ਅੱਗ 'ਤੇ ਕਾਬੂ ਪਾਉਣ ਗਈ ਫਾਇਰ ਬ੍ਰਿਗੇਡ ਦੀ ਗੱਡੀ ਨੂੰ ਲੱਗੀ ਅੱਗ
05/19/2019 9:46:52 PM
ਭਵਾਨੀਗੜ੍ਹ,(ਵਿਕਾਸ) : ਭਵਾਨੀਗੜ੍ਹ-ਸੰਗਰੂਰ ਮੁੱਖ ਮਾਰਗ 'ਤੇ ਪਿੰਡ ਘਾਬਦਾਂ ਨੇੜੇ ਫਾਇਰ ਬ੍ਰਿਗੇਡ ਦੀ ਚੱਲਦੀ ਇਕ ਗੱਡੀ ਨੂੰ ਅੱਜ ਅਚਾਨਕ ਅੱਗ ਲੱਗ ਗਈ। ਉਕਤ ਘਟਨਾ ਦੌਰਾਨ ਫਾਇਰ ਬ੍ਰਿਗੇਡ ਦੀ ਗੱਡੀ ਕਾਫੀ ਹੱਦ ਤਕ ਸੜ ਗਈ। ਹਾਲਾਂਕਿ ਇਸ ਦੌਰਾਨ ਗੱਡੀ 'ਚ ਮੌਜੂਦ ਫਾਇਰ ਬ੍ਰਿਗੇਡ ਅਮਲੇ ਦੇ 3 ਮੁਲਾਜ਼ਮਾਂ ਦਾ ਬਚਾਅ ਹੋ ਗਿਆ। ਘਟਨਾ ਸਬੰਧੀ ਫਾਇਰ ਬ੍ਰਿਗੇਡ ਦਫਤਰ ਸੰਗਰੂਰ ਤੋਂ ਮਿਲੀ ਜਾਣਕਾਰੀ ਮੁਤਾਬਕ ਅੱਜ ਭਵਾਨੀਗੜ੍ਹ ਨੇੜਲੇ ਪਿੰਡ ਆਲੌਅਰਖ ਵਿਖੇ ਇਕ ਤੂੜੀ ਵਾਲੇ ਕੁੱਪ ਨੂੰ ਲੱਗੀ ਅੱਗ 'ਤੇ ਕਾਬੂ ਪਾਉਣ ਲਈ ਸੰਗਰੂਰ ਤੋਂ ਰਵਾਨਾ ਹੋਈ ਫਾਇਰ ਬ੍ਰਿਗੇਡ ਦੀ ਗੱਡੀ ਨੂੰ ਭਾਈ ਗੁਰਦਾਸ ਕਾਲਜ ਨੇੜੇ ਅਚਾਨਕ ਅੱਗ ਲੱਗ ਗਈ। ਗੱਡੀ 'ਚ ਡਰਾਈਵਰ ਜਗਪਾਲ ਸਿੰਘ ਸਮੇਤ ਫਾਇਰਮੈਨ ਗੁਰਦਾਸ ਸਿੰਘ ਬੱਬਲਜੀਤ ਸਿੰਘ ਸਵਾਰ ਸਨ, ਜਿਨ੍ਹਾਂ ਦਾ ਵਾਲ-ਵਾਲ ਬਚਾਅ ਹੋ ਗਿਆ।
ਕਿੰਝ ਵਾਪਰੀ ਘਟਨਾ
ਜਾਣਕਾਰੀ ਮੁਤਾਬਕ ਘਟਨਾ ਗੱਡੀ ਦੇ ਅਚਾਨਕ ਸ਼ਾਕਟ ਟੁੱਟ ਜਾਣ ਕਾਰਨ ਵਾਪਰੀ। ਫਾਇਰ ਬ੍ਰਿਗੇਡ ਦੇ ਮੁਲਾਜ਼ਮਾਂ ਨੇ ਦੱਸਿਆ ਕਿ ਚੱਲਦੀ ਗੱਡੀ ਦਾ ਸ਼ਾਕਟ ਟੁੱਟ ਕੇ ਸਾਇਲੈਂਸਰ 'ਚ ਲੱਗਣ ਕਾਰਨ ਡੀਜ਼ਲ ਪਾਇਪ ਫੱਟ ਗਿਆ। ਜਿਸ ਕਾਰਨ ਡੀਜ਼ਲ ਸੜਕ 'ਤੇ ਫੈਲ ਗਿਆ ਤੇ ਗੱਡੀ ਨੂੰ ਅੱਗ ਲੱਗ ਗਈ। ਘਟਨਾ ਬਾਰੇ ਪਤਾ ਲੱਗਦਿਆਂ ਹੀ ਬੜੀ ਜੱਦੋ-ਜਹਿਦ ਮਗਰੋਂ ਗੱਡੀ ਨੂੰ ਲੱਗੀ ਅੱਗ 'ਤੇ ਕਾਬੂ ਪਾਇਆ ਗਿਆ ਪਰ ਤਦ ਤਕ ਫਾਇਰ ਬ੍ਰਿਗੇਡ ਦੀ ਗੱਡੀ ਕਾਫੀ ਹੱਦ ਤੱਕ ਸੜ ਚੁਕੀ ਸੀ। ਓਧਰ ਦੂਜੇ ਪਾਸੇ ਰਸਤੇ 'ਚ ਗੱਡੀ ਅੱਗ ਦੀ ਚਪੇਟ 'ਚ ਆ ਜਾਣ ਬਾਰੇ ਪਤਾ ਲੱਗਣ 'ਤੇ ਆਲੋਅਰਖ ਪਿੰਡ ਲਈ ਦੂਜੀ ਫਾਇਰ ਬ੍ਰਿਗੇਡ ਦੀ ਗੱਡੀ ਨੂੰ ਭੇਜਿਆ ਗਿਆ।
