਵਾਰ ਨੂੰ ਬੱਲੇਬਾਜ਼ੀ ਮੈਦਾਨ 'ਤੇ ਨਹੀਂ ਉਤਾਰਿਆ ਗਿਆ। ਅਈਅਰ ਦੇ ਮੁੰਬਈ ਵਿੱਚ 17 ਮਾਰਚ ਤੋਂ ਸ਼ੁਰੂ ਹੋਣ ਵਾਲੀ ਤਿੰਨ ਮੈਚਾਂ ਦੀ ਵਨਡੇ ਸੀਰੀਜ਼ ਤੋਂ ਬਾਹਰ ਹੋਣ ਦੀ ਸੰਭਾਵਨਾ ਹੈ।

ਵਿਸ਼ਵ ਕੱਪ ਇਸ ਸਾਲ ਦਾ ਸਭ ਤੋਂ ਮਹੱਤਵਪੂਰਨ ਟੂਰਨਾਮੈਂਟ ਹੈ ਅਤੇ ਅਈਅਰ ਨੂੰ ਆਈਪੀਐਲ ਵਿੱਚ ਕੋਲਕਾਤਾ ਨਾਈਟ ਰਾਈਡਰਜ਼ ਦੀ ਕਪਤਾਨੀ ਵੀ ਕਰਨੀ ਹੈ। ਅਜਿਹੇ 'ਚ ਉਸ ਨੂੰ ਆਰਾਮ ਦਿੱਤੇ ਜਾਣ ਦੀ ਸੰਭਾਵਨਾ ਹੈ। ਅਈਅਰ ਕਮਰ ਦੀ ਸਮੱਸਿਆ ਕਾਰਨ ਨਾਗਪੁਰ ਵਿੱਚ ਲੜੀ ਦੇ ਪਹਿਲੇ ਟੈਸਟ ਵਿੱਚ ਨਹੀਂ ਖੇਡ ਸਕੇ ਸਨ, ਜਿਸ ਤੋਂ ਬਾਅਦ ਉਹ ਦਿੱਲੀ ਵਿੱਚ ਦੂਜੇ ਮੈਚ ਲਈ ਟੀਮ ਵਿੱਚ ਵਾਪਸ ਆਏ ਸਨ। ਹਾਲਾਂਕਿ ਹੁਣ ਇਹ ਸਵਾਲ ਉਠਾਇਆ ਜਾ ਰਿਹਾ ਹੈ ਕਿ ਐਨਸੀਏ ਨੇ ਇੱਕ ਵਾਰ ਫਿਰ ਅਜਿਹੇ ਖਿਡਾਰੀ ਨੂੰ ਖੇਡਣ ਦੀ ਇਜਾਜ਼ਤ ਦਿੱਤੀ ਜੋ ਪੂਰੀ ਤਰ੍ਹਾਂ ਫਿੱਟ ਨਹੀਂ ਸੀ।

ਇਹ ਵੀ ਪੜ੍ਹੋ : ਲੰਮੀ ਉਡੀਕ ਖਤਮ, ਕੋਹਲੀ ਨੇ ਜੜਿਆ ਸੈਂਕੜਾ, ਇਸ ਮਾਮਲੇ 'ਚ ਬਣਿਆ ਦੁਨੀਆ ਦਾ ਨੰਬਰ-1 ਬੱਲੇਬਾਜ਼

ਪਤਾ ਲੱਗਾ ਹੈ ਕਿ ਅਈਅਰ ਨੇ ਸ਼ਨੀਵਾਰ ਨੂੰ ਅਸਹਿਜ ਮਹਿਸੂਸ ਕੀਤਾ ਜਿਸ ਤੋਂ ਬਾਅਦ ਰਵਿੰਦਰ ਜਡੇਜਾ ਨੂੰ ਪੰਜਵੇਂ ਨੰਬਰ 'ਤੇ ਬੱਲੇਬਾਜ਼ੀ ਲਈ ਭੇਜਿਆ ਗਿਆ। ਅਈਅਰ ਐਤਵਾਰ ਨੂੰ ਵੀ ਮੈਦਾਨ 'ਤੇ ਨਹੀਂ ਆਏ ਕਿਉਂਕਿ ਉਹ ਬੱਲੇਬਾਜ਼ੀ ਕਰਨ ਦੀ ਸਥਿਤੀ 'ਚ ਨਹੀਂ ਸਨ। ਇੱਕ ਸਾਬਕਾ ਰਾਸ਼ਟਰੀ ਚੋਣਕਾਰ ਨੇ ਨਾਮ ਗੁਪਤ ਰੱਖਣ ਦੀ ਸ਼ਰਤ 'ਤੇ ਪੀਟੀਆਈ ਨੂੰ ਦੱਸਿਆ, "ਇਹ ਆਸਟਰੇਲੀਆ ਦੀ ਪਾਰੀ ਦੌਰਾਨ ਲਗਭਗ 170 ਓਵਰਾਂ ਦੀ ਫੀਲਡਿੰਗ ਕਾਰਨ ਸੱਟ ਲੱਗਣ ਦਾ ਮਾਮਲਾ ਹੋ ਸਕਦਾ ਹੈ। ਪਰ ਮੈਨੂੰ ਸਮਝ ਨਹੀਂ ਆਉਂਦੀ ਕਿ ਘੱਟੋ-ਘੱਟ ਇੱਕ ਘਰੇਲੂ ਮੈਚ ਖੇਡਣ ਦਾ ਲਾਜ਼ਮੀ ਨਿਯਮ ਅਈਅਰ 'ਤੇ ਕਿਉਂ ਲਾਗੂ ਨਹੀਂ ਕੀਤਾ ਗਿਆ। ਅਈਅਰ ਨਾਗਪੁਰ ਟੈਸਟ ਤੋਂ ਖੁੰਝ ਗਏ ਪਰ ਦੂਜੇ ਟੈਸਟ ਲਈ ਉਨ੍ਹਾਂ ਨੂੰ ਫਿੱਟ ਐਲਾਨ ਦਿੱਤਾ ਗਿਆ। 

ਉਹ ਦਿੱਲੀ ਅਤੇ ਇੰਦੌਰ ਦੋਵਾਂ ਟੈਸਟਾਂ ਵਿੱਚ ਖੇਡਿਆ ਪਰ ਅਹਿਮਦਾਬਾਦ ਵਿੱਚ ਉਸ ਦਾ ਸਰੀਰ ਲੰਬੇ ਸਮੇਂ ਤੱਕ ਫੀਲਡਿੰਗ ਨੂੰ ਸੰਭਾਲ ਨਹੀਂ ਸਕਿਆ। ਜਦੋਂ ਅਈਅਰ ਨੂੰ ਜਨਵਰੀ ਵਿੱਚ ਪਹਿਲੀ ਵਾਰ ਕਮਰ ਦੀ ਸਮੱਸਿਆ ਹੋਈ ਸੀ, ਉਹ ਇੱਕ ਮਹੀਨੇ ਲਈ ਬਾਹਰ ਸੀ ਅਤੇ ਰਣਜੀ ਸੀਜ਼ਨ ਖਤਮ ਹੋਣ ਤੋਂ ਪਹਿਲਾਂ ਉਸਨੂੰ ਫਿੱਟ ਘੋਸ਼ਿਤ ਕਰਨ ਤੋਂ ਪਹਿਲਾਂ ਐਨਸੀਏ ਵਿੱਚ ਸਖ਼ਤ ਪੁਨਰਵਾਸ ਕੀਤਾ ਗਿਆ ਸੀ। ਸਾਬਕਾ ਚੋਣਕਾਰ ਨੇ ਕਿਹਾ, 'ਪਰ ਈਰਾਨੀ ਕੱਪ ਹੋਣਾ ਸੀ ਅਤੇ ਤੁਸੀਂ ਅਈਅਰ ਦੇ ਵਾਪਸੀ ਦਾ ਇੰਤਜ਼ਾਰ ਕਰ ਸਕਦੇ ਸੀ। ਉਸ ਨੂੰ ਈਰਾਨੀ ਕੱਪ 'ਚ ਇਸੇ ਤਰ੍ਹਾਂ ਦੇ ਮੌਸਮ 'ਚ ਖੇਡਣ ਦਿੱਤਾ ਜਾ ਸਕਦਾ ਸੀ ਤੇ ਦੇਖਿਆ ਜਾ ਸਕਦਾ ਸੀ ਕਿ ਉਸ ਦਾ ਸਰੀਰ ਨਮੀ ਵਾਲੇ ਹਾਲਾਤ 'ਚ ਦੋ ਦਿਨ ਫੀਲਡਿੰਗ ਨੂੰ ਸੰਭਾਲ ਸਕਦਾ ਹੈ ਜਾਂ ਨਹੀਂ।'

ਨੋਟ - ਇਸ ਖਬਰ ਬਾਰੇ ਕੀ ਹੈ ਤੁਹਾਡੀ ਰਾਏ। ਕੁਮੈਂਟ ਕਰਕੇ ਦਿਓ ਜਵਾਬ।