ਅਫਰੀਕਾ ਕੱਪ ਫੁੱਟਬਾਲ: ਸੇਨੇਗਲ ਨੇ ਮੇਜ਼ਬਾਨ ਮੋਰੋਕੋ ਨੂੰ ਹਰਾ ਕੇ ਜਿੱਤਿਆ ਖਿਤਾਬ

ਰਬਾਤ (ਮੋਰੋਕੋ) : ਫੁੱਟਬਾਲ ਦੇ ਮੈਦਾਨ ਤੋਂ ਇੱਕ ਵੱਡੀ ਖ਼ਬਰ ਸਾਹਮਣੇ ਆ ਰਹੀ ਹੈ, ਜਿੱਥੇ ਸੇਨੇਗਲ ਨੇ ਮੇਜ਼ਬਾਨ ਮੋਰੋਕੋ ਨੂੰ 1-0 ਨਾਲ ਹਰਾ ਕੇ ਅਫਰੀਕਾ ਕੱਪ ਆਫ ਨੇਸ਼ਨਜ਼ ਦਾ ਖਿਤਾਬ ਆਪਣੇ ਨਾਂ ਕਰ ਲਿਆ ਹੈ। ਬੇਹੱਦ ਤਣਾਅਪੂਰਨ ਹਾਲਾਤਾਂ ਵਿੱਚ ਖੇਡੇ ਗਏ ਇਸ ਫਾਈਨਲ ਮੁਕਾਬਲੇ ਵਿੱਚ ਸੇਨੇਗਲ ਨੇ ਦੂਜੀ ਵਾਰ ਇਹ ਇਤਿਹਾਸਕ ਜਿੱਤ ਦਰਜ ਕੀਤੀ ਹੈ।

ਮੈਚ ਦੇ ਨਿਰਧਾਰਿਤ ਸਮੇਂ ਤੱਕ ਦੋਵੇਂ ਟੀਮਾਂ ਕੋਈ ਗੋਲ ਨਹੀਂ ਕਰ ਸਕੀਆਂ ਸਨ। ਖੇਡ ਜਦੋਂ ਵਾਧੂ ਸਮੇਂ (Extra Time) ਵਿੱਚ ਪਹੁੰਚੀ, ਤਾਂ ਚੌਥੇ ਮਿੰਟ ਵਿੱਚ ਪੇਪ ਗੁਏ ਨੇ ਇੱਕ ਸ਼ਾਨਦਾਰ ਗੋਲ ਕਰਕੇ ਸੇਨੇਗਲ ਨੂੰ ਜਿੱਤ ਦਿਵਾਈ। ਇਸ ਤੋਂ ਪਹਿਲਾਂ ਸੇਨੇਗਲ ਦੀ ਟੀਮ ਸਾਲ 2021 ਵਿੱਚ ਚੈਂਪੀਅਨ ਬਣੀ ਸੀ।

ਫਾਈਨਲ ਮੈਚ ਦੌਰਾਨ ਹਾਲਾਤ ਉਦੋਂ ਕਾਫੀ ਵਿਗੜ ਗਏ ਜਦੋਂ ਦਰਸ਼ਕਾਂ ਨੇ ਮੈਦਾਨ ਵਿੱਚ ਵੜਨ ਦੀ ਕੋਸ਼ਿਸ਼ ਕੀਤੀ। ਦੂਜੇ ਹਾਫ ਦੇ ਸਟੌਪੇਜ ਟਾਈਮ ਵਿੱਚ ਇੱਕ ਪੈਨਲਟੀ ਦੇ ਫੈਸਲੇ ਦਾ ਵਿਰੋਧ ਕਰਦਿਆਂ ਸੇਨੇਗਲ ਦੇ ਖਿਡਾਰੀ ਮੈਦਾਨ ਛੱਡ ਕੇ ਬਾਹਰ ਚਲੇ ਗਏ ਸਨ। ਪ੍ਰਸ਼ੰਸਕਾਂ ਅਤੇ ਸੁਰੱਖਿਆ ਕਰਮੀਆਂ ਵਿਚਕਾਰ ਹੋਈ ਝੜਪ ਕਾਰਨ ਖੇਡ ਨੂੰ ਲਗਭਗ 14 ਮਿੰਟ ਤੱਕ ਰੋਕਣਾ ਪਿਆ। ਹਾਲਾਂਕਿ, ਜਦੋਂ ਮੈਚ ਮੁੜ ਸ਼ੁਰੂ ਹੋਇਆ, ਤਾਂ ਸੇਨੇਗਲ ਦੇ ਐਡੂਆਰਡ ਮੈਂਡੀ ਨੇ ਮੋਰੋਕੋ ਦੇ ਬਰਾਹਿਮ ਡਿਆਜ਼ ਦੀ ਪੈਨਲਟੀ ਨੂੰ ਰੋਕ ਕੇ ਆਪਣੀ ਟੀਮ ਦੀ ਜਿੱਤ ਯਕੀਨੀ ਬਣਾਈ।

ਮੋਰੋਕੋ ਦੀ ਹਾਰ ਤੋਂ ਬਾਅਦ 69,500 ਦਰਸ਼ਕਾਂ ਦੀ ਸਮਰੱਥਾ ਵਾਲਾ 'ਪ੍ਰਿੰਸ ਮੌਲੇ ਅਬਦੈੱਲਾ' ਸਟੇਡੀਅਮ ਅੰਤਿਮ ਸੀਟੀ ਵੱਜਦਿਆਂ ਹੀ ਖਾਲੀ ਹੋਣਾ ਸ਼ੁਰੂ ਹੋ ਗਿਆ। ਸੇਨੇਗਲ ਦੇ ਖਿਡਾਰੀਆਂ ਨੂੰ ਟਰਾਫੀ ਚੁੱਕਦੇ ਦੇਖਣ ਲਈ ਉੱਥੇ ਬਹੁਤ ਹੀ ਘੱਟ ਲੋਕ ਮੌਜੂਦ ਸਨ।