ਸਮੀਰ ਸਵਿਸ ਓਪਨ ਸੈਮੀਫਾਈਨਲ ਵਿੱਚ, ਕਸ਼ਯਪ ਵੀ ਵਿਏਨਾ ਵਿੱਚ ਚਮਕੇ

ਬਾਸੇਲ, (ਬਿਊਰੋ)— ਭਾਰਤੀ ਸ਼ਟਲਰ ਸਮੀਰ ਵਰਮਾ ਦੁਨੀਆ ਦੇ ਸਾਬਕਾ ਨੰਬਰ ਦੋ ਖਿਡਾਰੀ ਜਾਪਾਨ ਦੇ ਕੇਂਟੋ ਮੋਮੋਟਾ ਨੂੰ ਹਰਾਕੇ 150,000 ਡਾਲਰ ਇਨਾਮੀ ਰਾਸ਼ੀ ਦੇ ਸਵਿਸ ਓਪਨ ਦੇ ਸੈਮੀਫਾਈਨਲ ਵਿੱਚ ਪਹੁੰਚ ਗਏ । ਸਈਅਦ ਮੋਦੀ ਗਰਾਂ ਪ੍ਰੀ ਦੇ ਸੋਨੇ ਦੇ ਤਮਗਾਧਾਰੀ ਸਮੀਰ ਨੇ ਪੁਰਸ਼ ਸਿੰਗਲ ਕੁਆਰਟਰਫਾਈਨਲ 'ਚ ਮੋਮੋਟਾ ਨੂੰ 21-17, 21-16 ਨਾਲ ਹਰਾਇਆ । ਜਾਪਾਨ ਦੇ 23 ਸਾਲ ਦੇ ਇਸ ਖਿਡਾਰੀ ਨੂੰ ਨਿੱਪੋ ਬੈਡਮਿੰਟਨ ਸੰਘ ਨੇ 2016 ਵਿੱਚ ਕੈਸਿਨੋ ਵਿੱਚ ਜਾਣ ਲਈ ਬੈਨ ਕਰ ਦਿੱਤਾ ਸੀ । 

ਸਾਲ 2016 ਦੇ ਹਾਂਗਕਾਂਗ ਸੁਪਰ ਸੀਰੀਜ਼ ਦੇ ਫਾਈਨਲਸ ਵਿੱਚ ਪੁੱਜੇ ਸਮੀਰ ਦਾ ਸਾਹਮਣਾ ਹੁਣ ਸੁਪਰ 300 ਬੈਡਮਿੰਟਨ ਟੂਰਨਾਮੈਂਟ ਦੇ ਸੈਮੀਫਾਈਨਲ ਵਿੱਚ ਥਾਈਲੈਂਡ ਦੇ ਕਾਂਟਾਫੋਨ ਵਾਂਗਚਾਰੋਏਨ ਨਾਲ ਹੋਵੇਗਾ । ਜਦਕਿ ਐੱਮ ਆਰ ਅਰਜੁਨ ਅਤੇ ਸ਼ਲੋਕ ਰਾਮਚੰਦਰਨ ਦੀ ਪੁਰਸ਼ ਡਬਲਜ਼ ਜੋੜੀ ਨੂੰ ਥਾਈਲੈਂਡ ਦੇ ਮੈਨੀਪੋਂਗ ਜੋਂਗਜੀਤ ਅਤੇ ਨਾਨਥਾਕਰਨ ਯੋਰਡਫਾਈਸੋਂਗ ਤੋਂ 13-21, 18-21 ਨਾਲ ਹਾਰ ਦਾ ਮੂੰਹ ਵੇਖਣਾ ਪਿਆ । 

ਵਿਏਨਾ ਵਿੱਚ ਰਾਸ਼ਟਰਮੰਡਲ ਖੇਡਾਂ ਦੇ ਚੈਂਪੀਅਨ ਪੀ. ਕਸ਼ਯਪ ਨੇ ਆਪਣੀ ਸ਼ਾਨਦਾਰ ਲੈਅ ਜਾਰੀ ਰੱਖਦੇ ਹੋਏ ਸੱਤਵਾਂ ਦਰਜਾ ਪ੍ਰਾਪਤ ਡੈਨਮਾਰਕ ਦੇ ਵਿਕਟਰ ਸਵੇਂਡਸਨ ਨੂੰ 21-17, 21-19 ਨਾਲ ਹਰਾ ਕੇ ਆਸਟਰੀਆ ਓਪਨ ਅੰਤਰਰਾਸ਼ਟਰੀ ਚੈਲੰਜ ਦੇ ਫਾਈਨਲ ਵਿੱਚ ਪਰਵੇਸ਼ ਕੀਤਾ, ਜਿੱਥੇ ਉਨ੍ਹਾਂ ਦਾ ਸਾਹਮਣਾ ਪੰਜਵਾਂ ਦਰਜਾ ਪ੍ਰਾਪਤ ਰਾਲ ਮਸਟ ਨਾਲ ਹੋਵੇਗਾ ।