ਭਾਰਤ ਦੇ ਚੋਟੀ ਦੇ ਐਥਲੀਟਾਂ ਨਾਲ ਰੇਲਗੱਡੀ ਵਿੱਚ ਬਦਸਲੂਕੀ: ਨੈਸ਼ਨਲ ਰਿਕਾਰਡ ਹੋਲਡਰਾਂ ਨੂੰ ਅੱਧੇ ਰਸਤੇ ''ਚ ਉਤਾਰਿਆ

ਪਨਵੇਲ/ਭੋਪਾਲ : ਦੇਸ਼ ਦੇ ਸਿਖਰਲੇ ਪੋਲ ਵਾਲਟਰ ਦੇਵ ਮੀਣਾ ਅਤੇ ਕੁਲਦੀਪ ਯਾਦਵ ਨੂੰ ਰੇਲਗੱਡੀ ਵਿੱਚ ਸਫਰ ਦੌਰਾਨ ਬੇਹੱਦ ਮਾੜੇ ਵਤੀਰੇ ਦਾ ਸਾਹਮਣਾ ਕਰਨਾ ਪਿਆ, ਜਿਸ ਕਾਰਨ ਉਨ੍ਹਾਂ ਨੂੰ ਪਨਵੇਲ ਰੇਲਵੇ ਸਟੇਸ਼ਨ 'ਤੇ ਕਈ ਘੰਟਿਆਂ ਤੱਕ ਖੱਜਲ-ਖੁਆਰ ਹੋਣਾ ਪਿਆ। ਬੈਂਗਲੁਰੂ ਵਿੱਚ ਆਲ ਇੰਡੀਆ ਇੰਟਰ-ਯੂਨੀਵਰਸਿਟੀ ਐਥਲੈਟਿਕਸ ਚੈਂਪੀਅਨਸ਼ਿਪ ਤੋਂ ਵਾਪਸ ਭੋਪਾਲ ਪਰਤ ਰਹੇ ਇਨ੍ਹਾਂ ਖਿਡਾਰੀਆਂ ਨੂੰ ਰੇਲਗੱਡੀ ਵਿੱਚੋਂ ਉਤਾਰ ਦਿੱਤਾ ਗਿਆ, ਜਿਸ ਨਾਲ ਸੋਸ਼ਲ ਮੀਡੀਆ 'ਤੇ ਪ੍ਰਸ਼ੰਸਕਾਂ ਵਿੱਚ ਭਾਰੀ ਰੋਸ ਦੇਖਣ ਨੂੰ ਮਿਲ ਰਿਹਾ ਹੈ,।

ਕੀ ਸੀ ਵਿਵਾਦ ਦਾ ਕਾਰਨ? 
ਇਸ ਹੰਗਾਮੇ ਦਾ ਮੁੱਖ ਕਾਰਨ ਖਿਡਾਰੀਆਂ ਦੇ ਪੋਲ ਵਾਲਟ ਪੋਲ (ਖੇਡ ਦਾ ਸਾਮਾਨ) ਸਨ। ਇਨ੍ਹਾਂ ਪੋਲਾਂ ਦੀ ਲੰਬਾਈ ਲਗਭਗ 5 ਮੀਟਰ ਹੈ ਅਤੇ ਇੱਕ ਪੋਲ ਦੀ ਕੀਮਤ ਤਕਰੀਬਨ 2 ਲੱਖ ਰੁਪਏ ਹੈ। ਰੇਲਗੱਡੀ ਵਿੱਚ ਮੌਜੂਦ ਇੱਕ ਟੀ.ਟੀ.ਈ (TTE) ਨੇ ਇਨ੍ਹਾਂ ਪੋਲਾਂ 'ਤੇ ਇਤਰਾਜ਼ ਜਤਾਉਂਦਿਆਂ ਇਨ੍ਹਾਂ ਨੂੰ "ਅਣਅਧਿਕਾਰਤ ਸਮਾਨ" ਕਰਾਰ ਦਿੱਤਾ। ਖਿਡਾਰੀਆਂ ਵੱਲੋਂ ਤੁਰੰਤ ਜੁਰਮਾਨਾ ਭਰਨ ਦੀ ਪੇਸ਼ਕਸ਼ ਅਤੇ ਸੀਨੀਅਰ ਅਧਿਕਾਰੀਆਂ ਨਾਲ ਗੱਲ ਕਰਨ ਦੀ ਬੇਨਤੀ ਨੂੰ ਵੀ ਅਧਿਕਾਰੀ ਨੇ ਠੁਕਰਾ ਦਿੱਤਾ ਅਤੇ ਉਨ੍ਹਾਂ ਨੂੰ ਪਨਵੇਲ ਸਟੇਸ਼ਨ 'ਤੇ ਉਤਰਨ ਲਈ ਮਜ਼ਬੂਰ ਕੀਤਾ।

ਖਿਡਾਰੀਆਂ ਦਾ ਦਰਦ ਅਤੇ ਰਿਕਾਰਡ 
ਨੈਸ਼ਨਲ ਰਿਕਾਰਡ ਹੋਲਡਰ (5.40 ਮੀਟਰ) ਦੇਵ ਮੀਣਾ ਨੇ ਇੱਕ ਵੀਡੀਓ ਰਾਹੀਂ ਆਪਣਾ ਗੁੱਸਾ ਜ਼ਾਹਰ ਕਰਦਿਆਂ ਕਿਹਾ, "ਸਾਨੂੰ ਇੱਥੇ ਚਾਰ-ਪੰਜ ਘੰਟੇ ਇੰਤਜ਼ਾਰ ਕਰਵਾਇਆ ਗਿਆ। ਜੇਕਰ ਇੱਕ ਅੰਤਰਰਾਸ਼ਟਰੀ ਪੱਧਰ ਦੇ ਖਿਡਾਰੀ ਨਾਲ ਅਜਿਹਾ ਹੋ ਰਿਹਾ ਹੈ, ਤਾਂ ਮੈਂ ਆਪਣੇ ਜੂਨੀਅਰਾਂ ਤੋਂ ਕੀ ਉਮੀਦ ਕਰ ਸਕਦਾ ਹਾਂ?"। ਇਸੇ ਤਰ੍ਹਾਂ ਬੈਂਗਲੁਰੂ ਮੀਟ ਵਿੱਚ ਗੋਲਡ ਮੈਡਲ ਜਿੱਤਣ ਵਾਲੇ ਕੁਲਦੀਪ ਯਾਦਵ ਨੇ ਦੱਸਿਆ ਕਿ ਉਨ੍ਹਾਂ ਨੂੰ ਫਲਾਈਟਾਂ ਵਿੱਚ ਵੀ ਅਜਿਹੀਆਂ ਹੀ ਮੁਸ਼ਕਲਾਂ ਦਾ ਸਾਹਮਣਾ ਕਰਨਾ ਪੈਂਦਾ ਹੈ। ਉਨ੍ਹਾਂ ਕਿਹਾ ਕਿ ਖਿਡਾਰੀ ਸਾਮਾਨ ਲਈ ਪੈਸੇ ਦੇਣ ਨੂੰ ਤਿਆਰ ਹਨ, ਪਰ ਉਨ੍ਹਾਂ ਦੇ ਕੀਮਤੀ ਸਮਾਨ ਨੂੰ ਸਹੀ ਢੰਗ ਨਾਲ ਲਿਜਾਣ ਦੀ ਸਹੂਲਤ ਮਿਲਣੀ ਚਾਹੀਦੀ ਹੈ।

ਸ਼ਰਤਾਂ ਨਾਲ ਮਿਲੀ ਇਜਾਜ਼ਤ 
ਇਸ ਗਤੀਰੋਧ ਕਾਰਨ ਖਿਡਾਰੀਆਂ ਦੀ ਕਨੈਕਟਿੰਗ ਟ੍ਰੇਨ ਵੀ ਛੁੱਟ ਗਈ। ਕਾਫੀ ਜੱਦੋ-ਜਹਿਦ ਅਤੇ ਜੁਰਮਾਨਾ ਭਰਨ ਤੋਂ ਬਾਅਦ ਉਨ੍ਹਾਂ ਨੂੰ ਦੂਜੀ ਰੇਲਗੱਡੀ ਵਿੱਚ ਚੜ੍ਹਨ ਦੀ ਇਜਾਜ਼ਤ ਤਾਂ ਮਿਲੀ, ਪਰ ਇੱਕ ਸਖ਼ਤ ਸ਼ਰਤ ਦੇ ਨਾਲ। ਉਨ੍ਹਾਂ ਨੂੰ ਕਿਹਾ ਗਿਆ ਕਿ ਜੇਕਰ ਕਿਸੇ ਵੀ ਯਾਤਰੀ ਨੇ ਪੋਲ ਕਾਰਨ ਜਗ੍ਹਾ ਘੇਰਨ ਦੀ ਸ਼ਿਕਾਇਤ ਕੀਤੀ, ਤਾਂ ਉਨ੍ਹਾਂ ਵਿਰੁੱਧ ਹੋਰ ਕਾਰਵਾਈ ਕੀਤੀ ਜਾਵੇਗੀ।

ਖੇਡ ਜਗਤ ਦੇ ਹਾਲਾਤ
ਇਹ ਮੰਦਭਾਗੀ ਘਟਨਾ ਉਸ ਸਮੇਂ ਸਾਹਮਣੇ ਆਈ ਹੈ ਜਦੋਂ ਦੇਸ਼ ਏਸ਼ੀਆਈ ਖੇਡਾਂ ਲਈ ਕੁਆਲੀਫਾਈ ਕਰਨ ਅਤੇ ਨਵੀਆਂ ਉਚਾਈਆਂ ਨੂੰ ਛੂਹਣ ਦੇ ਸੁਪਨੇ ਦੇਖ ਰਿਹਾ ਹੈ। ਜਦੋਂ ਕਿ ਦੂਜੇ ਪਾਸੇ ਕ੍ਰਿਕਟ ਜਗਤ ਵਿੱਚ ਵਿਰਾਟ ਕੋਹਲੀ ਅਤੇ ਰੋਹਿਤ ਸ਼ਰਮਾ ਵਰਗੇ ਦਿੱਗਜ ਦੱਖਣੀ ਅਫ਼ਰੀਕਾ ਵਿਰੁੱਧ ਪਹਿਲੇ ਟੈਸਟ ਲਈ ਅਭਿਆਸ ਸੈਸ਼ਨਾਂ ਵਿੱਚ ਪਸੀਨਾ ਵਹਾ ਰਹੇ ਹਨ, ਇਨ੍ਹਾਂ ਐਥਲੀਟਾਂ ਦੀ ਖੱਜਲ-ਖੁਆਰੀ ਖੇਡਾਂ ਦੇ ਬੁਨਿਆਦੀ ਢਾਂਚੇ ਅਤੇ ਸਹੂਲਤਾਂ 'ਤੇ ਵੱਡੇ ਸਵਾਲ ਖੜ੍ਹੇ ਕਰਦੀ ਹੈ।