''ਸਟੈਚੂ ਆਫ਼ ਯੂਨਿਟੀ'' ਨੇੜੇ ਦੋ ਆਦਿਵਾਸੀਆਂ ਦੀ ਕੁੱਟ-ਕੁੱਟ ਕੇ ਹੱਤਿਆ, ਛੇ ਗ੍ਰਿਫ਼ਤਾਰ

ਕੇਵੜੀਆ — ਗੁਜਰਾਤ ਦੇ ਨਰਮਦਾ ਜ਼ਿਲ੍ਹੇ ਦੇ ਕੇਵੜੀਆ 'ਚ 'ਸਟੈਚੂ ਆਫ ਯੂਨਿਟੀ' ਦੇ ਨੇੜੇ ਨਿਰਮਾਣ ਅਧੀਨ 'ਕਬਾਇਲੀ ਮਿਊਜ਼ੀਅਮ' ਵਾਲੀ ਥਾਂ 'ਤੇ ਚੋਰੀ ਦੇ ਸ਼ੱਕ 'ਚ ਦੋ ਆਦਿਵਾਸੀਆਂ ਨੂੰ ਛੇ ਮਜ਼ਦੂਰਾਂ ਦੇ ਸਮੂਹ ਨੇ ਕਥਿਤ ਤੌਰ 'ਤੇ ਕੁੱਟ-ਕੁੱਟ ਕੇ ਮਾਰ ਦਿੱਤਾ। ਇਕ ਪੁਲਸ ਅਧਿਕਾਰੀ ਨੇ ਵੀਰਵਾਰ ਨੂੰ ਇਹ ਜਾਣਕਾਰੀ ਦਿੱਤੀ।

ਨਰਮਦਾ ਦੇ ਐਸਪੀ ਪ੍ਰਸ਼ਾਂਤ ਸੁੰਬੇ ਨੇ ਦੱਸਿਆ ਕਿ ਇਹ ਘਟਨਾ 6 ਅਗਸਤ ਦੀ ਰਾਤ ਨੂੰ ਵਾਪਰੀ ਅਤੇ ਮ੍ਰਿਤਕਾਂ ਦੀ ਪਛਾਣ ਜਯੇਸ਼ ਤਡਵੀ ਅਤੇ ਸੰਜੇ ਤਡਵੀ ਵਜੋਂ ਹੋਈ ਹੈ। ਐਸਪੀ ਨੇ ਕਿਹਾ, “ਛੇ ਨਿਰਮਾਣ ਮਜ਼ਦੂਰਾਂ ਦੇ ਇੱਕ ਸਮੂਹ ਨੇ ਕੇਵੜੀਆ ਦੇ ਰਹਿਣ ਵਾਲੇ ਜਯੇਸ਼ ਅਤੇ ਨੇੜਲੇ ਪਿੰਡ ਗਭਾਨ ਦੇ ਵਸਨੀਕ ਸੰਜੇ ਨੂੰ ਬੰਨ੍ਹ ਲਿਆ ਅਤੇ ਫਿਰ ਉਨ੍ਹਾਂ ਦੀ ਕੁੱਟਮਾਰ ਕੀਤੀ। ਜਯੇਸ਼ ਦੀ ਮੌਕੇ 'ਤੇ ਹੀ ਮੌਤ ਹੋ ਗਈ, ਜਦਕਿ ਸੰਜੇ ਦੀ ਅੱਜ ਸਵੇਰੇ ਰਾਜਪੀਪਲਾ ਦੇ ਸਰਕਾਰੀ ਹਸਪਤਾਲ 'ਚ ਮੌਤ ਹੋ ਗਈ।

ਉਨ੍ਹਾਂ ਕਿਹਾ, "ਸੰਜੇ ਤਡਵੀ ਦੇ ਮਰਨ ਤੋਂ ਪਹਿਲਾਂ ਦਿੱਤੇ ਬਿਆਨ ਦੇ ਅਨੁਸਾਰ, ਉਹ ਅਤੇ ਜਯੇਸ਼ ਖੇਤ ਮਜ਼ਦੂਰ ਸਨ ਅਤੇ ਕੁਝ ਧਾਤ ਦੇ ਟੁਕੜੇ ਚੋਰੀ ਕਰਨ ਅਤੇ ਵੇਚਣ ਲਈ ਰਾਤ ਨੂੰ ਨਿਰਮਾਣ ਵਾਲੀ ਥਾਂ 'ਤੇ ਦਾਖਲ ਹੋਏ ਸਨ। ਉਨ੍ਹਾਂ ਨੂੰ ਫੜ ਲਿਆ ਗਿਆ ਅਤੇ ਫਿਰ ਕੁੱਟਿਆ ਗਿਆ। ਅਸੀਂ ਇਸ ਮਾਮਲੇ 'ਚ ਕਥਿਤ ਤੌਰ 'ਤੇ ਸ਼ਾਮਲ ਛੇ ਲੋਕਾਂ ਨੂੰ ਗ੍ਰਿਫਤਾਰ ਕੀਤਾ ਹੈ। ਉਸ 'ਤੇ ਕਤਲ ਦਾ ਦੋਸ਼ ਹੈ।'' ਭਰੂਚ ਸੀਟ ਤੋਂ ਭਾਜਪਾ ਦੇ ਸੰਸਦ ਮੈਂਬਰ ਮਨਸੁਖ ਵਸਾਵਾ ਨੇ ਕਿਹਾ ਕਿ ਕੰਪਨੀ ਪਹਿਲਾਂ ਹੀ ਮ੍ਰਿਤਕਾਂ ਦੇ ਪਰਿਵਾਰਾਂ ਨੂੰ 20-20 ਲੱਖ ਰੁਪਏ ਦਾ ਭੁਗਤਾਨ ਕਰ ਚੁੱਕੀ ਹੈ।