ਬੀਸੀਬੀ ਨੇ ਬੀਪੀਐੱਲ ਦੇ ਦੋ ਸਾਬਕਾ ਟੀਮ ਅਧਿਕਾਰੀਆਂ ''ਤੇ ਲਾਏ ਭ੍ਰਿਸ਼ਟਾਚਾਰ ਦੇ ਦੋਸ਼

ਢਾਕਾ : ਬੰਗਲਾਦੇਸ਼ ਕ੍ਰਿਕਟ ਬੋਰਡ (BCB) ਨੇ ਬੰਗਲਾਦੇਸ਼ ਪ੍ਰੀਮੀਅਰ ਲੀਗ (BPL) ਦੀਆਂ ਦੋ ਸਾਬਕਾ ਟੀਮਾਂ ਦੇ ਅਧਿਕਾਰੀਆਂ, ਮੋ. ਅਬਦੁਲ ਕਯੂਮ ਰਾਸ਼ੇਦ ਅਤੇ ਮੋ. ਅਮੀਨ ਖ਼ਾਨ 'ਤੇ ਆਈ.ਸੀ.ਸੀ. ਦੇ ਭ੍ਰਿਸ਼ਟਾਚਾਰ ਵਿਰੋਧੀ ਨਿਯਮਾਂ ਦੀਆਂ ਕਈ ਉਲੰਘਣਾਂ ਦੇ ਦੋਸ਼ ਲਗਾਉਂਦੇ ਹੋਏ ਉਨ੍ਹਾਂ ਨੂੰ ਅਸਥਾਈ ਤੌਰ 'ਤੇ ਮੁਅੱਤਲ ਕਰ ਦਿੱਤਾ ਹੈ। ਮੋ. ਅਬਦੁਲ ਕਯੂਮ ਰਾਸ਼ੇਦ ਬੀ.ਪੀ.ਐੱਲ. 2024-25 ਵਿੱਚ ਚਟਗਾਓਂ ਰਾਇਲਜ਼ ਦੇ ਸਾਬਕਾ ਮਾਲਕ ਸਨ, ਜਦਕਿ ਅਮੀਨ ਖ਼ਾਨ ਬੀ.ਪੀ.ਐੱਲ. 2024-25 ਵਿੱਚ 'ਦਰਬਾਰ ਰਾਜਸ਼ਾਹੀ' ਅਤੇ 2025-26 ਵਿੱਚ 'ਰਾਇਲਜ਼' ਨਾਲ ਸਾਬਕਾ ਟੀਮ ਅਧਿਕਾਰੀ ਵਜੋਂ ਜੁੜੇ ਹੋਏ ਸਨ।

ਬੀ.ਸੀ.ਬੀ. ਵੱਲੋਂ ਜਾਰੀ ਬਿਆਨ ਅਨੁਸਾਰ, ਇਹ ਕਾਰਵਾਈ ਬੰਗਲਾਦੇਸ਼ ਕ੍ਰਿਕਟ ਬੋਰਡ ਇੰਟੈਗਰਿਟੀ ਯੂਨਿਟ (BCBIU) ਦੀ ਜਾਂਚ ਤੋਂ ਬਾਅਦ ਕੀਤੀ ਗਈ ਹੈ। ਇਹ ਜਾਂਚ ਬੀ.ਪੀ.ਐੱਲ. ਦੇ ਪਿਛਲੇ ਦੋ ਸੀਜ਼ਨਾਂ ਦੌਰਾਨ ਭ੍ਰਿਸ਼ਟ ਗਤੀਵਿਧੀਆਂ ਬਾਰੇ ਜਾਣਕਾਰੀ ਦਾ ਖੁਲਾਸਾ ਨਾ ਕਰਨ, ਭ੍ਰਿਸ਼ਟਾਚਾਰ ਵਿਰੋਧੀ ਜਾਂਚ ਵਿੱਚ ਸਹਿਯੋਗ ਨਾ ਕਰਨ ਅਤੇ ਜਾਂਚ ਵਿੱਚ ਰੁਕਾਵਟ ਪਾਉਣ ਜਾਂ ਦੇਰੀ ਕਰਨ ਦੇ ਦੋਸ਼ਾਂ ਹੇਠ ਕੀਤੀ ਗਈ ਸੀ। ਇਸ ਤੋਂ ਪਹਿਲਾਂ ਮਈ ਮਹੀਨੇ ਵਿੱਚ ਵੀ ਬੀ.ਸੀ.ਬੀ.ਆਈ.ਯੂ. ਨੇ ਕਈ ਟੀਮ ਅਧਿਕਾਰੀਆਂ, ਖਿਡਾਰੀਆਂ ਅਤੇ ਫਰੈਂਚਾਇਜ਼ੀ ਮਾਲਕਾਂ 'ਤੇ ਨਿਯਮਾਂ ਦੀ ਉਲੰਘਣਾ ਦੇ ਦੋਸ਼ ਲਗਾਏ ਸਨ, ਜਦਕਿ ਇਸੇ ਮਹੀਨੇ ਦੀ ਸ਼ੁਰੂਆਤ ਵਿੱਚ ਬੀ.ਸੀ.ਬੀ. ਦੇ ਸਾਬਕਾ ਡਾਇਰੈਕਟਰ ਮੁਹੰਮਦ ਮੁਖਲੇਸੁਰ ਰਹਿਮਾਨ ਸਮੇਤ ਤਿੰਨ ਹੋਰਾਂ 'ਤੇ ਵੀ ਆਈ.ਸੀ.ਸੀ. ਦੇ ਭ੍ਰਿਸ਼ਟਾਚਾਰ ਵਿਰੋਧੀ ਕੋਡ ਤਹਿਤ ਦੋਸ਼ ਆਇਦ ਕੀਤੇ ਗਏ ਸਨ।