ਦੀਵਾਲੀ ਮੌਕੇ ਇਸ ਕੰਪਨੀ ਦੇ ਮਾਲਕ ਨੇ ਆਪਣੇ ਕਰਮਚਾਰੀਆਂ ਦੀ ਖੁਸ਼ੀ ਨੂੰ ਕੀਤਾ ਦੁਗਣਾ, ਵੰਡੀਆਂ ਬ੍ਰਾਂਡ ਨਿਊ ਕਾਰਾਂ

ਨੈਸ਼ਨਲ ਡੈਸਕ - ਪੰਚਕੂਲਾ ਵਿੱਚ ਦੀਵਾਲੀ ਦੇ ਮੌਕੇ 'ਤੇ ਮਿੱਟਸ ਹੈਲਥਕੇਅਰ ਦੇ ਸੰਸਥਾਪਕ ਅਤੇ ਸਮਾਜਿਕ ਕਾਰਜਕਰਤਾ ਐਮ.ਕੇ. ਭਾਟੀਆ ਨੇ ਉੱਤਮ ਪ੍ਰਦਰਸ਼ਨ ਕਰਨ ਵਾਲੇ ਆਪਣੇ 51 ਕਰਮਚਾਰੀਆਂ ਨੂੰ 51 ਬ੍ਰਾਂਡ ਨਿਊ ਕਾਰਾਂ ਮੁਫ਼ਤ ਵੰਡੀਆਂ। ਇਸ ਸਮਾਰੋਹ ਦੌਰਾਨ ਭਾਟੀਆ ਨੇ ਕਰਮਚਾਰੀਆਂ ਨੂੰ ‘ਰੌਕਸਟਾਰ ਸੈਲੀਬ੍ਰਿਟੀ’ ਦਾ ਖਿਤਾਬ ਦਿੱਤਾ ਅਤੇ ਉਨ੍ਹਾਂ ਦੇ ਯਤਨਾਂ ਦੀ ਖੁੱਲ੍ਹ ਕੇ ਸ਼ਲਾਘਾ ਕੀਤੀ।

ਇਹ ਲਗਾਤਾਰ ਤੀਜਾ ਸਾਲ ਹੈ ਜਦੋਂ ਐਮ.ਕੇ. ਭਾਟੀਆ ਨੇ ਸਰਵੋਤਮ ਕਾਰਜਕਰਮੀਆਂ ਨੂੰ ਕਾਰਾਂ ਤੋਹਫੇ ਵਜੋਂ ਦਿੱਤੀਆਂ। ਭਾਟੀਆ ਨੇ ਕਿਹਾ, “ਮੇਰੇ ਕਰਮਚਾਰੀ ਮੇਰੇ ਫਿਲਮੀ ਜੀਵਨ ਦੇ ਸਿਤਾਰੇ ਹਨ। ਉਹ ਸਾਡੀ ਯਾਤਰਾ ਦੇ ਐਡਵੈਂਚਰ ਨੂੰ ਬਲੌਕਬਸਟਰ ਬਣਾਉਂਦੇ ਹਨ। ਉਹ ਸਿਰਫ਼ ਕਰਮਚਾਰੀ ਨਹੀਂ, ਮੇਰੇ ਰੌਕਸਟਾਰ ਸਿਤਾਰੇ ਹਨ।”

ਸੋਸ਼ਲ ਮੀਡੀਆ 'ਤੇ ਇਸ ਉਪਕਾਰ ਦੀ ਪੋਸਟ ਵਾਇਰਲ ਹੋ ਗਈ ਹੈ। ਲੋਕਾਂ ਨੇ ਐਮ.ਕੇ. ਭਾਟੀਆ ਦੀ ਇਸ ਉਦਾਰਤਾ ਦੀ ਖੁਲ੍ਹ ਕੇ ਪ੍ਰਸ਼ੰਸ਼ਾ ਕੀਤੀ ਹੈ। ਇੱਕ ਯੂਜ਼ਰ ਨੇ ਲਿਖਿਆ, “ਮੇਰੀ ਕੰਪਨੀ ਨੇ ਦੀਵਾਲੀ ਲਈ ਸਿਰਫ਼ ਡ੍ਰਾਈਫ੍ਰੂਟਸ ਅਤੇ ਕੁਝ ਦੀਵੇ ਦਿੱਤੇ।” ਦੂਜੇ ਨੇ ਕਿਹਾ, "ਤੁਹਾਡੇ ਕੀਮਤੀ ਟੀਮ ਮੈਂਬਰਾਂ ਲਈ ਖੁਸ਼ੀ ਦੇ ਪਲ ਅਤੇ ਉਹ ਧੰਨ ਹਨ।" ਇੱਕ ਤੀਜੇ ਯੂਜ਼ਰ ਨੇ ਟਿੱਪਣੀ ਕੀਤੀ, "ਐਮ.ਕੇ. ਭਾਟੀਆ ਜੀ, ਅਸੀਂ ਇਸ ਯੁੱਗ ਵਿੱਚ ਤੁਹਾਡੇ ਵਰਗਾ ਵਿਅਕਤੀ ਨਹੀਂ ਦੇਖਿਆ, ਤੁਸੀਂ ਬਹੁਤ ਵਧੀਆ ਕੰਮ ਕੀਤਾ ਹੈ, ਅਸੀਂ ਪ੍ਰਮਾਤਮਾ ਅੱਗੇ ਪ੍ਰਾਰਥਨਾ ਕਰਦੇ ਹਾਂ ਕਿ ਉਹ ਤੁਹਾਨੂੰ ਬਹੁਤ ਸਾਰੀਆਂ ਖੁਸ਼ੀਆਂ ਦੇਵੇ।"

ਭਾਟੀਆ ਨੇ ਕਿਹਾ ਕਿ ਕਰਮਚਾਰੀਆਂ ਦੀ ਮਿਹਨਤ, ਸੱਚਾਈ ਅਤੇ ਸਮਰਪਣ ਕੰਪਨੀ ਦੀ ਸਫ਼ਲਤਾ ਦੀ ਨੀਂਹ ਹਨ। ਉਨ੍ਹਾਂ ਦੇ ਯਤਨਾਂ ਦੀ ਪਛਾਣ ਕਰਨਾ ਅਤੇ ਉਨ੍ਹਾਂ ਨੂੰ ਪ੍ਰੇਰਿਤ ਕਰਨਾ ਮੇਰਾ ਇੱਕਮਾਤਰ ਉਦੇਸ਼ ਹੈ।