22 ਸਾਲ ਬਾਅਦ ਲਾਇਬ੍ਰੇਰੀ ’ਚੋਂ ਧਾਰਮਕ ਪੋਥੀਆਂ ਨੂੰ ਆਜ਼ਾਦ ਕਰਵਾਈਅਾਂ

ਗੁਰਦਾਸਪੁਰ/ਸ੍ਰੀ ਹਰਿਗੋਬਿੰਦਪੁਰ, ਘੁਮਾਣ,   (ਵਿਨੋਦ, ਰਮੇਸ਼, ਬਾਬਾ, ਬਾਬੂ)-  ਸ੍ਰੀ ਹਰਿਗੋਬਿੰਦਪੁਰ ਵਿਖੇ ਸੋਭਾ ਸਿੰਘ ਫਾਊਂਡੇਸ਼ਨ ਲਾਇਬ੍ਰੇਰੀ ਵਿਚ ਧਾਰਮਕ ਪੋਥੀਆਂ, ਗ੍ਰੰਥਾਂ ਅਤੇ ਕਿਤਾਬਾਂ ਦੀ ਹੋ ਰਹੀ ਬੇਅਦਬੀ ਦੇ ਸਬੰਧ ਵਿਚ ਸ੍ਰੀ ਗੁਰੂ ਗ੍ਰੰਥ ਸਾਹਿਬ ਸਤਿਕਾਰ ਕਮੇਟੀ ਪੰਜਾਬ ਦੇ ਮੁੱਖ ਸੇਵਾਦਾਰ ਬਲਬੀਰ ਸਿੰਘ ਮੁੱਛਲ  ਨੂੰ ਗੁਪਤ ਸੂਚਨਾ ਮਿਲੀ ਸੀ ਕਿ ਇਥੇ ਧਾਰਮਕ ਕਿਤਾਬਾਂ ਅਤੇ ਗ੍ਰੰਥਾਂ ਦੀ ਬੇਅਦਬੀ ਹੋ ਰਹੀ ਹੈ, ਜਿਸ ਦੀ ਕੋਈ ਸਾਂਭ-ਸੰਭਾਲ ਨਹੀਂ ਕਰ ਰਿਹਾ। ਇਸ ਸਬੰਧੀ ਮੁੱਛਲ ਸਾਥੀਆਂ  ਸਮੇਤ ਸੋਭਾ ਸਿੰਘ ਫਾਊਂਡੇਸ਼ਨ ਲਾਇਬ੍ਰੇਰੀ ਵਿਖੇ ਪਹੁੰਚੇ, ਜਿਥੇ ਉਨ੍ਹਾਂ ਦਰਵਾਜ਼ਾ ਖੋਲ੍ਹਿਆ  ਤਾਂ ਦੇਖਿਆ ਕਿ ਸ੍ਰੀ ਗੁਰੂ ਗ੍ਰੰਥ ਸਾਹਿਬ ਜੀ ਨਾਲ ਸਬੰਧਤ ਧਾਰਮਕ ਪੋਥੀਆਂ, ਕਿਤਾਬਾਂ ਦੀ ਕਾਫੀ ਵੱਡੇ ਰੂਪ ਵਿਚ ਬੇਅਦਬੀ ਹੋ ਰਹੀ ਸੀ। ਉਨ੍ਹਾਂ ਦੇਖਿਆ ਕਿ  ਕਿਤਾਬਾਂ ਉਪਰ ਕਾਫ਼ੀ ਧੂੜ-ਮਿੱਟੀ ਪਈ ਹੋਈ  ਸੀ ਅਤੇ ਕਈ ਕਿਤਾਬਾਂ ਅਤੇ ਪੋਥੀਆਂ ਨੂੰ ਸਿਉਂਕ ਖਾ ਚੁੱਕੀ  ਸੀ ਅਤੇ ਕੁਝ ਕਿਤਾਬਾਂ ਇਨ੍ਹਾਂ ਨੇ ਬਾਥਰੂਮ ਵਿਚ ਸੁੱਟੀਆਂ ਸਨ।  ਮੁੱਛਲ ਨੇ ਕਿਹਾ ਕਿ ਉਨ੍ਹਾਂ ਦੀ ਮੁੱਖ ਮੰਗ ਹੈ ਕਿ ਇਨ੍ਹਾਂ ਦੋਸ਼ੀਆਂ ਖ਼ਿਲਾਫ਼ ਕਾਰਵਾਈ ਕੀਤੀ ਜਾਵੇ ਜਿਨ੍ਹਾਂ ਨੇ ਇਸ ਫਾਊਂਡੇਸ਼ਨ ਦਾ ਨੀਂਹ-ਪੱਥਰ ਰੱਖਿਆ ਸੀ।  ਉਨ੍ਹਾਂ ਦੱਸਿਆ ਕਿ ਇਹ ਸਾਰੀ ਜੋ  ਕਾਰਵਾਈ ਹੋਈ ਹੈ, ਉਹ ਨਾਇਬ ਤਹਿਸੀਲਦਾਰ ਅਮਰਜੀਤ ਸਿੰਘ ਦੀ ਹਾਜ਼ਰੀ ਵਿਚ ਕੀਤੀ ਹੈ। ਉਨ੍ਹਾਂ ਨੇ  ਭਰੋਸਾ  ਦਿੱਤਾ ਕਿ ਦੋਸ਼ੀਆਂ ਖਿਲਾਫ ਬਣਦੀ ਕਾਨੂੰਨੀ ਕਾਰਵਾਈ ਕੀਤੀ ਜਾਵੇਗੀ।ਇਸ ਮੌਕੇ  ਰਣਜੀਤ ਸਿੰਘ, ਸਤਨਾਮ ਸਿੰਘ, ਗੁਰਨਾਮ ਸਿੰਘ, ਕਰਤਾਰ ਸਿੰਘ, ਬਲਵਿੰਦਰ ਸਿੰਘ ਮੰਡ, ਸੁਖਚੈਨ ਸਿੰਘ ਆਦਿ  ਮੌਜੂਦ ਸਨ। 
1996 ਵਿਚ ਲਾਇਬ੍ਰੇਰੀ ਦਾ ਹੋਇਆ ਸੀ ਉਦਘਾਟਨ 
ਮੁੱਛਲ ਨੇ ਦੱਸਿਆ ਕਿ ਇਹ  ਸਰਕਾਰੀ ਜਗ੍ਹਾ ਉਪਰ ਲਾਇਬ੍ਰੇਰੀ ਬਣੀ ਹੋਈ ਹੈ  ਅਤੇ 1996 ਵਿਚ ਇਸ ਦਾ ਉਦਘਾਟਨ ਕੀਤਾ ਗਿਆ  ਸੀ ਅਤੇ 1996 ਤੋਂ ਲੈ ਕੇ 2018 ਤੱਕ ਇਸ ਦੀ  ਦੇਖ-ਰੇਖ ਨਹੀਂ ਕੀਤੀ ਗਈ। ਉਨ੍ਹਾਂ  ਕਿਹਾ ਕਿ ਲਾਇਬ੍ਰੇਰੀ ’ਚੋਂ ਤਕਰੀਬਨ 21 ਪੋਥੀਆਂ ਅਤੇ 200 ਦੇ ਕਰੀਬ ਧਾਰਮਕ ਕਿਤਾਬਾਂ ਹਨ ਜਿਨ੍ਹਾਂ ਵਿਚ ਕੁਝ ਕਿਤਾਬਾਂ ਨੂੰ ਸਿਉਂਕ ਖਾ ਚੁੱਕੀ ਹੈ।  ਉਨ੍ਹਾਂ  ਇਸ  ਬੇਅਦਬੀ ਦੀ ਲਿਖਤੀ ਸ਼ਿਕਾਇਤ ਥਾਣਾ ਸ੍ਰੀ ਹਰਿਗੋਬਿੰਦਪੁਰ  ਨੂੰ ਕਰ ਦਿੱਤੀ ਹੈ। ਉਨ੍ਹਾਂ ਦੀ  ਮੰਗ ਹੈ ਕਿ ਦੋਸ਼ੀਆਂ ਖਿਲਾਫ ਸਖਤ ਕਾਰਵਾਈ ਕੀਤੀ ਜਾਵੇ।
ਕੀ ਕਹਿਣਾ ਹੈ ਸੋਭਾ ਸਿੰਘ ਫਾਊਂਡੇਸ਼ਨ ਦੇ ਪ੍ਰਧਾਨ ਦਾ
ਇਸ ਸਬੰਧੀ ਜਦੋਂ  ਸੋਭਾ ਸਿੰਘ ਫਾਊਂਡੇਸ਼ਨ ਦੇ ਪ੍ਰਧਾਨ ਤੇਜਿੰਦਰ ਸਿੰਘ ਪੰਨੂੰ ਨਾਲ ਗੱਲ ਕੀਤੀ ਤਾਂ ਉਨ੍ਹਾਂ ਕਿਹਾ ਕਿ 1996 ’ਚ ਸ਼੍ਰੋਮਣੀ ਗੁਰਦੁਆਰਾ ਪ੍ਰਬੰਧਕ ਕਮੇਟੀ ਵੱਲੋਂ  ਇਹ ਲਾਇਬ੍ਰੇਰੀ ਲਈ ਕਿਤਾਬਾਂ ਭੇਜੀਅਾਂ ਸਨ  ਪਰ ਲਾਇਬ੍ਰੇਰੀ ਚਾਲੂ ਨਹੀਂ ਹੋ ਸਕੀ, ਉਦੋਂ ਤੋਂ ਹੀ ਕਿਤਾਬਾਂ  ਇਥੇ ਹੀ ਪਈਅਾਂ ਸਨ। ਐੱਸ. ਜੀ. ਪੀ. ਸੀ. ਦੀਅਾਂ ਕਿਤਾਬਾਂ ਹੋਣ ਕਰ ਕੇ ਅਸੀਂ ਕਿਸੇ ਹੋਰ ਸੰਸਥਾਂ ਨੂੰ ਦੇ ਨਹੀਂ ਸਕੇ।