ਡਾਕਟਰਾਂ ਦੀ ਹੜਤਾਲ ''ਚ ''ਔਜਲਾ ਮੁਰਦਾਬਾਦ'' ਦੇ ਗੂੰਜੇ ਨਾਅਰੇ

ਅੰਮ੍ਰਿਤਸਰ,   (ਦਲਜੀਤ)-  ਗੁਰੂ ਨਾਨਕ ਦੇਵ ਹਸਪਤਾਲ ਦੇ ਡਾਕਟਰਾਂ ਨੇ ਸੰਸਦ ਮੈਂਬਰ ਗੁਰਜੀਤ ਸਿੰਘ ਔਜਲਾ ਖਿਲਾਫ ਮੋਰਚਾ ਖੋਲ੍ਹ ਦਿੱਤਾ ਹੈ। ਡਾਕਟਰਾਂ ਨੇ ਅੱਜ ਕਾਲੇ ਬਿੱਲੇ ਲਾ ਕੇ ਹਸਪਤਾਲ 'ਚੋਂ ਰੋਸ ਮਾਰਚ ਕੱਢਦਿਆਂ 'ਔਜਲਾ ਮੁਰਦਾਬਾਦ' ਦੇ ਨਾਅਰੇ ਲਾਏ। ਡਾਕਟਰਾਂ ਨੇ ਜਿਥੇ ਔਜਲਾ ਦੀ ਐਂਟਰੀ ਆਪਣੇ ਪੱਧਰ 'ਤੇ ਬੈਨ ਕਰ ਦਿੱਤੀ, ਉਥੇ ਹੀ ਹਮੇਸ਼ਾ ਲਈ ਬਾਈਕਾਟ ਕਰਨ ਦਾ ਐਲਾਨ ਵੀ ਕੀਤਾ।
ਡਾਕਟਰਾਂ ਦੇ ਭਾਰੀ ਇਕੱਠ ਨੂੰ ਸੰਬੋਧਨ ਕਰਦਿਆਂ ਪੰਜਾਬ ਸਟੇਟ ਮੈਡੀਕਲ ਅਤੇ ਡੈਂਟਲ ਟੀਚਰ ਐਸੋਸੀਏਸ਼ਨ ਦੇ ਸਕੱਤਰ ਡਾ. ਕਰਮਜੀਤ ਸਿੰਘ ਨੇ ਕਿਹਾ ਕਿ ਸੰਸਦ ਮੈਂਬਰ ਔਜਲਾ ਹਸਪਤਾਲ ਵਿਚ ਛਾਪੇਮਾਰੀ ਦੇ ਨਾਂ 'ਤੇ ਡਾਕਟਰਾਂ ਨੂੰ ਤੰਗ-ਪ੍ਰੇਸ਼ਾਨ ਕਰ ਕੇ ਜ਼ਲੀਲ ਕਰ ਰਹੇ ਹਨ। ਵਿਜੀਲੈਂਸ ਵਿਭਾਗ ਦੀ ਟੀਮ ਨੂੰ ਹਸਪਤਾਲ ਵਿਚ ਲਿਆ ਕੇ ਇਸ ਤਰ੍ਹਾਂ ਦਬਕੇ ਮਾਰੇ ਜਾ ਰਹੇ ਹਨ ਜਿਵੇਂ ਡਾਕਟਰ ਚੋਰ ਹੋਣ। ਡਾਕਟਰ ਚੋਰ ਨਹੀਂ, ਈਮਾਨਦਾਰ ਸਰਕਾਰੀ ਮੁਲਾਜ਼ਮ ਹਨ। ਹਸਪਤਾਲ ਵਿਚ ਸਹੂਲਤਾਂ ਦੀ ਵੱਡੇ ਪੱਧਰ 'ਤੇ ਘਾਟ ਹੋਣ ਦੇ ਬਾਵਜੂਦ ਡਾਕਟਰ ਮਰੀਜ਼ਾਂ ਨੂੰ ਬਿਹਤਰ ਸੇਵਾਵਾਂ ਦੇਣ ਲਈ ਕੰਮ ਕਰ ਰਹੇ ਹਨ। ਔਜਲਾ ਵੱਲੋਂ 4 ਵਾਰ ਹਸਪਤਾਲ ਦਾ ਨਿਰੀਖਣ ਕੀਤਾ ਗਿਆ ਹੈ ਪਰ ਅੱਜ ਤੱਕ ਸੁਧਾਰ ਲਈ ਕੋਈ ਠੋਸ ਉਪਰਾਲਾ ਨਹੀਂ ਕੀਤਾ ਗਿਆ ਬਲਕਿ ਡਾਕਟਰਾਂ ਨੂੰ ਨੀਵਾਂ ਦਿਖਾਉਣ ਦੀ ਕੋਸ਼ਿਸ਼ ਕੀਤੀ ਗਈ ਹੈ। ਮੁੱਖ ਮੰਤਰੀ ਕੈਪਟਨ ਅਮਰਿੰਦਰ ਸਿੰਘ ਤੇ ਮੈਡੀਕਲ ਸਿੱਖਿਆ ਅਤੇ ਖੋਜ ਵਿਭਾਗ ਦੇ ਮੰਤਰੀ ਬ੍ਰਹਮ ਮਹਿੰਦਰਾ ਸਰਕਾਰੀ ਮੈਡੀਕਲ ਕਾਲਜ ਅਧੀਨ ਚੱਲਣ ਵਾਲੇ ਉਕਤ ਹਸਪਤਾਲ ਦਾ ਨਾਂ ਹੋਰ ਰੌਸ਼ਨ ਕਰਨ ਲਈ ਯਤਨਸ਼ੀਲ ਹਨ ਪਰ ਔਜਲਾ ਛਾਪੇਮਾਰੀ ਦੇ ਨਾਂ 'ਤੇ ਸੰਸਥਾ ਦਾ ਨਾਂ ਬਦਨਾਮ ਕਰ ਰਹੇ ਹਨ।
ਹੋਰਨਾਂ ਡਾਕਟਰਾਂ ਨੇ ਸੰਬੋਧਨ ਕਰਦਿਆਂ ਕਿਹਾ ਕਿ ਹਸਪਤਾਲ ਵਿਚ ਦਵਾਈਆਂ ਦੀ ਵੱਡੇ ਪੱਧਰ 'ਤੇ ਘਾਟ ਹੈ ਤੇ ਮਰੀਜ਼ਾਂ ਦੀ ਐਮਰਜੈਂਸੀ ਨੂੰ ਮੱਦੇਨਜ਼ਰ ਰੱਖਦਿਆਂ ਡਾਕਟਰਾਂ ਨੂੰ ਮਜਬੂਰ ਹੋ ਕੇ ਜੈਨਰਿਕ ਦਵਾਈਆਂ ਲਿਖੀਆਂ ਜਾਂਦੀਆਂ ਹਨ। ਸਰਕਾਰ ਖੁਦ ਤਾਂ ਦਵਾਈਆਂ ਦੀ ਘਾਟ ਪੂਰੀ ਕਰਦੀ ਨਹੀਂ, ਉਲਟਾ ਡਾਕਟਰਾਂ ਨੂੰ ਉਹੀ ਦਵਾਈਆਂ ਲਿਖਣ ਲਈ ਕਹਿ ਰਹੀ ਹੈ ਜੋ ਸਰਕਾਰੀ ਸਟੋਰ ਵਿਚ ਪਿਛਲੇ ਲੰਬੇ ਸਮੇਂ ਤੋਂ ਖਤਮ ਹੋਈਆਂ ਪਈਆਂ ਹਨ। ਉਨ੍ਹਾਂ ਕਿਹਾ ਕਿ ਸਰਕਾਰੀ ਮੈਡੀਕਲ ਕਾਲਜ ਦੇ ਪ੍ਰਿੰਸੀਪਲ ਡਾ. ਤੇਜਬੀਰ ਸਿੰਘ ਦੇ ਜ਼ਰੀਏ ਮੰਤਰੀ ਬ੍ਰਹਮ ਮਹਿੰਦਰਾ ਨੂੰ ਮੰਗ ਪੱਤਰ ਵੀ ਭੇਜਿਆ ਗਿਆ ਹੈ ਅਤੇ ਸਪੱਸ਼ਟ ਕੀਤਾ ਗਿਆ ਹੈ ਕਿ ਔਜਲਾ ਦੀ ਐਂਟਰੀ ਹਸਪਤਾਲ ਵਿਚ ਬੈਨ ਕੀਤੀ ਜਾਵੇ। ਉਨ੍ਹਾਂ ਕਿਹਾ ਕਿ ਜੇਕਰ ਉਨ੍ਹਾਂ ਦੀਆਂ ਮੰਗਾਂ ਵੱਲ ਗੌਰ ਨਾ ਕੀਤਾ ਗਿਆ ਤਾਂ ਉਹ ਪੰਜਾਬ 'ਚ ਸਿਹਤ ਸੇਵਾਵਾਂ ਅਣਮਿੱਥੇ ਸਮੇਂ ਲਈ ਠੱਪ ਕਰ ਦੇਣਗੇ।
ਚਹੇਤਿਆਂ ਨੂੰ ਲਾਭ ਦਿਵਾਉਣ ਲਈ ਔਜਲਾ ਕਰ ਰਹੇ ਹਨ ਛਾਪੇਮਾਰੀ 
ਡਾਕਟਰਾਂ ਨੇ ਕਿਹਾ ਕਿ ਸੰਸਦ ਮੈਂਬਰ ਗੁਰਜੀਤ ਸਿੰਘ ਔਜਲਾ ਸੋਚੀ-ਸਮਝੀ ਸਾਜ਼ਿਸ਼ ਤਹਿਤ ਹਸਪਤਾਲ 'ਚ ਛਾਪੇਮਾਰੀ ਕਰ ਰਹੇ ਹਨ। ਔਜਲਾ ਅਸਲੀਅਤ ਵਿਚ ਆਪਣੇ ਕੁਝ ਚਹੇਤਿਆਂ ਨੂੰ ਹਸਪਤਾਲ ਦੇ ਸਰਕਾਰੀ ਕੰਮਾਂ ਵਿਚ ਲਾਭ ਦਿਵਾਉਣਾ ਚਾਹੁੰਦੇ ਹਨ, ਇਸੇ ਲਈ ਡਾਕਟਰਾਂ 'ਤੇ ਦਬਾਅ ਬਣਾਉਣ ਲਈ ਛਾਪੇਮਾਰੀ ਕਰ ਰਹੇ ਹਨ। ਉਨ੍ਹਾਂ ਦੇ ਕੁਝ ਚਹੇਤੇ ਗਲਤ ਸੰਦੇਸ਼ ਦੇ ਕੇ ਡਾਕਟਰਾਂ ਦੀ ਕਾਰਗੁਜ਼ਾਰੀ ਪ੍ਰਤੀ ਉਨ੍ਹਾਂ ਨੂੰ ਗੁੰਮਰਾਹ ਕਰ ਰਹੇ ਹਨ। ਔਜਲਾ ਕਦੇ ਵੀ ਉਨ੍ਹਾਂ ਨਾਲ ਹਸਪਤਾਲ ਦੀਆਂ ਸਮੱਸਿਆਵਾਂ ਸਬੰਧੀ ਟੇਬਲ-ਟਾਕ ਕਰ ਸਕਦੇ ਹਨ।
ਡਾਕਟਰ ਕਰਨਗੇ ਬਾਈਕਾਟ
ਡਾਕਟਰਾਂ ਨੇ ਕਿਹਾ ਕਿ ਸੰਸਦ ਮੈਂਬਰ ਔਜਲਾ ਨੂੰ ਹਸਪਤਾਲ ਦੀ ਸਿੱਧੇ ਤੌਰ 'ਤੇ ਚੈਕਿੰਗ ਕਰ ਕੇ ਡਾਕਟਰਾਂ ਨੂੰ ਤੰਗ ਕਰਨ ਦਾ ਕੋਈ ਹੱਕ ਨਹੀਂ ਹੈ, ਜੇਕਰ ਕਿਸੇ ਡਾਕਟਰ ਖਿਲਾਫ ਉਨ੍ਹਾਂ ਕੋਲ ਸ਼ਿਕਾਇਤ ਹੈ ਤਾਂ ਉਹ ਵਿਭਾਗ ਦੇ ਮੰਤਰੀ ਨੂੰ ਕਰ ਸਕਦੇ ਹਨ, ਨਾ ਕਿ ਖੁਦ ਹੀ ਮੰਤਰੀ ਬਣ ਕੇ ਡਾਕਟਰਾਂ ਨੂੰ ਨੀਵਾਂ ਦਿਖਾਉਣ। ਡਾਕਟਰਾਂ ਨੇ ਕਿਹਾ ਕਿ ਜੇਕਰ ਔਜਲਾ ਨੇ ਹੁਣ ਵੀ ਛਾਪੇਮਾਰੀ ਕੀਤੀ ਤਾਂ ਹਸਪਤਾਲ ਦਾ ਕੋਈ ਵੀ ਡਾਕਟਰ ਉਨ੍ਹਾਂ ਨਾਲ ਨਹੀਂ ਜਾਵੇਗਾ ਤੇ ਉਹ ਔਜਲਾ ਦੀ ਛਾਪੇਮਾਰੀ ਦਾ ਬਾਈਕਾਟ ਕਰਨਗੇ।
ਮੁੱਖ ਮੰਤਰੀ ਸਮੇਤ ਕਾਂਗਰਸ ਹਾਈਕਮਾਨ ਨੂੰ ਭੇਜੀ ਸ਼ਿਕਾਇਤ
ਰੋਸ ਮੁਜ਼ਾਹਰੇ ਨੂੰ ਸੰਬੋਧਨ ਕਰਦਿਆਂ ਡਾਕਟਰਾਂ ਨੇ ਕਿਹਾ ਕਿ ਉਨ੍ਹਾਂ ਔਜਲਾ ਵੱਲੋਂ ਹਸਪਤਾਲ ਦੇ ਕੰਮਾਂ ਵਿਚ ਬੇਲੋੜੀ ਦਖਲਅੰਦਾਜ਼ੀ ਦੇ ਸਬੰਧ ਵਿਚ ਮੁੱਖ ਮੰਤਰੀ ਅਤੇ ਕਾਂਗਰਸ ਹਾਈਕਮਾਨ ਨੂੰ ਸ਼ਿਕਾਇਤ ਭੇਜੀ ਹੈ ਅਤੇ ਸਪੱਸ਼ਟ ਕੀਤਾ ਹੈ ਕਿ ਸਰਕਾਰੀ ਕੰਮਾਂ ਵਿਚ ਦਖਲਅੰਦਾਜ਼ੀ 'ਤੇ ਰੋਕ ਲਾਈ ਜਾਵੇ ਤੇ ਬਿਨਾਂ ਵਜ੍ਹਾ ਡਾਕਟਰਾਂ ਨੂੰ ਪ੍ਰੇਸ਼ਾਨ ਨਾ ਕੀਤਾ ਜਾਵੇ।
ਡਾਕਟਰਾਂ ਦਾ ਮਾਣ-ਸਨਮਾਨ ਰਹੇਗਾ ਕਾਇਮ : ਬ੍ਰਹਮ ਮਹਿੰਦਰਾ
ਮੈਡੀਕਲ ਸਿੱਖਿਆ ਅਤੇ ਖੋਜ ਵਿਭਾਗ ਦੇ ਮੰਤਰੀ ਬ੍ਰਹਮ ਮਹਿੰਦਰਾ ਦਾ ਸੰਦੇਸ਼ ਲੈ ਕੇ ਡਾਕਟਰਾਂ ਦੇ ਰੋਸ ਮੁਜ਼ਾਹਰੇ 'ਚ ਪੁੱਜੇ ਸਰਕਾਰੀ ਮੈਡੀਕਲ ਕਾਲਜ ਦੇ ਪ੍ਰਿੰਸੀਪਲ ਡਾ. ਤੇਜਬੀਰ ਸਿੰਘ ਨੇ ਕਿਹਾ ਕਿ ਮੰਤਰੀ ਸਾਹਿਬ ਨੇ ਕਿਹਾ ਹੈ ਕਿ ਡਾਕਟਰਾਂ ਨੂੰ ਕੰਮ ਛੱਡਣ ਦੀ ਕੋਈ ਜ਼ਰੂਰਤ ਨਹੀਂ, ਉਹ ਉਨ੍ਹਾਂ ਦੀਆਂ ਮੰਗਾਂ ਦੀ ਸਮੀਖਿਆ ਕਰ ਰਹੇ ਹਨ। ਡਾਕਟਰਾਂ ਦਾ ਮਾਣ-ਸਨਮਾਨ ਕਾਇਮ ਰੱਖਿਆ ਜਾਵੇਗਾ। ਹਸਪਤਾਲ ਵਿਚ ਦਖਲਅੰਦਾਜ਼ੀ ਠੀਕ ਨਹੀਂ ਹੈ। ਡਾ. ਤੇਜਬੀਰ ਸਿੰਘ ਨੇ ਕਿਹਾ ਕਿ ਮੰਤਰੀ ਸਾਹਿਬ ਖੁਦ ਸਾਰੇ ਮਾਮਲੇ ਦੀ ਜਾਂਚ-ਪੜਤਾਲ ਕਰ ਰਹੇ ਹਨ।
ਇਹ ਡਾਕਟਰ ਸਨ ਮੌਜੂਦ
ਇਸ ਮੌਕੇ ਐੱਚ. ਐੱਸ. ਸੋਹਲ, ਸ਼ਿਵਚਰਨ, ਬਲਜੀਤ ਸਿੰਘ, ਡਾ. ਨੇਕੀ, ਮਨਜੀਤ ਸਿੰਘ ਖਾਲਸਾ, ਜੇ. ਐੱਸ. ਖੁੱਲਰ, ਜਸਪ੍ਰੀਤ ਸਿੰਘ, ਗਰੋਵਰ, ਏ. ਪੀ. ਕਟਾਰੀਆ, ਅਸ਼ੋਕ ਚਾਨਣਾ, ਰਮੇਸ਼ ਚੰਦਰ, ਸੁਜਾਤਾ ਸ਼ਰਮਾ, ਜਸਵੰਤ, ਰਮਨ ਸ਼ਰਮਾ, ਅੰਮ੍ਰਿਤ ਕੌਰ, ਹਰਪ੍ਰੀਤ, ਮਨਦੀਪ, ਰਵੀ, ਨਵੀਨ ਪਾਂਧੀ, ਐੱਨ. ਸੀ. ਕਾਜਲ ਆਦਿ ਡਾਕਟਰ ਮੌਜੂਦ ਸਨ।