ਫੀਫਾ ਵਿਸ਼ਵ ਕੱਪ ਦਾ ਰੋਮਾਂਚਕ ਪਹਿਲੂ: ਚਾਰ ਭਰਾਵਾਂ ਦੇ ਜੋੜੇ ਦਿਖਾਉਣਗੇ ਵੱਖ-ਵੱਖ ਦੇਸ਼ਾਂ ਵੱਲੋਂ ਦਮ

ਨਵੀਂ ਦਿੱਲੀ : ਆਗਾਮੀ ਫੀਫਾ ਵਿਸ਼ਵ ਕੱਪ ਵਿੱਚ ਭਾਗ ਲੈ ਰਹੀਆਂ 48 ਟੀਮਾਂ ਵਿੱਚ ਇਸ ਵਾਰ ਇੱਕ ਬੇਹੱਦ ਦਿਲਚਸਪ ਨਜ਼ਾਰਾ ਦੇਖਣ ਨੂੰ ਮਿਲੇਗਾ। ਵਿਸ਼ਵ ਕੱਪ ਦੇ ਇਤਿਹਾਸ ਵਿੱਚ ਇਹ ਪਹਿਲੀ ਵਾਰ ਹੋਣ ਜਾ ਰਿਹਾ ਹੈ ਜਿੱਥੇ ਸੱਕੇ ਅਤੇ ਮਤਰੇਏ ਭਰਾਵਾਂ ਦੇ ਚਾਰ ਅਜਿਹੇ ਜੋੜੇ (ਭਰਾ) ਹਨ, ਜੋ ਇੱਕ ਦੂਜੇ ਦੇ ਖ਼ਿਲਾਫ਼ ਵੱਖ-ਵੱਖ ਦੇਸ਼ਾਂ ਦੀਆਂ ਟੀਮਾਂ ਵੱਲੋਂ ਮੈਦਾਨ ਵਿੱਚ ਨਿੱਤਰਨਗੇ। ਹਾਲਾਂਕਿ, ਰਾਹਤ ਦੀ ਗੱਲ ਇਹ ਹੈ ਕਿ ਗਰੁੱਪ ਪੜਾਅ (Group Stage) ਵਿੱਚ ਇਹਨਾਂ ਵਿੱਚੋਂ ਕੋਈ ਵੀ ਜੋੜੀ ਆਪਸ ਵਿੱਚ ਨਹੀਂ ਟਕਰਾਏਗੀ।

1. ਡੋਊ ਭਰਾ (ਫ਼ਰਾਂਸ ਅਤੇ ਆਈਵਰੀ ਕੋਸਟ)
ਡੋਊ ਭਰਾਵਾਂ ਦਾ ਜਨਮ ਫ਼ਰਾਂਸ ਵਿੱਚ ਹੋਇਆ ਸੀ। ਛੋਟਾ ਭਰਾ ਡੇਜਾਇਰ ਡੋਊ ਫ਼ਰਾਂਸ ਦੀ ਟੀਮ ਵੱਲੋਂ ਖੇਡੇਗਾ, ਜਦੋਂ ਕਿ ਉਸਦਾ ਵੱਡਾ ਭਰਾ ਗੁਏਲਾ ਡੋਊ ਆਈਵਰੀ ਕੋਸਟ ਦੀ ਟੀਮ ਵੱਲੋਂ ਫੁਲਬੈਕ ਵਜੋਂ ਮੈਦਾਨ ਵਿੱਚ ਉਤਰੇਗਾ। ਆਈਵਰੀ ਕੋਸਟ ਉਹਨਾਂ ਦੇ ਪਿਤਾ ਦਾ ਮੂਲ ਦੇਸ਼ ਹੈ।

2. ਵਿਲੀਅਮਜ਼ ਭਰਾ (ਸਪੇਨ ਅਤੇ ਘਾਨਾ)
ਇਨਾਕੀ ਅਤੇ ਨਿਕੋ ਵਿਲੀਅਮਜ਼ ਦੀ ਕਹਾਣੀ ਵੀ ਕਾਫੀ ਦਿਲਚਸਪ ਹੈ। ਦੋਵਾਂ ਦਾ ਜਨਮ ਸਪੇਨ ਦੇ ਬਾਸਕ ਖੇਤਰ ਵਿੱਚ ਹੋਇਆ ਸੀ। 23 ਸਾਲਾ ਨਿਕੋ ਵਿਲੀਅਮਜ਼ ਨੇ ਦੋ ਸਾਲ ਪਹਿਲਾਂ ਇੰਗਲੈਂਡ ਖ਼ਿਲਾਫ਼ ਸਪੇਨ ਦੀ ਯੂਰਪੀਅਨ ਚੈਂਪੀਅਨਸ਼ਿਪ ਜਿੱਤ ਵਿੱਚ ਅਹਿਮ ਭੂਮਿਕਾ ਨਿਭਾਈ ਸੀ ਅਤੇ ਉਸਨੂੰ ਫਾਈਨਲ ਵਿੱਚ 'ਸਰਵੋਤਮ ਖਿਡਾਰੀ' ਚੁਣਿਆ ਗਿਆ ਸੀ। ਦੂਜੇ ਪਾਸੇ, ਉਸਦੇ ਵੱਡੇ ਭਰਾ 31 ਸਾਲਾ ਇਨਾਕੀ ਵਿਲੀਅਮਜ਼ ਨੇ ਸਪੇਨ ਲਈ ਸਿਰਫ਼ ਇੱਕ ਦੋਸਤਾਨਾ (Friendly) ਮੈਚ ਖੇਡਿਆ ਸੀ, ਪਰ ਬਾਅਦ ਵਿੱਚ ਉਸਨੇ ਆਪਣੇ ਪੂਰਵਜਾਂ ਦੇ ਦੇਸ਼ ਘਾਨਾ ਵੱਲੋਂ ਖੇਡਣ ਦਾ ਫੈਸਲਾ ਕੀਤਾ।

3. ਡੇਰਿਕ ਲੁਕਾਸੇਨ ਅਤੇ ਬ੍ਰਾਇਨ ਬ੍ਰੋਬੇ (ਘਾਨਾ ਅਤੇ ਨੀਦਰਲੈਂਡ)
ਘਾਨਾ ਦੀ ਟੀਮ ਵਿੱਚ ਡੱਚ ਮੂਲ ਦੇ ਡਿਫੈਂਡਰ ਡੇਰਿਕ ਲੁਕਾਸੇਨ ਸ਼ਾਮਲ ਹਨ। ਉਹ ਇਸ ਟੂਰਨਾਮੈਂਟ ਵਿੱਚ ਆਪਣੇ ਮਤਰੇਏ ਭਰਾ ਬ੍ਰਾਇਨ ਬ੍ਰੋਬੇ ਦੇ ਖ਼ਿਲਾਫ਼ ਖੇਡਦੇ ਨਜ਼ਰ ਆਉਣਗੇ। ਬ੍ਰੋਬੇ ਨੀਦਰਲੈਂਡ ਦੀ ਟੀਮ ਲਈ ਬੈਕਅੱਪ ਸਟ੍ਰਾਈਕਰ ਵਜੋਂ ਖੇਡਦੇ ਹਨ। ਇਹਨਾਂ ਦੋਵਾਂ ਭਰਾਵਾਂ ਦੀ ਮਾਂ ਇੱਕ ਹੀ ਹੈ, ਪਰ ਪਿਤਾ ਵੱਖ-ਵੱਖ ਹਨ।

4. ਸਾਊਥਾਰ ਭਰਾ (ਆਸਟ੍ਰੇਲੀਆ ਅਤੇ ਸਕਾਟਲੈਂਡ)
ਚੌਥੀ ਜੋੜੀ ਹੈਰੀ ਅਤੇ ਜੌਨ ਸਾਊਥਾਰ ਦੀ ਹੈ। ਸਕਾਟਲੈਂਡ ਦੇ ਐਬਰਡੀਨ ਵਿੱਚ ਜਨਮੇ 27 ਸਾਲਾ ਸੈਂਟਰ-ਬੈਕ ਹੈਰੀ ਸਾਊਥਾਰ ਆਸਟ੍ਰੇਲੀਆ ਦੀ ਨੁਮਾਇੰਦਗੀ ਕਰਦੇ ਹਨ। ਉਹਨਾਂ ਨੇ ਸੱਤ ਸਾਲ ਪਹਿਲਾਂ ਆਸਟ੍ਰੇਲੀਆ ਲਈ ਖੇਡਣ ਦਾ ਫੈਸਲਾ ਕੀਤਾ ਸੀ, ਜਦਕਿ ਇਸ ਤੋਂ ਪਹਿਲਾਂ ਉਹ ਯੂਥ ਪੱਧਰ 'ਤੇ ਸਕਾਟਲੈਂਡ ਵੱਲੋਂ ਖੇਡ ਚੁੱਕੇ ਸਨ। ਉਹਨਾਂ ਦੇ ਵੱਡੇ ਭਰਾ ਜੌਨ ਸਾਊਥਾਰ ਸਕਾਟਲੈਂਡ ਦੀ ਰਾਸ਼ਟਰੀ ਟੀਮ ਲਈ ਖੇਡਦੇ ਹਨ। ਇਹਨਾਂ ਦੀ ਮਾਂ ਆਸਟ੍ਰੇਲੀਆਈ ਹੈ।