ਏਸ਼ੇਜ਼ ਸੀਰੀਜ਼ : ਇੰਗਲੈਂਡ ਕਪਤਾਨ ਬੇਨ ਸਟੋਕਸ ਸੱਟ ਕਾਰਨ ਮੈਦਾਨ ਤੋਂ ਬਾਹਰ

ਸਪੋਰਟਸ ਡੈਸਕ : ਆਸਟ੍ਰੇਲੀਆ ਵਿਰੁੱਧ ਖੇਡੇ ਜਾ ਰਹੇ ਸਿਡਨੀ ਟੈਸਟ ਦੇ ਚੌਥੇ ਦਿਨ ਇੰਗਲੈਂਡ ਦੀਆਂ ਮੁਸ਼ਕਿਲਾਂ ਉਸ ਸਮੇਂ ਹੋਰ ਵਧ ਗਈਆਂ ਜਦੋਂ ਉਨ੍ਹਾਂ ਦੇ ਕਪਤਾਨ ਬੇਨ ਸਟੋਕਸ ਸੱਟ ਕਾਰਨ ਲੰਗੜਾਉਂਦੇ ਹੋਏ ਮੈਦਾਨ ਤੋਂ ਬਾਹਰ ਚਲੇ ਗਏ। ਇਹ ਘਟਨਾ ਆਸਟ੍ਰੇਲੀਆ ਦੀ ਪਹਿਲੀ ਪਾਰੀ ਦੇ 127ਵੇਂ ਓਵਰ ਦੌਰਾਨ ਵਾਪਰੀ, ਜੋ ਕਿ ਸਟੋਕਸ ਦੇ ਸਪੈੱਲ ਦਾ 28ਵਾਂ ਓਵਰ ਸੀ। ਆਪਣੀ ਚੌਥੀ ਗੇਂਦ ਸੁੱਟਣ ਤੋਂ ਬਾਅਦ ਸਟੋਕਸ ਨੇ ਦਰਦ ਕਾਰਨ ਆਪਣੀ ਕਮਰ ਫੜ ਲਈ ਅਤੇ ਹੌਲੀ-ਹੌਲੀ ਚੱਲਦੇ ਹੋਏ ਮੈਦਾਨ ਛੱਡ ਦਿੱਤਾ।

ਇੰਗਲੈਂਡ ਅਤੇ ਵੇਲਜ਼ ਕ੍ਰਿਕਟ ਬੋਰਡ (ECB) ਨੇ ਸੋਸ਼ਲ ਮੀਡੀਆ ਰਾਹੀਂ ਪੁਸ਼ਟੀ ਕੀਤੀ ਹੈ ਕਿ ਸਟੋਕਸ ਦੇ ਸੱਜੇ ਐਡਕਟਰ (adductor) ਮਾਸਪੇਸ਼ੀ ਵਿੱਚ ਖਿੱਚ ਆ ਗਈ ਹੈ, ਜਿਸ ਦਾ ਡਾਕਟਰੀ ਨਿਰੀਖਣ ਕੀਤਾ ਜਾ ਰਿਹਾ ਹੈ। ਇੰਗਲੈਂਡ ਦੀ ਟੀਮ ਪਹਿਲਾਂ ਹੀ ਸੀਰੀਜ਼ ਵਿੱਚ 3-1 ਨਾਲ ਪਿੱਛੇ ਚੱਲ ਰਹੀ ਹੈ ਅਤੇ ਪਹਿਲੀ ਪਾਰੀ ਦੇ ਆਧਾਰ 'ਤੇ ਵੀ ਆਸਟ੍ਰੇਲੀਆ ਤੋਂ ਪਛੜ ਰਹੀ ਹੈ, ਅਜਿਹੇ ਵਿੱਚ ਕਪਤਾਨ ਦੀ ਫਿਟਨੈਸ ਟੀਮ ਲਈ ਵੱਡੀ ਚਿੰਤਾ ਦਾ ਵਿਸ਼ਾ ਬਣੀ ਹੋਈ ਹੈ। ਹਾਲਾਂਕਿ, ਇਹ ਵੀ ਦੱਸਿਆ ਗਿਆ ਹੈ ਕਿ ਸੱਟ ਦੇ ਬਾਵਜੂਦ ਸਟੋਕਸ ਵੱਲੋਂ ਦੂਜੀ ਪਾਰੀ ਵਿੱਚ ਬੱਲੇਬਾਜ਼ੀ ਕਰਨ ਦੀ ਉਮੀਦ ਹੈ।

ਇੰਗਲੈਂਡ ਦਾ ਇਹ ਆਸਟ੍ਰੇਲੀਆਈ ਦੌਰਾ ਸੱਟਾਂ ਦੀ ਮਾਰ ਹੇਠ ਰਿਹਾ ਹੈ। ਸਟੋਕਸ ਤੋਂ ਪਹਿਲਾਂ ਮਾਰਕ ਵੁੱਡ ਅਤੇ ਜੋਫਰਾ ਆਰਚਰ ਕ੍ਰਮਵਾਰ ਬ੍ਰਿਸਬੇਨ ਅਤੇ ਐਡੀਲੇਡ ਟੈਸਟ ਤੋਂ ਬਾਅਦ ਏਸ਼ੇਜ਼ ਤੋਂ ਬਾਹਰ ਹੋ ਗਏ ਸਨ, ਜਦੋਂ ਕਿ ਗਸ ਐਟਕਿੰਸਨ ਵੀ ਹੈਮਸਟ੍ਰਿੰਗ ਦੀ ਸੱਟ ਕਾਰਨ ਸਿਡਨੀ ਟੈਸਟ ਵਿੱਚ ਹਿੱਸਾ ਨਹੀਂ ਲੈ ਸਕੇ।