ਹਾਈ-ਵੋਲਟੇਜ ਤਾਰਾਂ ਦੀ ਲਪੇਟ  ''ਚ ਆਇਆ ਨੌਜਵਾਨ, ਘਰ ਦੀ ਛੱਤ ''ਤੇ ਕਰ ਰਿਹਾ ਸੀ ਸੈਰ

ਅੰਮ੍ਰਿਤਸਰ, (ਰਮਨ)-ਸ਼ਹਿਰ ਦੇ ਪਿੰਡ ਵੱਲਾ ਦੇ ਮੇਨ ਚੌਂਕ ਨੇੜੇ 50 ਦੇ ਕਰੀਬ ਘਰਾਂ ਦੀਆਂ ਛੱਤਾਂ ਉੱਪਰੋਂ ਲੰਘ ਰਹੀਆ ਹਾਈ ਵੋਲਟੇਜ ਤਾਰਾਂ ਇੰਨੀਆਂ ਨੀਵੀਆਂ ਹਨ ਕਿ ਲੋਕ ਆਪਣੇ ਕੋਠਿਆਂ ਤੋਂ ਵੀ ਚੜਨ ਤੋਂ ਡਰਦੇ ਹਨ ਤਾਂ ਕਿ ਉਹ ਇਨ੍ਹਾਂ ਤਾਰਾਂ ਦੀ ਲਪੇਟ 'ਚ ਨਾ ਆ ਜਾਣ। ਅਜਿਹੀ ਹੀ ਘਟਨਾ ਉੁਸ ਸਮੇਂ ਵਾਪਰੀ ਜਦੋਂ ਇੱਕ ਨੌਜਵਾਨ ਮੰਗਲ ਸਿੰਘ ਮੰਗਾ ਆਪਣੇ ਘਰ ਦੀ ਛੱਤ ’ਤੇ ਸੈਰ ਕਰ ਰਿਹਾ ਸੀ ਕਿ ਅਚਾਨਕ ਹੀ ਦੂਰੋਂ ਹਾਈਵੋਲਟੇਜ ਤਾਰਾਂ ਨੇ ਉਸ ਨੂੰ ਆਪਣੀ ਲਪੇਟ ਵਿਚ ਲੈ ਲਿਆ ਅਤੇ ਬੁਰੀ ਤਰ੍ਹਾਂ ਨਾਲ ਤੜਫਣ ਤੋਂ ਬਾਅਦ ਬੜੀ ਮੁਸ਼ੱਕਤ ਨਾਲ ਆਪਣੀ ਕੀਮਤੀ ਜਾਨ ਬਚਾਉਦੇ ਹੋਏ ਬੇਹੋਸ਼ ਹੋ ਗਿਆ। ਤੁਰੰਤ ਮੌਕੇ ’ਤੇ ਇਲਾਕਾ ਵਾਸੀਆਂ ਨੇ ਮੰਗਲ ਸਿੰਘ ਮੰਗਾਂ ਨੂੰ ਇੱਕ ਨਿੱਜੀ ਹਸਪਤਾਲ ਵਿੱਚ ਪਹੁੰਚਾਇਆ, ਜਿੱਥੇ ਉਸ ਦਾ ਇਲਾਜ ਚੱਲ ਰਿਹਾ ਹੈ।

ਪੱਤਰਕਾਰਾਂ ਨਾਲ ਗੱਲਬਾਤ ਕਰਦੇ ਹੋਏ ਜੁਗਰਾਜ ਸਿੰਘ ਨੇ ਦੱਸਿਆ ਕਿ ਪਿਛਲੇ ਕਈ ਸਾਲਾਂ ਤੋਂ ਉਹ ਪ੍ਰਸ਼ਾਸਨ ਅਤੇ ਬਿਜਲੀ ਦੇ ਅਧਿਕਾਰੀਆਂ ਨੂੰ ਇਸ ਇਲਾਕੇ ਵਿੱਚੋਂ ਤਾਰਾਂ ਨੂੰ ਹਟਾਉਣ ਲਈ ਫਰਿਆਦ ਕਰ ਚੁੱਕੇ ਹਨ ਅਤੇ ਲਿਖ ਕੇ ਵੀ ਦੇ ਚੁੱਕੇ ਹਨ ਪਰੰਤੂ ਕਿਸੇ ਵੀ ਬਿਜਲੀ ਅਧਿਕਾਰੀ ਜਾਂ ਪ੍ਰਸ਼ਾਸਨ ਦੇ ਕੰਨਾਂ ’ਤੇ ਜੂ ਨਹੀਂ ਸਰਕੀ। ਹੋਰ ਇਲਾਕਾ ਵਾਸੀ ਭੋਲਾ ਸਿੰਘ, ਅਮਰੀਕ ਸਿੰਘ, ਹਰਦੀਪ ਸਿੰਘ, ਮਲਕੀਤ ਸਿੰਘ ਟਹਿਰਾਵਾਲਾ ਆਦਿ ਨੇ ਕਿਹਾ ਕਿ ਅੰਮ੍ਰਿਤਸਰ ਪਠਾਨਕੋਟ ਹਾਈਵੇ ਸਥਿਤ ਚੌਂਕ ਵੱਲਾ ਵਿੱਚ ਕਰੀਬ 50 ਘਰਾਂ ਦੇ ਉੱਪਰੋਂ ਬਿਜਲੀ ਦੀਆਂ ਹਾਈਵੋਲਟੇਜ ਤਾਰਾਂ ਇੰਨੀਆਂ ਹੇਠਾ ਲੰਘਦੀਆਂ ਹਨ ਕਿ ਕੋਈ ਨਿੱਕਾ ਬੱਚਾ ਵੀ ਉਸ ਦੀ ਲਪੇਟ ਵਿੱਚ ਆ ਸਕਦਾ ਹੈ।

ਇੰਨਾਂ ਤਾਰਾਂ ਵਿੱਚ ਇਨਾ ਜਿਆਦਾ ਕਰੰਟ ਹੁੰਦਾ ਹੈ ਕਿ ਇਹ ਦੂਰੋਂ ਹੀ ਇਨਸਾਨ ਨੂੰ ਆਪਣੇ ਵੱਲ ਖਿੱਚ ਲੈਂਦੀਆਂ ਹਨ, ਜਿਸ ਕਰ ਕੇ ਇੰਨਾਂ 50 ਘਰਾਂ ਦੇ ਲੋਕਾਂ ’ਤੇ ਹਰ ਸਮੇਂ ਖਤਰਾ ਮੰਡਰਾਇਆ ਰਹਿੰਦਾ ਹੈ ਅਤੇ ਲੋਕ ਦਹਿਸ਼ਤ ਵਿੱਚ ਜੀਅ ਰਹੇ ਹਨ ਕਿ ਕਿਤੇ ਕੋਈ ਤਾਰ ਟੁੱਟ ਕੇ ਉਨ੍ਹਾਂ ਦੇ ਘਰਾਂ ਦੇ ਉੱਪਰ ਡਿੱਗ ਨਾ ਜਾਵੇ ਅਤੇ ਉਨ੍ਹਾਂ ਦਾ ਕੋਈ ਜਾਨੀ ਮਾਲੀ ਨੁਕਸਾਨ ਨਾ ਹੋ ਜਾਵੇ। ਉਨ੍ਹਾਂ ਨੇ ਕਿਹਾ ਕਿ ਇਨ੍ਹਾਂ ਹਾਈ-ਵੋਲਟੇਜ ਤਾਰਾਂ ਦੀ ਲਪੇਟ ’ਚ ਆਇਆ ਨੌਜਵਾਨ ਮੰਗਲ ਸਿੰਘ ਬਾਰ-ਬਾਰ ਬੱਚ ਗਿਆ । ਜੇਕਰ ਕੋਈ ਅਣਹੋਣੀ ਹੋ ਜਾਂਦੀ ਤਾਂ ਇਸ ਦਾ ਜਿੰਮੇਵਾਰ ਪਾਵਰਕਾਮ ਦੇ ਬਿਜਲੀ ਅਧਿਕਾਰੀ ਹੁੰਦੇ। ਪਰਿਵਾਰ ਨੇ ਪ੍ਰਸ਼ਾਸਨ ਅਤੇ ਬਿਜਲੀ ਵਿਭਾਗ ਤੋਂ ਜਿੱਥੇ ਮੁਆਵਜੇ ਦੀ ਅਪੀਲ ਕੀਤੀ ਹੈ, ਉੱਥੇ ਨਾਲ ਹੀ ਉਨ੍ਹਾਂ ਅਧਿਕਾਰੀਆਂ ’ਤੇ ਕਾਰਵਾਈ ਕਰਨ ਦੀ ਅਪੀਲ ਕੀਤੀ ਹੈ ਜਿਹੜੇ ਲੋਕਾਂ ਦੀਆਂ ਮੁਸ਼ਕਿਲਾਂ ਹੱਲ ਕਰਨ ਦੀ ਬਜਾਏ, ਉਨ੍ਹਾਂ ਦੀ ਕੀਮਤੀ ਜਾਨਾਂ ਨਾਲ ਸ਼ਰੇਆਮ ਖਿਲਵਾੜ ਕਰ ਰਹੇ ਹਨ।