ਲੁਧਿਆਣਾ ਦੇ ਮਸ਼ਹੂਰ ਜਵੈਲਰ ਨਾਲ ਕਰੋੜਾਂ ਦੀ ਹੇਰਾਫ਼ੇਰੀ ਕਰ ਗਿਆ ਅਕਾਊਂਟੈਂਟ

ਲੁਧਿਆਣਾ (ਰਾਜ): ਫ਼ੁਹਾਰਾ ਚੌਕ ਦੇ ਕੋਲ ਸਥਿਤ ਮਸ਼ਹੂਰ ਸ਼ੋਅਰੂਮ ਐੱਮ.ਬੀ. ਜੈਨ ਜਵੈਲਰਜ਼ ਦੇ ਮਾਲਕ ਵਿਕਰਮ ਜੈਨ ਨੇ ਆਪਣੇ ਹੀ ਪੁਰਾਣੇ ਅਤੇ ਬਹੁਤ ਭਰੋਸੇਮੰਦ ਅਕਾਊਂਟੈਂਟ 'ਤੇ ਕਰੋੜਾਂ ਰੁਪਏ ਦੇ ਸੋਨੇ ਦੇ ਗਹਿਣਿਆਂ ਅਤੇ ਨਕਦੀ ਦੀ ਹੇਰਾਫੇਰੀ ਕਰਨ ਦਾ ਗੰਭੀਰ ਦੋਸ਼ ਲਗਾਇਆ ਹੈ। ਮੁਲਜ਼ਮ ਦੀ ਪਛਾਣ ਉੱਤਰ ਪ੍ਰਦੇਸ਼ ਦੇ ਗੋਂਡਾ ਦੇ ਰਹਿਣ ਵਾਲੇ ਰਾਮ ਸ਼ੰਕਰ ਵਜੋਂ ਹੋਈ ਹੈ, ਜੋ ਲੰਬੇ ਸਮੇਂ ਤੋਂ ਸ਼ੋਅਰੂਮ ਦੇ ਖਾਤਿਆਂ, ਵਿਕਰੀ-ਖਰੀਦ ਅਤੇ ਸਟਾਕ ਦਾ ਸਾਰਾ ਕੰਮ ਸੰਭਾਲ ਰਿਹਾ ਸੀ। ਸ਼ੋਅਰੂਮ ਦੇ ਮਾਲਕ ਨੂੰ ਪਿਛਲੇ ਕੁਝ ਸਮੇਂ ਤੋਂ ਸਟਾਕ ਵਿਚ ਗੜਬੜੀ ਦਾ ਸ਼ੱਕ ਸੀ। ਸ਼ੱਕ ਹੋਣ 'ਤੇ ਜਦੋਂ 22 ਜਨਵਰੀ ਨੂੰ ਮੁਨੀਮ ਰਾਮ ਸ਼ੰਕਰ ਤੋਂ ਸਾਰਾ ਹਿਸਾਬ-ਕਿਤਾਬ ਅਤੇ ਰਿਕਾਰਡ ਮੰਗਿਆ ਗਿਆ, ਤਾਂ ਉਸ ਨੇ ਚਲਾਕੀ ਨਾਲ ਮਾਲਕ ਨੂੰ ਝਾਂਸੇ ਵਿਚ ਲੈ ਲਿਆ। ਉਸ ਨੇ ਵਾਅਦਾ ਕੀਤਾ ਕਿ ਉਹ ਅਗਲੀ ਸਵੇਰ ਤੱਕ ਸਾਰਾ ਰਿਕਾਰਡ ਅਤੇ ਸਟਾਕ ਦਾ ਮਿਲਾਨ ਬਿਲਕੁਲ ਕਲੀਅਰ ਕਰ ਦੇਵੇਗਾ। ਪਰ ਅਗਲੀ ਸਵੇਰ ਜਦੋਂ ਸ਼ੋਅਰੂਮ ਖੁੱਲ੍ਹਿਆ ਤਾਂ ਰਾਮ ਸ਼ੰਕਰ ਉੱਥੇ ਨਹੀਂ ਪਹੁੰਚਿਆ ਅਤੇ ਉਸ ਦਾ ਮੋਬਾਈਲ ਫੋਨ ਵੀ ਬੰਦ ਆਉਣ ਲੱਗਾ।

ਸ਼ੱਕ ਹੋਰ ਡੂੰਘਾ ਹੋਣ 'ਤੇ ਜਦੋਂ ਮਾਲਕ ਵਿਕਰਮ ਜੈਨ ਨੇ ਖੁਦ ਕੰਪਿਊਟਰ ਸਿਸਟਮ ਖੋਲ੍ਹ ਕੇ ਵਿਕਰੀ ਅਤੇ ਸਟਾਕ ਦੀ ਬਾਰੀਕੀ ਨਾਲ ਜਾਂਚ ਕੀਤੀ ਤਾਂ ਉਨ੍ਹਾਂ ਦੇ ਹੋਸ਼ ਉੱਡ ਗਏ। ਜਾਂਚ ਵਿਚ ਸਾਹਮਣੇ ਆਇਆ ਕਿ ਮੁਲਜ਼ਮ ਰਾਮ ਸ਼ੰਕਰ ਨੇ ਬੜੀ ਚਲਾਕੀ ਨਾਲ ਕਈ ਫਰਜ਼ੀ ਨਕਦ ਬਿੱਲ ਕੱਟੇ ਹੋਏ ਸਨ, ਜਿਨ੍ਹਾਂ ਦੀ ਸ਼ੋਅਰੂਮ ਪ੍ਰਬੰਧਕਾਂ ਨੂੰ ਭਿਣਕ ਤੱਕ ਨਹੀਂ ਲੱਗੀ ਸੀ। ਇਨ੍ਹਾਂ ਫਰਜ਼ੀ ਐਂਟਰੀਆਂ ਰਾਹੀਂ ਉਸ ਨੇ ਕਾਗਜ਼ਾਂ ਵਿਚ ਤਾਂ ਸਟਾਕ ਨੂੰ ਬਿਲਕੁਲ ਸਹੀ ਦਿਖਾਇਆ ਹੋਇਆ ਸੀ, ਪਰ ਜਦੋਂ ਸਟਾਕ ਦੀ ਫਿਜ਼ੀਕਲ ਗਿਣਤੀ ਕੀਤੀ ਗਈ ਤਾਂ ਸੋਨੇ ਦੇ ਗਹਿਣਿਆਂ ਦਾ ਇਕ ਵੱਡਾ ਹਿੱਸਾ ਗਾਇਬ ਮਿਲਿਆ। ਮੁਲਜ਼ਮ ਨੇ ਪੂਰੀ ਯੋਜਨਾਬੰਦੀ ਨਾਲ ਇਸ ਧੋਖਾਧੜੀ ਨੂੰ ਅੰਜਾਮ ਦਿੱਤਾ ਸੀ ਤਾਂ ਜੋ ਆਡਿਟ ਦੌਰਾਨ ਫੜਿਆ ਨਾ ਜਾ ਸਕੇ। ਥਾਣਾ ਡਵੀਜ਼ਨ ਨੰਬਰ 8 ਦੀ ਪੁਲਸ ਨੇ ਜਵੈਲਰ ਦੀ ਸ਼ਿਕਾਇਤ 'ਤੇ ਮੁਲਜ਼ਮ ਰਾਮ ਸ਼ੰਕਰ ਖਿਲਾਫ ਮਾਮਲਾ ਦਰਜ ਕਰ ਲਿਆ ਹੈ। ਫਿਲਹਾਲ ਮੁਲਜ਼ਮ ਫਰਾਰ ਹੈ ਅਤੇ ਪੁਲਸ ਦੀਆਂ ਟੀਮਾਂ ਉਸ ਦੀ ਗ੍ਰਿਫਤਾਰੀ ਲਈ ਛਾਪੇਮਾਰੀ ਕਰ ਰਹੀਆਂ ਹਨ।