ਚੰਡੀਗੜ੍ਹ ਦੇ ਸੀਰੀਅਲ ਕਿਲਰ ਮੋਨੂੰ ਤੀਜੀ ਵਾਰ ਉਮਰ ਕੈਦ, ਪੜ੍ਹੋ ਕੀ ਹੈ ਪੂਰੀ ਖ਼ਬਰ

ਚੰਡੀਗੜ੍ਹ (ਸੁਸ਼ੀਲ) : ਜ਼ਿਲ੍ਹਾ ਅਦਾਲਤ ਨੇ ਜਬਰ-ਜ਼ਿਨਾਹ ਤੋਂ ਬਾਅਦ ਕਤਲ ਮਾਮਲੇ ’ਚ ਸੀਰੀਅਲ ਕਿਲਰ ਮੋਨੂੰ ਕੁਮਾਰ ਨੂੰ ਮੰਗਲਵਾਰ ਨੂੰ ਉਮਰ ਕੈਦ ਦੀ ਸਜ਼ਾ ਸੁਣਾਈ ਹੈ। ਇਸ ਤੋਂ ਪਹਿਲਾਂ ਦੋ ਮਾਮਲਿਆਂ ’ਚ ਵੀ ਉਸ ਨੂੰ ਉਮਰ ਕੈਦ ਦੀ ਸਜ਼ਾ ਸੁਣਾਈ ਜਾ ਚੁੱਕੀ ਹੈ, ਜਿਨ੍ਹਾਂ ’ਚ ਇਕ ਮਾਮਲਾ ਐੱਮ. ਬੀ. ਏ. ਵਿਦਿਆਰਥਣ ਅਤੇ ਦੂਜਾ ਮਲੋਆ ਵਾਸੀ 40 ਸਾਲਾ ਔਰਤ ਨਾਲ ਜਬਰ-ਜ਼ਿਨਾਹ ਤੋਂ ਬਾਅਦ ਕਤਲ ਦਾ ਹੈ। ਮੰਗਲਵਾਰ ਨੂੰ 2024 ’ਚ ਜਬਰ-ਜ਼ਿਨਾਹ ਤੋਂ ਬਾਅਦ 60 ਸਾਲਾ ਔਰਤ ਦੇ ਕਤਲ ਮਾਮਲੇ ’ਚ ਸਜ਼ਾ ਸੁਣਾਈ ਗਈ ਹੈ। ਪੁਲਸ ਜਾਂਚ ਦੌਰਾਨ ਇਸ ਵਾਰਦਾਤ ’ਚ ਵੀ ਮੋਨੂੰ ਦਾ ਨਾਮ ਸਾਹਮਣੇ ਆਇਆ ਸੀ। ਗ੍ਰਿਫ਼ਤਾਰੀ ਤੋਂ ਬਾਅਦ ਮੁਲਜ਼ਮ ਨੇ ਐੱਮ. ਬੀ. ਏ. ਵਿਦਿਆਰਥਣ ਅਤੇ ਔਰਤਾਂ ਦਾ ਕਤਲ ਕਰਨ ਦੀ ਗੱਲ ਕਬੂਲ ਕੀਤੀ ਸੀ। ਦਰਅਸਲ ਫਰਵਰੀ 2024 ’ਚ ਮਲੋਆ ਦੇ ਜੰਗਲ ’ਚੋਂ ਬਜ਼ੁਰਗ ਔਰਤ ਦੀ ਲਾਸ਼ ਮਿਲੀ ਸੀ। ਜਾਂਚ ਦੌਰਾਨ ਪੁਲਸ ਨੇ 100 ਤੋਂ ਵੱਧ ਸ਼ੱਕੀਆਂ ਦੇ ਸੀਮੇਨ ਸੈਂਪਲ ਲਏ ਸਨ। ਜਾਂਚ ’ਚ ਮੋਨੂੰ ਕੁਮਾਰ ਦਾ ਸੀਮੇਨ 2010 ’ਚ ਸੁਰੱਖਿਅਤ ਕੀਤੇ ਗਏ ਸੈਂਪਲ ਨਾਲ ਮੈਚ ਹੋ ਗਿਆ। ਇਸ ਤੋਂ ਬਾਅਦ 15 ਸਾਲ ਪੁਰਾਣੇ ਕਤਲ ਦੇ ਮਾਮਲੇ ’ਚ ਪੁਲਸ ਮੋਨੂੰ ਤੱਕ ਪਹੁੰਚੀ। ਡੱਡੂਮਾਜਰਾ ਨੇੜੇ ਸ਼ਾਹਪੁਰ ਕਾਲੋਨੀ ਦਾ ਰਹਿਣ ਵਾਲਾ ਮੋਨੂੰ ਕੁਮਾਰ ਪਛਾਣ ਲੁਕੋ ਕੇ ਰਹਿੰਦਾ ਸੀ। ਉਸ ਨੇ ਆਧਾਰ ਕਾਰਡ ਤੱਕ ਨਹੀਂ ਬਣਵਾਇਆ ਸੀ ਅਤੇ ਨਾ ਹੀ ਬੈਂਕ ਖ਼ਾਤਾ ਖੁੱਲ੍ਹਵਾਇਆ ਸੀ। ਉਹ ਇੰਟਰਸਿਟੀ ਟੈਕਸੀ ਚਲਾਉਂਦਾ ਸੀ ਅਤੇ ਆਪਣਾ ਟਿਕਾਣਾ ਬਦਲਦਾ ਰਹਿੰਦਾ ਸੀ। ਮਈ 2024 ’ਚ ਪੁਲਸ ਨੇ ਉਸ ਨੂੰ ਗ੍ਰਿਫ਼ਤਾਰ ਕੀਤਾ। ਇਸ ਤੋਂ ਬਾਅਦ ਪੁੱਛਗਿੱਛ ਹੋਈ, ਜਿਸ ’ਚ ਉਸ ਨੇ ਇਹ ਖ਼ੁਲਾਸੇ ਕੀਤੇ।
ਸਭ ਤੋਂ ਪਹਿਲਾਂ 2010 ’ਚ ਕੀਤਾ ਸੀ ਐੱਮ. ਬੀ. ਏ. ਵਿਦਿਆਰਥਣ ਦਾ ਕਤਲ
2010 ’ਚ ਸੈਕਟਰ-38 ’ਚ ਐੱਮ. ਬੀ. ਏ. ਵਿਦਿਆਰਥਣ (21) ਨਾਲ ਜਬਰ-ਜ਼ਿਨਾਹ ਤੋਂ ਬਾਅਦ ਕਤਲ ਦੇ ਮਾਮਲੇ ’ਚ ਮੋਨੂੰ ਦਾ ਨਾਮ ਸਾਹਮਣੇ ਆਇਆ ਸੀ। ਵਿਦਿਆਰਥਣ ਦੀ ਲਾਸ਼ ਸੈਕਟਰ-38 ਦੇ ਨੇੜੇ ਮਿਲੀ ਸੀ। ਉਸ ਨੂੰ ਪੱਥਰਾਂ ਨਾਲ ਕੁਚਲ ਕੇ ਮਾਰਿਆ ਗਿਆ ਸੀ। ਪੁਲਸ ਨੇ ਮਾਮਲੇ ਦੀ ਜਾਂਚ ਸ਼ੁਰੂ ਕੀਤੀ। ਲਗਭਗ 14 ਸਾਲਾਂ ਤੱਕ ਮੁਲਜ਼ਮ ਦੀ ਪਛਾਣ ਨਹੀਂ ਹੋ ਸਕੀ। ਇਸ ਤੋਂ ਬਾਅਦ ਪੁਲਸ ਨੇ ਜ਼ਿਲ੍ਹਾ ਅਦਾਲਤ ’ਚ ਮਾਮਲੇ ਦੀ ਅਣਟਰੇਸ ਰਿਪੋਰਟ ਦਾਇਰ ਕਰ ਦਿੱਤੀ। ਹਾਲਾਂਕਿ ਪੁਲਸ ਨੇ ਜਾਂਚ ਪੂਰੀ ਤਰ੍ਹਾਂ ਬੰਦ ਨਹੀਂ ਕੀਤੀ ਸੀ। ਮਾਮਲੇ ਨਾਲ ਸਬੰਧਿਤ ਸਬੂਤ ਸੁਰੱਖਿਅਤ ਰੱਖੇ ਗਏ ਸਨ। ਪੁਲਸ ਨੇ ਵਿਦਿਆਰਥਣ ਦੇ ਸਰੀਰ ਤੋਂ ਸੀਮੇਨ ਦਾ ਸੈਂਪਲ ਸੁਰੱਖਿਅਤ ਰੱਖ ਲਿਆ ਸੀ।
2022 ’ਚ ਆਟੋ ਡਰਾਈਵਰ ਦੀ ਪਤਨੀ ਦਾ ਕਤਲ
2022 ’ਚ ਵੀ ਉਸ ਨੇ ਇਕ ਔਰਤ ਨੂੰ ਮਾਰਿਆ ਸੀ। ਮੋਨੂੰ ਨੇ ਪੁਲਸ ਪੁੱਛਗਿੱਛ ਦੌਰਾਨ ਮਲੋਆ ਵਾਸੀ ਇਕ ਆਟੋ ਡਰਾਈਵਰ ਦੀ ਪਤਨੀ ਦਾ ਕਤਲ ਕਰਨ ਦੀ ਗੱਲ ਕਬੂਲੀ। ਪੁਲਸ ਨੇ ਦੱਸਿਆ ਕਿ ਘਟਨਾ 11 ਜਨਵਰੀ, 2022 ਦੀ ਰਾਤ ਦੀ ਸੀ। ਔਰਤ ਬਾਜ਼ਾਰ ਜਾਣ ਲਈ ਘਰੋਂ ਨਿਕਲੀ ਸੀ, ਪਰ ਉਹ ਵਾਪਸ ਨਹੀਂ ਪਰਤੀ। ਉਸ ਦੇ ਪਰਿਵਾਰ ਨੇ ਉਸ ਦੀ ਭਾਲ ਸ਼ੁਰੂ ਕੀਤੀ। ਅਗਲੇ ਦਿਨ ਔਰਤ ਦੀ ਲਾਸ਼ ਉਸ ਦੇ ਘਰ ਤੋਂ ਥੋੜ੍ਹੀ ਦੂਰੀ ’ਤੇ ਮਿਲੀ ਸੀ। ਪੁਲਸ ਨੇ ਇਸ ਮਾਮਲੇ ਦੀ ਜਾਂਚ ਕੀਤੀ, ਪਰ ਕਾਤਲ ਦਾ ਪਤਾ ਨਹੀਂ ਲੱਗਾ।
2024 ’ਚ 60 ਸਾਲਾ ਔਰਤ ਦਾ ਕਤਲ
ਫਰਵਰੀ 2024 ’ਚ ਉਸ ਨੇ ਇਕ 60 ਸਾਲਾ ਔਰਤ ਨਾਲ ਵੀ ਜਬਰ-ਜ਼ਿਨਾਹ ਕੀਤਾ। ਚੰਡੀਗੜ੍ਹ ਦੇ ਮਲੋਆ ਜੰਗਲ ਖੇਤਰ ’ਚ ਸੈਕਟਰ-54 ਦੇ ਨੇੜੇ ਸੁੰਨਸਾਨ ਸੜਕ ’ਤੇ ਔਰਤ ਜਾ ਰਹੀ ਸੀ। ਮੋਨੂੰ ਨੇ ਉਸ ਨੂੰ ਫੜ੍ਹ ਲਿਆ। ਜਬਰ-ਜ਼ਿਨਾਹ ਤੋਂ ਬਾਅਦ ਉਸ ਦਾ ਗਲਾ ਘੁੱਟ ਦਿੱਤਾ ਅਤੇ ਕੁੱਟ-ਕੁੱਟ ਕੇ ਉਸ ਦਾ ਕਤਲ ਕਰ ਦਿੱਤਾ। ਇਸ ਤੋਂ ਬਾਅਦ ਉਸ ਨੇ ਔਰਤ ਦਾ ਮੋਬਾਇਲ ਵੀ ਚੋਰੀ ਕਰ ਲਿਆ ਅਤੇ ਵੇਚ ਦਿੱਤਾ। ਮ੍ਰਿਤਕਾ ਚੰਡੀਗੜ੍ਹ ਦੇ ਮਲੋਆ ਦੀ ਹੀ ਰਹਿਣ ਵਾਲੀ ਸੀ। ਇਸੇ ਮਾਮਲੇ ’ਚ ਪੁਲਸ ਦੀ ਜਾਂਚ ਦੌਰਾਨ ਮੋਨੂੰ ਫੜ੍ਹਿਆ ਗਿਆ ਸੀ। ਉਸ ਨੇ ਤਿੰਨੋਂ ਜਬਰ-ਜ਼ਿਨਾਹ ਦੇ ਮਾਮਲਿਆਂ ਅਤੇ ਕਤਲ ਦੀਆਂ ਵਾਰਦਾਤਾਂ ਨੂੰ ਕਬੂਲਿਆ।