ਕੇਰਲਮ ’ਚ UDF ਦੀ ਜਿੱਤ : ਹਾਸ਼ੀਏ ’ਤੇ ਪਾਏ ਗਏ ਅਧਿਕਾਰੀਆਂ ਦੀ ਵਾਪਸੀ ਦੀ ਚਰਚਾ

ਨੈਸ਼ਨਲ ਡੈਸਕ- ਕੇਰਲਮ ਵਿਚ ਯੂ. ਡੀ. ਐੱਫ. ਵੱਲੋਂ ਐੱਲ. ਡੀ. ਐੱਫ. ਨੂੰ ਸੱਤਾ ਤੋਂ ਲਾਂਭੇ ਕਰਨ ਤੋਂ ਬਾਅਦ, ਪ੍ਰਸ਼ਾਸਨ ਵਿਚ ਇਕ ਵੱਡਾ ਫੇਰਬਦਲ ਹੋਣ ਵਾਲਾ ਹੈ। ਨੌਕਰਸ਼ਾਹੀ ਦੇ ਗਲਿਆਰਿਆਂ ਵਿਚ ਚਰਚਾ ਦਾ ਕੇਂਦਰ ਦੋ ਹਾਈ-ਪ੍ਰੋਫਾਈਲ ਆਈ. ਏ. ਐੱਸ. ਅਧਿਕਾਰੀ ਹਨ—ਬੀ. ਅਸ਼ੋਕ (1998) ਅਤੇ ਪ੍ਰਸ਼ਾਂਤ ਨਾਇਰ (2007) ਜਿਨ੍ਹਾਂ ਬਾਰੇ ਵਿਆਪਕ ਤੌਰ ’ਤੇ ਇਹ ਉਮੀਦ ਕੀਤੀ ਜਾ ਰਹੀ ਹੈ ਕਿ ਉਹ ਹਾਸ਼ੀਏ ਤੋਂ ਹਟ ਕੇ ਨਵੀਂ ਸਰਕਾਰ ਵਿਚ ਅਹਿਮ ਭੂਮਿਕਾਵਾਂ ਵਿਚ ਵਾਪਸੀ ਕਰਨਗੇ। ਪਿਨਾਰਾਈ ਵਿਜਯਨ ਦੀ ਅਗਵਾਈ ਵਾਲੀ ਸਰਕਾਰ ਦੌਰਾਨ, ਇਹ ਦੋਵੇਂ ਅਧਿਕਾਰੀ ਨੌਕਰਸ਼ਾਹੀ ਦੇ ਟਕਰਾਅ ਦਾ ਪ੍ਰਤੀਕ ਬਣ ਗਏ ਸਨ। ਆਪਣੀ ਬੇਬਾਕੀ ਅਤੇ ‘ਡਿਜੀਟਲ ਮੌਜੂਦਗੀ’ ਲਈ ਮਸ਼ਹੂਰ ਇਨ੍ਹਾਂ ਅਧਿਕਾਰੀਆਂ ਨੂੰ ਸਰਕਾਰੀ ਨੀਤੀਆਂ ਦੀ ਆਲੋਚਨਾ ਕਰਨ ਕਾਰਨ ਕਈ ਅਨੁਸ਼ਾਸਨੀ ਕਾਰਵਾਈਆਂ ਦਾ ਸਾਹਮਣਾ ਕਰਨਾ ਪਿਆ ਸੀ।

ਕੇਰਲ ਖੇਤੀਬਾੜੀ ਯੂਨੀਵਰਸਿਟੀ ਦੇ ਸਾਬਕਾ ਉਪ-ਕੁਲਪਤੀ ਬੀ. ਅਸ਼ੋਕ, ਇਸ ਸਮੇਂ ਮੁਅੱਤਲ ਹਨ। ਉਨ੍ਹਾਂ ਦੇ ਕਰੀਅਰ ਦੀ ਪਛਾਣ ਪਿਛਲੀ ਸਰਕਾਰ ਨਾਲ ਨੀਤੀਗਤ ਪੱਧਰ ’ਤੇ ਹੋਣ ਵਾਲੇ ਲਗਾਤਾਰ ਟਕਰਾਅ ਰਹੀ ਹੈ। ਪ੍ਰਸ਼ਾਂਤ ਨਾਇਰ, ਜੋ ਆਪਣੀ ਵੱਖਰੀ ਅਤੇ ਸੋਸ਼ਲ ਮੀਡੀਆ ਅਾਧਾਰਿਤ ਸ਼ਾਸਨ ਸ਼ੈਲੀ ਕਾਰਨ ‘ਕਲੈਕਟਰ ਬਰੋ’ ਦੇ ਨਾਂ ਨਾਲ ਮਸ਼ਹੂਰ ਹਨ, ਨੂੰ 2024 ਦੇ ਅਖੀਰ ਵਿਚ ਮੁਅੱਤਲ ਕਰ ਦਿੱਤਾ ਗਿਆ ਸੀ; ਬਾਅਦ ਵਿਚ, ਸੋਸ਼ਲ ਮੀਡੀਆ ’ਤੇ ਕੀਤੀ ਗਈ ਤਿੱਖੀ ਆਲੋਚਨਾ ਕਾਰਨ ਉਨ੍ਹਾਂ ਨੂੰ ਨਵੀਂ ਅਨੁਸ਼ਾਸਨੀ ਕਾਰਵਾਈ ਦਾ ਵੀ ਸਾਹਮਣਾ ਕਰਨਾ ਪਿਆ।

ਰਾਜਨੀਤਕ ਮਾਹਿਰਾਂ ਦਾ ਮੰਨਣਾ ਹੈ ਕਿ ਯੂ. ਡੀ. ਐੱਫ. ਲੀਡਰਸ਼ਿਪ ਇਸ ਜੋੜੀ ਦੇ ਵਿਰੋਧ ਦੇ ਇਤਿਹਾਸ ਨੂੰ ਇਕ ਬੋਝ ਦੀ ਬਜਾਏ ਪੇਸ਼ੇਵਰ ਇਮਾਨਦਾਰੀ ਦੇ ਪ੍ਰਤੀਕ ਵਜੋਂ ਵੇਖਦੀ ਹੈ। ਐੱਲ. ਡੀ. ਐੱਫ. ਤੰਤਰ ਵੱਲੋਂ ਨਿਸ਼ਾਨਾ ਬਣਾਏ ਜਾਣ ਕਾਰਨ, ਅਸ਼ੋਕ ਅਤੇ ਨਾਇਰ ਨੂੰ ਕਥਿਤ ਤੌਰ ’ਤੇ ਕਾਂਗਰਸ ਦੀ ਅਗਵਾਈ ਵਾਲੇ ਗੱਠਜੋੜ ਵਿਚ ‘ਹਮਦਰਦੀ ਦਾ ਲਾਭ’ ਮਿਲ ਰਿਹਾ ਹੈ। ਉਮੀਦ ਹੈ ਕਿ ਉਨ੍ਹਾਂ ਦੀ ਸੂਝ-ਬੂਝ ਦੀ ਵਰਤੋਂ ਐੱਲ. ਡੀ. ਐੱਫ. ਦੇ ਮਜ਼ਬੂਤ ਪ੍ਰਸ਼ਾਸਨਿਕ ਢਾਂਚੇ ਨੂੰ ਤੋੜਨ ਅਤੇ ਰਾਜ ਦੇ ਅਹਿਮ ਅਹੁਦਿਆਂ ਲਈ ਅਧਿਕਾਰੀਆਂ ਦੀ ਪਰਖ ਕਰਨ ਵਿਚ ਕੀਤੀ ਜਾਵੇਗੀ।

ਕਾਂਗਰਸ ਦੀ ਅਗਵਾਈ ਵਾਲਾ ਯੂ. ਡੀ. ਐੱਫ. ਇਨ੍ਹਾਂ ਸੁਤੰਤਰ ਵਿਚਾਰਾਂ ਵਾਲੀਆਂ ਆਵਾਜ਼ਾਂ ਨੂੰ ਆਪਣੇ ਨਾਲ ਜੋੜਨ ਲਈ ਤਿਆਰ ਨਜ਼ਰ ਆਉਂਦਾ ਹੈ; ਜੇਕਰ ਭਾਜਪਾ ਦੀ ਅਗਵਾਈ ਵਾਲਾ ਐੱਨ. ਡੀ. ਏ. ਬਦਲ ਵਜੋਂ ਉੱਭਰਿਆ ਹੁੰਦਾ, ਤਾਂ ਸ਼ਾਇਦ ਇਸ ਤਰ੍ਹਾਂ ਦੀ ਜਨਤਕ ‘ਸੱਤਾ ਦੀ ਖਿੱਚੋਤਾਣ’ ਅਤੇ ਨੌਕਰਸ਼ਾਹੀ ਬਹਿਸ ਕਿਤੇ ਜ਼ਿਆਦਾ ਸੰਜਮ ਵਾਲੀ ਹੁੰਦੀ। ਜਿਵੇਂ-ਜਿਵੇਂ ਯੂ. ਡੀ. ਐੱਫ. ਸਰਕਾਰ ਬਣਾਉਣ ਦੀ ਦਿਸ਼ਾ ਵਿਚ ਅੱਗੇ ਵਧ ਰਿਹਾ ਹੈ, ਇਨ੍ਹਾਂ ਦੋਵਾਂ ਅਧਿਕਾਰੀਆਂ ਦੇ ਮੁੜ-ਵਸੇਬੇ ’ਤੇ ਬਾਰੀਕੀ ਨਾਲ ਨਜ਼ਰ ਰੱਖੀ ਜਾਵੇਗੀ। ਇਸ ਨੂੰ ਨਵੇਂ ਪ੍ਰਸ਼ਾਸਨ ਦੇ ਪੇਸ਼ੇਵਰ ਖੁਦਮੁਖਤਿਆਰੀ ਪ੍ਰਤੀ ਦ੍ਰਿਸ਼ਟੀਕੋਣ ਦਾ ਇਕ ਅਹਿਮ ਸੰਕੇਤ ਮੰਨਿਆ ਜਾਵੇਗਾ।