ਓਲੰਪਿਕ ਸੋਨ ਤਮਗਾ ਜਿੱਤਣ ਤੋਂ ਬਾਅਦ ਜੋਕੋਵਿਚ ਦੀਆਂ ਨਜ਼ਰਾਂ ਰਿਕਾਰਡ 25ਵੇਂ ਗ੍ਰੈਂਡ ਸਲੈਮ ਖਿਤਾਬ ''ਤੇ
Sunday, Aug 25, 2024 - 01:50 PM (IST)
ਨਿਊਯਾਰਕ : ਪੈਰਿਸ ਓਲੰਪਿਕ ‘ਚ ਸੋਨ ਤਮਗਾ ਜਿੱਤਣ ਤੋਂ ਬਾਅਦ ਪੂਰੇ ਜੋਸ਼ ਨਾਲ ਭਰੇ ਨੋਵਾਕ ਜੋਕੋਵਿਚ ਸੋਮਵਾਰ ਤੋਂ ਇੱਥੇ ਸ਼ੁਰੂ ਹੋ ਰਹੇ ਅਮਰੀਕੀ ਓਪਨ ਟੈਨਿਸ ਟੂਰਨਾਮੈਂਟ ‘ਚ ਰਿਕਾਰਡ 25ਵਾਂ ਗ੍ਰੈਂਡ ਸਲੈਮ ਖਿਤਾਬ ਜਿੱਤਣ ਲਈ ਮੈਦਾਨ ‘ਚ ਉਤਰਨਗੇ। ਜੋਕੋਵਿਚ ਨੇ ਪੈਰਿਸ ਵਿੱਚ ਪੁਰਸ਼ ਸਿੰਗਲ ਸੋਨ ਤਮਗਾ ਜਿੱਤਿਆ। ਉਨ੍ਹਾਂ ਦੇ ਨਾਂ 24 ਗ੍ਰੈਂਡ ਸਲੈਮ ਸਮੇਤ ਕੁੱਲ 99 ਖ਼ਿਤਾਬ ਹਨ ਅਤੇ ਉਹ ਇੱਥੇ ਖ਼ਿਤਾਬਾਂ ਦਾ ਆਪਣਾ ਸੈਂਕੜਾ ਪੂਰਾ ਕਰਨ ਦੀ ਕੋਸ਼ਿਸ਼ ਕਰਨਗੇ। ਇਸ ਤੋਂ ਇਲਾਵਾ ਸਭ ਤੋਂ ਵੱਧ ਹਫ਼ਤੇ ਵਿਸ਼ਵ ਦੇ ਨੰਬਰ ਇਕ ਖਿਡਾਰੀ ਬਣੇ ਰਹਿਣ ਦਾ ਰਿਕਾਰਡ ਵੀ ਜੋਕੋਵਿਚ ਦੇ ਨਾਂ ਹੈ।
ਜੋਕੋਵਿਚ ਨੇ ਕਿਹਾ, "ਲੋਕ ਮੈਨੂੰ ਪੁੱਛਦੇ ਹਨ ਕਿ ਹੁਣ ਜਦੋਂ ਤੁਸੀਂ ਸੋਨ ਤਮਗਾ ਜਿੱਤ ਲਿਆ ਹੈ ਤਾਂ ਫਿਰ ਹੁਣ ਹਾਸਲ ਕਰਨ ਲਈ ਕੀ ਬਚਿਆ ਹੈ ਪਰ ਮੇਰੇ ਕੋਲ ਅਜੇ ਵੀ ਮੁਕਾਬਲਾ ਕਰਨ ਦੀ ਭਾਵਨਾ ਹੈ। ਮੈਂ ਅੱਗੇ ਇਤਿਹਾਸ ਬਣਾਉਣਾ ਚਾਹੁੰਦਾ ਹਾਂ ਅਤੇ ਆਪਣੇ ਕਰੀਅਰ ਦੇ ਇਸ ਪੜਾਅ ਦਾ ਪੂਰਾ ਆਨੰਦ ਲੈਣਾ ਚਾਹੁੰਦਾ ਹਾਂ।”
ਸਰਬੀਆ ਦੇ ਇਸ 37 ਸਾਲਾ ਖਿਡਾਰੀ ਦਾ ਅਮਰੀਕੀ ਓਪਨ ਦੇ ਪਹਿਲੇ ਦੌਰ ਵਿੱਚ 138ਵੀਂ ਰੈਂਕਿੰਗ ਦੇ ਮੋਲਡੋਵਾ ਦੇ ਰਾਡੂ ਅਲਬੋਟ ਨਾਲ ਭਿੜੇਗਾ। ਰੋਜਰ ਫੈਡਰਰ ਤੋਂ ਬਾਅਦ ਕੋਈ ਵੀ ਖਿਡਾਰੀ ਅਮਰੀਕੀ ਓਪਨ 'ਚ ਲਗਾਤਾਰ ਟੂਰਨਾਮੈਂਟ ਨਹੀਂ ਜਿੱਤ ਸਕਿਆ ਹੈ ਅਤੇ ਹੁਣ ਜੋਕੋਵਿਚ ਕੋਲ ਇਹ ਮੌਕਾ ਹੈ। ਫੈਡਰਰ ਨੇ 2004 ਤੋਂ 2008 ਤੱਕ ਲਗਾਤਾਰ ਪੰਜ ਖਿਤਾਬ ਜਿੱਤੇ। ਜੋਕੋਵਿਚ ਨੂੰ ਇਸ ਵਾਰ ਦੂਜੀ ਤਰਜੀਹ ਦਿੱਤੀ ਗਈ ਹੈ। ਜੋਕੋਵਿਚ ਨੂੰ ਸਪੇਨ ਦੇ 21 ਸਾਲਾ ਕਾਰਲੋਸ ਅਲਕਾਰਜ਼ ਤੋਂ ਸਖ਼ਤ ਚੁਣੌਤੀ ਦਾ ਸਾਹਮਣਾ ਕਰਨ ਦੀ ਸੰਭਾਵਨਾ ਹੈ ਪਰ ਉਹ ਅਮਰੀਕੀ ਓਪਨ ਵਿੱਚ ਆਪਣਾ ਪੰਜਵਾਂ ਖਿਤਾਬ ਜਿੱਤਣ ਲਈ ਦ੍ਰਿੜ ਹੈ।
