ਬੱਚੇ ਨੂੰ ਮੌਤ ਦੇ ਮੂੰਹ ''ਚੋਂ ਖਿੱਚ ਲਿਆਇਆ ਪਿਓ, ਵਾਲ-ਵਾਲ ਬਚੀ 10 ਸਾਲਾ ਬੱਚੇ ਦੀ ਜਾਨ
Wednesday, Nov 11, 2026 - 03:03 PM (IST)
ਲੁਧਿਆਣਾ (ਰਾਜ): ਢੋਲੇਵਾਲ ਸਥਿਤ ਪੁਲਸ ਚੌਂਕੀ ਨੰਬਰ 6 ਦੇ ਅਧੀਨ ਪੈਂਦੇ ਜਨਤਾ ਨਗਰ (ਭਗਵਾਨ ਚੌਂਕ) ਇਲਾਕੇ ਵਿਚ ਪਾਲਤੂ ਕੁੱਤੇ ਵੱਲੋਂ ਇਕ ਮਾਸੂਮ ਬੱਚੇ 'ਤੇ ਜਾਨਲੇਵਾ ਹਮਲਾ ਕਰਨ ਦੀ ਦਿਲ-ਦਹਿਲਾ ਦੇਣ ਵਾਲੀ ਘਟਨਾ ਸਾਹਮਣੇ ਆਈ ਹੈ। ਇੱਥੇ ਇਕ ਰਿਹਾਇਸ਼ੀ ਮਕਾਨ ਵਿਚ ਰਹਿਣ ਵਾਲੇ ਕਿਰਾਏਦਾਰ ਦੇ ਖੂੰਖਾਰ ਪਾਲਤੂ ਕੁੱਤੇ ਨੇ 10 ਸਾਲਾ ਮਾਸੂਮ ਮੋਹਿਤ 'ਤੇ ਅਚਾਨਕ ਹਮਲਾ ਕਰਕੇ ਉਸ ਨੂੰ ਬੁਰੀ ਤਰ੍ਹਾਂ ਜ਼ਖ਼ਮੀ ਕਰ ਦਿੱਤਾ।
ਲੀ ਜਾਣਕਾਰੀ ਮੁਤਾਬਕ, 10 ਸਾਲਾ ਮੋਹਿਤ ਆਪਣੇ ਘਰ ਦੇ ਵਿਹੜੇ ਵਿਚ ਖੇਡ ਰਿਹਾ ਸੀ। ਉਸੇ ਮਕਾਨ ਦੇ ਇਕ ਹਿੱਸੇ ਵਿਚ ਰਹਿਣ ਵਾਲੇ ਕਿਰਾਏਦਾਰ ਨੇ ਆਪਣੇ ਪਾਲਤੂ ਕੁੱਤੇ ਨੂੰ ਲੰਬੀ ਚੇਨ ਨਾਲ ਬੰਨ੍ਹ ਕੇ ਛੱਡਿਆ ਹੋਇਆ ਸੀ। ਖੇਡਦੇ-ਖੇਡਦੇ ਜਿਵੇਂ ਹੀ ਬੱਚਾ ਕੁੱਤੇ ਦੇ ਦਾਇਰੇ ਵਿਚ ਆਇਆ, ਕੁੱਤੇ ਨੇ ਅਚਾਨਕ ਹਮਲਾਵਰ ਹੋ ਕੇ ਉਸ 'ਤੇ ਝਪੱਟਾ ਮਾਰ ਦਿੱਤਾ। ਛੋਟਾ ਬੱਚਾ ਖੁਦ ਨੂੰ ਸੰਭਾਲ ਨਹੀਂ ਸਕਿਆ ਅਤੇ ਜ਼ਮੀਨ 'ਤੇ ਡਿੱਗ ਪਿਆ, ਜਿਸ ਤੋਂ ਬਾਅਦ ਕੁੱਤੇ ਨੇ ਉਸ ਦੇ ਚਿਹਰੇ, ਠੋਡੀ ਅਤੇ ਦੋਵਾਂ ਲੱਤਾਂ ਨੂੰ ਆਪਣੇ ਜਬੜੇ 'ਚ ਜਕੜ ਕੇ ਬੁਰੀ ਤਰ੍ਹਾਂ ਨੋਚਣਾ ਸ਼ੁਰੂ ਕਰ ਦਿੱਤਾ।
ਪਿਓ ਨੇ ਬਚਾਈ ਪੁੱਤ ਦੀ ਜਾਨ
ਹਾਦਸੇ ਦੇ ਵਕਤ ਬੱਚੇ ਦੇ ਪਿਤਾ ਗਰਨੇਸ਼ ਕੋਲ ਹੀ ਮੌਜੂਦ ਸਨ। ਬੱਚੇ ਦੀਆਂ ਦਰਦਨਾਕ ਚੀਕਾਂ ਸੁਣ ਕੇ ਪਿਤਾ ਨੇ ਹਿੰਮਤ ਦਿਖਾਈ ਅਤੇ ਬੱਚੇ ਨੂੰ ਪੂਰੀ ਤਾਕਤ ਨਾਲ ਕੁੱਤੇ ਦੀ ਪਕੜ ਤੋਂ ਪਿੱਛੇ ਖਿਚ ਕੇ ਉਸ ਦੀ ਜਾਨ ਬਚਾਈ। ਹਮਲੇ ਤੋਂ ਤੁਰੰਤ ਬਾਅਦ ਗੰਭੀਰ ਜ਼ਖ਼ਮੀ ਬੱਚੇ ਨੂੰ ਸਿਵਲ ਹਸਪਤਾਲ ਪਹੁੰਚਾਇਆ ਗਿਆ, ਜਿੱਥੇ ਡਾਕਟਰਾਂ ਨੇ ਉਸ ਦੇ ਡੂੰਘੇ ਜ਼ਖ਼ਮਾਂ 'ਤੇ ਲਗਭਗ 50 ਟਾਂਕੇ ਲਗਾਏ। ਇਸ ਰੂਹ ਕੰਬਾਊ ਘਟਨਾ ਤੋਂ ਬਾਅਦ ਮਾਸੂਮ ਬੱਚਾ ਡੂੰਘੇ ਮਾਨਸਿਕ ਸਦਮੇ ਵਿਚ ਹੈ।
ਮਾਲਕ ਦੀ ਲਾਪਰਵਾਹੀ 'ਤੇ ਰੋਸ
ਉਸੇ ਮਕਾਨ ਵਿਚ ਰਹਿਣ ਵਾਲੇ ਗੁਆਂਢੀ ਦੀਪਕ ਅਵਸਥੀ ਅਨੁਸਾਰ ਕੁੱਤੇ ਦੇ ਮਾਲਕ ਨੂੰ ਪਹਿਲਾਂ ਵੀ ਕਈ ਵਾਰ ਚੇਤਾਵਨੀ ਦਿੱਤੀ ਗਈ ਸੀ ਕਿ ਘਰ ਵਿਚ ਛੋਟੇ ਬੱਚੇ ਖੇਡਦੇ ਹਨ, ਇਸ ਲਈ ਕੁੱਤੇ ਨੂੰ ਛੋਟੀ ਚੇਨ ਨਾਲ ਬੰਨ੍ਹਿਆ ਜਾਵੇ। ਇਸ ਦੇ ਬਾਵਜੂਦ ਮਾਲਕ ਨੇ ਲਾਪਰਵਾਹੀ ਵਰਤਦੇ ਹੋਏ ਕੁੱਤੇ ਨੂੰ ਲੰਬੀ ਚੇਨ ਨਾਲ ਖੁੱਲ੍ਹਾ ਛੱਡਿਆ ਹੋਇਆ ਸੀ। ਘਟਨਾ ਵੇਲੇ ਕੁੱਤੇ ਦਾ ਮਾਲਕ ਘਰ 'ਚ ਮੌਜੂਦ ਨਹੀਂ ਸੀ।
ਕਾਨੂੰਨੀ ਕਾਰਵਾਈ ਅਤੇ ਮੌਜੂਦਾ ਸਥਿਤੀ
ਮਾਸੂਮ ਦੇ ਗੰਭੀਰ ਜ਼ਖ਼ਮੀ ਹੋਣ ਦੇ ਬਾਵਜੂਦ ਪੀੜਤ ਪਰਿਵਾਰ ਫਿਲਹਾਲ ਪੁਲਸ ਕਾਰਵਾਈ ਤੋਂ ਦੂਰੀ ਬਣਾਏ ਹੋਏ ਹੈ। ਪਿਤਾ ਗਰਨੇਸ਼ ਅਨੁਸਾਰ ਇਸ ਵਕਤ ਉਨ੍ਹਾਂ ਦੀ ਪਹਿਲੀ ਤਰਜੀਹ ਬੱਚੇ ਦਾ ਬਿਹਤਰ ਇਲਾਜ ਕਰਵਾਉਣਾ ਅਤੇ ਉਸ ਨੂੰ ਇਸ ਸਦਮੇ 'ਚੋਂ ਬਾਹਰ ਕੱਢਣਾ ਹੈ। ਦੂਜੇ ਪਾਸੇ, ਗੁਆਂਢੀ ਅਤੇ ਸਥਾਨਕ ਲੋਕ ਪਰਿਵਾਰ ਨੂੰ ਢੋਲੇਵਾਲ ਪੁਲਸ ਚੌਂਕੀ ਵਿਚ ਅਧਿਕਾਰਤ ਸ਼ਿਕਾਇਤ ਦਰਜ ਕਰਵਾਉਣ ਲਈ ਸਮਝਾ ਰਹੇ ਹਨ ਤਾਂ ਜੋ ਲਾਪਰਵਾਹ ਮਾਲਕ ਖ਼ਿਲਾਫ਼ ਸਖ਼ਤ ਕਾਰਵਾਈ ਕੀਤੀ ਜਾ ਸਕੇ।
