ਪੰਜਾਬ ''ਚ ਮਹਿਲਾ ਰੁਜ਼ਗਾਰ ''ਚ ਦਰਜ ਕੀਤੀ ਗਈ ਗਿਰਾਵਟ, ਅੰਕੜਿਆਂ ''ਚ ਹੋਇਆ ਖ਼ੁਲਾਸਾ

ਚੰਡੀਗੜ੍ਹ : ਪੰਜਾਬ 'ਚ ਮਹਿਲਾ ਰੁਜ਼ਗਾਰ ਨੂੰ ਲੈ ਕੇ ਅਹਿਮ ਖ਼ਬਰ ਸਾਹਮਣੇ ਆਈ ਹੈ। ਸੂਖਮ, ਲਘੂ ਅਤੇ ਦਰਮਿਆਨੇ ਉਦਯੋਗਾਂ (MSMEs) 'ਚ ਮਹਿਲਾ ਰੁਜ਼ਗਾਰ ਦੇ ਅੰਕੜਿਆਂ ਨੇ ਗੰਭੀਰ ਸਥਿਤੀ ਪੈਦਾ ਕਰ ਦਿੱਤੀ ਹੈ। ਲੋਕ ਸਭਾ 'ਚ ਐੱਮ. ਐੱਸ. ਐੱਮ. ਈ. ਰਾਜ ਮੰਤਰੀ ਸ਼ੋਭਾ ਕਰੰਦਲਾਜੇ ਵੱਲੋਂ ਦਿੱਤੇ ਗਏ ਅੰਕੜਿਆਂ ਅਨੁਸਾਰ ਜਿੱਥੇ ਦੇਸ਼ ਭਰ 'ਚ ਮਹਿਲਾ ਰੁਜ਼ਗਾਰ 2.04 ਕਰੋੜ ਤੋਂ ਵੱਧ ਕੇ 2.13 ਕਰੋੜ ਹੋਇਆ ਹੈ, ਉੱਥੇ ਪੰਜਾਬ ਦਾ ਪਿਛੜਣਾ ਸੂਬੇ ਦੀ ਆਰਥਿਕਤਾ ਲਈ ਵੱਡਾ ਝਟਕਾ ਹੈ। ਕੇਂਦਰ ਸਰਕਾਰ ਦੇ ਉੱਦਮ ਰਜਿਸਟ੍ਰੇਸ਼ਨ ਪੋਰਟਲ ਦੇ ਅੰਕੜਿਆਂ ਅਨੁਸਾਰ ਸਾਲ 2025-26 ਦੇ ਫਰਵਰੀ ਮਹੀਨੇ ਤੱਕ ਪੰਜਾਬ 'ਚ ਮਹਿਲਾ ਰੁਜ਼ਗਾਰ ਘੱਟ ਕੇ 3.53 ਲੱਖ ਰਹਿ ਗਿਆ ਹੈ, ਜੋ ਕਿ ਪਿਛਲੇ ਸਾਲ 2024-25 'ਚ 8.40 ਲੱਖ ਸੀ।

ਇਹ ਗਿਰਾਵਟ 50 ਫ਼ੀਸਦੀ ਤੋਂ ਵੀ ਜ਼ਿਆਦਾ ਹੈ, ਜਦੋਂ ਕਿ ਹਾਲੇ ਮਾਰਚ ਮਹੀਨੇ ਦਾ ਡਾਟਾ ਆਉਣਾ ਬਾਕੀ ਹੈ। ਦੂਜੇ ਪਾਸੇ ਪੰਜਾਬ ਦੇ ਗੁਆਂਢੀ ਸੂਬੇ ਹਰਿਆਣਾ 'ਚ ਮਹਿਲਾ ਰੁਜ਼ਗਾਰ 'ਚ 18.27 ਫ਼ੀਸਦੀ ਦਾ ਵਾਧਾ ਦਰਜ ਕੀਤਾ ਗਿਆ ਹੈ। ਜੰਮੂ-ਕਸ਼ਮੀਰ 'ਚ ਵੀ ਮਹਿਲਾ ਕਰਮਚਾਰੀਆਂ ਦੀ ਗਿਣਤੀ 1.44 ਲੱਖ ਤੋਂ ਵੱਧ ਕੇ 1.51 ਲੱਖ ਹੋ ਗਈ ਹੈ। ਹਾਲਾਂਕਿ, ਹਿਮਾਚਲ ਪ੍ਰਦੇਸ਼ ਅਤੇ ਚੰਡੀਗੜ੍ਹ 'ਚ ਪੰਜਾਬ ਵਾਂਗ ਹੀ ਗਿਰਾਵਟ ਦੇਖਣ ਨੂੰ ਮਿਲੀ ਹੈ। ਔਰਤਾਂ ਦੀ ਮਲਕੀਅਤ ਵਾਲੇ ਉਦਯੋਗਾਂ ਦੀ ਗਿਣਤੀ 'ਚ ਵੀ ਵੱਡੀ ਕਮੀ ਆਈ ਹੈ। ਸਾਲ 2024-25 'ਚ ਪੰਜਾਬ 'ਚ 2.18 ਲੱਖ ਮਹਿਲਾ ਮਲਕੀਅਤ ਵਾਲੇ ਐੱਮ. ਐੱਸ. ਐੱਮ. ਈ. ਸਨ, ਜੋ ਹੁਣ ਘੱਟ ਕੇ 1.36 ਲੱਖ ਰਹਿ ਗਏ ਹੈ।