ਪ੍ਰੀ-ਵੈਡਿੰਗ ਸ਼ੂਟ ਕਰਵਾ ਕੇ ਆ ਰਹੇ ਲੜਕੇ-ਲੜਕੀ ਦੀ ਕਾਰ ਹਾਦਸਾਗ੍ਰਸਤ, 4 ਜ਼ਖ਼ਮੀ

ਸਮਾਣਾ (ਦਰਦ): ਪ੍ਰੀ-ਵੈਡਿੰਗ ਸ਼ੂਟ ਕਰਵਾ ਕੇ ਵਾਪਸ ਆ ਰਹੇ ਲੜਕੇ-ਲੜਕੀ ਦੀ ਕਾਰ ਵੀਰਵਾਰ ਦੇਰ ਰਾਤ ਭਾਖੜਾ ਨਹਿਰ 'ਤੇ ਨਿਰਮਾਣ ਅਧੀਨ ਪੁਲ ਨਾਲ ਟਕਰਾਅ ਗਈ। ਉਸ ਵਿਚ ਸਵਾਰ 4 ਵਿਅਕਤੀ ਜ਼ਖ਼ਮੀ ਹੋ ਗਏ, ਜਿਨ੍ਹਾਂ ਨੂੰ ਸਿਵਲ ਹਸਪਤਾਲ ਸਮਾਣਾ ਵਿਖੇ ਲਿਆਂਦਾ ਗਿਆ।

ਜਾਣਕਾਰੀ ਅਨੁਸਾਰ 1 ਫਰਵਰੀ ਨੂੰ ਹੋਣ ਜਾ ਰਹੇ ਵਿਆਹ ਤੋਂ ਪਹਿਲਾ ਟੋਹਾਣਾ (ਹਰਿਆਣਾ) ਨਿਵਾਸੀ ਪਰਿਵਾਰ ਦੀ ਇਕ ਲੜਕੀ ਅਤੇ ਲੜਕਾ ਕਸੌਲੀ ਵਿਚ ਪ੍ਰੀ-ਵੈਡਿੰਗ ਸ਼ੂਟ ਕਰਵਾਉਣ ਤੋਂ ਬਾਅਦ ਹੋਰ 2 ਪਰਿਵਾਰਕ ਮੈਂਬਰਾਂ ਨਾਲ ਬੀਤੀ ਰਾਤ ਕਾਰ ਰਾਹੀਂ ਆਪਣੇ ਸ਼ਹਿਰ ਟੋਹਾਣਾ ਵਾਪਸ ਜਾ ਰਹੇ ਸਨ ਕਿ ਰਾਤ 12 ਵਜੇ ਸਮਾਣਾ ਨੇੜੇ ਪਹੁੰਚਣ 'ਤੇ ਅਚਾਨਕ ਕੋਈ ਜਾਨਵਰ ਕਾਰ ਅੱਗੇ ਆ ਗਿਆ। ਉਨ੍ਹਾਂ ਦੀ ਤੇਜ਼ ਰਫਤਾਰ ਕਾਰ ਭਾਖੜਾ ਨਹਿਰ ਦੇ ਨਿਰਮਾਣ ਅਧੀਨ ਪੁਲ ਨਾਲ ਟਕਰਾਅ ਗਈ। ਹਾਦਸੇ ਵਿਚ ਕਾਰ ਦਾ ਭਾਰੀ ਨੁਕਸਾਨ ਹੋਇਆ। ਕਾਰ ਵਿਚ ਸਵਾਰ ਲੜਕਾ-ਲੜਕੀ ਅਤੇ ਹੋਰ ਵੀ ਜ਼ਖ਼ਮੀ ਹੋ ਗਏ। ਜ਼ਖ਼ਮੀਆਂ ਦੀ ਪਛਾਣ ਕੁਨਾਲ ਚੱਢਾ ਨਿਵਾਸੀ ਟੋਹਾਣਾ, ਗ੍ਰਿਸ਼ਾ ਨਿਵਾਸੀ ਸਿਰਸਾ ਅਤੇ ਸੁਮਿਤ ਕਾਮਰਾ ਸ਼ਾਮਲ ਹਨ।