ਵਿਸ਼ਵ ਚੈਂਪੀਅਨ ਧੀਆਂ ਲਈ ਗਾਵਸਕਰ ਦਾ ਖੁੱਲ੍ਹਾ ਖ਼ਤ: 'ਪ੍ਰਚਾਰ ਲਈ ਤੁਹਾਡੀ ਜਿੱਤ ਦੀ ਵਰਤੋਂ ਹੋਵੇ ਤਾਂ ਪਰੇਸ਼ਾਨ ਨਾ ਹੋਣ

ਸਪੋਰਟਸ ਡੈਸਕ- ਭਾਰਤੀ ਮਹਿਲਾ ਕ੍ਰਿਕਟ ਟੀਮ ਵੱਲੋਂ ਦੱਖਣੀ ਅਫ਼ਰੀਕਾ ਨੂੰ ਹਰਾ ਕੇ ਪਹਿਲੀ ਵਾਰ ਵਿਸ਼ਵ ਕੱਪ ਦਾ ਖਿਤਾਬ ਜਿੱਤਣ ਤੋਂ ਬਾਅਦ, ਦੇਸ਼ ਭਰ ਵਿੱਚ ਇਨਾਮਾਂ ਦੀ ਬਰਸਾਤ ਹੋ ਰਹੀ ਹੈ। ਇਸ ਖਿਤਾਬ ਨੂੰ ਕਪਤਾਨ ਹਰਮਨਪ੍ਰੀਤ ਕੌਰ ਦੀ ਅਗਵਾਈ ਹੇਠ ਟੀਮ ਇੰਡੀਆ ਨੇ 52 ਦੌੜਾਂ ਨਾਲ ਜਿੱਤ ਕੇ ਇਤਿਹਾਸ ਰਚਿਆ ਹੈ।

ਇਸ ਇਤਿਹਾਸਕ ਪਲ 'ਤੇ, ਭਾਰਤੀ ਕ੍ਰਿਕਟ ਟੀਮ ਦੇ ਸਾਬਕਾ ਕਪਤਾਨ ਅਤੇ ਮਹਾਨ ਬੱਲੇਬਾਜ਼ ਸੁਨੀਲ ਗਾਵਸਕਰ ਨੇ ਵਿਸ਼ਵ ਚੈਂਪੀਅਨ ਖਿਡਾਰੀਆਂ ਨੂੰ ਇੱਕ ਖਾਸ ਨਸੀਹਤ ਦਿੱਤੀ ਹੈ। ਗਾਵਸਕਰ ਨੇ ਮਿਡ-ਡੇ ਅਖਬਾਰ ਵਿੱਚ ਆਪਣੇ ਕਾਲਮ ਰਾਹੀਂ ਲਿਖਿਆ ਕਿ ਖਿਡਾਰੀਆਂ ਨੂੰ ਜ਼ਿਆਦਾ ਉਮੀਦਾਂ ਨਹੀਂ ਰੱਖਣੀਆਂ ਚਾਹੀਦੀਆਂ ਅਤੇ ਜੇਕਰ ਕੁਝ ਵਾਅਦੇ ਪੂਰੇ ਨਾ ਹੋਣ ਤਾਂ ਨਿਰਾਸ਼ ਨਾ ਹੋਣ।

ਕੰਪਨੀਆਂ ਵੱਲੋਂ ਸਿਰਫ਼ ਪ੍ਰਚਾਰ:
ਸੁਨੀਲ ਗਾਵਸਕਰ ਦਾ ਮੰਨਣਾ ਹੈ ਕਿ ਭਾਰਤ ਵਿੱਚ ਕਈ ਇਸ਼ਤਿਹਾਰ ਕੰਪਨੀਆਂ, ਬ੍ਰਾਂਡ ਅਤੇ ਲੋਕ ਜਿੱਤ ਤੋਂ ਬਾਅਦ ਤੁਰੰਤ ਟੀਮ ਦੇ ਨਾਮ ਦੀ ਵਰਤੋਂ ਕਰਕੇ ਆਪਣੇ ਲਈ ਪ੍ਰਚਾਰ ਕਰਨਾ ਸ਼ੁਰੂ ਕਰ ਦਿੰਦੇ ਹਨ। ਉਹ ਕਹਿੰਦੇ ਹਨ ਕਿ ਅਖ਼ਬਾਰਾਂ ਅਤੇ ਹੋਰਡਿੰਗਾਂ 'ਤੇ ਟੀਮ ਨੂੰ ਵਧਾਈ ਦੇਣ ਵਾਲੇ ਵੱਡੇ-ਵੱਡੇ ਇਸ਼ਤਿਹਾਰ ਦੇਖੋ—ਜੇ ਉਹ ਅਧਿਕਾਰਤ ਸਪਾਂਸਰ ਨਹੀਂ ਹਨ, ਤਾਂ ਉਹ ਸਿਰਫ਼ ਆਪਣਾ ਬ੍ਰਾਂਡ ਚਮਕਾਉਣ ਦੀ ਕੋਸ਼ਿਸ਼ ਕਰ ਰਹੇ ਹਨ।

1983 ਵਿਸ਼ਵ ਕੱਪ ਦੀ ਯਾਦ:
ਗਾਵਸਕਰ ਨੇ 1983 ਦੇ ਕ੍ਰਿਕਟ ਵਰਲਡ ਕੱਪ ਨੂੰ ਯਾਦ ਕਰਦੇ ਹੋਏ ਲਿਖਿਆ, "1983 ਦੀ ਸਾਡੀ ਟੀਮ ਦੇ ਨਾਲ ਵੀ ਅਜਿਹਾ ਹੀ ਹੋਇਆ ਸੀ। ਤਦ ਵੀ ਮੀਡੀਆ ਵਿੱਚ ਬਹੁਤ ਸਾਰੇ ਵਾਅਦੇ ਅਤੇ ਘੋਸ਼ਣਾਵਾਂ ਹੋਈਆਂ ਸਨ, ਪਰ ਉਨ੍ਹਾਂ ਵਿੱਚੋਂ ਲਗਭਗ ਕੋਈ ਵੀ ਪੂਰੀ ਨਹੀਂ ਹੋਈ।" ਉਨ੍ਹਾਂ ਨੇ ਮਹਿਲਾ ਖਿਡਾਰੀਆਂ ਨੂੰ ਕਿਹਾ ਕਿ ਜੇਕਰ ਹੁਣ ਵੀ ਕੁਝ ਲੋਕ ਉਨ੍ਹਾਂ ਦੀ ਜਿੱਤ ਦਾ ਇਸਤੇਮਾਲ ਆਪਣੇ ਪ੍ਰਚਾਰ ਲਈ ਕਰ ਰਹੇ ਹਨ, ਤਾਂ ਉਹ ਪਰੇਸ਼ਾਨ ਨਾ ਹੋਣ।

ਸਭ ਤੋਂ ਵੱਡੀ ਦੌਲਤ ਪ੍ਰਸ਼ੰਸਕਾਂ ਦਾ ਪਿਆਰ:
ਗਾਵਸਕਰ ਨੇ ਸਲਾਹ ਦਿੱਤੀ ਕਿ 1983 ਦੀ ਟੀਮ ਅੱਜ ਵੀ ਕਹਿੰਦੀ ਹੈ ਕਿ ਇੰਨੇ ਸਾਲਾਂ ਬਾਅਦ ਵੀ ਉਨ੍ਹਾਂ ਲਈ ਸਭ ਤੋਂ ਵੱਡੀ ਦੌਲਤ ਭਾਰਤੀ ਕ੍ਰਿਕਟ ਪ੍ਰਸ਼ੰਸਕਾਂ ਦਾ ਪਿਆਰ ਅਤੇ ਸਤਿਕਾਰ ਹੈ। ਉਨ੍ਹਾਂ ਨੇ ਕਿਹਾ ਕਿ ਇਹੀ ਪਿਆਰ ਅੱਗੇ ਚੱਲ ਕੇ ਉਨ੍ਹਾਂ ਦੀ ਸਭ ਤੋਂ ਵੱਡੀ ਪੂੰਜੀ ਬਣੇਗਾ।

ਇਨਾਮਾਂ ਦੀ ਬਰਸਾਤ:
ਖਿਤਾਬ ਜਿੱਤਣ ਤੋਂ ਬਾਅਦ ਖਿਡਾਰੀਆਂ 'ਤੇ ਇਨਾਮਾਂ ਦੀ ਭਰਮਾਰ ਹੋਈ ਹੈ। ਭਾਰਤੀ ਕ੍ਰਿਕਟ ਕੰਟਰੋਲ ਬੋਰਡ (BCCI) ਨੇ 51 ਕਰੋੜ ਰੁਪਏ ਅਤੇ ਅੰਤਰਰਾਸ਼ਟਰੀ ਕ੍ਰਿਕਟ ਕੌਂਸਲ (ICC) ਨੇ ਲਗਭਗ 40 ਕਰੋੜ ਰੁਪਏ ਦੀ ਇਨਾਮੀ ਰਾਸ਼ੀ ਦਾ ਐਲਾਨ ਕੀਤਾ। ਇਸ ਤੋਂ ਇਲਾਵਾ, ਰਾਜ ਸਰਕਾਰਾਂ ਨੇ ਵੀ ਸਮ੍ਰਿਤੀ ਮੰਧਾਨਾ, ਹਰਲੀਨ ਦਿਓਲ, ਰਿਚਾ ਘੋਸ਼, ਸ੍ਰੀ ਚਰਣੀ ਅਤੇ ਹਰਮਨਪ੍ਰੀਤ ਕੌਰ ਸਮੇਤ ਹੋਰ ਖਿਡਾਰੀਆਂ ਲਈ ਨਿੱਜੀ ਪੁਰਸਕਾਰਾਂ ਦੀ ਘੋਸ਼ਣਾ ਕੀਤੀ ਹੈ। ਜ਼ਿਕਰਯੋਗ ਹੈ ਕਿ ਵਿਸ਼ਵ ਚੈਂਪੀਅਨ ਰਿਚਾ ਘੋਸ਼ ਨੂੰ ਸੀਐਮ ਮਮਤਾ ਬੈਨਰਜੀ ਨੇ ਡੀਐਸਪੀ ਨਿਯੁਕਤੀ ਪੱਤਰ ਅਤੇ 'ਬੰਗ ਭੂਸ਼ਣ' ਸਨਮਾਨ ਦਿੱਤਾ ਹੈ।