ਭਾਰਤ ਨੇ ਵਿਸ਼ਵ ਟੈਸਟ ਚੈਂਪੀਅਨਸ਼ਿਪ ਸੂਚੀ ਦੇ ਟਾਪ ''ਤੇ ਆਪਣੀ ਸਥਿਤੀ ਕੀਤੀ ਮਜ਼ਬੂਤ

ਦੁਬਈ : ਭਾਰਤ ਨੇ ਬੰਗਲਾਦੇਸ਼ ਨੂੰ 280 ਦੌੜਾਂ ਨਾਲ ਹਰਾ ਕੇ ਵਿਸ਼ਵ ਟੈਸਟ ਚੈਂਪੀਅਨਸ਼ਿਪ (ਡਬਲਿਊਟੀਸੀ) ਸੂਚੀ ਵਿਚ ਸਿਖਰ ’ਤੇ ਆਪਣੀ ਸਥਿਤੀ ਮਜ਼ਬੂਤ ​​ਕਰ ਲਈ ਹੈ, ਜਦਕਿ ਸ਼੍ਰੀਲੰਕਾ ਨੇ ਗਾਲੇ ਵਿਚ ਨਿਊਜ਼ੀਲੈਂਡ ਨੂੰ ਹਰਾ ਕੇ ਅਗਲੇ ਸਾਲ ਲਾਰਡਜ਼ ਵਿਚ ਹੋਣ ਵਾਲੇ ਫਾਈਨਲ ਲਈ ਆਪਣੀ ਦਾਅਵੇਦਾਰੀ ਮਜ਼ਬੂਤ ​​ਕਰ ਲਈ ਹੈ। ਸ਼੍ਰੀਲੰਕਾ ਆਪਣੇ ਮੌਜੂਦਾ ਵਿਰੋਧੀ ਨਿਊਜ਼ੀਲੈਂਡ ਨੂੰ ਹਰਾ ਕੇ ਤੀਜੇ ਸਥਾਨ 'ਤੇ ਪਹੁੰਚ ਗਿਆ ਹੈ। ਚੇਨਈ ਵਿਚ ਜਿੱਤ ਅਤੇ 12 ਡਬਲਯੂਟੀਸੀ ਅੰਕਾਂ ਦੇ ਨਾਲ ਭਾਰਤ ਨੇ ਆਸਟ੍ਰੇਲੀਆ (62.50 ਫੀਸਦੀ ਅੰਕਾਂ ਨਾਲ ਦੂਜੇ) ਨਾਲੋਂ 71.67 ਫੀਸਦੀ ਅੰਕਾਂ ਨਾਲ ਸੂਚੀ ਵਿਚ ਸਿਖਰ 'ਤੇ ਆਪਣੀ ਸਥਿਤੀ ਮਜ਼ਬੂਤ ​​ਕਰ ਲਈ ਹੈ।

ਪਾਕਿਸਤਾਨ ਖਿਲਾਫ ਸੀਰੀਜ਼ 2-0 ਨਾਲ ਜਿੱਤ ਕੇ ਚੌਥੇ ਸਥਾਨ 'ਤੇ ਪਹੁੰਚੀ ਬੰਗਲਾਦੇਸ਼ (39.29 ਫੀਸਦੀ ਅੰਕ) ਇਸ ਹਾਰ ਤੋਂ ਬਾਅਦ ਛੇਵੇਂ ਸਥਾਨ 'ਤੇ ਖਿਸਕ ਗਈ ਹੈ। ਚੌਥੇ ਦਿਨ ਭਾਰਤ ਦੇ 515 ਦੌੜਾਂ ਦੇ ਟੀਚੇ ਦਾ ਪਿੱਛਾ ਕਰਨ ਉਤਰੀ ਬੰਗਲਾਦੇਸ਼ ਨੇ ਚਾਰ ਵਿਕਟਾਂ 'ਤੇ 158 ਦੌੜਾਂ ਤੋਂ ਖੇਡ ਦੀ ਸ਼ੁਰੂਆਤ ਕੀਤੀ। ਕਪਤਾਨ ਨਜ਼ਮੁਲ ਹੁਸੈਨ ਸ਼ਾਂਤੋ ਅਤੇ ਸ਼ਾਕਿਬ ਅਲ ਹਸਨ ਨੇ ਕੁਝ ਸਮੇਂ ਲਈ ਹਾਰ ਤੋਂ ਬਚਿਆ ਪਰ ਭਾਰਤ ਦੀ ਸਪਿਨ ਜੋੜੀ ਰਵੀਚੰਦਰਨ ਅਸ਼ਵਿਨ ਅਤੇ ਰਵਿੰਦਰ ਜਡੇਜਾ ਨੇ ਸਿਰਫ਼ 40 ਦੌੜਾਂ ਦੇ ਕੇ ਬਾਕੀ ਦੀਆਂ ਛੇ ਵਿਕਟਾਂ ਲਈਆਂ।

ਇਹ ਵੀ ਪੜ੍ਹੋ : ਸਮਿਥ ਨੇ ਬੁਮਰਾਹ ਦੀਆਂ ਤਾਰੀਫ਼ਾਂ ਦੇ ਬੰਨ੍ਹੇ ਪੁਲ, ਸਾਰੇ ਫਾਰਮੈਟਾਂ 'ਚ ਦੱਸਿਆ ਸਰਬੋਤਮ ਤੇਜ਼ ਗੇਂਦਬਾਜ਼

ਅਸ਼ਵਿਨ ਨੂੰ ਪਹਿਲੀ ਪਾਰੀ 'ਚ ਸ਼ਾਨਦਾਰ ਸੈਂਕੜਾ ਲਗਾਉਣ ਅਤੇ ਦੂਜੀ ਪਾਰੀ 'ਚ ਛੇ ਵਿਕਟਾਂ ਲੈਣ ਲਈ 'ਪਲੇਅਰ ਆਫ ਦਿ ਮੈਚ' ਚੁਣਿਆ ਗਿਆ। ਗਾਲੇ 'ਚ ਜਿੱਤ ਤੋਂ ਬਾਅਦ ਸੂਚੀ 'ਤੇ ਤੀਜੇ ਸਥਾਨ 'ਤੇ ਪਹੁੰਚ ਚੁੱਕੇ ਸ਼੍ਰੀਲੰਕਾ ਕੋਲ 2025 ਦੇ ਫਾਈਨਲ 'ਚ ਜਗ੍ਹਾ ਬਣਾਉਣ ਲਈ 2023 WTC ਫਾਈਨਲਿਸਟ ਭਾਰਤ ਅਤੇ ਆਸਟ੍ਰੇਲੀਆ ਨੂੰ ਚੁਣੌਤੀ ਦੇਣ ਦਾ ਸਭ ਤੋਂ ਵਧੀਆ ਮੌਕਾ ਹੈ। ਗਾਲੇ 'ਚ ਨਿਊਜ਼ੀਲੈਂਡ 'ਤੇ 63 ਦੌੜਾਂ ਦੀ ਜਿੱਤ ਸ਼੍ਰੀਲੰਕਾ ਦੀ ਅੱਠ ਮੈਚਾਂ 'ਚ ਚੌਥੀ ਜਿੱਤ ਸੀ, ਜਿਸ ਨਾਲ ਉਨ੍ਹਾਂ ਦੇ ਅੰਕ 50 ਫੀਸਦੀ ਹੋ ਗਏ ਹਨ।

ਸ਼੍ਰੀਲੰਕਾ ਦੀ ਟੀਮ ਮੌਜੂਦਾ ਦੌਰ 'ਚ ਹੁਣ ਵੱਧ ਤੋਂ ਵੱਧ 69.23 ਫੀਸਦੀ ਅੰਕ ਹਾਸਲ ਕਰ ਸਕਦੀ ਹੈ, ਜੋ ਉਸ ਨੂੰ ਅਗਲੇ ਸਾਲ ਲਾਰਡਸ 'ਚ ਹੋਣ ਵਾਲੇ ਫਾਈਨਲ 'ਚ ਜਗ੍ਹਾ ਦਿਵਾਉਣ ਲਈ ਕਾਫੀ ਹੋਵੇਗੀ। ਇਸ ਲਈ ਟੀਮ ਨੂੰ ਨਿਊਜ਼ੀਲੈਂਡ ਨੂੰ ਇਕ ਵਾਰ ਫਿਰ ਹਰਾਉਣਾ ਹੋਵੇਗਾ ਅਤੇ ਫਿਰ ਦੱਖਣੀ ਅਫਰੀਕਾ ਅਤੇ ਆਸਟ੍ਰੇਲੀਆ ਦਾ ਸਫ਼ਾਇਆ ਕਰਨਾ ਹੋਵੇਗਾ। ਭਾਰਤ ਨੇ ਡਬਲਯੂਟੀਸੀ ਚੱਕਰ ਵਿਚ ਅਜੇ ਵੀ 9 ਹੋਰ ਟੈਸਟ ਖੇਡਣੇ ਹਨ ਅਤੇ ਲਗਾਤਾਰ ਤੀਜੀ ਵਾਰ ਡਬਲਯੂਟੀਸੀ ਫਾਈਨਲ ਵਿਚ ਜਗ੍ਹਾ ਬਣਾਉਣ ਲਈ ਉਸ ਦੀ ਨਜ਼ਰ ਹੈ। ਨਿਊਜ਼ੀਲੈਂਡ (2020) ਅਤੇ ਆਸਟ੍ਰੇਲੀਆ (2022) ਖਿਲਾਫ ਫਾਈਨਲ ਵਿਚ ਹਾਰ ਕੇ ਭਾਰਤ ਪਿਛਲੇ ਦੋ ਸੈਸ਼ਨਾਂ ਵਿਚ ਉਪ ਜੇਤੂ ਰਿਹਾ ਸੀ।

ਜਗਬਾਣੀ ਈ-ਪੇਪਰ ਨੂੰ ਪੜ੍ਹਨ ਅਤੇ ਐਪ ਨੂੰ ਡਾਊਨਲੋਡ ਕਰਨ ਲਈ ਇੱਥੇ ਕਲਿੱਕ ਕਰੋ 
For Android:-  https://play.google.com/store/apps/details?id=com.jagbani&hl=en 
For IOS:-  https://itunes.apple.com/in/app/id538323711?mt=8