IND vs AFG: ਸਾਬਕਾ ਭਾਰਤੀ ਸਟਾਰ ਨੇ ਸੰਜੂ ਸੈਮਸਨ ਦੀ ਕੀਤੀ ਤਾਰੀਫ, ਬੋਲੇ-''ਉਨ੍ਹਾਂ ਨੇ ਬਹਿਸ ਖਤਮ ਕਰ''ਤੀ''
Thursday, Sep 17, 2026 - 04:46 PM (IST)
ਸਪੋਰਟਸ ਡੈਸਕ- ਨਵੀਂ ਦਿੱਲੀ ਦੇ ਅਰੁਣ ਜੇਤਲੀ ਸਟੇਡੀਅਮ ਵਿਖੇ ਅਫ਼ਗਾਨਿਸਤਾਨ ਵਿਰੁੱਧ ਖੇਡੇ ਗਏ ਦੂਜੇ ਟੀ-20I ਮੈਚ ਵਿੱਚ ਭਾਰਤੀ ਵਿਕਟਕੀਪਰ-ਬੱਲੇਬਾਜ਼ ਸੰਜੂ ਸੈਮਸਨ ਨੇ ਮਹਿਜ਼ 22 ਗੇਂਦਾਂ ਵਿੱਚ 57 ਦੌੜਾਂ ਦੀ ਤੂਫ਼ਾਨੀ ਪਾਰੀ ਖੇਡ ਕੇ ਭਾਰਤ ਨੂੰ 7 ਵਿਕਟਾਂ ਨਾਲ ਸ਼ਾਨਦਾਰ ਜਿੱਤ ਦਿਵਾਈ। ਲੜੀ ਦੇ ਪਹਿਲੇ ਮੈਚ ਵਿੱਚ ਸਿਰਫ਼ 10 ਦੌੜਾਂ 'ਤੇ ਆਊਟ ਹੋਣ ਤੋਂ ਬਾਅਦ ਸੈਮਸਨ ਦੀ ਟੀਮ ਵਿੱਚ ਜਗ੍ਹਾ 'ਤੇ ਸਵਾਲ ਖੜ੍ਹੇ ਹੋ ਰਹੇ ਸਨ, ਪਰ ਇਸ ਧਮਾਕੇਦਾਰ ਅਰਧ-ਸੈਂਕੜੇ (ਜਿਸ ਵਿੱਚ 7 ਚੌਕੇ ਅਤੇ 4 ਛੱਕੇ ਸ਼ਾਮਲ ਸਨ) ਨਾਲ ਉਨ੍ਹਾਂ ਨੇ ਭਾਰਤ ਨੂੰ 3 ਮੈਚਾਂ ਦੀ ਲੜੀ ਵਿੱਚ 2-0 ਦੀ ਅਜੇਤੂ ਬੜ੍ਹਤ ਦਿਵਾ ਦਿੱਤੀ।
ਸੈਮਸਨ ਦੀ ਇਸ ਸ਼ਾਨਦਾਰ ਵਾਪਸੀ ਤੋਂ ਬਾਅਦ ਭਾਰਤ ਦੇ ਸਾਬਕਾ ਤੇਜ਼ ਗੇਂਦਬਾਜ਼ ਮੋਹਿਤ ਸ਼ਰਮਾ ਨੇ ਉਨ੍ਹਾਂ ਦੀ ਜੰਮ ਕੇ ਸ਼ਲਾਘਾ ਕੀਤੀ। ਮੋਹਿਤ ਸ਼ਰਮਾ ਨੇ 'ਕ੍ਰਿਕਬਜ਼' ਨਾਲ ਗੱਲਬਾਤ ਕਰਦਿਆਂ ਕਿਹਾ ਕਿ ਅਸੀਂ ਅਕਸਰ ਸੰਜੂ ਦਾ ਆਕਲਨ ਕਰਨ ਵਿੱਚ ਬਹੁਤ ਜਲਦਬਾਜ਼ੀ ਕਰ ਦਿੰਦੇ ਹਾਂ, ਪਰ ਜਿਸ ਤਰ੍ਹਾਂ ਉਨ੍ਹਾਂ ਨੇ ਇਸ ਮੈਚ ਵਿੱਚ ਬੱਲੇਬਾਜ਼ੀ ਕੀਤੀ ਹੈ, ਉਸ ਨਾਲ ਉਨ੍ਹਾਂ ਨੇ ਟੀਮ 'ਚ ਆਪਣੀ ਚੋਣ ਨੂੰ ਲੈ ਕੇ ਚੱਲ ਰਹੀ ਸਾਰੀ ਬਹਿਸ ਹੀ ਖ਼ਤਮ ਕਰ ਦਿੱਤੀ ਹੈ ('ਡਿਬੇਟ ਬੰਦ ਕਰਦੀ')।
ਜ਼ਿਕਰਯੋਗ ਹੈ ਕਿ 15 ਸਾਲਾ ਨੌਜਵਾਨ ਬੱਲੇਬਾਜ਼ ਵੈਭਵ ਸੂਰਿਆਵੰਸ਼ੀ ਦੇ ਸ਼ਾਨਦਾਰ ਪ੍ਰਦਰਸ਼ਨ ਤੋਂ ਬਾਅਦ ਸੰਜੂ ਸੈਮਸਨ 'ਤੇ ਟੀਮ ਵਿੱਚ ਆਪਣੀ ਜਗ੍ਹਾ ਬਣਾਏ ਰੱਖਣ ਦਾ ਕਾਫ਼ੀ ਦਬਾਅ ਸੀ। ਸਾਬਕਾ ਭਾਰਤੀ ਬੱਲੇਬਾਜ਼ ਮੁਹੰਮਦ ਕੈਫ਼ ਨੇ ਵੀ ਮੰਨਿਆ ਕਿ ਸੈਮਸਨ ਦੀ ਅਸਥਿਰਤਾ ਕਾਰਨ ਹੀ ਸੂਰਿਆਵੰਸ਼ੀ ਦਾ ਨਾਂ ਚਰਚਾ ਵਿੱਚ ਆਇਆ ਸੀ, ਪਰ ਜੇਕਰ ਸੈਮਸਨ ਲਗਾਤਾਰ ਅਜਿਹਾ ਪ੍ਰਦਰਸ਼ਨ ਕਰਦੇ ਰਹਿੰਦੇ ਹਨ, ਤਾਂ ਉਹ ਟੀਮ ਵਿੱਚ ਆਪਣੇ ਸਥਾਨ ਨੂੰ ਪੂਰੀ ਤਰ੍ਹਾਂ ਪੱਕਾ ਰੱਖਣਗੇ।
ਮੈਚ ਤੋਂ ਬਾਅਦ ਹੋਈ ਪ੍ਰੈੱਸ ਕਾਨਫਰੰਸ ਵਿੱਚ ਸੰਜੂ ਸੈਮਸਨ ਨੇ ਕਿਹਾ ਕਿ ਬਾਹਰੀ ਦੁਨੀਆ ਲਈ ਵੈਭਵ ਸੂਰਿਆਵੰਸ਼ੀ ਅਤੇ ਉਹ ਇੱਕ-ਦੂਜੇ ਦੇ ਪ੍ਰਤੀਦਵੰਦੀ ਹੋ ਸਕਦੇ ਹਨ, ਪਰ ਉਹ ਸਾਰੇ ਇੱਕ ਟੀਮ ਵਜੋਂ ਦੇਸ਼ ਲਈ ਖੇਡ ਰਹੇ ਹਨ। ਉਨ੍ਹਾਂ ਕਿਹਾ ਕਿ ਟੀਮ ਦਾ ਮੁੱਖ ਮਕਸਦ ਮੈਚ ਜਿੱਤਣਾ ਹੈ ਅਤੇ ਉਹ ਟੀਮ ਪ੍ਰਬੰਧਨ (ਕੋਚ ਗੌਤਮ ਗੰਭੀਰ ਅਤੇ ਕਪਤਾਨ ਸ਼੍ਰੇਅਸ ਅਈਅਰ) ਦੁਆਰਾ ਦਿਖਾਏ ਗਏ ਭਰੋਸੇ 'ਤੇ ਖਰੇ ਉੱਤਰ ਕੇ ਬਹੁਤ ਖ਼ੁਸ਼ ਹਨ।
