ਵਿਸ਼ਵ ਬਾਕਸਿੰਗ ਚੈਂਪੀਅਨਸ਼ਿਪ ਤੋਂ ਪਹਿਲਾਂ ਸਭ ਖਿਡਾਰਣਾਂ ਦਾ ਲਿੰਗ ਟੈਸਟ ਲਾਜ਼ਮੀ

ਲਾਸ ਏਂਜਲਸ – ਓਲੰਪਿਕ ਸ਼ੈਲੀ ਦੀ ਬਾਕਸਿੰਗ ਦੀ ਨਿਯਾਮਕ ਸੰਸਥਾ ਵਰਲਡ ਬਾਕਸਿੰਗ ਨੇ ਐਲਾਨ ਕੀਤਾ ਹੈ ਕਿ ਅਗਲੇ ਮਹੀਨੇ ਇੰਗਲੈਂਡ ਦੇ ਲਿਵਰਪੂਲ ‘ਚ ਹੋਣ ਵਾਲੀ ਵਿਸ਼ਵ ਬਾਕਸਿੰਗ ਚੈਂਪੀਅਨਸ਼ਿਪ ਤੋਂ ਪਹਿਲਾਂ ਮਹਿਲਾ ਵਰਗ ਵਿੱਚ ਹਿੱਸਾ ਲੈਣ ਵਾਲੀਆਂ ਸਭ ਖਿਡਾਰਣਾਂ ਲਈ ਲਿੰਗ ਟੈਸਟ ਕਰਵਾਉਣਾ ਲਾਜ਼ਮੀ ਹੋਵੇਗਾ।

ਸੰਸਥਾ ਅਨੁਸਾਰ ਮੁਕਾਬਲੇ ਵਿੱਚ ਸ਼ਾਮਲ ਖਿਡਾਰਣਾਂ ਦਾ ਜਨਮ ਸਮੇਂ ਲਿੰਗ ਦੀ ਪੁਸ਼ਟੀ ਕਰਨ ਲਈ ਪੋਲੀਮੇਰੇਜ਼ ਚੇਨ ਰਿਏਕਸ਼ਨ ਟੈਸਟ (PCR) ਜਾਂ ਇਸ ਤਰ੍ਹਾਂ ਦੇ ਜੈਨੇਟਿਕ ਸਕ੍ਰੀਨਿੰਗ ਟੈਸਟ ਕੀਤੇ ਜਾਣਗੇ। ਇਹ ਟੈਸਟ Y ਗੁਣਸੂਤਰ ਦੀ ਮੌਜੂਦਗੀ ਜਾਂ ਗੈਰ-ਮੌਜੂਦਗੀ ਦਾ ਪਤਾ ਲਗਾ ਕੇ ਜੀਵ ਵਿਗਿਆਨਕ ਲਿੰਗ ਦੀ ਪਛਾਣ ਕਰਦੇ ਹਨ।

ਵਰਲਡ ਬਾਕਸਿੰਗ ਦੇ ਪ੍ਰਧਾਨ ਬੋਰਿਸ ਵਾਨ ਡੇਰ ਵੋਰਸਟ ਨੇ ਕਿਹਾ ਕਿ ਸੰਸਥਾ ਸਭ ਖਿਡਾਰੀਆਂ ਦੀ ਇੱਜ਼ਤ ਕਰਦੀ ਹੈ ਅਤੇ ਵੱਧ ਤੋਂ ਵੱਧ ਸਮਾਵੇਸ਼ੀ ਹੋਣ ਦੀ ਕੋਸ਼ਿਸ਼ ਕਰਦੀ ਹੈ, ਪਰ ਬਾਕਸਿੰਗ ਵਰਗੇ ਖੇਡ ਵਿੱਚ ਸੁਰੱਖਿਆ ਅਤੇ ਨਿਆਂਪੂਰਨ ਮੁਕਾਬਲੇ ਨੂੰ ਯਕੀਨੀ ਬਣਾਉਣਾ ਲਾਜ਼ਮੀ ਹੈ।

ਯਾਦ ਰਹੇ ਕਿ ਪੈਰਿਸ ਓਲੰਪਿਕ ਦੀ ਚੈਂਪੀਅਨ ਅਲਜੀਰੀਆ ਦੀ ਇਮਾਨ ਖ਼ਲੀਫ਼ ਨੇ ਇਸ ਸਾਲ ਜੂਨ ਵਿੱਚ ਨੀਦਰਲੈਂਡ ਵਿੱਚ ਇਕ ਟੂਰਨਾਮੈਂਟ ਖੇਡਣ ਤੋਂ ਇਨਕਾਰ ਕਰ ਦਿੱਤਾ ਸੀ ਜਦੋਂ ਵਰਲਡ ਬਾਕਸਿੰਗ ਨੇ ਲਿੰਗ ਟੈਸਟ ਸ਼ੁਰੂ ਕਰਨ ਦੀ ਯੋਜਨਾ ਦਾ ਐਲਾਨ ਕੀਤਾ ਸੀ। ਬਾਅਦ ਵਿੱਚ ਵੋਰਸਟ ਨੇ ਖ਼ਲੀਫ਼ ਦਾ ਨਾਂ ਲੈਣ ਲਈ ਮਾਫ਼ੀ ਵੀ ਮੰਗੀ।

26 ਸਾਲਾਂ ਦੀ ਖ਼ਲੀਫ਼ ਪਹਿਲਾਂ ਹੀ ਸਪਸ਼ਟ ਕਰ ਚੁੱਕੀ ਹੈ ਕਿ ਉਹ ਜਨਮ ਤੋਂ ਹੀ ਇਕ ਔਰਤ ਹੈ ਅਤੇ ਲਗਭਗ ਇਕ ਦਹਾਕੇ ਤੋਂ ਵੱਧ ਸਮੇਂ ਤੋਂ ਮਹਿਲਾ ਬਾਕਸਿੰਗ ਦੇ ਸਭ ਪੱਧਰਾਂ ‘ਤੇ ਖੇਡ ਰਹੀ ਹੈ। ਪੈਰਿਸ ਓਲੰਪਿਕ ਵਿੱਚ ਉਸ ਅਤੇ ਤਾਈਵਾਨ ਦੀ ਲਿਨ ਯੂ-ਟਿੰਗ ਨੇ ਆਪਣੇ ਲਿੰਗ ਬਾਰੇ ਗਲਤਫ਼ਹਿਮੀਆਂ ਦੇ ਬਾਵਜੂਦ ਸ਼ਾਨਦਾਰ ਪ੍ਰਦਰਸ਼ਨ ਕੀਤਾ ਸੀ।

ਓਲੰਪਿਕ ਖੇਡਾਂ ਵਿੱਚ ਪਹਿਲਾਂ ਗੁਣਸੂਤਰ ਟੈਸਟ ਆਮ ਸਨ ਪਰ 1990 ਦੇ ਦਹਾਕੇ ਵਿੱਚ ਇਨ੍ਹਾਂ ਤੋਂ ਹਟਾਇਆ ਗਿਆ ਸੀ। ਬਾਅਦ ਵਿੱਚ ਕਈ ਖੇਡਾਂ ਵਿੱਚ ਹਾਰਮੋਨ ਟੈਸਟ ਲਾਗੂ ਕੀਤੇ ਗਏ ਜਿਨ੍ਹਾਂ ਵਿੱਚ ਟੈਸਟੋਸਟੇਰੋਨ ਦੇ ਵੱਧ ਪੱਧਰ ਵਾਲੀਆਂ ਖਿਡਾਰਣਾਂ ਨੂੰ ਲੈ ਕੇ ਕੜੇ ਫ਼ੈਸਲੇ ਕਰਨੇ ਪਏ।

ਵਰਲਡ ਬਾਕਸਿੰਗ ਨੇ ਸਪਸ਼ਟ ਕੀਤਾ ਹੈ ਕਿ ਟੈਸਟ ਕਰਵਾਉਣ ਅਤੇ ਨਤੀਜੇ ਪੇਸ਼ ਕਰਨ ਦੀ ਜ਼ਿੰਮੇਵਾਰੀ ਰਾਸ਼ਟਰੀ ਖੇਡ ਸੰਘਾਂ ਦੀ ਹੋਵੇਗੀ। ਇਸ ਤੋਂ ਪਹਿਲਾਂ ਇਸ ਸਾਲ ਦੇ ਸ਼ੁਰੂ ਵਿੱਚ ਵਿਸ਼ਵ ਐਥਲੈਟਿਕਸ ਗੁਣਸੂਤਰ ਟੈਸਟ ਮੁੜ ਲਾਗੂ ਕਰਨ ਵਾਲੀ ਪਹਿਲੀ ਓਲੰਪਿਕ ਖੇਡ ਬਣੀ ਸੀ।