ਸਾਬਕਾ ਚੈਂਪੀਅਨ ਕ੍ਰਿਸਟੀਅਨ ਗਾਰਿਨ ਨੇ ਫ੍ਰਿਟਜ਼ ਨੂੰ ਹਰਾਇਆ, ਇਸਨਰ ਨਾਲ ਹੋਵੇਗਾ ਮੁਕਾਬਲਾ

ਸਪੋਰਟਸ ਡੈਸਕ- ਸਾਬਕਾ ਚੈਂਪੀਅਨ ਕ੍ਰਿਸਟੀਅਨ ਗਾਰਿਨ ਨੇ ਦੂਜਾ ਦਰਜਾ ਪ੍ਰਾਪਤ ਟੇਲਰ ਫ੍ਰਿਟਜ਼ ਨੂੰ ਹਰਾ ਕੇ ਸ਼ੁੱਕਰਵਾਰ ਨੂੰ ਇੱਥੇ ਅਮਰੀਕੀ ਓਪਨ ਕਲੇ ਕੋਰਟ ਟੈਨਿਸ ਚੈਂਪੀਅਨਸ਼ਿਪ ਦੇ ਸੈਮੀਫਾਈਨਲ 'ਚ ਜਗ੍ਹਾ ਬਣਾਈ। ਟੂਰਨਾਮੈਂਟ 'ਚ ਅਜੇ ਤਕ ਅਜੇਤੂ ਗਾਰਿਨ ਦੀ ਇਹ ਲਗਾਤਾਰ 8ਵੀਂ ਜਿੱਤ ਹੈ। ਉਨ੍ਹਾਂ ਨੇ ਕੁਆਰਟਰ ਫਾਈਨਲ 'ਚ ਫ੍ਰਿਟਜ਼ ਨੂੰ 6-2, 6-7 (5), 6-3 ਨਾਲ ਹਰਾਇਆ ਜੋ 13ਵੀਂ ਵਿਸ਼ਵ ਰੈਂਕਿੰਗ ਦੇ ਨਾਲ ਅਮਰੀਕਾ ਦੇ ਚੋਟੀ ਦੀ ਰੈਂਕਿੰਗ ਵਾਲੇ ਖਿਡਾਰੀ ਹਨ।

ਪਿਛਲੇ ਮਹੀਨੇ ਕੈਲੀਫੋਰਨੀਆਂ 'ਚ ਇੰਡੀਅਨਜ਼ ਵੇਲਸ ਖ਼ਿਤਾਬ ਜਿੱਤਣ ਵਾਲੇ ਫ੍ਰਿਟਜ਼ ਨੇ ਪਿਛਲੇ 10 'ਚੋਂ 9 ਮੁਕਾਬਲੇ ਜਿੱਤੇ ਹਨ। ਗਾਰਿਨ ਨੇ 2019 'ਚ ਹਿਊਸਟਨ 'ਚ ਖ਼ਿਤਾਬ ਜਿੱਤਿਆ ਸੀ ਤੇ ਮਹਾਮਾਰੀ ਕਾਰਨ ਪਿਛਲੇ ਦੋ ਸਾਲ ਇਸ ਟੂਰਨਾਮੈਂਟ 'ਚ ਆਯੋਜਨ ਨਹੀਂ ਹੋ ਸਕਿਆ। ਦੁਨੀਆ ਦੇ 29ਵੇਂ ਨੰਬਰ ਦੇ ਖਿਡਾਰੀ ਤੇ ਪੰਜਵਾਂ ਦਰਜਾ ਪ੍ਰਾਪਤ ਗਾਰਿਨ ਫਾਈਨਲ 'ਚ ਜਗ੍ਹਾ ਬਣਾਉਣ ਲਈ ਸ਼ਨੀਵਾਰ ਨੂੰ ਚੌਥਾ ਦਰਜਾ ਪ੍ਰਾਪਤ ਜਾਨ ਇਸਨਰ ਨਾਲ ਭਿੜਨਗੇ। ਇਸਨਰ ਨੇ ਕੁਆਰਟਰ ਫਾਈਨਲ 'ਚ ਫ੍ਰਾਂਸੇਸ ਤਿਆਫੋ ਨੂੰ 6-4, 2-6, 6-3 ਨਾਲ ਹਰਾਇਆ।