ਪਿੰਡ ਸੁਤਰਾਣਾ ਨੇੜੇ ਵਾਪਰੇ ਸੜਕ ਹਾਦਸੇ ’ਚ ਇਕ ਦੀ ਮੌਤ
09/27/2022 4:25:48 PM
ਸਮਾਣਾ (ਦਰਦ, ਅਸ਼ੋਕ) : ਪਿੰਡ ਸੁਤਰਾਣਾ ਨੇੜੇ ਦੋ ਮੋਟਰਸਾਇਕਲਾਂ ਦੀ ਟਕੱਰ ਵਿਚ ਇਕ ਮੋਟਰਸਾਇਕਲ ਚਾਲਕ ਦੀ ਮੌਤ ਹੋ ਗਈ। ਜਿਸ ਦੀ ਲਾਸ਼ ਨੂੰ ਪੋਸਟਮਾਰਟਮ ਲਈ ਸਿਵਲ ਹਸਪਤਾਲ ਲਿਆਂਦਾ ਗਿਆ। ਮਾਮਲੇ ਦੇ ਜਾਂਚ ਅਧਿਕਾਰੀ ਸੁਤਰਾਣਾ ਪੁਲਸ ਦੇ ਏ.ਐੱਸ.ਆਈ. ਜਸਵਿੰਦਰ ਸਿੰਘ ਨੇ ਦੱਸਿਆ ਕਿ ਮ੍ਰਿਤਕ ਜੀਤ ਸਿੰਘ (27) ਪੁੱਤਰ ਹਰਦਿਆਲ ਸਿੰਘ ਵਾਸੀ ਪਿੰਡ ਟਟਿਆਣਾ ਦੇ ਭਰਾ ਗੁਰਮੀਤ ਸਿੰਘ ਅਨੁਸਾਰ ਪਾਤੜਾਂ ਤੋਂ ਕੰਮਕਾਜ ਨਿਪਟਾਉਣ ਉਪਰੰਤ ਆਪਣੇ ਮੋਟਰਸਾਇਕਲ ਰਾਹੀਂ ਵਾਪਸ ਪਿੰਡ ਆ ਰਿਹਾ ਸੀ ਕਿ ਸੁਤਰਾਣਾ ਨੇੜੇ ਅਣਪਛਾਤੇ ਮੋਟਰਸਾਇਕਲ ਨੇ ਉਸ ਨੂੰ ਟੱਕਰ ਮਾਰ ਦਿਤੀ ।
ਇਸ ਨਾਲ ਉਹ ਮੋਟਰਸਾਇਕਲ ਤੋਂ ਸੜਕ ’ਤੇ ਡਿੱਗ ਪਿਆ। ਹਾਦਸੇ ਵਿਚ ਉਸ ਦੀ ਮੌਕੇ ’ਤੇ ਹੀ ਮੌਤ ਹੋ ਗਈ। ਪੁਲਸ ਨੇ ਅਣਪਛਾਤੇ ਮੋਟਰਸਾਇਕਲ ਸਵਾਰ ਖ਼ਿਲਾਫ ਮਾਮਲਾ ਦਰਜ ਕਰਕੇ ਭਾਲ ਸ਼ੁਰੂ ਕਰ ਦਿੱਤੀ ਹੈ। ਪੋਸਟਮਾਰਟਮ ਉਪਰੰਤ ਲਾਸ਼ ਨੂੰ ਵਾਰਸਾਂ ਹਵਾਲੇ ਕਰ ਦਿੱਤਾ। ਮ੍ਰਿਤਕ ਆਪਣੇ ਪਿੱਛੇ ਪਤਨੀ ਅਤੇ ਇਕ ਛੋਟੀ ਬੱਚੀ ਛੱਡ ਗਿਆ ਹੈ।
