6 ਮਹੀਨਿਅਾਂ ਬਾਅਦ ਵੀ ਡੀ. ਆਰ. ਆਈ. ਨੂੰ ਨਹੀਂ ਮਿਲੀ ਸੀ. ਸੀ. ਟੀ. ਵੀ. ਫੁਟੇਜ

ਅੰਮ੍ਰਿਤਸਰ,  (ਨੀਰਜ)-  ਸ੍ਰੀ ਗੁਰੂ ਰਾਮਦਾਸ ਇੰਟਰਨੈਸ਼ਨਲ ਏਅਰਪੋਰਟ ’ਤੇ ਡੀ. ਆਰ. ਆਈ.  (ਡਾਇਰੈਕਟੋਰੇਟ ਆਫ ਰੈਵੇਨਿਊ ਇੰਟੈਲੀਜੈਂਸ) ਦੀ ਟੀਮ ਵੱਲੋਂ ਦੁਬਈ ਤੋਂ ਅੰਮ੍ਰਿਤਸਰ ਆਈ ਫਲਾਈਟ ’ਚ ਸਵਾਰ ਪਤੀ-ਪਤਨੀ ਦੀ ਸੀਟ ਹੇਠੋਂ 15 ਕਿਲੋ ਸੋਨਾ ਜ਼ਬਤ ਕੀਤੇ ਜਾਣ ਦੇ ਮਾਮਲੇ ਵਿਚ ਕੁਝ ਹੈਰਾਨੀਜਨਕ ਪਹਿਲੂ ਸਾਹਮਣੇ ਆ ਰਹੇ ਹਨ। ਡੀ. ਆਰ. ਆਈ. ਅਤੇ ਕਸਟਮ ਵਿਭਾਗ ਦੀ ਟੀਮ ਨੇ ਜਿਸ ਦਲੇਰੀ ਨਾਲ ਦੁਬਈ ਤੋਂ ਅੰਮ੍ਰਿਤਸਰ ਆਈ ਫਲਾਈਟ ’ਚ ਸਵਾਰ ਤਰਨਜੀਤ ਸਿੰਘ ਉਰਫ ਰਾਜੂ ਨੂੰ ਰੰਗੇ ਹੱਥੀਂ ਸੋਨੇ ਦੀ ਇੰਨੀ ਵੱਡੀ ਖੇਪ ਨਾਲ ਗ੍ਰਿਫਤਾਰ ਕੀਤਾ ਸੀ, ਇਸ ਕੇਸ ਦੀ ਜਾਂਚ ਵਿਚ ਓਨੀ ਹੀ ਵੱਡੀ ਅਡ਼ਚਨ ਜਾਂਚ ਅਧਿਕਾਰੀਆਂ ਨੂੰ ਖਡ਼੍ਹੀ ਹੁੰਦੀ ਜਾ ਰਹੀ ਹੈ। 
ਸੂਤਰਾਂ ਤੋਂ ਮਿਲੀ ਜਾਣਕਾਰੀ ਅਨੁਸਾਰ ਸੋਨੇ ਦੀ ਖੇਪ ਦੀ ਜਾਂਚ ਕਰਨ ਵਾਲੀ ਟੀਮ ਨੂੰ 6 ਮਹੀਨਿਅਾਂ ਬਾਅਦ ਵੀ ਅੰਮ੍ਰਿਤਸਰ ਆਈ ਫਲਾਈਟ ’ਚੋਂ ਉਤਰਨ ਵਾਲੇ ਯਾਤਰੀਅਾਂ ਦੀ ਸੀ. ਸੀ. ਟੀ. ਵੀ. ਫੁਟੇਜ ਨਹੀਂ ਮਿਲੀ, ਜਦਕਿ ਡੀ. ਆਰ. ਆਈ. ਨੇ ਲਿਖਤੀ ਤੌਰ ’ਤੇ ਏਅਰਪੋਰਟ ਪ੍ਰਬੰਧਨ ਤੋਂ ਸੀ. ਸੀ. ਟੀ. ਵੀ. ਫੁਟੇਜ ਮੰਗੀ ਸੀ ਤਾਂ ਕਿ ਫਲਾਈਟ ਦੇ ਅੰਮ੍ਰਿਤਸਰ ਉਤਰਦੇ ਸਮੇਂ ਉਨ੍ਹਾਂ ਅਧਿਕਾਰੀਆਂ ਤੇ ਕਰਮਚਾਰੀਆਂ ਨੂੰ ਸੀ. ਸੀ. ਟੀ. ਵੀ. ਵਿਚ ਵੇਖਿਆ ਜਾ ਸਕੇ, ਜੋ ਫਲਾਈਟ ਦੇ ਆਲੇ-ਦੁਆਲੇ ਸਨ, ਜਿਨ੍ਹਾਂ ’ਤੇ ਗੋਲਡ ਸਮੱਗਲਰ ਤਰਨਜੀਤ ਸਿੰਘ ਰਾਜੂ ਨਾਲ ਮਿਲੀਭੁਗਤ ਕਰਨ ਦਾ ਸ਼ੱਕ ਹੋ ਸਕਦਾ ਹੈ ਪਰ ਡੀ. ਆਰ. ਆਈ. ਨੂੰ ਸੀ. ਸੀ. ਟੀ. ਵੀ. ਫੁਟੇਜ ਨਹੀਂ ਮਿਲੀ ਤੇ ਨਾ ਹੀ ਮਿਲਣ ਵਾਲੀ ਹੈ ਕਿਉਂਕਿ 30 ਦਿਨਾਂ ਬਾਅਦ ਸੀ. ਸੀ. ਟੀ. ਵੀ. ਫੁਟੇਜ ਡਿਲੀਟ ਹੋ ਜਾਂਦੀ ਹੈ। ਇਸ ਘਟਨਾਚੱਕਰ ਤੋਂ ਬਾਅਦ ਇਕ ਵਾਰ ਫਿਰ ਗੋਲਡ ਸਮੱਗਲਿੰਗ ਦਾ ਕਿੰਗਪਿਨ ਡੀ. ਆਰ. ਆਈ. ਤੇ ਕਸਟਮ ਵਿਭਾਗ ਦੇ ਸ਼ਿਕੰਜੇ ਤੋਂ ਬਾਹਰ ਜਾ ਚੁੱਕਾ ਹੈ ਕਿਉਂਕਿ ਅੱਜ ਤੱਕ ਅੰਮ੍ਰਿਤਸਰ ਏਅਰਪੋਰਟ ’ਤੇ ਜਿੰਨੀਆਂ ਵੀ ਸੋਨੇ ਦੀਆਂ ਖੇਪਾਂ ਫਡ਼ੀਆਂ ਗਈਆਂ ਸਨ, ਉਨ੍ਹਾਂ ਵਿਚ 15 ਕਿਲੋ ਸੋਨੇ ਦੀ ਖੇਪ ਸਭ ਤੋਂ ਵੱਡੀ ਸੀ। ਐਤਵਾਰ ਨੂੰ ਵੀ ਕਸਟਮ ਵਿਭਾਗ ਵੱਲੋਂ 38 ਲੱਖ ਦਾ ਸੋਨਾ ਫਡ਼ੇ ਜਾਣ ਤੋਂ ਬਾਅਦ ਇਹ ਸਵਾਲ ਪੈਦਾ ਹੋ ਰਿਹਾ ਹੈ ਕਿ ਕੀ ਹੁਣ ਕਿੰਗਪਿਨ ਸ਼ਿਕੰਜੇ ਵਿਚ ਆਵੇਗਾ ਜਾਂ ਨਹੀਂ।
ਜਹਾਜ਼ ਤੱਕ ਪਹੁੰਚ ਜਾਂਦਾ ਸੀ ਕਸਟਮ ਵਿਭਾਗ ਦਾ ਡਾਗ ਹੈਂਡਲਰ ਪਾਲ
 ਅੰਮ੍ਰਿਤਸਰ ਏਅਰਪੋਰਟ ’ਤੇ ਸੋਨੇ ਦੀ ਖੇਪ ਨਾਲ ਫਡ਼ੇ ਗਏ ਕਸਟਮ ਵਿਭਾਗ ਦੇ ਮੁਅੱਤਲ ਹੋ ਚੁੱਕੇ ਕਰਮਚਾਰੀ ਡਾਗ ਹੈਂਡਲਰ ਪਾਲ ਦੀ ਗੱਲ ਕਰੀਏ ਤਾਂ ਉਂਝ ਤਾਂ ਉਸ ਦਾ ਕੰਮ ਸਨਿਫਰ ਡਾਗ ਨਾਲ ਸਾਮਾਨ ਦੀ ਚੈਕਿੰਗ ਆਦਿ ਕਰਨਾ ਸੀ ਪਰ ਕੁਝ ਵਿਭਾਗੀ ਅਧਿਕਾਰੀਆਂ ਦਾ ਸਿਰ ’ਤੇ ਹੱਥ ਹੋਣ ਕਾਰਨ ਇਕ ਡਾਗ ਹੈਂਡਲਰ ਪਾਲ ਦੀ ਇੰਨੀ ਪਹੁੰਚ ਸੀ ਕਿ ਉਹ ਜਹਾਜ਼ ਤੱਕ ਵੀ ਪਹੁੰਚ ਜਾਂਦਾ ਸੀ।  ਉਸ ਨੂੰ ਫਡ਼ੇ ਜਾਣ ਤੋਂ ਬਾਅਦ ਇਸ ਮਾਮਲੇ ਵਿਚ ਵਿਭਾਗ ਦੇ ਹੀ ਕੁਝ ਅਧਿਕਾਰੀਆਂ ਦਾ ਨਾਂ ਵੀ ਭੁਡ਼ਕਿਆ ਸੀ ਪਰ ਵਿਭਾਗੀ ਮਿਲੀਭੁਗਤ ਕਾਰਨ ਇਸ ਮਾਮਲੇ ਵਿਚ ਹੋਰ ਅਧਿਕਾਰੀਆਂ ਦੇ ਨਾਂ ਦਬਾਅ ਦਿੱਤੇ ਗਏ ਅਤੇ ਇਕੱਲੇ ਪਾਲ ’ਤੇ ਹੀ ਸਾਰੀ ਗਾਜ ਡਿੱਗ ਗਈ ਅਤੇ ਉਸ ਨੂੰ ਨੌਕਰੀ ਤੋਂ ਹੀ ਡਿਸਮਿਸ ਕਰ ਦਿੱਤਾ ਗਿਆ। ਪਾਲ ਦੇ ਫਡ਼ੇ ਜਾਣ ਦੇ ਸਮੇਂ ਵਿਭਾਗ ਦੇ ਇਕ ਇੰਸਪੈਕਟਰ ਦਾ ਨਾਂ ਕਾਫ਼ੀ ਚਰਚਾ ਵਿਚ ਰਿਹਾ ਸੀ, ਜਿਸ ਨੂੰ ਬਾਅਦ ਵਿਚ ਖੁੱਡੇਲਾਈਨ ਲਾ ਦਿੱਤਾ ਗਿਆ ਤੇ ਤਬਾਦਲਾ ਕਰ ਦਿੱਤਾ ਗਿਆ। ਇਸ ਤਰ੍ਹਾਂ ਵਿਭਾਗ ਦੇ ਪਹਿਲਵਾਨ ਤੋਂ ਤਾਂ ਆਪਣੇ-ਆਪ ਵਿਭਾਗ ਦੇ ਹੀ ਡੀ. ਸੀ. ਨੇ ਰੇਡ ਕਰ ਕੇ ਸੋਨਾ ਫਡ਼ ਲਿਆ ਸੀ, ਜਦੋਂ ਉਹ ਸੋਨੇ ਦੀ ਖੇਪ ਨੂੰ ਆਪਣੀ ਕਾਰ ਵਿਚ ਰੱਖ ਕੇ ਸਵਾਰ ਹੋਣ ਲੱਗਾ ਸੀ। ਇਸ ਮਾਮਲੇ ਵਿਚ ਕੁਝ ਸੁਨਿਆਰਿਆਂ ਨੂੰ ਵੀ ਵਿਭਾਗ ਨੇ ਤਲਬ ਕੀਤਾ ਸੀ।
ਏਅਰਪੋਰਟ ਦੇ ਟਾਇਲਟ ’ਚ ਪਿਆ ਕਰੋਡ਼ਾਂ ਦਾ ਲਾਵਾਰਸ ਸੋਨਾ ਕਿਸ ਦਾ?
ਹਵਾਈ ਜਹਾਜ਼ ਰਾਹੀਂ ਦੁਬਈ ਅਤੇ ਹੋਰ ਦੇਸ਼ਾਂ ਤੋਂ ਅੰਮ੍ਰਿਤਸਰ ਆਉਣ ਵਾਲੇ ਯਾਤਰੀਅਾਂ ਤੋਂ ਤਾਂ ਸੋਨਾ ਫਡ਼ਿਆ ਹੀ ਜਾ ਰਿਹਾ ਹੈ, ਉਥੇ ਹੀ ਐੱਸ. ਜੀ. ਆਰ. ਡੀ. ਏਅਰਪੋਰਟ ਦੇ ਟਾਇਲਟ ’ਚੋਂ ਜ਼ਬਤ ਕੀਤੇ ਗਏ ਕਰੋਡ਼ਾਂ ਰੁਪਏ ਦੇ ਲਾਵਾਰਸ ਸੋਨੇ ਦੇ ਮਾਲਕ ਦਾ ਅੱਜ ਤੱਕ ਪਤਾ ਨਹੀਂ ਲੱਗ ਸਕਿਆ। ਹਾਲਾਂਕਿ ਇਸ ਮਾਮਲੇ ਵਿਚ ਵੀ ਏਅਰਪੋਰਟ ’ਤੇ ਹੀ ਤਾਇਨਾਤ ਕਿਸੇ ਨਾ ਕਿਸੇ ਕਰਮਚਾਰੀ ਦੀ ਮਿਲੀਭੁਗਤ ਹੋਣ ਦੀ ਚਰਚਾ ਰਹੀ ਹੈ। ਕਿਸੇ ਅਰਬ ਦੇਸ਼ ਤੋਂ ਆਇਆ ਸੋਨਾ ਸਾਰੀਅਾਂ ਸੁਰੱਖਿਆ ਏਜੰਸੀਆਂ ਦੀਆਂ ਅੱਖਾਂ ਵਿਚ ਮਿੱਟੀ ਪਾ ਕੇ ਟਾਇਲਟ ਤੱਕ ਕਿਵੇਂ ਪਹੁੰਚ ਗਿਆ ਅਤੇ ਟਾਇਲਟ ਦੇ ਵਾਟਰ ਟੈਂਕ ਵਿਚ ਉਸ ਨੂੰ ਕਿਸ ਨੇ ਛੁਪਾਇਆ ਤੇ ਕਿਵੇਂ ਉਸ ਨੂੰ ਕੱਢਿਆ ਜਾਣਾ ਸੀ, ਇਹ ਸਭ ਸਵਾਲ ਅੱਜ ਤੱਕ ਪਹੇਲੀ ਬਣੇ ਹੋਏ ਹਨ ਪਰ ਇਸ ਮਾਮਲੇ ਵਿਚ ਵੀ ਇਹ ਸਾਬਤ ਹੋ ਰਿਹਾ ਕਿ ਕੋਈ ਨਾ ਕੋਈ ਕਰਮਚਾਰੀ ਇਸ ਗੋਰਖਧੰਦੇ ਵਿਚ ਸ਼ਾਮਲ ਹੈ।
 1 ਕਿਲੋ ਪਿੱਛੇ 2 ਲੱਖ ਦੀ ਬੱਚਤ ਤੇ ਜ਼ਬਤ ਹੋਣ ’ਤੇ ਕਰੋਡ਼ਾਂ ਦਾ ਨੁਕਸਾਨ
 ਸੋਨੇ ਦੀ ਸਮੱਗਲਿੰਗ ਰੋਕਣ ਵਿਚ ਮਾਹਿਰ ਕੁਝ ਅਧਿਕਾਰੀਆਂ ਤੋਂ ਪਤਾ ਲੱਗਾ ਹੈ ਕਿ ਸੋਨੇ ਦੀ ਸਮੱਗਲਿੰਗ ਕਰਨ ਵਾਲਿਆਂ ਨੂੰ ਇਕ ਕਿਲੋ ਸੋਨੇ ਦੇ ਪਿੱਛੇ ਡੇਢ ਤੋਂ ਦੋ ਲੱਖ ਰੁਪਏ ਤੱਕ ਦੀ ਬੱਚਤ ਹੁੰਦੀ ਹੈ ਪਰ ਫਡ਼ੇ ਜਾਣ ਦੇ ਇਵਜ਼ ’ਚ ਕਰੋਡ਼ਾਂ ਦਾ ਨੁਕਸਾਨ ਵੀ ਤੈਅ ਹੈ ਪਰ ਗੋਲਡ ਮਾਫੀਆ ਇੰਨਾ ਸ਼ਾਤਿਰ ਹੈ ਕਿ ਵਾਰ-ਵਾਰ ਫਡ਼ੇ ਜਾਣ ’ਤੇ ਵੀ ਗੋਲਡ ਸਮੱਗਲਿੰਗ ਬੰਦ ਨਹੀਂ ਕਰਦਾ। ਇਸ ਵਿਚ ਦੁਬਈ ਅਤੇ ਹੋਰ ਦੇਸ਼ਾਂ ਵਿਚ ਸੋਨਾ ਲਿਆਉਣ ਵਾਲੇ ਕੁਰੀਅਰਾਂ ਨੂੰ ਵੀ 50 ਹਜ਼ਾਰ ਦੇਣਾ ਹੁੰਦਾ ਹੈ। ਮੁੱਖ ਰੂਪ ’ਚ ਦਿੱਲੀ ਅਤੇ ਮੁੰਬਈ ਵਰਗੇ ਵੱਡੇ ਮੈਟਰੋਪੋਲੀਟਿਨ ਸਿਟੀਜ਼ ਵਿਚ ਵੱਡੇ ਪੱਧਰ ’ਤੇ ਗੋਲਡ ਦੀ ਸਮੱਗਲਿੰਗ ਕੀਤੀ ਜਾਂਦੀ ਹੈ ਪਰ ਸਖਤੀ ਹੋਣ ਦੇ ਬਾਅਦ ਅੰਮ੍ਰਿਤਸਰ ਵਰਗੇ ਛੋਟੇ ਏਅਰਪੋਰਟਰਾਂ ਵੱਲ ਵੀ ਗੋਲਡ ਸਮੱਗਲਰ ਆਪਣਾ ਰੁਖ਼ ਕਰ ਲੈਂਦੇ ਹਨ।
ਗੋਲਡ ਸਮੱਗਲਰ ਕਰ ਸਕਦੇ ਹਨ 9/11
 ਜਿਸ ਤਰ੍ਹਾਂ ਗੋਲਡ ਸਮੱਗਲਰ ਇਕ ਇੰਟਰਨੈਸ਼ਨਲ ਫਲਾਈਟ ਵਿਚ ਸਵਾਰ ਯਾਤਰੀ ਦੀ ਸੀਟ ਹੇਠਾਂ 15 ਕਿਲੋ ਸੋਨਾ ਰੱਖ ਸਕਦੇ ਹਨ, ਉਸ ਤੋਂ ਦੇਸ਼ ਦੀ ਸੁਰੱਖਿਆ ’ਤੇ ਵੀ ਸਵਾਲ ਖਡ਼੍ਹੇ ਹੋ ਚੁੱਕੇ ਹਨ, ਜੇਕਰ ਸੀਟ ਦੇ ਹੇਠਾਂ 15 ਕਿਲੋ ਸੋਨਾ ਰੱਖਿਆ ਜਾ ਸਕਦਾ ਹੈ ਤਾਂ ਹਥਿਆਰ ਜਾਂ ਆਰ. ਡੀ. ਐਕਸ. ਵੀ ਛੁਪਾਇਆ ਜਾ ਸਕਦਾ ਹੈ, ਜਿਸ ਨਾਲ ਕਦੇ ਅਮਰੀਕਾ ਵਾਂਗ ਭਾਰਤ ਵਿਚ ਵੀ 9/11 ਕੀਤਾ ਜਾ ਸਕਦਾ ਹੈ। ਇਸ ਕੇਸ ਨੂੰ ਦੁਬਈ ਦੀਅਾਂ ਸੁਰੱਖਿਆ ਏਜੰਸੀਆਂ ਨਾਲ ਵੀ ਜੋਡ਼ਿਆ ਜਾ ਸਕਦਾ ਹੈ। ਆਏ ਦਿਨ ਐੱਸ. ਜੀ. ਆਰ. ਡੀ. ਏਅਰਪੋਰਟ ’ਤੇ ਸੋਨੇ ਦੀ ਖੇਪ ਫਡ਼ੇ ਜਾਣ ਤੋਂ ਬਾਅਦ ਕਸਟਮ ਵਿਭਾਗ ਦੀਅਾਂ ਕੁਝ ਕਾਲੀਆਂ ਭੇਡਾਂ ਵੀ ਚਰਚਾ ਵਿਚ ਹਨ।  ਇਕ ਵਾਰ ਫਿਰ ਕਸਟਮ ਵਿਭਾਗ ਦਾ ਡਾਗ ਹੈਂਡਲਰ ਪਾਲ ਤੇ ਪਹਿਲਵਾਨ ਦਾ ਨਾਂ ਚਰਚਾ ਵਿਚ ਹੈ, ਜਿਨ੍ਹਾਂ ਨੂੰ ਡੀ. ਆਰ. ਆਈ. ਅਤੇ ਆਪਣੇ-ਆਪ ਕਸਟਮ ਵਿਭਾਗ ਦੀ ਟੀਮ ਨੇ ਹੀ ਸੋਨੇ ਦੀ ਖੇਪ ਨਾਲ ਰੰਗੇ ਹੱਥੀਂ ਗ੍ਰਿਫਤਾਰ ਕੀਤਾ ਸੀ।  ਦੁਬਈ ਏਅਰਪੋਰਟ ’ਤੇ ਜਹਾਜ਼ ਦੀ ਸਾਫ਼-ਸਫਾਈ ਕਰਨ ਵਾਲਾ ਸਟਾਫ ਤਾਂ ਜਾਂਚ ਦੇ ਦਾਇਰੇ ਵਿਚ ਹੈ ਹੀ, ਉਥੇ ਹੀ ਇਸ ਮਾਮਲੇ ਵਿਚ ਐੱਸ. ਜੀ. ਆਰ. ਡੀ. ਏਅਰਪੋਰਟ ’ਤੇ ਜਹਾਜ਼ ਦੀ ਸਫਾਈ ਤੇ ਕੂਡ਼ਾ ਚੁੱਕਣ ਵਾਲਾ ਸਟਾਫ ਵੀ ਜਾਂਚ ਦੇ ਘੇਰੇ ਵਿਚ ਆ ਗਿਆ ਹੈ ਕਿਉਂਕਿ ਗ੍ਰਿਫਤਾਰ ਕੀਤੇ ਗਏ ਪਤੀ-ਪਤਨੀ ਆਪਣੇ-ਆਪ ਸੀਟ ਹੇਠੋਂ ਸੋਨਾ ਨਹੀਂ ਕੱਢ ਸਕਦੇ, ਇਸ ਨੂੰ ਯਾਤਰੀਅਾਂ ਦੇ ਉਤਰ ਜਾਣ ਤੋਂ ਬਾਅਦ ਹੀ ਕੱਢਿਆ ਜਾ ਸਕਦਾ ਹੈ ਅਤੇ ਇਹ ਕੰਮ ਏਅਰਪੋਰਟ ’ਤੇ ਤਾਇਨਾਤ ਕੋਈ ਨਾ ਕੋਈ ਕਰਮਚਾਰੀ ਹੀ ਕਰ ਸਕਦਾ ਹੈ ਪਰ ਜਿਸ ਤਰ੍ਹਾਂ 6 ਮਹੀਨੇ ਬਾਅਦ ਵੀ ਇਸ ਕੇਸ ਵਿਚ ਸਾਕਾਰਾਤਮਕ ਨਤੀਜਾ ਨਜ਼ਰ ਨਹੀਂ ਆ ਰਿਹਾ, ਉਹ ਸਾਬਤ ਕਰਦਾ ਹੈ ਕਿ ਗੋਲਡ ਸਮੱਗਲਰਾਂ ਦੇ ਹੱਥ ਕਿਥੋਂ ਤੱਕ ਮਜ਼ਬੂਤ ਹਨ।