ਅਵਾਰਾ ਕੁੱਤੇ ਨੇ 13 ਸਾਲਾ ਬੱਚੇ ਨੂੰ ਵੱਢਿਆ, ਲਿਜਾਇਆ ਗਿਆ ਹਸਪਤਾਲ

ਜ਼ੀਰਕਪੁਰ (ਧੀਮਾਨ) : ਇੱਥੇ ਢਕੌਲੀ ਖੇਤਰ ’ਚ ਪੈਂਦੀ ਅਜੀਤ ਇਨਕਲੇਵ ਕਾਲੋਨੀ ’ਚ ਸਵੇਰੇ ਅਵਾਰਾ ਕੁੱਤੇ ਵੱਲੋਂ 13 ਸਾਲਾ ਬੱਚੇ ’ਤੇ ਕੀਤੇ ਹਮਲੇ ਨੇ ਸ਼ਹਿਰ ’ਚ ਡਾਗ ਬਾਈਟ ਦੀ ਵੱਧਦੀ ਸਮੱਸਿਆ ਨੂੰ ਇਕ ਵਾਰ ਫਿਰ ਬੇਨਕਾਬ ਕਰ ਦਿੱਤਾ। ਸਵੇਰੇ ਕਰੀਬ 9 ਵਜੇ ਹੋਈ ਇਸ ਘਟਨਾ ’ਚ ਬੱਚਾ ਗੰਭੀਰ ਜ਼ਖ਼ਮੀ ਹੋ ਗਿਆ। ਉਸ ਨੂੰ ਤੁਰੰਤ ਇਲਾਜ ਲਈ ਪੰਚਕੂਲਾ ਸੈਕਟਰ-6 ਸਥਿਤ ਹਸਪਤਾਲ ਲਿਜਾਇਆ ਗਿਆ। ਡਾਕਟਰਾਂ ਨੇ ਬੱਚੇ ਨੂੰ ਰੇਬੀਜ਼ ਦਾ ਟੀਕਾ ਲਾ ਕੇ ਘਰ ਭੇਜ ਦਿੱਤਾ। ਪੀੜਤ ਬੱਚੇ ਤੇਜਸ ਮਿਸ਼ਰਾ ਵਾਸੀ ਅਜੀਤ ਇਨਕਲੇਵ ਨੇ ਦੱਸਿਆ ਕਿ ਉਹ ਸਵੇਰੇ ਘਰੋਂ ਕਿਸੇ ਜ਼ਰੂਰੀ ਕੰਮ ਲਈ ਬਾਹਰ ਨਿਕਲ ਰਿਹਾ ਸੀ। ਇਸ ਦੌਰਾਨ ਅਚਾਨਕ ਅਵਾਰਾ ਕੁੱਤਾ ਉਸ ’ਤੇ ਝਪਟ ਪਿਆ ਅਤੇ ਉਸ ਦੀ ਖੱਬੀ ਲੱਤ ’ਤੇ ਕੱਟ ਲਿਆ।

ਕੁੱਤਾ ਇੰਨਾ ਖੂੰਖਾਰ ਸੀ ਕਿ ਗੁਆਂਢੀਆਂ ਦੀ ਮਦਦ ਨਾਲ ਬਹੁਤ ਮੁਸ਼ਕਲ ਨਾਲ ਉਸ ਨੂੰ ਕੁੱਤੇ ਦੇ ਚੁੰਗਲ ਤੋਂ ਛੁਡਵਾਇਆ ਜਾ ਸਕਿਆ, ਨਹੀਂ ਤਾਂ ਨੁਕਸਾਨ ਹੋਰ ਵੀ ਵੱਡਾ ਹੋ ਸਕਦਾ ਸੀ। ਘਟਨਾ ਤੋਂ ਬਾਅਦ ਪੂਰੀ ਕਾਲੋਨੀ ’ਚ ਦਹਿਸ਼ਤ ਦਾ ਮਾਹੌਲ ਬਣ ਗਿਆ। ਸ਼ਹਿਰ ਵਾਸੀਆਂ ਦਾ ਕਹਿਣਾ ਹੈ ਕਿ ਅਜੀਤ ਇਨਕਲੇਵ ਸਮੇਤ ਢਕੌਲੀ ਖੇਤਰ ’ਚ ਅਵਾਰਾ ਕੁੱਤਿਆਂ ਦੀ ਗਿਣਤੀ ਲਗਾਤਾਰ ਵੱਧ ਰਹੀ ਹੈ ਤੇ ਇਹ ਕੁੱਤੇ ਸਵੇਰੇ ਸਕੂਲ ਜਾਣ ਵਾਲੇ ਬੱਚਿਆਂ ਤੇ ਸ਼ਾਮ ਸਮੇਂ ਰਾਹਗੀਰਾਂ ਲਈ ਗੰਭੀਰ ਖ਼ਤਰਾ ਬਣੇ ਹਨ।

ਲੋਕਾਂ ਮੁਤਾਬਕ ਅਜਿਹੀਆਂ ਘਟਨਾਵਾਂ ਪਹਿਲਾਂ ਵੀ ਵਾਪਰ ਚੁੱਕੀਆਂ ਹਨ ਪਰ ਹਾਲਾਤ ਜਿਉਂ ਦੇ ਤਿਉਂ ਬਣੇ ਹਨ। ਜਾਣਕਾਰੀ ਮੁਤਾਬਕ ਜ਼ੀਰਕਪੁਰ ਦੇ ਢਕੌਲੀ ਹਸਪਤਾਲ ’ਚ ਲਗਭਗ ਰੋਜ਼ਾਨਾ ਔਸਤਨ ਅੱਧਾ ਦਰਜਨ ਦੇ ਕਰੀਬ ਕੁੱਤਿਆਂ ਵਲੋਂ ਵੱਢਣ ਦੇ ਕੇਸ ਦਰਜ ਹੋ ਰਹੇ ਹਨ। ਲਗਾਤਾਰ ਸਾਹਮਣੇ ਆ ਰਹੇ ਇਹ ਮਾਮਲੇ ਸ਼ਹਿਰ ’ਚ ਬਣੀ ਗੰਭੀਰ ਸਥਿਤੀ ਨੂੰ ਸਾਫ਼ ਦਰਸਾਉਂਦੇ ਹਨ ਤੇ ਅਵਾਰਾ ਕੁੱਤਿਆਂ ਦਾ ਮਸਲਾ ਗੰਭੀਰ ਰੂਪ ਧਾਰ ਚੁੱਕਾ ਹੈ।