ਪੰਜਾਬ ਪੁਲਸ ਦੀ ਵੱਡੀ ਸਫ਼ਲਤਾ: ਪਾਕਿਸਤਾਨ ਦੀ ਖੁਫ਼ੀਆ ਏਜੰਸੀ ISI ਲਈ ਜਾਸੂਸੀ ਕਰਨ ਵਾਲਾ ਏਜੰਟ ਕਾਬੂ

ਮੋਹਾਲੀ (ਪਰਦੀਪ) : ਪੁਲਸ ਨੇ ਪਾਕਿਸਤਾਨ ਦੀ ਖੁਫ਼ੀਆ ਏਜੰਸੀ ਆਈ. ਐੱਸ. ਆਈ. ਲਈ ਜਾਸੂਸੀ ਕਰਨ ਵਾਲੇ ਏਜੰਟ ਨੂੰ ਕਾਬੂ ਕੀਤਾ ਹੈ। ਅਸ਼ਵਨੀ ਕਪੂਰ ਏ.ਆਈ.ਜੀ. ਸਟੇਟ ਸਪੈਸ਼ਲ ਆਪਰੇਟਿੰਗ ਸੈੱਲ ਨੇ ਦੱਸਿਆ ਹੈ ਕਿ 14 ਦਸੰਬਰ ਨੂੰ ਗੁਪਤ ਸੂਚਨਾ ਪ੍ਰਾਪਤ ਹੋਈ ਸੀ ਕਿ ਤਪਿੰਦਰ ਸਿੰਘ ਪੁੱਤਰ ਪਰਮਿੰਦਰ ਸਿੰਘ ਆਰ. 3397/1, ਸੈਕਟਰ 40-ਡੀ, ਚੰਡੀਗੜ੍ਹ, ਜੋ ਕਿ ਭਾਰਤ ਤੋਂ ਬਾਹਰ ਬੈਠੇ ਕੱਟੜਪੰਥੀਆਂ ਦੇ ਨਿਰਦੇਸ਼ਾਂ ’ਤੇ ਪਾਕਿਸਤਾਨ ਦੀ ਖੁਫੀਆ ਏਜੰਸੀ ਆਈ ਐਸ ਆਈ" ਲਈ ਜਾਸੂਸੀ ਏਜੰਟ ਵਜੋਂ ਕੰਮ ਕਰ ਰਿਹਾ ਹੈ ਅਤੇ ਉਨ੍ਹਾਂ ਨੂੰ ਪੁਲਸ ਸਟੇਸ਼ਨਾਂ ਅਤੇ ਫੌਜ ਦੇ ਠਿਕਾਣਿਆਂ ਬਾਰੇ ਸੰਵੇਦਨਸ਼ੀਲ ਦਸਤਾਵੇਜ਼, ਟਿਕਾਣੇ ਅਤੇ ਹੋਰ ਜਾਣਕਾਰੀ ਦੇ ਰਿਹਾ ਸੀ।

ਇਹ ਵੀ ਪੜ੍ਹੋ : BSF ਨੇ ਪਾਕਿਸਤਾਨ ਤੋਂ ਆਏ ਡਰੋਨ 'ਤੇ ਕੀਤੀ ਫਾਇਰਿੰਗ, ਕਰੋੜਾਂ ਦੀ ਹੈਰੋਇਨ ਬਰਾਮਦ

ਇਸ ਲਈ ਭਾਰਤ ਦੇਸ਼ ਦੀ ਰਾਸ਼ਟਰੀ ਸੁਰੱਖਿਆ ਲਈ ਖਤਰਾ ਬਣ ਰਿਹਾ ਹੈ। ਇਸ ਸਬੰਧੀ ਐਫ.ਆਈ.ਆਰ ਨੰਬਰ 09 ਮਿਤੀ 14.12.2022 ਯੂ/ਐਸ 3,4,5 ਅਤੇ 9 ਆਫੀਸ਼ੀਅਲ ਸੀਕਰੇਟਸ ਐਕਟ 1923 ਥਾਣਾ ਐਸ.ਐਸ.ਓ.ਸੀ ਐਸ.ਏ.ਐਸ.ਨਗਰ ਵਿਖੇ ਦਰਜ ਕੀਤੀ ਗਈ ਸੀ ਜਿਸ ਉਪਰੰਤ ਛਾਪੇਮਾਰੀ ਕੀਤੀ ਗਈ ਅਤੇ ਪੁਲਸ ਪਾਰਟੀ ਐਸ.ਐਸ.ਓ.ਸੀ ਐਸ.ਏ.ਐਸ.ਨਗਰ ਨੇ ਇਲਾਕੇ ਵਿਚੋਂ ਤਪਿੰਦਰ ਸਿੰਘ ਨੂੰ ਗ੍ਰਿਫਤਾਰ ਕੀਤਾ। ਤਪਿੰਦਰ ਦੇ ਕਬਜ਼ੇ 'ਚੋਂ ਫੇਜ਼-01 ਮੋਹਾਲੀ ਅਤੇ 02 ਮੋਬਾਈਲ ਫੋਨ ਬਰਾਮਦ ਕੀਤੇ ਗਏ ਹਨ।

ਮੁੱਢਲੀ ਜਾਂਚ ਦੌਰਾਨ ਪਤਾ ਲੱਗਾ ਹੈ ਕਿ ਤਪਿੰਦਰ ਸਿੰਘ ( 40 ਸਾਲ), ਚੰਡੀਗੜ੍ਹ ਵਿੱਚ ਜੰਮਿਆ ਅਤੇ ਪਾਲਿਆ ਗਿਆ। ਉਹ ਡਬਲ ਐੱਮ.ਏ. ਗ੍ਰੈਜੂਏਟ ਹੈ ਜਿਸ ਨੇ ਖਾਲਸਾ ਕਾਲਜ ਸੈਕਟਰ-26, ਚੰਡੀਗੜ੍ਹ ਤੋਂ ਐੱਮ. ਏ. (ਪੰਜਾਬੀ) ਅਤੇ ਪੰਜਾਬ ਯੂਨੀ. ਤੋਂ ਐੱਮ. ਏ (ਰਾਜਨੀਤੀ ਵਿਗਿਆਨ) ਪਾਸ ਕੀਤੀ ਹੈ। ਸੀ. ਐੱਚ. ਡੀ. 2018 ਵਿਚ. ਫੇਸਬੁੱਕ ਰਾਹੀਂ ਤਪਿੰਦਰ ਸ਼ੁਰੂ ਵਿਚ ਵਿਦੇਸ਼ਾਂ ਵਿਚ ਬੈਠੇ ਕੱਟੜਪੰਥੀਆਂ ਦੇ ਸੰਪਰਕ ਵਿਚ ਆਇਆ ਅਤੇ ਕੱਟੜਪੰਥੀ ਬਣ ਗਿਆ, ਜਿਸਨੇ ਉਸਨੂੰ ਇੱਕ ਕੱਟੜਪੰਥੀ ਵਟਸਐਪ ਗਰੁੱਪ ਵਿੱਚ ਸ਼ਾਮਲ ਕੀਤਾ ਅਤੇ ਇਸ ਤਰ੍ਹਾਂ ਪਾਕਿ-ਆਈ. ਐੱਸ. ਆਈ. ਦੇ ਖੁਫੀਆ ਏਜੰਟਾਂ ਨਾਲ ਹੱਥ ਮਿਲਾਉਣ ਦਾ ਰਸਤਾ ਬਣਾਇਆ, ਜਿਨ੍ਹਾਂ ਨੇ ਜਾਣਕਾਰੀ ਪ੍ਰਾਪਤ ਕਰਨ ਲਈ ਤਪਿੰਦਰ ਨੂੰ "ਜਾਸੂਸ" ਵਜੋਂ ਭਰਤੀ ਕੀਤਾ।

ਇਹ ਵੀ ਪੜ੍ਹੋ : ਸੰਸਦ 'ਚ ਗੂੰਜਿਆ ਲਤੀਫ਼ਪੁਰਾ ਦੇ ਪੀੜਤਾਂ ਦਾ ਮੁੱਦਾ , ਰਵਨੀਤ ਬਿੱਟੂ ਨੇ ਕੀਤੀ ਇਹ ਮੰਗ

ਤਪਿੰਦਰ ਹੁਣ 03 ਸਾਲਾਂ ਤੋਂ ਵੱਧ ਸਮੇਂ ਤੋਂ ਆਈਐਸਆਈ ਏਜੰਟਾਂ ਨਾਲ ਕੰਮ ਕਰ ਰਿਹਾ ਹੈ ਅਤੇ ਹੁਣ ਤੱਕ ਪੰਜਾਬ ਵਿੱਚ ਸਥਿਤ ਵੱਖ-ਵੱਖ ਪੁਲਸ ਇਮਾਰਤਾਂ ਅਤੇ ਫੌਜ ਦੇ ਠਿਕਾਣਿਆਂ ਦੇ ਸੰਵੇਦਨਸ਼ੀਲ ਦਸਤਾਵੇਜ਼, ਸਥਾਨ, ਫੋਟੋਆਂ ਅਤੇ ਹੋਰ ਜਾਣਕਾਰੀ ਪ੍ਰਦਾਨ ਕਰ ਚੁੱਕਾ ਹੈ। ਮੁਲਜ਼ਮਾਂ ਕੋਲੋਂ ਬਰਾਮਦ ਕੀਤੇ ਗਏ ਮੋਬਾਈਲ ਫੋਨਾਂ ਵਿੱਚੋਂ ਤਪਿੰਦਰ ਸਿੰਘ ਦੀਆਂ ਪਾਕਿਸਤਾਨ ਆਈ.ਐਸ.ਆਈ ਏਜੰਟਾਂ ਨਾਲ ਵਟਸਐਪ ਚੈਟ, ਵੱਖ-ਵੱਖ ਪੁਲਸ ਇਮਾਰਤਾਂ ਦੀਆਂ ਫੋਟੋਆਂ ਅਤੇ ਲੋਕੇਸ਼ਨਾਂ, ਉਸ ਵੱਲੋਂ ਆਪਣੇ ਮੋਬਾਈਲ ਫੋਨ ਵਿੱਚ ਬਣਾਈ ਐੱਸ.ਐੱਸ.ਓ.ਸੀ ਮੋਹਾਲੀ ਦੀ ਬਿਲਡਿੰਗ ਦੀ ਵੀਡਿਓ ਅੱਗੇ ਪਾਕਿਸਤਾਨ ਆਈ.ਐਸ.ਆਈ ਏਜੰਟਾਂ ਨੂੰ ਭੇਜੀ ਗਈ ਹੈ। ਕਾਬੂ ਕੀਤੇ ਮੁਲਜ਼ਮ ਅਨੁਸਾਰ ਪਹਿਲਾਂ ਆਈ.ਐਸ.ਆਈ ਏਜੰਟਾਂ ਨੂੰ ਭੇਜੇ ਗਏ ਸੰਵੇਦਨਸ਼ੀਲ ਰਿਕਾਰਡ, ਫੋਟੋਆਂ ਅਤੇ ਹੋਰ ਜਾਣਕਾਰੀਆਂ ਨੂੰ ਉਸ ਨੇ ਆਪਣੇ ਮੋਬਾਈਲ ਫੋਨ ਤੋਂ ਮਿਟਾ ਦਿੱਤਾ ਹੈ। ਪੁਲਿਸ ਨੇ ਹੋਰ ਪੁੱਛਗਿੱਛ ਕਰਨ ਲਈ ਮੁਲਜ਼ਮਾਂ ਦਾ 4 ਦਿਨ ਦਾ ਪੁਲਸ ਰਿਮਾਂਡ ਹਾਸਲ ਕੀਤਾ ਹੈ ਤਾਂ ਜੋ ਪਿਛਲੇ ਅਤੇ ਅਗਲੇ ਸਬੰਧਾਂ ਦਾ ਪਤਾ ਲਗਾਇਆ ਜਾ ਸਕੇ।