ਬਰਨਾਲਾ ਨਗਰ ਨਿਗਮ ਨੂੰ ਕੱਲ੍ਹ ਮਿਲੇਗਾ ਪਹਿਲਾ ਮੇਅਰ, ਬਗਾਵਤ ਦੇ ਡਰੋਂ ਖਾਲੀ ਰਹਿ ਸਕਦੇ ਨੇ ਡਿਪਟੀ ਮੇਅਰ ਦੇ ਅਹੁਦੇ

ਬਰਨਾਲਾ (ਵਿਵੇਕ ਸਿੰਧਵਾਨੀ, ਰਵੀ): ਬਰਨਾਲਾ ਨਗਰ ਨਿਗਮ ਦੇ ਇਤਿਹਾਸ ਵਿਚ ਕੱਲ੍ਹ ਇਕ ਨਵਾਂ ਅਧਿਆਇ ਲਿਖਿਆ ਜਾਵੇਗਾ ਜਦੋਂ ਇਸ ਨੂੰ ਆਪਣਾ ਪਹਿਲਾ ਮੇਅਰ ਮਿਲੇਗਾ। 11 ਜੂਨ ਨੂੰ ਨਵੇਂ ਚੁਣੇ ਗਏ ਨਗਰ ਕੌਂਸਲਰਾਂ ਦੀ ਮੀਟਿੰਗ ਨਗਰ ਨਿਗਮ ਵਿਚ ਸਥਿਤ ਲਾਇਬ੍ਰੇਰੀ ਹਾਲ ਵਿਖੇ ਬੁਲਾਈ ਗਈ ਹੈ। ਸੱਤਾਧਾਰੀ ਧਿਰ ਕੋਲ ਸਪੱਸ਼ਟ ਬਹੁਮਤ ਹੋਣ ਕਾਰਨ ਉਨ੍ਹਾਂ ਦੇ ਮੇਅਰ ਦਾ ਚੁਣਿਆ ਜਾਣਾ ਲਗਭਗ ਤੈਅ ਮੰਨਿਆ ਜਾ ਰਿਹਾ ਹੈ।

ਪਰ ਇਸ ਪੂਰੇ ਘਟਨਾਕ੍ਰਮ ਵਿਚ ਜੋ ਗੱਲ ਸਭ ਤੋਂ ਵੱਧ ਚਰਚਾ ਵਿਚ ਹੈ, ਉਹ ਇਹ ਹੈ ਕਿ ਸੱਤਾ ਪੱਖ ਨੇ ਕੇਵਲ ਮੇਅਰ ਦੀ ਚੋਣ ਕਰਨ ਦਾ ਫੈਸਲਾ ਕੀਤਾ ਹੈ ਜਦੋਂ ਕਿ ਸੀਨੀਅਰ ਡਿਪਟੀ ਮੇਅਰ ਅਤੇ ਡਿਪਟੀ ਮੇਅਰ ਦੇ ਅਹੁਦੇ ਫਿਲਹਾਲ ਖਾਲੀ ਰੱਖੇ ਜਾ ਸਕਦੇ ਹਨ। ਸੂਤਰਾਂ ਅਨੁਸਾਰ ਇਨ੍ਹਾਂ ਦੋਵਾਂ ਅਹੁਦਿਆਂ ਲਈ ਕਈ ਕੌਂਸਲਰ ਆਪਣਾ-ਆਪਣਾ ਦਾਅਵਾ ਜਤਾ ਰਹੇ ਹਨ ਅਤੇ ਤੁਰੰਤ ਚੋਣ ਕਰਵਾਉਣ ਨਾਲ ਸੱਤਾ ਪੱਖ ਦੇ ਅੰਦਰ ਬਗਾਵਤ ਭੜਕਣ ਦਾ ਖ਼ਤਰਾ ਸੀ। ਅਜਿਹੇ ਵਿੱਚ ਲੀਡਰਸ਼ਿਪ ਨੇ ਸਮਝਦਾਰੀ ਦਿਖਾਉਂਦੇ ਹੋਏ ਇਨ੍ਹਾਂ ਅਹੁਦਿਆਂ ਨੂੰ ਫਿਲਹਾਲ ਖਾਲੀ ਰੱਖਣ ਦਾ ਫੈਸਲਾ ਕੀਤਾ ਹੈ ਤਾਂ ਜੋ ਪਾਰਟੀ ਦੀ ਅੰਦਰੂਨੀ ਇੱਕਜੁਟਤਾ ਬਣੀ ਰਹੇ।

ਇਸ ਰਣਨੀਤੀ ਦੇ ਪਿੱਛੇ ਵਿਧਾਨ ਸਭਾ ਚੋਣਾਂ ਦੀ ਆਹਟ ਵੀ ਸਾਫ਼ ਸੁਣਾਈ ਦੇ ਰਹੀ ਹੈ। ਕੁਝ ਹੀ ਸਮੇਂ ਬਾਅਦ ਵਿਧਾਨ ਸਭਾ ਚੋਣਾਂ ਆਉਣ ਵਾਲੀਆਂ ਹਨ ਅਤੇ ਅਜਿਹੇ ਨਾਜ਼ੁਕ ਦੌਰ ਵਿਚ ਸੱਤਾ ਪੱਖ ਕਿਸੇ ਵੀ ਕੀਮਤ 'ਤੇ ਘਰ ਵਿਚ ਫੁੱਟ ਨਹੀਂ ਪੈਣ ਦੇਣਾ ਚਾਹੁੰਦਾ। ਇਸੇ ਲਈ ਹਰ ਫੈਸਲਾ ਬੇਹੱਦ ਸੋਚ-ਸਮਝ ਕੇ ਲਿਆ ਜਾ ਰਿਹਾ ਹੈ ਅਤੇ ਸੱਤਾ ਪੱਖ ਫੂਕ-ਫੂਕ ਕੇ ਕਦਮ ਰੱਖ ਰਿਹਾ ਹੈ।

ਬਰਨਾਲਾ ਨਗਰ ਨਿਗਮ ਦਾ ਗਠਨ ਆਪਣੇ ਆਪ ਵਿਚ ਇਕ ਇਤਿਹਾਸਕ ਘਟਨਾ ਹੈ। ਪਹਿਲਾਂ ਇਹ ਨਗਰ ਕੌਂਸਲ ਵਜੋਂ ਕੰਮ ਕਰਦੀ ਸੀ ਅਤੇ ਹੁਣ ਨਗਰ ਨਿਗਮ ਬਣਨ ਤੋਂ ਬਾਅਦ ਪਹਿਲੀ ਵਾਰ ਚੁਣਿਆ ਹੋਇਆ ਮੇਅਰ ਮਿਲਣ ਜਾ ਰਿਹਾ ਹੈ। ਸ਼ਹਿਰ ਵਾਸੀਆਂ ਨੂੰ ਉਮੀਦ ਹੈ ਕਿ ਨਵੇਂ ਮੇਅਰ ਦੀ ਅਗਵਾਈ ਵਿਚ ਸੜਕਾਂ, ਸੀਵਰੇਜ, ਪੀਣ ਵਾਲੇ ਪਾਣੀ ਅਤੇ ਸਫ਼ਾਈ ਵਿਵਸਥਾ ਵਰਗੀਆਂ ਬੁਨਿਆਦੀ ਸਹੂਲਤਾਂ ਵਿੱਚ ਸੁਧਾਰ ਹੋਵੇਗਾ ਅਤੇ ਬਰਨਾਲਾ ਵਿਕਾਸ ਦੀਆਂ ਨਵੀਆਂ ਉਚਾਈਆਂ ਨੂੰ ਛੂਹੇਗਾ।