ਹੁਣ 'ਨਿੱਕਰ ਤੇ ਚੱਪਲ' ਪਾ ਕੇ ਡਰਾਈਵਿੰਗ ਕਰਨ 'ਤੇ ਵੀ ਕੱਟੇਗਾ ਭਾਰੀ ਚਲਾਨ
09/12/2019 10:47:47 AM
ਚੰਡੀਗੜ੍ਹ (ਸਾਜਨ) : ਨਵੇਂ ਟ੍ਰੈਫਿਕ ਨਿਯਮਾਂ ਦੇ ਤਹਿਤ ਕੱਟੇ ਜਾ ਰਹੇ ਭਾਰੀ ਚਲਾਨ ਇਨ੍ਹੀਂ ਦਿਨੀਂ ਸੁਰਖੀਆਂ 'ਚ ਹਨ ਪਰ ਟ੍ਰੈਫਿਕ ਦੇ ਕੁਝ ਸਖਤ ਨਿਯਮ ਅਜਿਹੇ ਵੀ ਹਨ, ਜੋ ਪਹਿਲਾਂ ਤੋਂ ਮੌਜੂਦ ਹਨ ਪਰ ਘੱਟ ਹੀ ਲੋਕਾਂ ਨੂੰ ਇਸ ਦੀ ਜਾਣਕਾਰੀ ਹੈ। ਅਜਿਹਾ ਹੀ ਇਕ ਨਿਯਮ ਇਹ ਹੈ ਕਿ ਚੱਪਲ ਜਾਂ ਸੈਂਡਲ ਪਾ ਕੇ ਬਾਈਕ ਚਲਾਉਣ 'ਤੇ ਵੀ ਚਲਾਨ ਕੀਤਾ ਜਾ ਸਕਦਾ ਹੈ। ਹੁਣ ਚੰਡੀਗੜ੍ਹ ਦੇ ਐੱਸ. ਪੀ. ਟ੍ਰੈਫਿਕ ਨੇ ਨਵੇਂ ਨਿਰਦੇਸ਼ ਜਾਰੀ ਕੀਤੇ ਹਨ ਕਿ ਜੇਕਰ ਕੋਈ ਪੈਂਟ-ਸ਼ਰਟ ਅਤੇ ਜੁੱਤੇ ਨਾ ਪਾ ਕੇ ਬਰਮੂਡਾ, ਸ਼ਾਰਟਸ, ਲੁੰਗੀ ਜਾਂ ਹੋਰ ਕੱਪੜਿਆਂ 'ਚ ਡਰਾਈਵਿੰਗ ਕਰਦਾ ਹੈ ਤਾਂ 2000 ਰੁਪਏ ਦਾ ਚਲਾਨ ਕੱਟੇਗਾ। ਐੱਸ. ਪੀ. ਟ੍ਰੈਫਿਕ ਮੁਤਾਬਕ ਵੱਡੇ ਅਤੇ ਹੈਵੀ ਵ੍ਹੀਕਲ ਚਲਾਉਣ ਵਾਲੇ ਜੇਕਰ ਟ੍ਰੈਫਿਕ ਐਕਟ ਦੇ ਨਿਯਮਾਂ ਮੁਤਾਬਕ ਕੱਪੜੇ ਨਹੀਂ ਪਾਉਣਗੇ ਤਾਂ ਨਵੀਆਂ ਦਰਾਂ ਨਾਲ ਉਨ੍ਹਾਂ ਤੋਂ ਵੀ ਜ਼ੁਰਮਾਨਾ ਵਸੂਲਿਆ ਜਾਵੇਗਾ। ਐੱਸ. ਪੀ. ਟ੍ਰੈਫਿਕ ਨੇ ਕਿਹਾ ਕਿ ਸਾਰੀਆਂ ਮੋਟਰ ਗੱਡੀਆਂ ਚਲਾਉਣ ਵਾਲਿਆਂ ਲਈ ਖਾਸ ਤੌਰ 'ਤੇ ਡਰੈਸ ਕੋਡ ਹੋਵੇਗਾ, ਜਿਸ 'ਚ ਪੈਂਟ, ਸ਼ਰਟ ਅਤੇ ਜੁੱਤੇ ਸ਼ਾਮਲ ਹਨ।
ਚੰਡੀਗੜ੍ਹ 'ਚ ਗੁਜਰਾਤ ਦੀ ਤਰਜ਼ 'ਤੇ ਚਲਾਨ ਦੇ ਰੇਟਾਂ ਨੂੰ ਘਟਾਉਣ ਦੇ ਮੁੱਦੇ 'ਤੇ ਐਡਵਾਈਜ਼ਰ ਮਨੋਜ ਪਰਿਦਾ ਦਾ ਕਹਿਣਾ ਹੈ ਕਿ ਯੂ. ਟੀ. ਸਿੱਧਾ ਕੇਂਦਰ ਸਰਕਾਰ ਦੇ ਅੰਡਰ ਆਉਂਦਾ ਹੈ। ਜਿਹੜੀ ਵੀ ਨੋਟੀਫਿਕੇਸ਼ਨ ਕੇਂਦਰ ਵਲੋਂ ਲਾਗੂ ਕੀਤੀ ਜਾਵੇਗੀ, ਉਸ ਨੂੰ ਲਾਗੂ ਕਰਨਾ ਸਾਡਾ ਫਰਜ਼ ਹੈ। ਉਨ੍ਹਾਂ ਕਿਹਾ ਕਿ ਚੰਡੀਗੜ੍ਹ 'ਚ ਚਲਾਨ ਦੇ ਰੇਟ ਘੱਟ ਕਰਨ ਦਾ ਨਾ ਤਾਂ ਕੋਈ ਪ੍ਰਸਤਾਵ ਹੈ ਅਤੇ ਨਾ ਹੀ ਇਸ ਵਿਸ਼ੇ 'ਤੇ ਕਿਸੇ ਮੰਗ ਨੂੰ ਮੰਨਿਆ ਜਾਵੇਗਾ। ਨਵੇਂ ਮੋਟਰ ਵ੍ਹੀਕਲ ਐਕਟ ਨੂੰ ਸਖਤੀ ਨਾਲ ਲਾਗੂ ਕੀਤਾ ਜਾਵੇਗਾ, ਅਤੇ ਜਿਹੜੇ ਵੀ ਨਿਯਮ ਹੋਣਗੇ, ਉਸ ਤਹਿਤ ਚਲਾਨ ਕੱਟੇ ਜਾਣਗੇ ਤਾਂ ਜੋ ਟ੍ਰੈਫਿਕ ਨਿਯਮ ਸਖਤੀ ਨਾਲ ਲਾਗੂ ਕੀਤੇ ਜਾ ਸਕਣ।
