ਪੰਜਾਬ 'ਚ ਭਾਜਪਾ ਕਸੂਤੀ ਸਥਿਤੀ 'ਚ ਉਮੀਦਵਾਰ ਨਹੀਂ ਹੋਏ ਤੈਅ

ਲੁਧਿਆਣਾ (ਸੁਨੀਲ)—ਲੋਕ ਸਭਾ ਚੋਣਾਂ ਲਈ ਪੰਜਾਬ 'ਚ ਨੋਟੀਫਿਕੇਸ਼ਨ ਜਾਰੀ ਹੋਣ ਦਾ ਸਮਾਂ ਨੇੜੇ ਆ ਗਿਆ ਹੈ ਪਰ ਪੰਜਾਬ ਭਾਜਪਾ ਅਜੇ ਤੱਕ ਆਪਣੀਆਂ ਤਿੰਨ ਲੋਕ ਸਭਾ ਸੀਟਾਂ ਅੰਮ੍ਰਿਤਸਰ, ਗੁਰਦਾਸਪੁਰ ਅਤੇ ਹੁਸ਼ਿਆਰਪੁਰ ਲਈ ਉਮੀਦਵਾਰ ਤੈਅ ਨਹੀਂ ਕਰ ਸਕੀ। ਇਨ੍ਹਾਂ ਸੀਟਾਂ 'ਤੇ ਕਾਂਗਰਸ ਪਹਿਲਾਂ ਹੀ ਆਪਣੇ ਉਮੀਦਵਾਰਾਂ ਦੇ ਨਾਵਾਂ ਦਾ ਐਲਾਨ ਕਰ ਚੁੱਕੀ ਹੈ। ਭਾਜਪਾ ਅੰਦਰ ਉਮੀਦਵਾਰ ਤੈਅ ਕਰਨ ਦੇ ਮਾਮਲੇ ਨੂੰ ਲੈ ਕੇ ਅੰਦਰੂਨੀ ਜੰਗ ਤੇਜ਼ੀ ਨਾਲ ਚੱਲ ਰਹੀ ਹੈ। ਇਨ੍ਹਾਂ ਤਿੰਨਾਂ ਸੀਟਾਂ 'ਤੇ ਭਾਜਪਾ ਕੋਲ ਆਪਸੀ ਸਹਿਮਤੀ ਵਾਲੇ ਉਮੀਦਵਾਰ ਅਜੇ ਤੱਕ ਸਾਹਮਣੇ ਨਹੀਂ ਆਏ ਜਿਸ ਕਾਰਨ ਪਾਰਟੀ ਦੇ ਅਕਸ 'ਤੇ ਮਾੜਾ ਅਸਰ ਪੈਂਦਾ ਨਜ਼ਰ ਆ ਰਿਹਾ ਹੈ।

ਪੰਜਾਬ 'ਚ ਭਾਵੇਂ ਭਾਜਪਾ ਦਾ ਸ਼੍ਰੋਮਣੀ ਅਕਾਲੀ ਦਲ ਨਾਲ ਗੱਠਜੋੜ ਕਾਫੀ ਲੰਬੇ ਸਮੇਂ ਤੋਂ ਚੱਲ ਰਿਹਾ ਹੈ ਪਰ ਹਰ ਵਾਰ ਲੋਕ ਸਭਾ ਚੋਣਾਂ ਦੇ ਸਮੇਂ ਪਾਰਟੀ ਆਪਣੇ ਉਮੀਦਵਾਰਾਂ ਨੂੰ ਲੈ ਕੇ ਉਲਝਣ 'ਚ ਰਹਿੰਦੀ ਹੈ। ਅੰਮ੍ਰਿਤਸਰ ਵਿਖੇ ਨਵਜੋਤ ਸਿੰਘ ਸਿੱਧੂ ਵਲੋਂ ਭਾਜਪਾ ਨੂੰ ਅਲਵਿਦਾ ਕਹਿਣ ਪਿੱਛੋਂ ਪਾਰਟੀ ਪਿਛਲੇ ਕੁਝ ਸਮੇਂ ਤੋਂ ਆਪਣਾ ਕੋਈ ਵੀ ਮਜ਼ਬੂਤ ਚਿਹਰਾ ਅੱਗੇ ਨਹੀਂ ਲਿਆ ਸਕੀ। ਵਾਜਪਾਈ ਦੇ ਸਮੇਂ ਸਿੱਧੂ ਨੂੰ ਅੰਮ੍ਰਿਤਸਰ ਤੋਂ ਲਾਂਚ ਕੀਤਾ ਗਿਆ ਸੀ। ਉਨ੍ਹਾਂ ਕਾਂਗਰਸ ਦੇ ਚੋਟੀ ਦੇ ਆਗੂ ਰਘੂਨੰਦਨ ਲਾਲ ਭਾਟੀਆ ਨੂੰ ਹਰਾਇਆ ਸੀ। 2014 ਦੀਆਂ ਲੋਕ ਸਭਾ ਚੋਣਾਂ 'ਚ ਭਾਜਪਾ ਨੇ ਅਰੁਣ ਜੇਤਲੀ ਨੂੰ ਚੋਣ ਮੈਦਾਨ 'ਚ ਉਤਾਰਿਆ ਸੀ ਪਰ ਮੁੱਖ ਮੰਤਰੀ ਕੈਪਟਨ ਅਮਰਿੰਦਰ ਸਿੰਘ ਨੇ ਜੇਤਲੀ ਨੂੰ ਹਰਾ ਦਿੱਤਾ ਸੀ। ਕੈਪਟਨ ਵਲੋਂ ਭਾਜਪਾ ਨੂੰ ਦਿੱਤੀ ਗਈ ਹਾਰ ਪਿੱਛੋਂ ਪਾਰਟੀ ਦੇ ਆਗੂਆਂ ਦਾ ਮਨੋਬਲ ਡਿੱਗਿਆ ਉਸ ਪਿੱਛੋਂ ਭਾਜਪਾ ਦੀ ਹਾਲਤ ਲਗਾਤਾਰ ਗਿਰਾਵਟ ਵੱਲ ਵਧਦੀ ਗਈ। ਗੁਰਦਾਸਪੁਰ ਵਿਖੇ ਸਵਰਗੀ ਵਾਜਪਾਈ ਨੇ ਫਿਲਮ ਅਭਿਨੇਤਾ ਵਿਨੋਦ ਖੰਨਾ ਨੂੰ ਚੋਣ ਮੈਦਾਨ 'ਚ ਉਤਾਰਿਆ। ਉਨ੍ਹਾਂ ਗੁਰਦਾਸਪੁਰ ਤੋਂ ਲਗਾਤਾਰ ਚੋਣ ਜਿੱਤਦੀ ਆ ਰਹੀ ਸੁਖਬੰਸ ਕੌਰ ਭਿੰਡਰ ਨੂੰ ਹਰਾਇਆ। ਵਿਨੋਦ ਖੰਨਾ ਦਾ ਦੇਹਾਂਤ ਪਿੱਛੋਂ ਭਾਜਪਾ ਗੁਰਦਾਸਪੁਰ 'ਚ ਵੀ ਪੂਰੀ ਤਰ੍ਹਾਂ ਕੱਟੀ ਨਜ਼ਰ ਆ ਰਹੀ ਹੈ। ਇਸਦੇ ਸਥਾਨਕ ਆਗੂਆਂ ਅੰਦਰ ਮੱਤਭੇਦ ਸਿਖਰਾਂ 'ਤੇ ਹਨ। ਬੀਤੇ 20 ਸਾਲਾਂ ਦੌਰਾਨ ਪਾਰਟੀ ਸਥਾਨਕ ਪੱਧਰ 'ਤੇ ਕਿਸੇ ਵੀ ਮਜ਼ਬੂਤ ਚਿਹਰੇ ਨੂੰ ਅੱਗੇ ਲਿਆਉਣ 'ਚ ਸਫਲ ਨਹੀਂ ਹੋ ਸਕੀ।

ਹੁਸ਼ਿਆਰਪੁਰ 'ਚ ਵੀ ਭਾਜਪਾ ਦੇ ਹਾਲਾਤ ਅਜਿਹੇ ਹੀ ਨਜ਼ਰ ਆ ਰਹੇ ਹਨ। ਮੌਜੂਦਾ ਭਾਜਪਾ ਐੱਮ.ਪੀ. ਵਿਜੇ ਸਾਂਪਲਾ ਜੋ ਕੇਂਦਰੀ ਮੰਤਰੀ ਹਨ, ਨੂੰ ਲੈ ਕੇ ਵੀ ਪਾਰਟੀ ਪੂਰੀ ਭਰੋਸੇ 'ਚ ਨਹੀਂ ਹੈ ਕਿਉਂਕਿ ਪਾਰਟੀ ਆਗੂਆਂ ਦਾ ਕਹਿਣਾ ਹੈ ਕਿ ਉਨ੍ਹਾਂ ਦੀ ਲੋਕਪ੍ਰਿਯਤਾ 'ਚ ਪਿਛਲੇ 5 ਸਾਲ ਦੇ ਮੁਕਾਬਲੇ ਕਮੀ ਹੋਈ ਹੈ। ਉਨ੍ਹਾਂ ਦੀ ਥਾਂ ਦੀ 'ਤੇ ਸੋਮ ੁਪ੍ਰਕਾਸ਼ ਦਾ ਨਾਂ ਚੱਲ ਰਿਹਾ ਹੈ। ਅਜਿਹੇ ਹਾਲਾਤ ਨੂੰ ਦੇਖਦਿਆਂ ਮੌਜੂਦਾ ਲੋਕ ਸਭਾ ਚੋਣਾਂ ਭਾਜਪਾ ਲਈ ਘੱਟੋ-ਘੱਟ ਪੰਜਾਬ 'ਚ ਸ਼ੁੱਭ ਸੰਕੇਤ ਨਹੀਂ ਹਨ। ਭਾਜਪਾ ਉਮੀਦਵਾਰਾਂ ਦੇ ਨਾਵਾਂ ਦਾ ਐਲਾਨ ਅਜੇ ਤੱਰ ਨਾ ਹੋਣ ਕਾਰਨ ਉਲਝਣ ਭਪੀ ਸਥਿਤੀ ਬਣੀ ਹੋਈ ਹੈ। ਕਾਂਗਰਸੀ ਉਮੀਦਵਾਰਾਂ ਨੇ ਉਕਤ ਤਿੰਨ ਹਲਕਿਆਂ 'ਚ ਆਪਣਾ ਚੋਣ ਪ੍ਰਚਾਰ ਸ਼ੁਰੂ ਕਰ ਦਿੱਤਾ ਹੈ।