ਵੈਸਟਇੰਡੀਜ਼ ਟੀਮ ਦੇ ਸਾਰੇ ਫਾਰਮੈਟਾਂ ਦੇ ਕੋਚ ਬਣੇ ਡੈਰੇਨ ਸੈਮੀ
Tuesday, Dec 17, 2024 - 06:38 PM (IST)
ਪੋਰਟ ਆਫ ਸਪੇਨ: ਕ੍ਰਿਕਟ ਵੈਸਟਇੰਡੀਜ਼ (CWI) ਦੇ ਨਿਰਦੇਸ਼ਕ ਮਾਈਲਸ ਬਾਸਕੋਂਬੇ ਨੇ ਡੈਰੇਨ ਸੈਮੀ ਨੂੰ ਸਾਰੇ ਫਾਰਮੈਟਾਂ ਵਿੱਚ ਵੈਸਟਇੰਡੀਜ਼ ਕ੍ਰਿਕਟ ਟੀਮ ਦਾ ਕੋਚ ਨਿਯੁਕਤ ਕੀਤਾ ਹੈ। ਉਹ ਅਪ੍ਰੈਲ 2025 ਵਿੱਚ ਮੌਜੂਦਾ ਟੈਸਟ ਕੋਚ ਆਂਦਰੇ ਕੋਲ ਦੀ ਥਾਂ ਲੈਣਗੇ।
ਸੀਮਿਤ ਓਵਰਾਂ ਦੇ ਕੋਚ ਡੈਰੇਨ ਸੈਮੀ ਨੇ ਸਾਰੇ ਫਾਰਮੈਟਾਂ ਦਾ ਕੋਚ ਬਣਾਏ ਜਾਣ 'ਤੇ ਕਿਹਾ, 'ਕਿਸੇ ਵੀ ਫਾਰਮੈਟ, ਕਿਸੇ ਵੀ ਅਹੁਦੇ 'ਤੇ ਵੈਸਟਇੰਡੀਜ਼ ਦੀ ਨੁਮਾਇੰਦਗੀ ਕਰਨਾ ਮੇਰੇ ਲਈ ਸਨਮਾਨ ਦੀ ਗੱਲ ਹੈ। ਹਾਲਾਂਕਿ ਮੈਂ ਇਸ ਖਬਰ ਦੀ ਕਲਪਨਾ ਵੀ ਨਹੀਂ ਕੀਤੀ ਸੀ। ਮੈਂ ਕਦੇ ਨਹੀਂ ਸੋਚਿਆ ਸੀ ਕਿ ਮੈਂ ਕੋਚ ਬਣਾਂਗਾ, ਪਰ ਹੁਣ ਤੱਕ ਜਿਸ ਤਰ੍ਹਾਂ ਦੀਆਂ ਚੀਜ਼ਾਂ ਬਦਲੀਆਂ ਹਨ, ਮੈਨੂੰ ਇਸ ਕੰਮ ਨਾਲ ਪਿਆਰ ਹੋ ਗਿਆ ਹੈ। ਮੈਂ ਆਪਣੀ ਨਵੀਂ ਭੂਮਿਕਾ, ਨਵੇਂ ਸਫਰ ਲਈ ਵੀ ਉਤਸ਼ਾਹਿਤ ਹਾਂ।
ਮਈ 2023 ਤੋਂ ਸੈਮੀ ਦੇ ਕੋਚਿੰਗ ਕਾਰਜਕਾਲ ਦੌਰਾਨ, ਵੈਸਟਇੰਡੀਜ਼ ਨੇ 28 ਵਨਡੇ ਮੈਚਾਂ ਵਿੱਚੋਂ 15 ਜਿੱਤੇ ਹਨ। ਉਨ੍ਹਾਂ ਨੇ ਇਸ ਦੌਰਾਨ ਸੱਤ ਵਿੱਚੋਂ ਚਾਰ ਦੁਵੱਲੀ ਸੀਰੀਜ਼ ਜਿੱਤੀਆਂ ਹਨ। ਟੀ-20 ਦੀ ਗੱਲ ਕਰੀਏ ਤਾਂ ਟੀਮ ਨੇ ਭਾਰਤ, ਇੰਗਲੈਂਡ ਅਤੇ ਦੱਖਣੀ ਅਫਰੀਕਾ ਖਿਲਾਫ ਚਾਰ ਘਰੇਲੂ ਸੀਰੀਜ਼ ਜਿੱਤੀਆਂ ਹਨ। ਕੁੱਲ ਮਿਲਾ ਕੇ ਉਨ੍ਹਾਂ ਨੇ ਇਸ ਦੌਰਾਨ 35 ਟੀ-20 ਮੈਚਾਂ 'ਚੋਂ 20 ਜਿੱਤੇ ਹਨ।
