ਇੰਗਲੈਂਡ ਨੇ ਸਾਊਥੀ ਨੂੰ ਟੀਮ ਸਲਾਹਕਾਰ ਨਿਯੁਕਤ ਕੀਤਾ

ਲੰਡਨ- ਇੰਗਲੈਂਡ ਅਤੇ ਵੇਲਜ਼ ਕ੍ਰਿਕਟ ਬੋਰਡ (ਈਸੀਬੀ) ਨੇ ਨਿਊਜ਼ੀਲੈਂਡ ਦੇ ਸਾਬਕਾ ਤੇਜ਼ ਗੇਂਦਬਾਜ਼ ਟਿਮ ਸਾਊਥੀ ਨੂੰ ਪੁਰਸ਼ ਟੀਮ ਦਾ ਮਾਹਰ ਹੁਨਰ ਸਲਾਹਕਾਰ ਨਿਯੁਕਤ ਕੀਤਾ ਹੈ। ਟਿਮ ਸਾਊਥੀ ਨੇ ਨਿਊਜ਼ੀਲੈਂਡ ਲਈ 107 ਟੈਸਟ, 161 ਵਨਡੇ ਅਤੇ 126 ਟੀ-20 ਮੈਚ ਖੇਡੇ ਹਨ। ਉਸਨੇ ਨਿਊਜ਼ੀਲੈਂਡ ਲਈ ਸਾਰੇ ਫਾਰਮੈਟਾਂ ਵਿੱਚ ਸਭ ਤੋਂ ਵੱਧ 776 ਵਿਕਟਾਂ ਲਈਆਂ ਹਨ। ਉਸਨੂੰ ਅੰਤਰਰਾਸ਼ਟਰੀ ਕ੍ਰਿਕਟ ਵਿੱਚ 15 ਸਾਲਾਂ ਤੋਂ ਵੱਧ ਦਾ ਤਜਰਬਾ ਹੈ। ਉਸਨੇ ਦਸੰਬਰ 2024 ਵਿੱਚ ਅੰਤਰਰਾਸ਼ਟਰੀ ਕ੍ਰਿਕਟ ਤੋਂ ਸੰਨਿਆਸ ਲੈ ਲਿਆ। 

ਈਸੀਬੀ ਦਾ ਮੰਨਣਾ ਹੈ ਕਿ ਸਾਊਥੀ ਦਾ ਤਜਰਬਾ ਇੰਗਲੈਂਡ ਟੀਮ ਲਈ ਬਹੁਤ ਲਾਭਦਾਇਕ ਹੋਵੇਗਾ। ਟਿਮ ਸਾਊਦੀ 22 ਮਈ ਨੂੰ ਟ੍ਰੈਂਟ ਬ੍ਰਿਜ ਵਿਖੇ ਜ਼ਿੰਬਾਬਵੇ ਵਿਰੁੱਧ ਸ਼ੁਰੂ ਹੋਣ ਵਾਲੇ ਇੱਕੋ-ਇੱਕ ਟੈਸਟ ਤੋਂ ਪਹਿਲਾਂ ਇੰਗਲੈਂਡ ਟੀਮ ਨਾਲ ਜੁੜਨਗੇ। ਹਾਲਾਂਕਿ, ਸਾਊਦੀ ਦੀ ਇਹ ਨਿਯੁਕਤੀ ਲੰਬੇ ਸਮੇਂ ਲਈ ਨਹੀਂ ਹੈ। ਇਹ ਮੰਨਿਆ ਜਾ ਰਿਹਾ ਹੈ ਕਿ ਸਾਊਥੀ ਆਪਣੀ ਸਲਾਹਕਾਰ ਭੂਮਿਕਾ ਦੀ ਸਮਾਪਤੀ ਤੋਂ ਬਾਅਦ ਬਰਮਿੰਘਮ ਫੀਨਿਕਸ ਨਾਲ ਦ ਹੰਡਰਡ ਵਿੱਚ ਖੇਡਣਾ ਦੁਬਾਰਾ ਸ਼ੁਰੂ ਕਰ ਸਕਦਾ ਹੈ।