ਕੂੰਮਕਲਾਂ ਥਾਣਾ ਅਧੀਨ ਆਉਂਦੇ ਪਿੰਡਾਂ ’ਚ ਰੇਤ ਮਾਫ਼ੀਆ ਸਰਗਰਮ, ਇੰਝ ਹੁੰਦਾ ਪੂਰਾ ਖੇਡ

ਮਾਛੀਵਾੜਾ ਸਾਹਿਬ (ਟੱਕਰ) : ਕੂੰਮਕਲਾਂ ਥਾਣਾ ਅਧੀਨ ਆਉਂਦੇ ਪਿੰਡਾਂ ਵਿਚ ਰੇਤ ਮਾਫ਼ੀਆ ਬੇਖੌਫ਼ ਅਤੇ ਸਰਗਰਮ ਦਿਖਾਈ ਦੇ ਰਿਹਾ ਹੈ ਕਿਉਂਕਿ ਪਿਛਲੀਆਂ 2 ਰਾਤਾਂ ਵਿਚ ਦੋ ਪਿੰਡਾਂ ਦੀਆਂ ਪੰਚਾਇਤੀ ਜ਼ਮੀਨਾਂ ’ਚੋਂ ਨਾਜਾਇਜ਼ ਮਾਈਨਿੰਗ ਕਰ ਚੋਰੀ ਟਿੱਪਰ ਭਰੇ ਗਏ ਅਤੇ ਪੁਲਸ ਵਲੋਂ ਅਜੇ ਤੱਕ ਇਸ ਸਬੰਧੀ ਸ਼ਿਕਾਇਤਾਂ ਮਿਲਣ ਦੇ ਬਾਵਜੂਦ ਵੀ ਕੋਈ ਪਰਚਾ ਦਰਜ ਨਹੀਂ ਕੀਤਾ ਗਿਆ। ਪ੍ਰਾਪਤ ਜਾਣਕਾਰੀ ਅਨੁਸਾਰ 2 ਅਕਤੂਬਰ ਦੀ ਰਾਤ ਨੂੰ ਥਾਣਾ ਕੂੰਮਕਲਾਂ ਅਧੀਨ ਪੈਂਦੇ ਪਿੰਡ ਮੰਡ ਚੌਂਤਾ ਦੀ ਪੰਚਾਇਤੀ ਜ਼ਮੀਨ ’ਚੋਂ ਨਾਜਾਇਜ਼ ਮਾਈਨਿੰਗ ਕਰ ਰੇਤ ਦੇ ਚੋਰੀ ਟਿੱਪਰ ਭਰ ਲਏ ਗਏ। ਇਸ ਸਬੰਧੀ ਪਿੰਡ ਦੇ ਸਰਪੰਚ ਵਲੋਂ ਪੁਲਸ ਤੇ ਪੰਚਾਇਤ ਵਿਭਾਗ ਨੂੰ ਸੂਚਿਤ ਕਰ ਦਿੱਤਾ ਗਿਆ ਕਿ ਪਿੰਡ ਦੀ ਕਰੀਬ ਅੱਧਾ ਏਕੜ ਪੰਚਾਇਤੀ ਜ਼ਮੀਨ ’ਚੋਂ ਰਾਤ ਨੂੰ ਨਾਜਾਇਜ਼ ਮਾਈਨਿੰਗ ਹੋਈ ਅਤੇ ਡੂੰਘੇ ਖੱਡੇ ਪਾ ਕੇ ਰੇਤਾ ਚੋਰੀ ਕਰ ਲਿਆ ਗਿਆ। 

ਕੂੰਮਕਲਾਂ ਅਧੀਨ ਆਉਂਦੇ ਪਿੰਡ ਮੰਡ ਚੌਂਤਾ ਵਿਖੇ ਅਜੇ ਇਹ ਨਾਜਾਇਜ਼ ਮਾਈਨਿੰਗ ਦਾ ਮਾਮਲਾ ਸੁਲਝਿਆ ਨਹੀਂ ਕਿ ਬੀਤੀ ਰਾਤ ਰੇਤ ਮਾਫ਼ੀਆ ਨੇ ਭਮਾ ਖੁਰਦ ਦੀ ਪੰਚਾਇਤੀ ਜ਼ਮੀਨ ’ਚੋਂ ਮਸ਼ੀਨਾਂ ਲਗਾ ਕੇ ਟਿੱਪਰਾਂ ਰਾਹੀਂ ਰੇਤ ਚੋਰੀ ਕਰ ਲਿਆ ਗਿਆ। ਪਿੰਡ ਦੇ ਪੰਚਾਇਤ ਮੈਂਬਰ ਹਰਵਿੰਦਰ ਸਿੰਘ ਨੇ ਦੱਸਿਆ ਕਿ ਉਸਨੇ ਪਿੰਡ ਦੀ ਜ਼ਮੀਨ ਚਕੌਤੇ ’ਤੇ ਲਈ ਹੈ ਅਤੇ ਕੁਝ ਦਿਨ ਪਹਿਲਾਂ ਉਸਨੇ ਹਰਾ ਚਾਰਾ ਵੱਢ ਕੇ ਅਗਲੀ ਬਿਜਾਈ ਲਈ ਵਾਹ ਕੇ ਤਿਆਰ ਕੀਤੀ ਸੀ। ਜਦੋਂ ਅੱਜ ਉਸਨੇ ਸਵੇਰੇ ਆ ਕੇ ਦੇਖਿਆ ਤਾਂ ਉਸਦੀ ਇਹ ਚਕੌਤੇ ’ਤੇ ਲਈ ਜ਼ਮੀਨ ’ਚੋਂ ਮਸ਼ੀਨਾਂ ਰਾਹੀਂ ਡੂੰਘੇ ਖੱਡੇ ਪਾ ਕੇ ਰੇਤ ਕੱਢ ਕੇ ਨਾਜਾਇਜ਼ ਮਾਈਨਿੰਗ ਕੀਤੀ ਹੋਈ ਸੀ। ਇਸ ਰੇਤ ਚੋਰੀ ਤੇ ਨਾਜਾਇਜ ਮਾਈਨਿੰਗ ਸਬੰਧੀ ਉਸ ਵਲੋਂ ਥਾਣਾ ਕੂੰਮਕਲਾਂ ਨੂੰ ਸੂਚਿਤ ਕਰ ਦਿੱਤਾ ਗਿਆ। ਹੈਰਾਨੀ ਦੀ ਗੱਲ ਤਾਂ ਇਹ ਹੈ ਕਿ ਥਾਣਾ ਕੂੰਮਕਲਾਂ ਅਧੀਨ ਪੈਂਦੇ 2 ਪਿੰਡਾਂ ਦੀਆਂ ਪੰਚਾਇਤੀ ਜ਼ਮੀਨਾਂ ’ਚੋਂ ਲਗਾਤਾਰ 2 ਰਾਤਾਂ ਵਿਚ ਮਸ਼ੀਨਾਂ ਤੇ ਟਿੱਪਰਾਂ ਰਾਹੀਂ ਨਾਜਾਇਜ਼ ਮਾਈਨਿੰਗ ਕਰ ਰੇਤ ਚੋਰੀ ਕਰ ਲਿਆ ਗਿਆ ਅਤੇ ਇਹ ਬੇਖੌਫ਼ ਰੇਤ ਮਾਫ਼ੀਆ ਕਿਸ ਦੀ ਸ਼ਹਿ ’ਤੇ ਇਹ ਵੱਡਾ ਅਪਰਾਧ ਕਰ ਗਿਆ ਜੋ ਕਿ ਲੋਕਾਂ ਵਿਚ ਚਰਚਾ ਦਾ ਵਿਸ਼ਾ ਬਣਿਆ ਹੈ। 

ਇਸ ਸਬੰਧੀ ਜਦੋਂ ਥਾਣਾ ਕੂੰਮਕਲਾਂ ਮੁਖੀ ਕਮਲਪ੍ਰੀਤ ਸਿੰਘ ਨਾਲ ਗੱਲਬਾਤ ਕੀਤੀ ਗਈ ਤਾਂ ਉਨ੍ਹਾਂ ਕਿਹਾ ਕਿ ਪੁਲਸ ਨੂੰ ਨਾਜਾਇਜ਼ ਮਾਈਨਿੰਗ ਸਬੰਧੀ ਸ਼ਿਕਾਇਤਾਂ ਮਿਲੀਆਂ ਹਨ ਇਸ ਸਬੰਧੀ ਸ਼ਿਕਾਇਤਕਰਤਾ ਮਾਈਨਿੰਗ ਵਿਭਾਗ ਨੂੰ ਸ਼ਿਕਾਇਤ ਦੇਣ ਜਿਨ੍ਹਾਂ ਦੀ ਰਿਪੋਰਟ ਦੇ ਅਧਾਰ ’ਤੇ ਕਾਨੂੰਨੀ ਕਾਰਵਾਈ ਅਮਲ ਵਿਚ ਲਿਆਂਦੀ ਜਾਵੇਗੀ। ਉਨ੍ਹਾਂ ਕਿਹਾ ਕਿ ਰਾਤ ਨੂੰ ਪੁਲਸ ਗਸ਼ਤ ਵਧਾ ਦਿੱਤੀ ਜਾਵੇਗੀ ਤਾਂ ਜੋ ਨਾਜਾਇਜ਼ ਮਾਈਨਿੰਗ ਨੂੰ ਨੱਥ ਪਾਈ ਜਾ ਸਕੇ।