IPL ਖੇਡਣਾ ਛੱਡੇਗਾ ਇਹ ਦਿੱਗਜ ਖਿਡਾਰੀ, ਨਿਲਾਮੀ ਤੋਂ ਪਹਿਲਾਂ ਦਿੱਤੇ ਸੰਕੇਤ
01/25/2018 10:17:38 AM
ਨਵੀਂ ਦਿੱਲੀ, (ਬਿਊਰੋ)— ਗੌਤਮ ਗੰਭੀਰ ਨੇ 27 ਅਤੇ 28 ਜਨਵਰੀ ਨੂੰ ਬੈਂਗਲੁਰੂ ਵਿੱਚ ਹੋਣ ਵਾਲੀ ਨਿਲਾਮੀ ਤੋਂ ਪਹਿਲਾਂ ਆਈ.ਪੀ.ਐੱਲ. ਨੂੰ ਛੱਡ ਦੇਣ ਦੇ ਸੰਕੇਤ ਦਿੱਤੇ ਹਨ । ਗੰਭੀਰ ਨੇ ਕਿਹਾ, ''ਮੈਂ ਆਪਣੇ ਕਰੀਅਰ ਦੇ ਉਸ ਪੜਾਅ ਵਿੱਚ ਹਾਂ ਜਿੱਥੇ ਮੈਂ ਸੀਨੀਅਰ ਖਿਡਾਰੀ ਹੋਣਾ ਚਾਹੁੰਦਾ ਹਾਂ, ਯੁਵਾ ਕ੍ਰਿਕਟਰਾਂ ਦਾ ਮੈਂਟਰ ਹੋਣਾ ਚਾਹੁੰਦਾ ਹਾਂ । ਭਾਵੇਂ ਹੀ ਇਹ ਕੇ.ਕੇ.ਆਰ. ਲਈ ਹੋਵੇ ਜਾਂ ਫਿਰ ਸਨਰਾਈਜ਼ਰਸ, ਦਿੱਲੀ ਅਤੇ ਮੁੰਬਈ ਦੇ ਲਈ, ਮੈਨੂੰ ਇਸ ਤੋਂ ਕੋਈ ਪਰੇਸ਼ਾਨੀ ਨਹੀਂ ਹੈ ।'' ਉਨ੍ਹਾਂ ਦੇ ਇਸ ਬਿਆਨ ਤੋਂ ਸਾਫ਼ ਹੈ ਕਿ ਗੰਭੀਰ ਦਾ ਇਹ ਆਖਰੀ ਸੀਜ਼ਨ ਹੈ ਅਤੇ ਉਹ 12ਵੇਂ ਸੀਜ਼ਨ ਵਿੱਚ ਕਿਸੇ ਟੀਮ ਵਿੱਚ ਮੈਂਟਰ ਦੀ ਭੂਮਿਕਾ ਨਿਭਾ ਸਕਦੇ ਹਨ ।
'ਸੀਨੀਅਰ ਖਿਡਾਰੀ' ਦੀ ਭੂਮਿਕਾ ਨਿਭਾਉਣ ਨੂੰ ਹਨ ਤਿਆਰ
ਸਾਲ 2011 ਵਿੱਚ ਜਦੋਂ ਗੌਤਮ ਗੰਭੀਰ ਦਾ ਨਾਂ ਆਈ.ਪੀ.ਐੱਲ. ਨੀਲਾਮੀ ਵਿੱਚ ਆਇਆ ਸੀ ਤਾਂ ਉਨ੍ਹਾਂ ਦੀ ਇਸ ਵਿੱਚ ਦਿਲਚਸਪੀ ਨਾ ਦੇ ਬਰਾਬਰ ਸੀ ਕਿਉਂਕਿ ਵਿਸ਼ਵ ਕੱਪ ਕਰੀਬ ਸੀ । ਪਰ ਇਕ ਵਾਰ ਭਾਰਤ ਦੀ ਖਿਤਾਬੀ ਜਿੱਤ ਵਿੱਚ ਅਹਿਮ ਭੂਮਿਕਾ ਨਿਭਾਉਣ ਦੇ ਬਾਅਦ ਉਨ੍ਹਾਂ ਨੇ ਕੋਲਕਾਤਾ ਨਾਈਟਰਾਈਡਰਸ ਦੀ ਅਗਵਾਈ ਕਰਦੇ ਹੋਏ ਟੀਮ ਨੂੰ ਦੋ ਆਈ.ਪੀ.ਐੱਲ. ਖਿਤਾਬ ਦਿਲਾਏ । ਹੁਣ ਆਈ.ਪੀ.ਐੱਲ. ਦੀ ਇੱਕ ਹੋਰ ਨਿਲਾਮੀ ਹੋਵੇਗੀ ਜਿਸ ਵਿੱਚ ਇਹ ਸਲਾਮੀ ਬੱਲੇਬਾਜ਼ ਕਿਸੇ ਵੀ ਫਰੈਂਚਾਈਜ਼ੀ ਲਈ 'ਸੀਨੀਅਰ ਖਿਡਾਰੀ' ਦੀ ਭੂਮਿਕਾ ਨਿਭਾਉਣ ਲਈ ਤਿਆਰ ਹੈ ।
ਗੰਭੀਰ ਨੇ ਕਿਹਾ, ''2011 ਵਿੱਚ, ਮੈਨੂੰ ਯਾਦ ਹੈ ਕਿ ਇਹ ਜਨਵਰੀ ਦਾ ਮਹੀਨਾ ਸੀ ਅਤੇ ਤੱਦ ਮੇਰੀ ਚਿੰਤਾ ਬਸ ਇਹੀ ਸੀ ਕਿ ਮੈਨੂੰ ਉਸ ਸਾਲ ਹੋਣ ਵਾਲੇ 50 ਓਵਰ ਦੇ ਵਿਸ਼ਵ ਕੱਪ ਲਈ ਚੁਣਿਆ ਜਾਂਦਾ ਹੈ ਜਾਂ ਨਹੀਂ । ਇਹ ਨਿਲਾਮੀ ਦੇ ਦਿਨ ਹੀ ਸੀ, ਮੈਨੂੰ ਚਿੰਤਾ ਹੋ ਰਹੀ ਸੀ । ਹੁਣ ਸੱਤ ਸਾਲ ਬਾਅਦ ਮੇਰਾ ਜੀਵਨ ਅਤੇ ਕ੍ਰਿਕਟ ਦੇ ਪ੍ਰਤੀ ਰਵੱਈਆ ਕਾਫ਼ੀ ਵਿਆਪਕ ਹੋ ਗਿਆ ਹੈ ।''
