ਰਾਇਲਜ਼ ਖਿਲਾਫ ਸੀਜ਼ਨ ਦੀ ਪਹਿਲੀ ਜਿੱਤ ਦਰਜ ਕਰਨ ਦੇ ਇਰਾਦੇ ਨਾਲ ਉਤਰੇਗੀ ਦਿੱਲੀ, ਪੰਤ ''ਤੇ ਨਜ਼ਰਾਂ

ਜੈਪੁਰ, (ਭਾਸ਼ਾ) ਦਿੱਲੀ ਕੈਪੀਟਲਜ਼ ਵੀਰਵਾਰ ਇੱਥੇ ਰਾਜਸਥਾਨ ਰਾਇਲਜ਼ ਖਿਲਾਫ ਆਈ.ਪੀ.ਐੱਲ. ਸੀਜ਼ਨ ਦੀ ਪਹਿਲੀ ਜਿੱਤ ਦਰਜ ਕਰਨ ਦੇ ਇਰਾਦੇ ਨਾਲ ਉਤੇਰਗੀ ਤਾਂ ਸਭ ਦੀਆਂ ਨਜ਼ਰਾਂ ਕਪਤਾਨ ਰਿਸ਼ਭ ਪੰਤ ਇਸ 'ਤੇ ਹੋਣਗੀਆਂ।  ਜਦਕਿ ਟੀਮ ਨੂੰ ਬੱਲੇਬਾਜ਼ਾਂ ਤੋਂ ਬਿਹਤਰ ਪ੍ਰਦਰਸ਼ਨ ਦੀ ਉਮੀਦ ਰਹੇਗੀ। ਗੰਭੀਰ ਕਾਰ ਹਾਦਸੇ ਕਾਰਨ 453 ਦਿਨਾਂ ਤੱਕ ਬਾਹਰ ਰਹਿਣ ਤੋਂ ਬਾਅਦ, ਪੰਤ ਮੁੱਲਾਂਪੁਰ ਵਿੱਚ ਆਪਣੇ ਨਵੇਂ ਘਰੇਲੂ ਮੈਦਾਨ ਵਿੱਚ ਪੰਜਾਬ ਕਿੰਗਜ਼ ਦੇ ਖਿਲਾਫ ਵਾਪਸੀ ਵਿੱਚ ਸਿਰਫ 13 ਗੇਂਦਾਂ (18 ਦੌੜਾਂ) ਹੀ ਟਿਕ ਸਕਿਆ। ਪੰਤ ਨੇ ਹਾਲਾਂਕਿ ਵਿਕਟ ਦੇ ਪਿੱਛੇ ਪ੍ਰਭਾਵਿਤ ਕੀਤਾ ਅਤੇ ਜਿਤੇਸ਼ ਸ਼ਰਮਾ ਨੂੰ ਸਟੰਪ ਵੀ ਕੀਤਾ। ਆਪਣੇ ਪਹਿਲੇ ਮੈਚ ਦੇ ਸ਼ੁਰੂਆਤੀ ਝਟਕਿਆਂ ਨੂੰ ਪਾਰ ਕਰਨ ਤੋਂ ਬਾਅਦ, ਪੰਤ ਜਲਦੀ ਹੀ ਆਪਣੀ ਲੈਅ ਲੱਭਣ ਲਈ ਬੇਤਾਬ ਹੋਵੇਗਾ ਕਿਉਂਕਿ ਉਹ ਟ੍ਰੇਂਟ ਬੋਲਟ, ਰਵੀਚੰਦਰਨ ਅਸ਼ਵਿਨ ਅਤੇ ਯੁਜਵੇਂਦਰ ਚਾਹਲ ਵਰਗੇ ਤਜਰਬੇਕਾਰ ਗੇਂਦਬਾਜ਼ਾਂ ਦਾ ਸਾਹਮਣਾ ਕਰੇਗਾ।

ਮੁੱਖ ਕੋਚ ਰਿਕੀ ਪੋਂਟਿੰਗ ਨੇ ਪਹਿਲੇ ਮੈਚ ਵਿੱਚ ਡੇਵਿਡ ਵਾਰਨਰ ਅਤੇ ਮਿਸ਼ੇਲ ਮਾਰਸ਼ ਦੇ ਨਾਲ ਪਾਰੀ ਦੀ ਸ਼ੁਰੂਆਤ ਕਰਨ ਦਾ ਫੈਸਲਾ ਕੀਤਾ ਸੀ ਤਾਂ ਜੋ ਇਹ ਜੋੜੀ ਮੱਧਕ੍ਰਮ ਵਿੱਚ ਪੰਤ ਦੇ ਦਬਾਅ ਨੂੰ ਦੂਰ ਕਰਨ ਲਈ ਕਾਫ਼ੀ ਦੌੜਾਂ ਬਣਾ ਸਕੇ। ਹਾਲਾਂਕਿ ਇਹ ਦੋਵੇਂ ਚੰਗੀ ਸ਼ੁਰੂਆਤ ਦਾ ਫਾਇਦਾ ਉਠਾਉਣ 'ਚ ਨਾਕਾਮ ਰਹੇ ਅਤੇ ਪੰਤ 'ਤੇ ਦਬਾਅ ਪੈ ਗਿਆ। ਵਿਕਟਕੀਪਰ ਬੱਲੇਬਾਜ਼ ਅਭਿਸ਼ੇਕ ਪੋਰੇਲ ਨੇ ਹਾਲਾਂਕਿ ਨਾਬਾਦ 32 ਦੌੜਾਂ ਦੀ ਸ਼ਾਨਦਾਰ ਪਾਰੀ ਖੇਡੀ, ਜਿਸ ਦੀ ਬਦੌਲਤ ਦਿੱਲੀ ਦੀ ਟੀਮ ਸੱਤ ਵਿਕਟਾਂ 'ਤੇ 138 ਦੌੜਾਂ ਬਣਾ ਕੇ ਇਕ ਸਮੇਂ ਮੁਸ਼ਕਲ 'ਚ ਹੋਣ ਦੇ ਬਾਵਜੂਦ ਨੌਂ ਵਿਕਟਾਂ 'ਤੇ 174 ਦੌੜਾਂ ਦਾ ਸਨਮਾਨਜਨਕ ਸਕੋਰ ਬਣਾਉਣ 'ਚ ਸਫਲ ਰਹੀ।  ਪੋਰੇਲ ਨੂੰ 'ਪ੍ਰਭਾਵੀ ਖਿਡਾਰੀ' ਵਜੋਂ ਵਰਤਿਆ ਗਿਆ ਸੀ, ਜਿਸ ਨਾਲ ਦਿੱਲੀ ਨੂੰ ਇੱਕ ਗੇਂਦਬਾਜ਼ ਘੱਟ ਸੀ। ਸਮੱਸਿਆ ਉਦੋਂ ਵਧ ਗਈ ਜਦੋਂ ਇਸ਼ਾਂਤ ਸ਼ਰਮਾ ਨੇ ਆਪਣਾ ਗਿੱਟਾ ਮੁੜ ਗਿਆ। ਇਸ ਤੇਜ਼ ਗੇਂਦਬਾਜ਼ ਦੇ ਕੁਝ ਮੈਚਾਂ ਤੋਂ ਬਾਹਰ ਹੋਣ ਦੀ ਸੰਭਾਵਨਾ ਹੈ। ਟੀਮ ਨੂੰ ਕੁਲਦੀਪ ਯਾਦਵ ਅਤੇ ਅਕਸ਼ਰ ਪਟੇਲ ਦੀ ਸਪਿਨ ਜੋੜੀ ਤੋਂ ਵੀ ਵੱਡੀਆਂ ਉਮੀਦਾਂ ਹੋਣਗੀਆਂ। 

ਪਿਛਲੇ ਮੈਚ 'ਚ ਸਵਾਈ ਮਾਨਸਿੰਘ ਸਟੇਡੀਅਮ ਦੀ ਖੁਸ਼ਕ ਪਿੱਚ 'ਤੇ ਰਾਜਸਥਾਨ ਰਾਇਲਜ਼ ਦੇ ਜੋਸ ਬਟਲਰ ਅਤੇ ਯਸ਼ਸਵੀ ਜਾਇਸਵਾਲ ਦੀ ਓਪਨਿੰਗ ਜੋੜੀ ਨੂੰ ਲਖਨਊ ਸੁਪਰ ਜਾਇੰਟਸ ਦੇ ਗੇਂਦਬਾਜ਼ਾਂ ਦੇ ਸਾਹਮਣੇ ਪਰੇਸ਼ਾਨੀ ਦਾ ਸਾਹਮਣਾ ਕਰਨਾ ਪਿਆ। ਹਾਲਾਂਕਿ ਸੰਜੂ ਸੈਮਸਨ ਦੀਆਂ ਅਜੇਤੂ 82 ਦੌੜਾਂ ਦੀ ਬਦੌਲਤ ਰਾਇਲਜ਼ ਦੀ ਟੀਮ 20 ਦੌੜਾਂ ਨਾਲ ਜਿੱਤ ਦਰਜ ਕਰਨ 'ਚ ਸਫਲ ਰਹੀ। ਸੈਮਸਨ ਨੇ ਲਗਾਤਾਰ ਪੰਜਵੀਂ ਵਾਰ ਰਾਇਲਜ਼ ਸੀਜ਼ਨ ਦੇ ਪਹਿਲੇ ਮੈਚ 'ਚ ਅਰਧ ਸੈਂਕੜਾ ਲਗਾ ਕੇ ਆਗਾਮੀ ਟੀ-20 ਵਿਸ਼ਵ ਕੱਪ ਲਈ ਭਾਰਤੀ ਟੀਮ 'ਚ ਵਿਕਟਕੀਪਰ ਬੱਲੇਬਾਜ਼ ਦੇ ਤੌਰ 'ਤੇ ਆਪਣਾ ਦਾਅਵਾ ਜਤਾਇਆ ਹੈ। ਰਿਆਨ ਪਰਾਗ ਵੀ ਚੰਗੀ ਫਾਰਮ 'ਚ ਨਜ਼ਰ ਆ ਰਹੇ ਹਨ। ਰਾਇਲਜ਼ ਦੇ ਚੋਟੀ ਦੇ ਚਾਰ ਬੱਲੇਬਾਜ਼ ਦਿੱਲੀ ਦੇ ਗੇਂਦਬਾਜ਼ੀ ਕ੍ਰਮ ਨੂੰ ਤਬਾਹ ਕਰਨ ਦੀ ਕੋਸ਼ਿਸ਼ ਕਰਨਗੇ ਅਤੇ ਅਜਿਹੇ 'ਚ ਕੁਲਦੀਪ ਅਤੇ ਅਕਸ਼ਰ ਦੀ ਭੂਮਿਕਾ ਅਹਿਮ ਹੋਵੇਗੀ। ਰਾਇਲਜ਼ ਦੇ ਗੇਂਦਬਾਜ਼ ਵੀ ਚੰਗੀ ਫਾਰਮ 'ਚ ਨਜ਼ਰ ਆਏ। ਜਿੱਥੇ ਬੋਲਟ ਨੇ ਨਵੀਂ ਗੇਂਦ ਨਾਲ ਪ੍ਰਭਾਵਿਤ ਕੀਤਾ, ਉੱਥੇ ਹੀ ਸੰਦੀਪ ਸ਼ਰਮਾ ਨੇ ਡੈੱਥ ਓਵਰਾਂ ਵਿੱਚ ਚੰਗਾ ਪ੍ਰਦਰਸ਼ਨ ਕੀਤਾ। ਟੀਮ ਨੇ ਪਿਛਲੇ ਮੈਚ 'ਚ ਸੁਪਰ ਜਾਇੰਟਸ ਨੂੰ ਛੇ ਵਿਕਟਾਂ 'ਤੇ 173 ਦੌੜਾਂ 'ਤੇ ਰੋਕ ਦਿੱਤਾ ਸੀ। 

ਟੀਮਾਂ ਇਸ ਪ੍ਰਕਾਰ ਹਨ:

ਰਾਜਸਥਾਨ ਰਾਇਲਜ਼ : ਸੰਜੂ ਸੈਮਸਨ (ਕਪਤਾਨ), ਆਬਿਦ ਮੁਸ਼ਤਾਕ, ਅਵੇਸ਼ ਖਾਨ, ਧਰੁਵ ਜੁਰੇਲ, ਡੋਨੋਵਨ ਫਰੇਰਾ, ਜੋਸ ਬਟਲਰ, ਕੁਲਦੀਪ ਸੇਨ, ਕਰੁਣਾਲ ਸਿੰਘ ਰਾਠੌਰ, ਨੰਦਰੇ ਬਰਗਰ, ਨਵਦੀਪ ਸੈਣੀ, ਪ੍ਰਸਿਧ ਕ੍ਰਿਸ਼ਨਾ, ਰਵੀਚੰਦਰਨ ਅਸ਼ਵਿਨ, ਰਿਆਨ ਪਰਾਗ, ਸੰਦੀਪ ਸ਼ਰਮਾ, ਸ਼ਿਮਰੋਨ ਹੇਟਮਾਇਰ, ਸ਼ੁਭਮ ਦੂਬੇ, ਰੋਵਮੈਨ ਪਾਵੇਲ, ਟੌਮ ਕੋਹਲਰ-ਕੈਡਮੋਰ, ਟ੍ਰੇਂਟ ਬੋਲਟ, ਯਸ਼ਸਵੀ ਜਾਇਸਵਾਲ, ਯੁਜਵੇਂਦਰ ਚਾਹਲ ਅਤੇ ਤਨੁਸ਼ ਕੋਟੀਅਨ। 

ਦਿੱਲੀ ਕੈਪੀਟਲਜ਼ : ਰਿਸ਼ਭ ਪੰਤ (ਕਪਤਾਨ), ਡੇਵਿਡ ਵਾਰਨਰ, ਪ੍ਰਿਥਵੀ ਸ਼ਾਅ, ਯਸ਼ ਢੁਲ, ਅਭਿਸ਼ੇਕ ਪੋਰੇਲ, ਅਕਸ਼ਰ ਪਟੇਲ, ਲਲਿਤ ਯਾਦਵ, ਮਿਸ਼ੇਲ ਮਾਰਸ਼, ਪ੍ਰਵੀਨ ਦੂਬੇ, ਵਿੱਕੀ ਓਸਟਵਾਲ, ਐਨਰਿਕ ਨੋਰਕੀਆ, ਕੁਲਦੀਪ ਯਾਦਵ, ਜੇਕ ਫਰੇਜ਼ਰ-ਮੈਕਗੁਰਕ, ਖਲੀਲ, ਅਹਿਮਦ, ਇਸ਼ਾਂਤ ਸ਼ਰਮਾ, ਮੁਕੇਸ਼ ਕੁਮਾਰ, ਟ੍ਰਿਸਟਨ ਸਟੱਬਸ, ਰਿਕੀ ਭੁਈ, ਕੁਮਾਰ ਕੁਸ਼ਾਗਰਾ, ਰਸਿਖ ਡਾਰ, ਜੇ ਰਿਚਰਡਸਨ, ਸੁਮਿਤ ਕੁਮਾਰ, ਸਵਾਸਤਿਕ ਚਿਕਾਰਾ ਅਤੇ ਸ਼ਾਈ ਹੋਪ। 

ਸਮਾਂ : ਮੈਚ ਸ਼ਾਮ 7:30 ਵਜੇ ਸ਼ੁਰੂ ਹੋਵੇਗਾ