ਪਿਸਤੌਲ ਵਿਖਾ 2 ਲੱਖ ਲੁੱਟੇ

ਧੂਰੀ (ਜੈਨ) : ਲੰਘੀਂ ਸ਼ਾਮ ਸਥਾਨਕ ਬਾਗੜੀਆਂ ਰੋਡ 'ਤੇ ਇਕ ਵਿਅਕਤੀ ਤੋਂ ਮੋਟਰਸਾਈਕਲ ਸਵਾਰ ਨੌਜਵਾਨਾਂ ਵਲੋਂ ਪਿਸਤੌਲ ਦੀ ਨੋਕ 'ਤੇ 2 ਲੱਖ ਦੀ ਨਕਦੀ ਖੋਹ ਕੇ ਫਰਾਰ ਹੋਣ ਦਾ ਮਾਮਲਾ ਸਾਹਮਣੇ ਆਇਆ ਹੈ।
ਧੂਰੀ-ਬਾਗੜੀਆਂ ਰੋਡ 'ਤੇ ਮੈਟਰੋ ਸੇਲਜ਼ ਕਾਰਪੋਰੇਸ਼ਨ ਨਾਂ ਦੀ ਪ੍ਰਚੂਨ ਦੀ ਦੁਕਾਨ ਕਰਦੇ ਮਨੀਸ਼ ਕੁਮਾਰ ਵਲੋਂ ਪੁਲਸ ਨੂੰ ਦਰਜ ਕਰਵਾਈ ਗਈ ਸ਼ਿਕਾਇਤ ਮੁਤਾਬਕ ਲੰਘੀਂ ਸ਼ਾਮ ਕਰੀਬ ਸਵਾ 8 ਵਜੇ ਜਦੋਂ ਉਹ ਆਪਣੀ ਦੁਕਾਨ ਬੰਦ ਕਰਕੇ ਕਾਰ 'ਚ ਬੈਠ ਕੇ ਘਰ ਜਾਣ ਹੀ ਲੱਗਾ ਸੀ ਕਿ ਅਚਾਨਕ ਮੂੰਹ ਲਪੇਟੀ ਤਿੰਨ ਅਣਪਛਾਤੇ ਮੋਟਰਸਾਈਕਲ ਸਵਾਰਾਂ ਨੇ ਕਾਰ ਨੇੜੇ ਆ ਕੇ ਪਿਸਤੌਲ ਵਰਗੇ ਹਥਿਆਰ ਨਾਲ ਉਸ ਨੂੰ ਡਰਾਉਂਦੇ ਹੋਏ ਕਾਰ 'ਚ ਪਿਆ 2 ਲੱਖ ਰੁਪਏ ਵਾਲਾ ਬੈਗ ਖੋਹ ਕੇ ਫ਼ਰਾਰ ਹੋ ਗਏ। 
ਇਸ ਸਬੰਧੀ ਐੱਸ. ਐੱਚ. ਓ. ਸਿਟੀ ਧੂਰੀ ਹੈਰੀ ਬੋਪਾਰਾਏ ਨਾਲ ਸੰਪਰਕ ਕਰਨ 'ਤੇ ਉਨ੍ਹਾਂ ਮਾਮਲੇ ਦੀ ਪੁਸ਼ਟੀ ਕਰਦਿਆਂ ਕਿਹਾ ਕਿ ਲੁੱਟ-ਖੋਹ ਦੀ ਘਟਨਾ ਸਬੰਧੀ ਮਾਮਲਾ ਦਰਜ ਕਰ ਲਿਆ ਗਿਆ ਹੈ ਅਤੇ ਜਾਂਚ ਕੀਤੀ ਜਾ ਰਹੀ ਹੈ।