IPL 2026: ਰਿਆਨ ਪਰਾਗ ਦੀ ਦਲੇਰਾਨਾ ਕਪਤਾਨੀ; ਗੁਜਰਾਤ ਵਿਰੁੱਧ ਜਿੱਤ ਨਾਲ ਇਰਫਾਨ ਪਠਾਨ ਹੋਏ ਮੁਰੀਦ

ਅਹਿਮਦਾਬਾਦ  : ਭਾਰਤ ਦੇ ਸਾਬਕਾ ਤੇਜ਼ ਗੇਂਦਬਾਜ਼ ਇਰਫਾਨ ਪਠਾਨ ਦਾ ਮੰਨਣਾ ਹੈ ਕਿ ਗੁਜਰਾਤ ਟਾਈਟਨਜ਼ ਵਿਰੁੱਧ ਰਾਜਸਥਾਨ ਰਾਇਲਜ਼ ਦੀ ਰੋਮਾਂਚਕ ਜਿੱਤ ਦੌਰਾਨ ਰਿਆਨ ਪਰਾਗ ਵਲੋਂ ਲਏ ਗਏ ਦਲੇਰਾਨਾ ਫੈਸਲਿਆਂ ਨਾਲ ਇੱਕ ਲੀਡਰ ਵਜੋਂ ਉਨ੍ਹਾਂ ਦਾ ਆਤਮ-ਵਿਸ਼ਵਾਸ ਕਾਫ਼ੀ ਵਧੇਗਾ। ਮੌਜੂਦਾ ਸੀਜ਼ਨ ਵਿੱਚ ਰਾਇਲਜ਼ ਦੀ ਕਮਾਨ ਸੰਭਾਲ ਰਹੇ ਪਰਾਗ ਨੇ ਡੈੱਥ ਓਵਰਾਂ ਵਿੱਚ ਇੱਕ ਅਹਿਮ ਰਣਨੀਤਕ ਫੈਸਲਾ ਲੈਂਦਿਆਂ ਜੋਫਰਾ ਆਰਚਰ ਨੂੰ 19ਵਾਂ ਅਤੇ ਤੁਸ਼ਾਰ ਦੇਸ਼ਪਾਂਡੇ ਨੂੰ ਆਖਰੀ ਓਵਰ ਸੌਂਪਿਆ।

ਸੈਸ਼ਨ ਦਾ ਸਭ ਤੋਂ ਵਧੀਆ ਮੈਚ
ਇਰਫਾਨ ਪਠਾਨ ਨੇ ਇਸ ਮੁਕਾਬਲੇ ਨੂੰ ਹੁਣ ਤੱਕ ਦੇ ਸੀਜ਼ਨ ਦਾ ਸਭ ਤੋਂ ਵਧੀਆ ਮੈਚ ਦੱਸਿਆ ਹੈ। ਉਨ੍ਹਾਂ ਕਿਹਾ ਕਿ ਪਰਾਗ ਲਈ ਇਹ ਬਹੁਤ ਜ਼ਰੂਰੀ ਸੀ ਕਿ ਉਹ ਕਪਤਾਨ ਵਜੋਂ ਟੀਮ ਵਿੱਚ ਸਨਮਾਨ ਹਾਸਲ ਕਰਨ। ਪਠਾਨ ਅਨੁਸਾਰ, ਆਮ ਤੌਰ 'ਤੇ ਸਭ ਤੋਂ ਤਜਰਬੇਕਾਰ ਗੇਂਦਬਾਜ਼ ਨੂੰ ਆਖਰੀ ਤੋਂ ਪਹਿਲੇ (19ਵੇਂ) ਓਵਰ ਲਈ ਚੁਣਿਆ ਜਾਂਦਾ ਹੈ ਅਤੇ ਪਰਾਗ ਨੇ ਆਰਚਰ 'ਤੇ ਭਰੋਸਾ ਜਤਾਇਆ, ਜੋ ਬਿਲਕੁਲ ਸਹੀ ਸਾਬਤ ਹੋਇਆ।

ਆਰਚਰ ਅਤੇ ਦੇਸ਼ਪਾਂਡੇ ਦੀ ਘਾਤਕ ਗੇਂਦਬਾਜ਼ੀ
ਆਰਚਰ ਨੇ ਪਰਾਗ ਦੇ ਫੈਸਲੇ ਨੂੰ ਸਹੀ ਠਹਿਰਾਉਂਦਿਆਂ 19ਵੇਂ ਓਵਰ ਵਿੱਚ ਸਿਰਫ 4 ਦੌੜਾਂ ਦਿੱਤੀਆਂ। ਇਸ ਤੋਂ ਬਾਅਦ ਤੁਸ਼ਾਰ ਦੇਸ਼ਪਾਂਡੇ ਨੇ ਆਖਰੀ ਓਵਰ ਵਿੱਚ 10 ਦੌੜਾਂ ਦਾ ਸਫਲਤਾਪੂਰਵਕ ਬਚਾਅ ਕੀਤਾ ਅਤੇ ਰਾਜਸਥਾਨ ਰਾਇਲਜ਼ ਨੇ ਗੁਜਰਾਤ ਟਾਈਟਨਜ਼ ਨੂੰ 6 ਦੌੜਾਂ ਨਾਲ ਮਾਤ ਦਿੱਤੀ।

ਸਾਈ ਸੁਦਰਸ਼ਨ ਦਾ ਸ਼ਾਨਦਾਰ ਪ੍ਰਦਰਸ਼ਨ
ਗੁਜਰਾਤ ਟਾਈਟਨਜ਼ ਵੱਲੋਂ 211 ਦੌੜਾਂ ਦੇ ਵੱਡੇ ਟੀਚੇ ਦਾ ਪਿੱਛਾ ਕਰਦਿਆਂ ਸਾਈ ਸੁਦਰਸ਼ਨ ਨੇ ਸ਼ਾਨਦਾਰ ਬੱਲੇਬਾਜ਼ੀ ਕੀਤੀ। ਸ਼ੁਭਮਨ ਗਿੱਲ ਦੀ ਗੈਰ-ਮੌਜੂਦਗੀ ਵਿੱਚ ਸੁਦਰਸ਼ਨ ਨੇ ਜ਼ਿੰਮੇਵਾਰੀ ਸੰਭਾਲਦਿਆਂ 44 ਗੇਂਦਾਂ ਵਿੱਚ 73 ਦੌੜਾਂ ਦੀ ਪਾਰੀ ਖੇਡੀ। ਸਾਬਕਾ ਸਪਿਨਰ ਰਵੀਚੰਦਰਨ ਅਸ਼ਵਿਨ ਨੇ ਸੁਦਰਸ਼ਨ ਦੀ ਤਕਨੀਕ ਦੀ ਤਾਰੀਫ਼ ਕਰਦਿਆਂ ਕਿਹਾ ਕਿ ਉਨ੍ਹਾਂ ਨੇ ਗਤੀ ਦਾ ਵਧੀਆ ਇਸਤੇਮਾਲ ਕੀਤਾ ਅਤੇ ਕਵਰ ਡਰਾਈਵ ਦੇ ਨਾਲ-ਨਾਲ ਸਲੌਗ ਸਵੀਪ ਵੀ ਸ਼ਾਨਦਾਰ ਲਗਾਏ।