ਬਾਦਲ ਪਰਿਵਾਰ ਨੂੰ ਝਟਕਾ : ਸਾਬਕਾ ਅਕਾਲੀ ਵਿਧਾਇਕ ਔਲਖ ਸਮੇਤ ਕਈ ਆਗੂ ਢੀਂਡਸਾ ਗਰੁੱਪ ''ਚ ਸ਼ਾਮਲ

ਮਾਨਸਾ,(ਸੰਦੀਪ ਮਿੱਤਲ)-ਮਾਨਸਾ ਜ਼ਿਲ੍ਹੇ ਅੰਦਰ ਸ਼੍ਰੋਮਣੀ ਅਕਾਲੀ ਦਲ ਬਾਦਲ ਤੋਂ ਨਿਰਾਸ਼ ਹੋ ਕੇ ਸਾਬਕਾ ਅਕਾਲੀ ਵਿਧਾਇਕ ਅਤੇ ਪਨਸੀਡ ਪੰਜਾਬ ਦੇ ਸਾਬਕਾ ਚੇਅਰਮੈਨ ਸੁਖਵਿੰਦਰ ਸਿੰਘ ਔਲਖ, ਸ਼੍ਰੋਮਣੀ ਕਮੇਟੀ ਮੈਂਬਰ ਮਾ. ਮਿੱਠੂ ਸਿੰਘ ਕਾਹਨੇਕੇ, ਧਰਮ ਪ੍ਰਚਾਰ ਕਮੇਟੀ ਮੈਂਬਰ ਜਥੇਦਾਰ ਮਨਜੀਤ ਸਿੰਘ ਬੱਪੀਆਣਾ, ਸਾਬਕਾ ਐਸ.ਜੀ.ਪੀ.ਸੀ ਮੈਂਬਰ ਕੌਰ ਸਿੰਘ ਖਾਰਾ ਸਮੇਤ ਵੱਡੀ ਗਿਣਤੀ 'ਚ ਅਕਾਲੀ ਵਰਕਰ ਅੱਜ ਸਾਬਕਾ ਵਿੱਤ ਮੰਤਰੀ ਪਰਮਿੰਦਰ ਸਿੰਘ ਢੀਂਡਸਾ ਦੀ ਅਗਵਾਈ 'ਚ ਸ਼੍ਰੋਮਣੀ ਅਕਾਲੀ ਦਲ ਡੈਮੋਕਰੇਟਿਕ 'ਚ ਸ਼ਾਮਲ ਹੋ ਗਏ।

ਇਸ ਬਾਰੇ ਸਾਬਕਾ ਵਿੱਤ ਮੰਤਰੀ ਤੇ ਮੌਜੂਦਾ ਵਿਧਾਇਕ ਪਰਮਿੰਦਰ ਸਿੰਘ ਢੀਂਡਸਾ ਨੇ ਆਪਣੇ ਪ੍ਰਤੀਕਰਮ 'ਚ ਕਿਹਾ ਕਿ ਸੁਖਬੀਰ ਬਾਦਲ ਨੇ ਆਪਣੇ ਵਪਾਰ ਤੇ ਪਤਨੀ ਦੀ ਕੁਰਸੀ ਮੋਹ 'ਚ ਫਸ ਕੇ ਪਾਰਟੀ ਨੂੰ ਮਾਫੀਆ ਸਿਆਸਤ ਦੇ ਹਵਾਲੇ ਕਰਕੇ ਪੰਜਾਬ ਅਤੇ ਅਕਾਲੀ ਦਲ ਦਾ ਵੱਡਾ ਨੁਕਸਾਨ ਕੀਤਾ ਹੈ। ਉਨ੍ਹਾਂ ਕਿਹਾ ਕਿ ਪੰਜਾਬੀਆਂ ਵਲੋਂ ਲਗਾਤਾਰ ਮਿਲ ਰਹੇ ਪਿਆਰ ਤੇ ਤਾਕਤ ਸਦਕਾ ਹੀ ਅਸੀਂ ਇਸ ਚੁਣੌਤੀ ਨੂੰ ਸਵੀਕਾਰ ਕੀਤਾ ਹੈ। ਜਿਸ ਅੱਗੇ ਸੁਖਬੀਰ ਦੀ ਮਾਫੀਆ ਸਿਆਸਤ ਵੀ ਪੰਜਾਬੀਆਂ ਅੱਗੇ ਟਿਕ ਨਹੀਂ ਸਕੇਗੀ।

ਪੰਜਾਬ ਦੇ ਸਾਬਕਾ ਮੰਤਰੀ ਨਵਜੋਤ ਸਿੰਘ ਸਿੱਧੂ ਦੇ ਪਾਰਟੀ 'ਚ ਆਉਣ ਬਾਰੇ ਪੁੱਛੇ ਸਵਾਲ ਦੇ ਜਵਾਬ 'ਚ ਉਨ੍ਹਾਂ ਕਿਹਾ ਕਿ ਪੰਜਾਬ ਅਤੇ ਪੰਜਾਬੀਅਤ ਦੇ ਭਲੇ ਲਈ ਕਿਸੇ ਦੇ ਵੀ ਪਾਰਟੀ 'ਚ ਆਉਣ 'ਤੇ ਉਸ ਦਾ ਭਰਵਾਂ ਸੁਆਗਤ ਕੀਤਾ ਜਾਵੇਗਾ। ਉਨ੍ਹਾਂ ਕਿਹਾ ਕਿ ਹੁਣ ਉਨ੍ਹਾਂ ਦਾ ਇੱਕੋ ਨਿਸ਼ਾਨਾ ਹੈ ਕਿ ਪੰਜਾਬ ਨੂੰ ਕਿਵੇ ਬਚਾਇਆ ਜਾਵੇ। ਢੀਂਡਸਾ ਨੇ ਕਿਹਾ ਕਿ ਅਕਾਲੀ ਦਲ 'ਚ 40-40 ਸਾਲ ਤੱਕ ਸਖਤ ਮਿਹਨਤ ਕਰਨ ਵਾਲੇ ਸੀਨੀਅਰ ਟਕਸਾਲੀ ਨੇਤਾਵਾਂ ਨੂੰ ਸੁਖਬੀਰ ਨੇ ਮਾਫੀਆ ਸਿਆਸਤ ਰਾਹੀਂ ਪਾਰਟੀ ਦੀ ਵਿਰਾਸਤ ਤੋਂ ਲਾਂਭੇ ਕਰਨ ਦੀ ਕੋਝੀ ਸਾਜ਼ਿਸ਼ ਰਚੀ ਪਰ ਉਹ ਇਸ ਮਾਮਲੇ 'ਚ ਅਸਫਲ ਸਾਬਤ ਹੋਏ ਹਨ ਕਿਉਂਕਿ ਅੱਜ ਮਾਫੀਆ ਸਿਆਸਤ ਤੋਂ ਦੁੱਖੀ ਅਤੇ ਨਿਰਾਸ਼ ਹੋ ਕੇ ਟਕਸਾਲੀ ਨੇਤਾ ਤੇ ਵਰਕਰ ਵੱਡੀ ਗਿਣਤੀ 'ਚ ਪੰਜਾਬ ਦੇ ਹਿੱਤਾਂ ਨੂੰ ਬਚਾਉਣ ਲਈ ਬਾਦਲ ਪਰਿਵਾਰ ਦਾ ਸਾਥ ਛੱਡ ਕੇ ਸ਼੍ਰੋਮਣੀ ਅਕਾਲੀ ਦਲ ਡੈਮੋਕਰੇਟਿਕ ਨਾਲ ਜੁੜ ਰਹੇ ਹਨ। ਇਸ ਮੌਕੇ ਸੁਖਮਨਦੀਪ ਸਿੰਘ ਡਿੰਪੀ, ਗੁਰਸੇਵਕ ਸਿੰਘ, ਮਨਜੀਤ ਸਿੰਘ ਚੋਟੀਆਂ ਆਦਿ ਵੀ ਹਾਜ਼ਰ ਸਨ।