ਖੁਦ ਨੂੰ ਡੀ. ਜੀ. ਪੀ. ਦਾ ਨਜ਼ਦੀਕੀ ਦੱਸ ਕੇ 15 ਲੱਖ ਠੱਗੇ

ਮੋਹਾਲੀ (ਕੁਲਦੀਪ) - ਪੰਜਾਬ ਪੁਲਸ ਵਿਚ ਭਰਤੀ ਕਰਵਾਉਣ ਦੇ ਨਾਂ 'ਤੇ ਲੱਖਾਂ ਰੁਪਏ ਦੀ ਠੱਗੀ ਮਾਰਨ ਦਾ ਇਕ ਹੋਰ ਮਾਮਲਾ ਸਾਹਮਣੇ ਆਇਆ ਹੈ । ਭਾਵੇਂ ਪੁਲਸ ਭਰਤੀ ਦੇ ਨਾਂ 'ਤੇ ਪਹਿਲਾਂ ਵੀ ਕਈ ਠੱਗੀਆਂ ਹੁੰਦੀਆਂ ਆਈਆਂ ਹਨ ਪਰ ਇਸ ਵਾਰ ਇਕ ਵਿਅਕਤੀ ਨੇ ਖ਼ੁਦ ਨੂੰ ਡਾਇਰੈਕਟਰ ਜਨਰਲ ਆਫ਼ ਪੁਲਸ (ਡੀ. ਜੀ. ਪੀ.) ਦਾ ਨਜ਼ਦੀਕੀ ਦੱਸਦਿਆਂ ਪੁਲਸ ਵਿਚ ਏ. ਐੱਸ. ਆਈ. ਭਰਤੀ ਕਰਵਾਉਣ ਦੇ ਨਾਂ 'ਤੇ 15 ਲੱਖ ਰੁਪਏ ਦੀ ਠੱਗੀ ਮਾਰੀ ਹੈ।
ਪੁਲਸ ਸਟੇਸ਼ਨ ਫੇਜ਼-1 ਵਿਖੇ ਨਿਰਮਲ ਸਿੰਘ ਨਿਵਾਸੀ ਪਿੰਡ ਮੱਲਾਂਵਾਲਾ ਜ਼ਿਲਾ ਫਿਰੋਜ਼ਪੁਰ ਦੀ ਸ਼ਿਕਾਇਤ 'ਤੇ ਸੁਖਦੇਵ ਸਿੰਘ ਨਿਵਾਸੀ ਐੱਫ.-155, ਪਹਿਲੀ ਮੰਜ਼ਿਲ, ਗੌਲਫ ਵਿਊ ਟਾਵਰ, ਫੇਜ਼-8ਬੀ, ਮੋਹਾਲੀ ਖਿਲਾਫ ਕੇਸ ਦਰਜ ਕਰ ਲਿਆ ਗਿਆ ਹੈ। ਮੁਲਜ਼ਮ ਸੁਖਦੇਵ ਸਿੰਘ ਮੂਲ ਰੂਪ ਵਿਚ ਜ਼ਿਲਾ ਪਟਿਆਲਾ ਦੇ ਪਿੰਡ ਪੰਜੇਟਾ ਦਾ ਰਹਿਣ ਵਾਲਾ ਹੈ।
ਪੁਲਸ ਨੂੰ ਦਿੱਤੀ ਸ਼ਿਕਾਇਤ ਵਿਚ ਨਿਰਮਲ ਸਿੰਘ ਨੇ ਦੱਸਿਆ ਕਿ ਉਸ ਨੇ ਆਪਣੇ ਬੇਟੇ ਨੂੰ ਪੰਜਾਬ ਪੁਲਸ ਵਿਚ ਭਰਤੀ ਕਰਵਾਉਣ ਬਾਰੇ ਸੋਚਿਆ ਸੀ। ਇਸੇ ਦੌਰਾਨ ਉਸ ਦੇ ਇਕ ਦੋਸਤ ਅਮਿਤ ਨਿਵਾਸੀ ਹੁਸ਼ਿਆਰਪੁਰ ਨੇ ਉਸ ਦੀ ਮੁਲਾਕਾਤ ਸੁਖਦੇਵ ਸਿੰਘ ਨਿਵਾਸੀ ਪਿੰਡ ਪੰਜੇਟਾ ਦੇਵੀਗੜ੍ਹ, ਜ਼ਿਲਾ ਪਟਿਆਲਾ ਨਾਲ ਕਰਵਾਈ। ਸੁਖਦੇਵ ਸਿੰਘ ਨੇ ਕਿਹਾ ਕਿ ਉਸ ਦੀ ਡੀ. ਜੀ. ਪੀ. ਪੰਜਾਬ ਸੁਰੇਸ਼ ਅਰੋੜਾ ਨਾਲ ਸਿੱਧੀ ਗੱਲਬਾਤ ਹੈ ਤੇ ਉਹ ਉਸ ਦੇ ਬੇਟੇ ਨੂੰ ਪੰਜਾਬ ਪੁਲਸ ਵਿਚ ਏ. ਐੱਸ. ਆਈ. ਭਰਤੀ ਕਰਵਾ ਦੇਵੇਗਾ। ਇਸ ਭਰਤੀ ਲਈ ਉਸ ਨੇ 20 ਲੱਖ ਰੁਪਏ ਦੀ ਮੰਗ ਕੀਤੀ। ਉਸ ਨੇ ਆਪਣੇ ਘਰ ਦੇ ਗਹਿਣੇ ਤੇ ਅੱਧਾ ਏਕੜ ਜ਼ਮੀਨ ਵੇਚ ਕੇ ਤੇ ਕੁਝ ਪੈਸੇ ਉਧਾਰ ਚੁੱਕ ਕੇ ਜਨਵਰੀ 2015 ਵਿਚ ਸੁਖਦੇਵ ਸਿੰਘ ਨੂੰ 10 ਲੱਖ ਰੁਪਏ ਨਕਦ ਦੇ ਦਿੱਤੇ।
ਉਸ ਉਪਰੰਤ ਪਹਿਲਾਂ ਤਾਂ ਉਹ ਨੌਕਰੀ ਲਵਾਉਣ ਤੋਂ ਆਨਾਕਾਨੀ ਕਰਦਾ ਰਿਹਾ ਤੇ ਜਦੋਂ 2016 ਵਿਚ ਪੰਜਾਬ ਪੁਲਸ ਦੀ ਭਰਤੀ ਆਈ ਤਾਂ ਉਸ ਨੇ 5 ਲੱਖ ਰੁਪਏ ਹੋਰ ਮੰਗੇ ਤੇ ਕਿਹਾ ਕਿ ਇਸ ਵਾਰ ਉਹ ਉਸ ਦੇ ਬੇਟੇ ਨੂੰ ਏ. ਐੱਸ. ਆਈ. ਪੱਕਾ ਭਰਤੀ ਕਰਵਾ ਦੇਵੇਗਾ। ਨਿਰਮਲ ਸਿੰਘ ਨੇ ਕਿਹਾ ਕਿ ਪੁਲਸ ਭਰਤੀ ਵੀ ਲੰਘ ਗਈ ਪਰ ਉਸ ਦੇ ਬੇਟੇ ਨੂੰ ਭਰਤੀ ਨਹੀਂ ਕਰਵਾਇਆ ਗਿਆ।
ਸ਼ਿਕਾਇਤਕਰਤਾ ਨੇ ਕਿਹਾ ਕਿ ਭਰਤੀ ਨਾ ਕਰਵਾਏ ਜਾਣ ਉਪਰੰਤ ਜਦੋਂ ਉਸ ਨੇ ਸੁਖਦੇਵ ਸਿੰਘ ਕੋਲੋਂ ਆਪਣੇ ਪੈਸੇ ਵਾਪਸ ਮੰਗੇ ਤਾਂ ਉਸ ਨੇ ਤਿੰਨ-ਤਿੰਨ ਲੱਖ ਰੁਪਏ ਦੇ ਚਾਰ ਚੈੱਕ ਦੇ ਦਿੱਤੇ, ਜੋ ਕਿ ਬੈਂਕ ਵਿਚ ਲਾਉਣ 'ਤੇ ਬਾਊਂਸ ਹੋ ਗਏ। ਜਦੋਂ ਉਸ ਨੂੰ ਚੈੱਕ ਬਾਊਂਸਿੰਗ ਬਾਰੇ ਦੱਸਿਆ ਤੇ ਪੈਸੇ ਵਾਪਿਸ ਮੰਗੇ ਤਾਂ ਉਹ ਉਲਟਾ ਉਨ੍ਹਾਂ ਨੂੰ ਆਪਣੀ ਉੱਚੀ ਪਹੁੰਚ ਕਾਰਨ ਝੂਠੇ ਕੇਸ ਵਿਚ ਫਸਾਉਣ ਦੀਆਂ ਧਮਕੀਆਂ ਦੇਣ ਲਗ ਪਿਆ। ਪ੍ਰੇਸ਼ਾਨ ਹੋ ਕੇ ਉਸ ਨੇ ਇਸ ਸਬੰਧੀ ਸ਼ਿਕਾਇਤ ਪੁਲਸ ਸਟੇਸ਼ਨ ਫੇਜ਼-1 ਮੋਹਾਲੀ ਵਿਖੇ ਦੇ ਦਿੱਤੀ, ਜਿਸ ਦੌਰਾਨ ਪੁਲਸ ਨੇ ਸੁਖਦੇਵ ਸਿੰਘ ਖਿਲਾਫ਼ ਠੱਗੀ ਦਾ ਕੇਸ ਦਰਜ ਕਰ ਲਿਆ ਹੈ।