ਪ੍ਰਸਿੱਧ ਕ੍ਰਿਸ਼ਨਾ ਨੂੰ ਭਾਰਤ ਲਈ ਤਿੰਨੋ ਫਾਰਮੈਟ 'ਚ ਖੇਡਦੇ ਹੋਏ ਦੇਖਦਾ ਹਾਂ : ਜੋਸ ਬਟਲਰ

ਮੁੰਬਈ- ਰਾਜਸਥਾਨ ਰਾਇਲਜ਼ ਦੇ ਤਜਰਬੇਕਾਰ ਸਲਾਮੀ ਬੱਲੇਬਾਜ਼ ਜੋਸ ਬਟਲਰ ਦਾ ਮੰਨਣਾ ਹੈ ਕਿ ਉਸ ਦੀ ਟੀਮ ਦੇ ਮਸ਼ਹੂਰ ਖਿਡਾਰੀ ਪ੍ਰਸਿੱਧ ਕ੍ਰਿਸ਼ਨਾ ਵਿਚ ਇਕ ਸਫਲ ਤੇਜ਼ ਗੇਂਦਬਾਜ਼ ਬਣਨ ਦੇ ਸਾਰੇ ਗੁਣ ਹਨ ਤੇ ਉਹ ਇਸ ਨੌਜਵਾਨ ਨੂੰ ਭਾਰਤ ਲਈ ਤਿੰਨਾਂ ਫਾਰਮੈਟਾਂ ਵਿਚ ਖੇਡਦੇ ਹੋਏ ਦੇਖਦੇ ਹਨ। ਕ੍ਰਿਸ਼ਨਾ ਨੇ ਪਿਛਲੇ ਸਾਲ ਮਾਰਚ 'ਚ ਭਾਰਤ ਲਈ ਵਨਡੇ ਡੈਬਿਊ ਕੀਤਾ ਸੀ ਅਤੇ ਉਸ ਦਾ ਪ੍ਰਦਰਸ਼ਨ ਵੀ ਚੰਗਾ ਰਿਹਾ ਹੈ। ਉਸਨੇ ਆਪਣੀ ਗਤੀ ਅਤੇ ਉਛਾਲ ਨਾਲ ਵੈਸਟਇੰਡੀਜ਼ ਟੀਮ ਨੂੰ ਪਰੇਸ਼ਾਨ ਕੀਤਾ ਅਤੇ ਕੋਲਕਾਤਾ ਨਾਈਟ ਰਾਈਡਰਜ਼ ਲਈ ਖੇਡਦੇ ਹੋਏ ਆਈਪੀਐਲ ਦੇ ਪਿਛਲੇ ਸੀਜ਼ਨ ਵਿੱਚ ਵੀ ਚੰਗਾ ਪ੍ਰਦਰਸ਼ਨ ਕੀਤਾ।

ਜੋਸ ਬਟਲਰ ਨੇ ਕਿਹਾ ਕਿ ਉਸ ਕੋਲ ਰਫਤਾਰ ਅਤੇ ਹੁਨਰ ਦੀ ਕੋਈ ਕਮੀ ਨਹੀਂ ਹੈ ਅਤੇ ਉਸ ਵਿਚ ਖੇਡ ਦੇ ਸਾਰੇ ਫਾਰਮੈਟਾਂ ਵਿਚ ਭਾਰਤ ਲਈ ਬਹੁਤ ਸਫਲ ਤੇਜ਼ ਗੇਂਦਬਾਜ਼ ਬਣਨ ਦੇ ਸਾਰੇ ਗੁਣ ਹਨ। ਮੈਂ ਉਸ ਨੂੰ ਭਾਰਤ ਲਈ ਲਾਲ ਗੇਂਦ ਦੀ ਕ੍ਰਿਕਟ ਖੇਡਦੇ ਹੋਏ ਵੀ ਦੇਖਦਾ ਹਾਂ। ਧਮਾਕੇਦਾਰ ਸਲਾਮੀ ਬੱਲੇਬਾਜ਼ ਦਾ ਮੰਨਣਾ ਹੈ ਕਿ ਟੀਮ ਨੂੰ ਨਾਜ਼ੁਕ ਹਾਲਾਤਾਂ 'ਚ ਤਜ਼ਰਬੇਕਾਰ ਰਵੀਚੰਦਰਨ ਅਸ਼ਵਿਨ, ਯੁਜਵੇਂਦਰ ਚਾਹਲ ਅਤੇ ਟ੍ਰੇਂਟ ਬੋਲਟ ਦੇ ਅਨਮੋਲ ਅਨੁਭਵ ਦਾ ਫਾਇਦਾ ਹੋ ਰਿਹਾ ਹੈ। ਬਟਲਰ ਨੇ ਕਿਹਾ ਕਿ ਉਨ੍ਹਾਂ ਦਾ ਤਜਰਬਾ ਸੱਚਮੁੱਚ ਅਨਮੋਲ ਹੈ ਅਤੇ ਉਨ੍ਹਾਂ ਲੋਕਾਂ ਦਾ ਹੋਣਾ ਸ਼ਾਨਦਾਰ ਹੈ। ਮੁੰਬਈ ਦੇ ਖਿਲਾਫ ਖੇਡ ਮੁਸ਼ਕਿਲ ਸੀ ਅਤੇ ਸਾਨੂੰ ਵਿਕਟਾਂ ਦੀ ਜ਼ਰੂਰਤ ਸੀ, ਅਸ਼ਵਿਨ ਨੇ ਸ਼ਾਨਦਾਰ ਵਿਕਟਾਂ ਲਈਆਂ ਅਤੇ ਫਿਰ ਯੂਜੀ ਨੇ ਦੋ ਗੇਂਦਾਂ ਵਿੱਚ ਦੋ ਵਿਕਟਾਂ ਲਈਆਂ। ਉਹ ਚੋਟੀ ਦੇ ਪ੍ਰਦਰਸ਼ਨਕਾਰ ਹਨ ਅਤੇ ਉਹ ਜਾਣਦੇ ਹਨ ਕਿ ਕੰਮ ਕਿਵੇਂ ਕਰਨਾ ਹੈ।

ਕਪਤਾਨ ਸੰਜੂ ਸੈਮਸਨ ਦੇ ਬਾਰੇ 'ਚ ਬਟਲਰ ਨੇ ਕਿਹਾ ਕਿ ਉਹ ਹੁਣ ਪਹਿਲਾਂ ਨਾਲੋਂ ਜ਼ਿਆਦਾ ਪਰਿਪੱਕ ਹੋ ਗਏ ਹਨ। ਅਸੀਂ ਉਨ੍ਹਾਂ ਦੀ ਕਪਤਾਨੀ 'ਚ ਖੇਡਣ ਦਾ ਮਜ਼ਾ ਲੈ ਰਹੇ ਹਾਂ ਅਤੇ ਉਹ ਸ਼ਾਨਦਾਰ ਮਾਹੌਲ ਸਿਰਜਦਾ ਹੈ। ਉਹ ਬਹੁਤ ਹੀ ਮਜ਼ਾਕੀਆ ਵਿਅਕਤੀ ਹੈ ਅਤੇ ਉਸ ਨੂੰ ਪੂਰੀ ਟੀਮ ਵੱਲੋਂ ਸਨਮਾਨ ਮਿਲਦਾ ਹੈ। ਆਈਪੀਐਲ 2022 ਵਿੱਚ ਹਰ ਮੈਚ ਵਿੱਚ ਤ੍ਰੇਲ ਦੀ ਵੱਡੀ ਭੂਮਿਕਾ ਬਾਰੇ, ਬਟਲਰ ਨੇ ਕਿਹਾ ਕਿ ਤ੍ਰੇਲ ਇੱਕ ਅਜਿਹੀ ਚੀਜ਼ ਹੈ ਜਿਸ ਨੂੰ ਅਸੀਂ ਕਾਬੂ ਨਹੀਂ ਕਰ ਸਕਦੇ ਪਰ ਅਸੀਂ ਗਿੱਲੀ ਗੇਂਦ ਨਾਲ ਅਭਿਆਸ ਕਰ ਸਕਦੇ ਹਾਂ ਅਤੇ ਇਸਦੀ ਆਦਤ ਪਾ ਸਕਦੇ ਹਾਂ। ਫੀਲਡਿੰਗ ਲਈ ਵੀ, ਥੋੜ੍ਹਾ ਪਾਣੀ ਪਾਓ ਅਤੇ ਗੇਂਦ ਨੂੰ ਫੜਨ ਦਾ ਅਭਿਆਸ ਕਰੋ ਕਿਉਂਕਿ ਤ੍ਰੇਲ ਇੱਕ ਵੱਡਾ ਕਾਰਕ ਹੈ। ਲੋੜ ਇਸ ਗੱਲ ਦੀ ਹੈ ਕਿ ਅਸੀਂ ਜਿੰਨੀ ਜਲਦੀ ਇਸਦੀ ਆਦਤ ਪਾ ਲਵਾਂਗੇ, ਓਨਾ ਹੀ ਚੰਗਾ ਹੈ।