ਆਕਸਫੋਰਡ ਯੂਨੀਵਰਸਿਟੀ ''ਚ ਬਣ ਰਹੀ ਕੋਰੋਨਾ ਵੈਕਸੀਨ ਦੇ ਟ੍ਰਾਇਲ ਦਾ ਹਿੱਸਾ ਬਣਿਆ ''PGI''
08/04/2020 11:36:23 AM
ਚੰਡੀਗੜ੍ਹ (ਪਾਲ) : ਪੁਣੇ ਦਾ ਸੀਰਮ ਇੰਸਟੀਚਿਊਟ ਆਫ ਇੰਡੀਆ (ਐੱਸ. ਆਈ. ਆਈ.) ਆਕਸਫੋਰਡ ਯੂਨੀਵਰਸਿਟੀ 'ਚ ਬਣ ਰਹੀ ਕੋਰੋਨਾ ਵੈਕਸੀਨ ਦੇ ਟ੍ਰਾਇਲ ਦਾ ਇਕ ਹਿੱਸਾ ਬਣ ਗਿਆ ਹੈ, ਜੋ ਦੂਜੇ ਅਤੇ ਤੀਜੇ ਫੇਜ਼ 'ਚ ਹਿਊਮਨ ਟ੍ਰਾਇਲ ਕਰੇਗਾ। ਇਸ ਤਹਿਤ ਸੀਰਮ ਇੰਸਟੀਚਿਊਟ ਨੇ ਦੇਸ਼ ਦੇ ਕੁਝ ਖਾਸ ਮੈਡੀਕਲ ਸੰਸਥਾਨਾਂ ਨੂੰ ਇਸ ਟ੍ਰਾਇਲ ਦਾ ਹਿੱਸਾ ਬਣਾਇਆ ਹੈ, ਜਿਨ੍ਹਾਂ 'ਚ ਸੋਮਵਾਰ ਨੂੰ ਪੀ. ਜੀ. ਆਈ. ਨੂੰ ਵੀ ਚੁਣਿਆ ਗਿਆ ਹੈ। ਪੀ. ਜੀ. ਆਈ. ਕੰਮਿਊਨਿਟੀ ਮੈਡੀਸਨ ਮਹਿਕਮਾ ਇਸ ਟ੍ਰਾਇਲ ਨੂੰ ਕਰੇਗਾ, ਜਿਸ 'ਚ ਵਾਇਰੋਲਾਜੀ ਅਤੇ ਫਾਰਮਾਕੋਲਾਜੀ ਮਹਿਕਮੇ ਵੀ ਸਹਿਯੋਗ ਦੇਣਗੇ।
ਇਹ ਵੈਕਸੀਨ ਦਾ ਸੇਫਟੀ ਟ੍ਰਾਇਲ
ਕੰਮਿਊਨਿਟੀ ਮੈਡੀਸਨ ਮਹਿਕਮੇ ਅਤੇ ਟ੍ਰਾਇਲ ਦੀ ਪ੍ਰਿੰਸੀਪਲ ਇਨਵੈਸਟੀਗੇਟਰ ਡਾ. ਮਧੂ ਨੇ ਦੱਸਿਆ ਕਿ ਇਹ ਵੈਕਸੀਨ ਦਾ ਸੇਫਟੀ ਟ੍ਰਾਇਲ ਹੈ, ਜਿਸ ਦਾ ਮਕਸਦ ਇਹ ਵੇਖਣਾ ਹੈ ਕਿ ਵੈਕਸੀਨ ਦਾ ਕੋਈ ਸਾਈਡ ਇਫੈਕਟ ਤਾਂ ਨਹੀਂ ਹੈ। ਦੇਸ਼ ਭਰ ਤੋਂ 1600 ਲੋਕਾਂ ’ਤੇ ਇਸ ਦਾ ਟ੍ਰਾਇਲ ਹੋਵੇਗਾ, ਜਿਸ 'ਚ ਪੀ. ਜੀ. ਆਈ. ਵੱਲੋਂ 250 ਤੋਂ 300 ਲੋਕਾਂ ਦਾ ਸੈਂਪਲ ਸਾਈਜ਼ ਹੋਵੇਗਾ। ਟ੍ਰਾਇਲ ਦਾ ਪ੍ਰੋਟੋਕਾਲ ਆਉਂਦੇ ਹੀ ਪੀ. ਜੀ. ਆਈ. ਦੀ ਐਥੀਕਲ ਕਮੇਟੀ 'ਚ ਇਸ ਦਾ ਪ੍ਰਪੋਜ਼ਲ ਭੇਜਿਆ ਜਾਵੇਗਾ, ਜਿੱਥੋਂ ਪਾਸ ਹੁੰਦੇ ਹੀ ਇਸ ’ਤੇ ਕੰਮ ਸ਼ੁਰੂ ਹੋ ਜਾਵੇਗਾ।
ਮਰੀਜ਼ਾਂ ’ਤੇ ਨਹੀਂ ਸਿਹਤਮੰਦ ਲੋਕਾਂ ’ਤੇ ਹੋਵੇਗਾ ਟ੍ਰਾਇਲ
ਡਾ. ਮਧੂ ਕਹਿੰਦੇ ਹਨ ਕਿ ਇਹ ਟ੍ਰਾਇਲ ਕਿਸੇ ਮਰੀਜ਼ ’ਤੇ ਨਹੀਂ ਕੀਤਾ ਜਾਵੇਗਾ। ਟ੍ਰਾਇਲ ਸਿਹਤਮੰਦ ਲੋਕਾਂ 'ਤੇ ਕੀਤਾ ਜਾਵੇਗਾ। ਇਹ ਇਕ ਵਾਲੰਟਰੀ ਟ੍ਰਾਇਲ ਹੋਵੇਗਾ, ਜਿਸ ਦਾ ਹਿੱਸਾ ਕੋਈ ਵੀ ਵਿਅਕਤੀ ਬਣ ਸਕਦਾ ਹੈ। ਸਾਡੇ ਕੁਝ ਵਰਕਰ ਵੀ ਇਸ ਦਾ ਹਿੱਸਾ ਬਣਨਗੇ। ਟ੍ਰਾਇਲ ਲਈ 18 ਸਾਲ ਤੋਂ ਉਪਰ ਸਿਹਤਮੰਦ ਲੋਕਾਂ ਨੂੰ ਹੀ ਲਿਆ ਜਾਵੇਗਾ। ਬਕਾਇਦਾ ਸਾਰੇ ਲੋਕਾਂ ਦੀ ਸਕਰੀਨਿੰਗ ਹੋਵੇਗੀ, ਜੋ ਲੋਕ ਫਿੱਟ ਅਤੇ ਸਿਹਤਮੰਦ ਹੋਣਗੇ, ਉੱਥੇ ਹੀ ਇਸ ਦਾ ਹਿੱਸਾ ਬਣ ਸਕਣਗੇ। ਵੈਕਸੀਨ ਦੇਣ ਤੋਂ ਬਾਅਦ ਘੱਟ ਤੋਂ ਘੱਟ 7 ਮਹੀਨਿਆਂ ਤੱਕ ਸਾਰੇ ਲੋਕਾਂ ਦੀ ਲਗਾਤਾਰ ਮਾਨੀਟਰਿੰਗ ਕੀਤੀ ਜਾਵੇਗੀ। ਵੇਖਿਆ ਜਾਵੇਗਾ ਕਿ ਕੀ ਉਸ ਦੇ ਸਰੀਰ 'ਚ ਐਂਟੀ ਬਾਡੀਜ਼ ਬਣੀਆਂ ਹਨ ਜਾਂ ਨਹੀਂ। ਉਨ੍ਹਾਂ ਨੂੰ ਕਿਸੇ ਤਰ੍ਹਾਂ ਦਾ ਕੋਈ ਸਾਈਡ ਇਫੈਕਟ ਤਾਂ ਨਹੀਂ ਹੋ ਰਿਹਾ। ਸੀਰਮ ਇੰਸਟੀਚਿਊਟ ਪੀ. ਜੀ. ਆਈ. ਨੂੰ ਵੈਕਸੀਨ ਟ੍ਰਾਇਲ ਲਈ ਦੇਵੇਗਾ।
ਯੂ. ਕੇ. 'ਚ ਹੋਏ ਪਹਿਲੇ ਫੇਜ਼ ਦੇ ਟ੍ਰਾਇਲ ਦੇ ਸਕਾਰਾਤਮਕ
ਪੀ. ਜੀ. ਆਈ. ਡਾਇਰੈਕਟਰ ਡਾ. ਜਗਤਰਾਮ ਕਹਿੰਦੇ ਹਨ ਕਿ ਯੂ. ਕੇ. 'ਚ ਹੋਏ ਪਹਿਲੇ ਫੇਜ਼ ਦੇ ਟ੍ਰਾਇਲ 'ਚ ਕਿਸੇ ਵੀ ਤਰ੍ਹਾਂ ਦਾ ਕੋਈ ਸਾਈਡ ਇਫੈਕਟ ਨਹੀਂ ਵੇਖਿਆ ਗਿਆ ਹੈ। ਦੂਜੇ ਅਤੇ ਤੀਜੇ ਟ੍ਰਾਇਲ ਨੂੰ ਜ਼ਿਆਦਾ ਲੋਕਾਂ ’ਤੇ ਕੀਤਾ ਜਾ ਰਿਹਾ ਹੈ, ਜਿਸ ਲਈ ਭਾਰਤ ਨੂੰ ਵੀ ਚੁਣਿਆ ਗਿਆ ਹੈ।
ਇਸ ਇੰਸਟੀਚਿਊਟ 'ਚ ਹੋਵੇਗਾ ਟ੍ਰਾਇਲ
ਏਮਜ਼ ਦਿੱਲੀ, ਏ. ਪੀ. ਜੇ. ਮੈਡੀਕਲ ਕਾਲਜ ਪੁਣੇ, ਰਾਜਿੰਦਰਾ ਮੈਮੋਰੀਅਲ ਰਿਸਰਚ ਇੰਸਟੀਚਿਊਟ ਆਫ ਮੈਡੀਕਲ ਸਾਇੰਸੇਸ ਪਟਨਾ, ਐਂਮਸ ਜੋਧਪੁਰ, ਨਹਿਰੂ ਹਸਪਤਾਲ ਗੋਰਖਪੁਰ, ਅੰਦਰਾ ਮੈਡੀਕਲ ਕਾਲਜ ਵਿਸ਼ਾਖਾਪੱਟਨਮ, ਜੇ. ਐੱਸ. ਐੱਸ. ਅਕੈਡਮੀ ਆਫ ਹਾਇਰ ਐਜੂਕੇਸ਼ਨ ਐਂਡ ਰਿਸਰਚ ਮੈਸੂਰ ਇਸਦਾ ਹਿੱਸਾ ਬਣੇ ਹਨ।
ਪੀ. ਜੀ. ਆਈ. ਤਿਆਰ ਹੈ
ਡਾ. ਮਧੂ ਕਹਿੰਦੇ ਹਨ ਕਿ ਪੀ. ਜੀ. ਆਈ. ਟ੍ਰਾਇਲ ਨੂੰ ਲੈ ਕੇ ਪੂਰੀ ਤਰ੍ਹਾਂ ਤਿਆਰ ਹੈ। ਮਾਰਚ ਤੋਂ ਹਾਲੇ ਤੱਕ ਪਾਜ਼ੇਟਿਵ ਮਰੀਜ਼ਾਂ ਨਾਲ ਕੰਮ ਹੋ ਰਿਹਾ ਹੈ। ਸਾਡੇ ਕੋਲ ਚੰਗੀਆਂ ਸਹੂਲਤਾਂ ਵਾਲੀ ਲੈਬਜ਼ ਹਨ। ਡਾਕਟ ਅਤੇ ਪੂਰੀ ਟੀਮ ਹੈ। ਇਸ ਤੋਂ ਪਹਿਲਾਂ ਵੀ ਕੰਮਿਊਨਿਟੀ ਮੈਡੀਸਨ ਪੇਂਟਾਵੇਲੇਂਟ, ਰੋਟਾ ਵਾਇਰਸ, ਹੈਪੇਟਾਈਟਿਸ ਏ, ਮਿਜਲ ਰੁਬੇਲਾ ਵਰਗੀ ਵੱਡੀ ਵੈਕਸੀਨ ਦਾ ਟ੍ਰਾਇਲ ਕਰ ਚੁੱਕਿਆ ਹੈ।
